Chapter 32

dhṛtarāṣṭra uvāca |
tathā vyūḍheṣvanīkeṣu saṃsakteṣu ca saṃjaya |
saṃśaptakānkathaṃ pārtho gataḥ karṇaśca pāṇḍavān || 1 ||
[Analyze grammar]

etadvistarato yuddhaṃ prabrūhi kuśalo hyasi |
na hi tṛpyāmi vīrāṇāṃ śṛṇvāno vikramānraṇe || 2 ||
[Analyze grammar]

saṃjaya uvāca |
tatsthāne samavasthāpya pratyamitraṃ mahābalam |
avyūhatārjuno vyūhaṃ putrasya tava durnaye || 3 ||
[Analyze grammar]

tatsādināgakalilaṃ padātirathasaṃkulam |
dhṛṣṭadyumnamukhairvyūḍhamaśobhata mahadbalam || 4 ||
[Analyze grammar]

pārāvatasavarṇāśvaścandrādityasamadyutiḥ |
pārṣataḥ prababhau dhanvī kālo vigrahavāniva || 5 ||
[Analyze grammar]

pārṣataṃ tvabhi saṃtasthurdraupadeyā yuyutsavaḥ |
sānugā bhīmavapuṣaścandraṃ tārāgaṇā iva || 6 ||
[Analyze grammar]

atha vyūḍheṣvanīkeṣu prekṣya saṃśaptakānraṇe |
kruddho'rjuno'bhidudrāva vyākṣipangāṇḍivaṃ dhanuḥ || 7 ||
[Analyze grammar]

atha saṃśaptakāḥ pārthamabhyadhāvanvadhaiṣiṇaḥ |
vijaye kṛtasaṃkalpā mṛtyuṃ kṛtvā nivartanam || 8 ||
[Analyze grammar]

tadaśvasaṃghabahulaṃ mattanāgarathākulam |
pattimacchūravīraughairdrutamarjunamādravat || 9 ||
[Analyze grammar]

sa saṃprahārastumulasteṣāmāsītkirīṭinā |
tasyaiva naḥ śruto yādṛṅnivātakavacaiḥ saha || 10 ||
[Analyze grammar]

rathānaśvāndhvajānnāgānpattīnrathapatīnapi |
iṣūndhanūṃṣi khaḍgāṃśca cakrāṇi ca paraśvadhān || 11 ||
[Analyze grammar]

sāyudhānudyatānbāhūnudyatānyāyudhāni ca |
ciccheda dviṣatāṃ pārthaḥ śirāṃsi ca sahasraśaḥ || 12 ||
[Analyze grammar]

tasminsainye mahāvarte pātālāvartasaṃnibhe |
nimagnaṃ taṃ rathaṃ matvā neduḥ saṃśaptakā mudā || 13 ||
[Analyze grammar]

sa purastādarīnhatvā paścārdhenottareṇa ca |
dakṣiṇena ca bībhatsuḥ kruddho rudraḥ paśūniva || 14 ||
[Analyze grammar]

atha pāñcālacedīnāṃ sṛñjayānāṃ ca māriṣa |
tvadīyaiḥ saha saṃgrāma āsītparamadāruṇaḥ || 15 ||
[Analyze grammar]

kṛpaśca kṛtavarmā ca śakuniścāpi saubalaḥ |
hṛṣṭasenāḥ susaṃrabdhā rathānīkaiḥ prahāriṇaḥ || 16 ||
[Analyze grammar]

kosalaiḥ kāśimatsyaiśca kārūṣaiḥ kekayairapi |
śūrasenaiḥ śūravīrairyuyudhuryuddhadurmadāḥ || 17 ||
[Analyze grammar]

teṣāmantakaraṃ yuddhaṃ dehapāpmapraṇāśanam |
śūdraviṭkṣatravīrāṇāṃ dharmyaṃ svargyaṃ yaśaskaram || 18 ||
[Analyze grammar]

duryodhano'pi sahito bhrātṛbhirbharatarṣabha |
guptaḥ kurupravīraiśca madrāṇāṃ ca mahārathaiḥ || 19 ||
[Analyze grammar]

pāṇḍavaiḥ sahapāñcālaiścedibhiḥ sātyakena ca |
yudhyamānaṃ raṇe karṇaṃ kuruvīro'bhyapālayat || 20 ||
[Analyze grammar]

karṇo'pi niśitairbāṇairvinihatya mahācamūm |
pramṛdya ca rathaśreṣṭhānyudhiṣṭhiramapīḍayat || 21 ||
[Analyze grammar]

vipatrāyudhadehāsūnkṛtvā śatrūnsahasraśaḥ |
yuktvā svargayaśobhyāṃ ca svebhyo mudamudāvahat || 22 ||
[Analyze grammar]

dhṛtarāṣṭra uvāca |
yattatpraviśya pārthānāṃ senāṃ kurvañjanakṣayam |
karṇo rājānamabhyarcchattanmamācakṣva saṃjaya || 23 ||
[Analyze grammar]

ke ca pravīrāḥ pārthānāṃ yudhi karṇamavārayan |
kāṃśca pramathyādhirathiryudhiṣṭhiramapīḍayat || 24 ||
[Analyze grammar]

saṃjaya uvāca |
dhṛṣṭadyumnamukhānpārthāndṛṣṭvā karṇo vyavasthitān |
samabhyadhāvattvaritaḥ pāñcālāñśatrukarśanaḥ || 25 ||
[Analyze grammar]

taṃ tūrṇamabhidhāvantaṃ pāñcālā jitakāśinaḥ |
pratyudyayurmahārāja haṃsā iva mahārṇavam || 26 ||
[Analyze grammar]

tataḥ śaṅkhasahasrāṇāṃ nisvano hṛdayaṃgamaḥ |
prādurāsīdubhayato bherīśabdaśca dāruṇaḥ || 27 ||
[Analyze grammar]

nānāvāditranādaśca dvipāśvarathanisvanaḥ |
siṃhanādaśca vīrāṇāmabhavaddāruṇastadā || 28 ||
[Analyze grammar]

sādridrumārṇavā bhūmiḥ savātāmbudamambaram |
sārkendugrahanakṣatrā dyauśca vyaktaṃ vyaghūrṇata || 29 ||
[Analyze grammar]

ati bhūtāni taṃ śabdaṃ menire'ti ca vivyathuḥ |
yāni cāplavasattvāni prāyastāni mṛtāni ca || 30 ||
[Analyze grammar]

atha karṇo bhṛśaṃ kruddhaḥ śīghramastramudīrayan |
jaghāna pāṇḍavīṃ senāmāsurīṃ maghavāniva || 31 ||
[Analyze grammar]

sa pāṇḍavarathāṃstūrṇaṃ praviśya visṛjañśarān |
prabhadrakāṇāṃ pravarānahanatsaptasaptatim || 32 ||
[Analyze grammar]

tataḥ supuṅkhairniśitai rathaśreṣṭho ratheṣubhiḥ |
avadhītpañcaviṃśatyā pāñcālānpañcaviṃśatim || 33 ||
[Analyze grammar]

suvarṇapuṅkhairnārācaiḥ parakāyavidāraṇaiḥ |
cedikānavadhīdvīraḥ śataśo'tha sahasraśaḥ || 34 ||
[Analyze grammar]

taṃ tathā samare karma kurvāṇamatimānuṣam |
parivavrurmahārāja pāñcālānāṃ rathavrajāḥ || 35 ||
[Analyze grammar]

tataḥ saṃdhāya viśikhānpañca bhārata duḥsahān |
pāñcālānavadhītpañca karṇo vaikartano vṛṣaḥ || 36 ||
[Analyze grammar]

bhānudevaṃ citrasenaṃ senābinduṃ ca bhārata |
tapanaṃ śūrasenaṃ ca pāñcālānavadhīdraṇe || 37 ||
[Analyze grammar]

pāñcāleṣu ca śūreṣu vadhyamāneṣu sāyakaiḥ |
hāhākāro mahānāsītpāñcālānāṃ mahāhave || 38 ||
[Analyze grammar]

teṣāṃ saṃkīryamāṇānāṃ hāhākārakṛtā diśaḥ |
punareva ca tānkarṇo jaghānāśu patatribhiḥ || 39 ||
[Analyze grammar]

cakrarakṣau tu karṇasya putrau māriṣa durjayau |
suṣeṇaḥ satyasenaśca tyaktvā prāṇānayudhyatām || 40 ||
[Analyze grammar]

pṛṣṭhagopastu karṇasya jyeṣṭhaḥ putro mahārathaḥ |
vṛṣasenaḥ svayaṃ karṇaṃ pṛṣṭhataḥ paryapālayat || 41 ||
[Analyze grammar]

dhṛṣṭadyumnaḥ sātyakiśca draupadeyā vṛkodaraḥ |
janamejayaḥ śikhaṇḍī ca pravīrāśca prabhadrakāḥ || 42 ||
[Analyze grammar]

cedikekayapāñcālā yamau matsyāśca daṃśitāḥ |
samabhyadhāvanrādheyaṃ jighāṃsantaḥ prahāriṇaḥ || 43 ||
[Analyze grammar]

ta enaṃ vividhaiḥ śastraiḥ śaradhārābhireva ca |
abhyavarṣanvimṛdnantaḥ prāvṛṣīvāmbudā girim || 44 ||
[Analyze grammar]

pitaraṃ tu parīpsantaḥ karṇaputrāḥ prahāriṇaḥ |
tvadīyāścāpare rājanvīrā vīrānavārayan || 45 ||
[Analyze grammar]

suṣeṇo bhīmasenasya chittvā bhallena kārmukam |
nārācaiḥ saptabhirviddhvā hṛdi bhīmaṃ nanāda ha || 46 ||
[Analyze grammar]

athānyaddhanurādāya sudṛḍhaṃ bhīmavikramaḥ |
sajyaṃ vṛkodaraḥ kṛtvā suṣeṇasyācchinaddhanuḥ || 47 ||
[Analyze grammar]

vivyādha cainaṃ navabhiḥ kruddho nṛtyanniveṣubhiḥ |
karṇaṃ ca tūrṇaṃ vivyādha trisaptatyā śitaiḥ śaraiḥ || 48 ||
[Analyze grammar]

satyasenaṃ ca daśabhiḥ sāśvasūtadhvajāyudham |
paśyatāṃ suhṛdāṃ madhye karṇaputramapātayat || 49 ||
[Analyze grammar]

kṣurapraṇunnaṃ tattasya śiraścandranibhānanam |
śubhadarśanamevāsīnnālabhraṣṭamivāmbujam || 50 ||
[Analyze grammar]

hatvā karṇasutaṃ bhīmastāvakānpunarārdayat |
kṛpahārdikyayośchittvā cāpe tāvapyathārdayat || 51 ||
[Analyze grammar]

duḥśāsanaṃ tribhirviddhvā śakuniṃ ṣaḍbhirāyasaiḥ |
ulūkaṃ ca patatriṃ ca cakāra virathāvubhau || 52 ||
[Analyze grammar]

he suṣeṇa hato'sīti bruvannādatta sāyakam |
tamasya karṇaściccheda tribhiścainamatāḍayat || 53 ||
[Analyze grammar]

athānyamapi jagrāha suparvāṇaṃ sutejanam |
suṣeṇāyāsṛjadbhīmastamapyasyācchinadvṛṣaḥ || 54 ||
[Analyze grammar]

punaḥ karṇastrisaptatyā bhīmasenaṃ ratheṣubhiḥ |
putraṃ parīpsanvivyādha krūraṃ krūrairjighāṃsayā || 55 ||
[Analyze grammar]

suṣeṇastu dhanurgṛhya bhārasādhanamuttamam |
nakulaṃ pañcabhirbāṇairbāhvorurasi cārdayat || 56 ||
[Analyze grammar]

nakulastaṃ tu viṃśatyā viddhvā bhārasahairdṛḍhaiḥ |
nanāda balavannādaṃ karṇasya bhayamādadhat || 57 ||
[Analyze grammar]

taṃ suṣeṇo mahārāja viddhvā daśabhirāśugaiḥ |
ciccheda ca dhanuḥ śīghraṃ kṣurapreṇa mahārathaḥ || 58 ||
[Analyze grammar]

athānyaddhanurādāya nakulaḥ krodhamūrcchitaḥ |
suṣeṇaṃ bahubhirbāṇairvārayāmāsa saṃyuge || 59 ||
[Analyze grammar]

sa tu bāṇairdiśo rājannācchādya paravīrahā |
ājaghne sārathiṃ cāsya suṣeṇaṃ ca tatastribhiḥ |
ciccheda cāsya sudṛḍhaṃ dhanurbhallaistribhistridhā || 60 ||
[Analyze grammar]

athānyaddhanurādāya suṣeṇaḥ krodhamūrchitaḥ |
avidhyannakulaṃ ṣaṣṭyā sahadevaṃ ca saptabhiḥ || 61 ||
[Analyze grammar]

tadyuddhaṃ sumahadghoramāsīddevāsuropamam |
nighnatāṃ sāyakaistūrṇamanyonyasya vadhaṃ prati || 62 ||
[Analyze grammar]

sātyakirvṛṣasenasya hatvā sūtaṃ tribhiḥ śaraiḥ |
dhanuściccheda bhallena jaghānāśvāṃśca saptabhiḥ |
dhvajamekeṣuṇonmathya tribhistaṃ hṛdyatāḍayat || 63 ||
[Analyze grammar]

athāvasannaḥ svarathe muhūrtātpunarutthitaḥ |
atho jighāṃsuḥ śaineyaṃ khaḍgacarmabhṛdabhyayāt || 64 ||
[Analyze grammar]

tasya cāplavataḥ śīghraṃ vṛṣasenasya sātyakiḥ |
varāhakarṇairdaśabhiravidhyadasicarmaṇī || 65 ||
[Analyze grammar]

duḥśāsanastu taṃ dṛṣṭvā virathaṃ vyāyudhaṃ kṛtam |
āropya svarathe tūrṇamapovāha rathāntaram || 66 ||
[Analyze grammar]

athānyaṃ rathamāsthāya vṛṣaseno mahārathaḥ |
karṇasya yudhi durdharṣaḥ punaḥ pṛṣṭhamapālayat || 67 ||
[Analyze grammar]

duḥśāsanaṃ tu śaineyo navairnavabhirāśugaiḥ |
visūtāśvarathaṃ kṛtvā lalāṭe tribhirārpayat || 68 ||
[Analyze grammar]

sa tvanyaṃ rathamāsthāya vidhivatkalpitaṃ punaḥ |
yuyudhe pāṇḍubhiḥ sārdhaṃ karṇasyāpyāyayanbalam || 69 ||
[Analyze grammar]

dhṛṣṭadyumnastataḥ karṇamavidhyaddaśabhiḥ śaraiḥ |
draupadeyāstrisaptatyā yuyudhānastu saptabhiḥ || 70 ||
[Analyze grammar]

bhīmasenaścatuḥṣaṣṭyā sahadevaśca pañcabhiḥ |
nakulastriṃśatā bāṇaiḥ śatānīkaśca saptabhiḥ |
śikhaṇḍī daśabhirvīro dharmarājaḥ śatena tu || 71 ||
[Analyze grammar]

ete cānye ca rājendra pravīrā jayagṛddhinaḥ |
abhyardayanmaheṣvāsaṃ sūtaputraṃ mahāmṛdhe || 72 ||
[Analyze grammar]

tānsūtaputro viśikhairdaśabhirdaśabhiḥ śitaiḥ |
rathe cāru caranvīraḥ pratyavidhyadariṃdamaḥ || 73 ||
[Analyze grammar]

tatrāstravīryaṃ karṇasya lāghavaṃ ca mahātmanaḥ |
apaśyāma mahārāja tadadbhutamivābhavat || 74 ||
[Analyze grammar]

na hyādadānaṃ dadṛśuḥ saṃdadhānaṃ ca sāyakān |
vimuñcantaṃ ca saṃrambhāddadṛśuste mahāratham || 75 ||
[Analyze grammar]

dyaurviyadbhūrdiśaścāśu praṇunnā niśitaiḥ śaraiḥ |
aruṇābhrāvṛtākāraṃ tasmindeśe babhau viyat || 76 ||
[Analyze grammar]

nṛtyanniva hi rādheyaścāpahastaḥ pratāpavān |
yairviddhaḥ pratyavidhyattānekaikaṃ triguṇaiḥ śaraiḥ || 77 ||
[Analyze grammar]

daśabhirdaśabhiścainānpunarviddhvā nanāda ha |
sāśvasūtadhvajacchatrāstataste vivaraṃ daduḥ || 78 ||
[Analyze grammar]

tānpramṛdnanmaheṣvāsānrādheyaḥ śaravṛṣṭibhiḥ |
rājānīkamasaṃbādhaṃ prāviśacchatrukarśanaḥ || 79 ||
[Analyze grammar]

sa rathāṃstriśatānhatvā cedīnāmanivartinām |
rādheyo niśitairbāṇaistato'bhyārcchadyudhiṣṭhiram || 80 ||
[Analyze grammar]

tataste pāṇḍavā rājañśikhaṇḍī ca sasātyakiḥ |
rādheyātparirakṣanto rājānaṃ paryavārayan || 81 ||
[Analyze grammar]

tathaiva tāvakāḥ sarve karṇaṃ durvāraṇaṃ raṇe |
yattāḥ senāmaheṣvāsāḥ paryarakṣanta sarvaśaḥ || 82 ||
[Analyze grammar]

nānāvāditraghoṣāśca prādurāsanviśāṃ pate |
siṃhanādaśca saṃjajñe śūrāṇāmanivartinām || 83 ||
[Analyze grammar]

tataḥ punaḥ samājagmurabhītāḥ kurupāṇḍavāḥ |
yudhiṣṭhiramukhāḥ pārthāḥ sūtaputramukhā vayam || 84 ||
[Analyze grammar]