Chapter 6

saṃjaya uvāca |
etacchrutvā vaco rājño madrarājaḥ pratāpavān |
duryodhanaṃ tadā rājanvākyametaduvāca ha || 1 ||
[Analyze grammar]

duryodhana mahābāho śṛṇu vākyavidāṃ vara |
yāvetau manyase kṛṣṇau rathasthau rathināṃ varau |
na me tulyāvubhāvetau bāhuvīrye kathaṃcana || 2 ||
[Analyze grammar]

udyatāṃ pṛthivīṃ sarvāṃ sasurāsuramānavām |
yodhayeyaṃ raṇamukhe saṃkruddhaḥ kimu pāṇḍavān |
vijeṣye ca raṇe pārthānsomakāṃśca samāgatān || 3 ||
[Analyze grammar]

ahaṃ senāpraṇetā te bhaviṣyāmi na saṃśayaḥ |
taṃ ca vyūhaṃ vidhāsyāmi na tariṣyanti yaṃ pare |
iti satyaṃ bravīmyeṣa duryodhana na saṃśayaḥ || 4 ||
[Analyze grammar]

evamuktastato rājā madrādhipatimañjasā |
abhyaṣiñcata senāyā madhye bharatasattama |
vidhinā śāstradṛṣṭena hṛṣṭarūpo viśāṃ pate || 5 ||
[Analyze grammar]

abhiṣikte tatastasminsiṃhanādo mahānabhūt |
tava sainyeṣvavādyanta vāditrāṇi ca bhārata || 6 ||
[Analyze grammar]

hṛṣṭāścāsaṃstadā yodhā madrakāśca mahārathāḥ |
tuṣṭuvuścaiva rājānaṃ śalyamāhavaśobhinam || 7 ||
[Analyze grammar]

jaya rājaṃściraṃ jīva jahi śatrūnsamāgatān |
tava bāhubalaṃ prāpya dhārtarāṣṭrā mahābalāḥ |
nikhilāṃ pṛthivīṃ sarvāṃ praśāsantu hatadviṣaḥ || 8 ||
[Analyze grammar]

tvaṃ hi śakto raṇe jetuṃ sasurāsuramānavān |
martyadharmāṇa iha tu kimu somakasṛñjayān || 9 ||
[Analyze grammar]

evaṃ saṃstūyamānastu madrāṇāmadhipo balī |
harṣaṃ prāpa tadā vīro durāpamakṛtātmabhiḥ || 10 ||
[Analyze grammar]

śalya uvāca |
adyaivāhaṃ raṇe sarvānpāñcālānsaha pāṇḍavaiḥ |
nihaniṣyāmi rājendra svargaṃ yāsyāmi vā hataḥ || 11 ||
[Analyze grammar]

adya paśyantu māṃ lokā vicarantamabhītavat |
adya pāṇḍusutāḥ sarve vāsudevaḥ sasātyakiḥ || 12 ||
[Analyze grammar]

pāñcālāścedayaścaiva draupadeyāśca sarvaśaḥ |
dhṛṣṭadyumnaḥ śikhaṇḍī ca sarve cāpi prabhadrakāḥ || 13 ||
[Analyze grammar]

vikramaṃ mama paśyantu dhanuṣaśca mahadbalam |
lāghavaṃ cāstravīryaṃ ca bhujayośca balaṃ yudhi || 14 ||
[Analyze grammar]

adya paśyantu me pārthāḥ siddhāśca saha cāraṇaiḥ |
yādṛśaṃ me balaṃ bāhvoḥ saṃpadastreṣu yā ca me || 15 ||
[Analyze grammar]

adya me vikramaṃ dṛṣṭvā pāṇḍavānāṃ mahārathāḥ |
pratīkāraparā bhūtvā ceṣṭantāṃ vividhāḥ kriyāḥ || 16 ||
[Analyze grammar]

adya sainyāni pāṇḍūnāṃ drāvayiṣye samantataḥ |
droṇabhīṣmāvati vibho sūtaputraṃ ca saṃyuge |
vicariṣye raṇe yudhyanpriyārthaṃ tava kaurava || 17 ||
[Analyze grammar]

saṃjaya uvāca |
abhiṣikte tadā śalye tava sainyeṣu mānada |
na karṇavyasanaṃ kiṃcinmenire tatra bhārata || 18 ||
[Analyze grammar]

hṛṣṭāḥ sumanasaścaiva babhūvustatra sainikāḥ |
menire nihatānpārthānmadrarājavaśaṃ gatān || 19 ||
[Analyze grammar]

praharṣaṃ prāpya senā tu tāvakī bharatarṣabha |
tāṃ rātriṃ sukhinī suptā svasthacitteva sābhavat || 20 ||
[Analyze grammar]

sainyasya tava taṃ śabdaṃ śrutvā rājā yudhiṣṭhiraḥ |
vārṣṇeyamabravīdvākyaṃ sarvakṣatrasya śṛṇvataḥ || 21 ||
[Analyze grammar]

madrarājaḥ kṛtaḥ śalyo dhārtarāṣṭreṇa mādhava |
senāpatirmaheṣvāsaḥ sarvasainyeṣu pūjitaḥ || 22 ||
[Analyze grammar]

etajjñātvā yathābhūtaṃ kuru mādhava yatkṣamam |
bhavānnetā ca goptā ca vidhatsva yadanantaram || 23 ||
[Analyze grammar]

tamabravīnmahārāja vāsudevo janādhipam |
ārtāyanimahaṃ jāne yathātattvena bhārata || 24 ||
[Analyze grammar]

vīryavāṃśca mahātejā mahātmā ca viśeṣataḥ |
kṛtī ca citrayodhī ca saṃyukto lāghavena ca || 25 ||
[Analyze grammar]

yādṛgbhīṣmastathā droṇo yādṛkkarṇaśca saṃyuge |
tādṛśastadviśiṣṭo vā madrarājo mato mama || 26 ||
[Analyze grammar]

yudhyamānasya tasyājau cintayanneva bhārata |
yoddhāraṃ nādhigacchāmi tulyarūpaṃ janādhipa || 27 ||
[Analyze grammar]

śikhaṇḍyarjunabhīmānāṃ sātvatasya ca bhārata |
dhṛṣṭadyumnasya ca tathā balenābhyadhiko raṇe || 28 ||
[Analyze grammar]

madrarājo mahārāja siṃhadviradavikramaḥ |
vicariṣyatyabhīḥ kāle kālaḥ kruddhaḥ prajāsviva || 29 ||
[Analyze grammar]

tasyādya na prapaśyāmi pratiyoddhāramāhave |
tvāmṛte puruṣavyāghra śārdūlasamavikramam || 30 ||
[Analyze grammar]

sadevaloke kṛtsne'sminnānyastvattaḥ pumānbhavet |
madrarājaṃ raṇe kruddhaṃ yo hanyātkurunandana |
ahanyahani yudhyantaṃ kṣobhayantaṃ balaṃ tava || 31 ||
[Analyze grammar]

tasmājjahi raṇe śalyaṃ maghavāniva śambaram |
atipaścādasau vīro dhārtarāṣṭreṇa satkṛtaḥ || 32 ||
[Analyze grammar]

tavaiva hi jayo nūnaṃ hate madreśvare yudhi |
tasminhate hataṃ sarvaṃ dhārtarāṣṭrabalaṃ mahat || 33 ||
[Analyze grammar]

etacchrutvā mahārāja vacanaṃ mama sāṃpratam |
pratyudyāhi raṇe pārtha madrarājaṃ mahābalam |
jahi cainaṃ mahābāho vāsavo namuciṃ yathā || 34 ||
[Analyze grammar]

na caivātra dayā kāryā mātulo'yaṃ mameti vai |
kṣatradharmaṃ puraskṛtya jahi madrajaneśvaram || 35 ||
[Analyze grammar]

bhīṣmadroṇārṇavaṃ tīrtvā karṇapātālasaṃbhavam |
mā nimajjasva sagaṇaḥ śalyamāsādya goṣpadam || 36 ||
[Analyze grammar]

yacca te tapaso vīryaṃ yacca kṣātraṃ balaṃ tava |
taddarśaya raṇe sarvaṃ jahi cainaṃ mahāratham || 37 ||
[Analyze grammar]

etāvaduktvā vacanaṃ keśavaḥ paravīrahā |
jagāma śibiraṃ sāyaṃ pūjyamāno'tha pāṇḍavaiḥ || 38 ||
[Analyze grammar]

keśave tu tadā yāte dharmarājo yudhiṣṭhiraḥ |
visṛjya sarvānbhrātṝṃśca pāñcālānatha somakān |
suṣvāpa rajanīṃ tāṃ tu viśalya iva kuñjaraḥ || 39 ||
[Analyze grammar]

te ca sarve maheṣvāsāḥ pāñcālāḥ pāṇḍavāstathā |
karṇasya nidhane hṛṣṭāḥ suṣupustāṃ niśāṃ tadā || 40 ||
[Analyze grammar]

gatajvaraṃ maheṣvāsaṃ tīrṇapāraṃ mahāratham |
babhūva pāṇḍaveyānāṃ sainyaṃ pramuditaṃ niśi |
sūtaputrasya nidhane jayaṃ labdhvā ca māriṣa || 41 ||
[Analyze grammar]