Chapter 31

saṃjaya uvāca |
tataḥ parānīkabhidaṃ vyūhamapratimaṃ paraiḥ |
samīkṣya karṇaḥ pārthānāṃ dhṛṣṭadyumnābhirakṣitam || 1 ||
[Analyze grammar]

prayayau rathaghoṣeṇa siṃhanādaraveṇa ca |
vāditrāṇāṃ ca ninadaiḥ kampayanniva medinīm || 2 ||
[Analyze grammar]

vepamāna iva krodhādyuddhaśauṇḍaḥ paraṃtapaḥ |
prativyūhya mahātejā yathāvadbharatarṣabha || 3 ||
[Analyze grammar]

vyadhamatpāṇḍavīṃ senāmāsurīṃ maghavāniva |
yudhiṣṭhiraṃ cābhibhavannapasavyaṃ cakāra ha || 4 ||
[Analyze grammar]

dhṛtarāṣṭra uvāca |
kathaṃ saṃjaya rādheyaḥ pratyavyūhata pāṇḍavān |
dhṛṣṭadyumnamukhānvīrānbhīmasenābhirakṣitān || 5 ||
[Analyze grammar]

ke ca prapakṣau pakṣau vā mama sainyasya saṃjaya |
pravibhajya yathānyāyaṃ kathaṃ vā samavasthitāḥ || 6 ||
[Analyze grammar]

kathaṃ pāṇḍusutāścāpi pratyavyūhanta māmakān |
kathaṃ caitanmahāyuddhaṃ prāvartata sudāruṇam || 7 ||
[Analyze grammar]

kva ca bībhatsurabhavadyatkarṇo'yādyudhiṣṭhiram |
ko hyarjunasya sāṃnidhye śakto'bhyetuṃ yudhiṣṭhiram || 8 ||
[Analyze grammar]

sarvabhūtāni yo hyekaḥ khāṇḍave jitavānpurā |
kastamanyatra rādheyātpratiyudhyejjijīviṣuḥ || 9 ||
[Analyze grammar]

saṃjaya uvāca |
śṛṇu vyūhasya racanāmarjunaśca yathā gataḥ |
paridāya nṛpaṃ tebhyaḥ saṃgrāmaścābhavadyathā || 10 ||
[Analyze grammar]

kṛpaḥ śāradvato rājanmāgadhaśca tarasvinaḥ |
sātvataḥ kṛtavarmā ca dakṣiṇaṃ pakṣamāśritāḥ || 11 ||
[Analyze grammar]

teṣāṃ prapakṣe śakunirulūkaśca mahārathaḥ |
sādibhirvimalaprāsaistavānīkamarakṣatām || 12 ||
[Analyze grammar]

gāndhāribhirasaṃbhrāntaiḥ pārvatīyaiśca durjayaiḥ |
śalabhānāmiva vrātaiḥ piśācairiva durdṛśaiḥ || 13 ||
[Analyze grammar]

catustriṃśatsahasrāṇi rathānāmanivartinām |
saṃśaptakā yuddhaśauṇḍā vāmaṃ pārśvamapālayan || 14 ||
[Analyze grammar]

samuccitāstava sutaiḥ kṛṣṇārjunajighāṃsavaḥ |
teṣāṃ prapakṣaḥ kāmbojāḥ śakāśca yavanaiḥ saha || 15 ||
[Analyze grammar]

nideśātsūtaputrasya sarathāḥ sāśvapattayaḥ |
āhvayanto'rjunaṃ tasthuḥ keśavaṃ ca mahābalam || 16 ||
[Analyze grammar]

madhyesenāmukhaṃ karṇo vyavātiṣṭhata daṃśitaḥ |
citravarmāṅgadaḥ sragvī pālayandhvajinīmukham || 17 ||
[Analyze grammar]

rakṣyamāṇaḥ susaṃrabdhaiḥ putraiḥ śastrabhṛtāṃ varaḥ |
vāhinīpramukhaṃ vīraḥ saṃprakarṣannaśobhata || 18 ||
[Analyze grammar]

ayoratnirmahābāhuḥ sūryavaiśvānaradyutiḥ |
mahādvipaskandhagataḥ piṅgalaḥ priyadarśanaḥ |
duḥśāsano vṛtaḥ sainyaiḥ sthito vyūhasya pṛṣṭhataḥ || 19 ||
[Analyze grammar]

tamanvayānmahārāja svayaṃ duryodhano nṛpaḥ |
citrāśvaiścitrasaṃnāhaiḥ sodaryairabhirakṣitaḥ || 20 ||
[Analyze grammar]

rakṣyamāṇo mahāvīryaiḥ sahitairmadrakekayaiḥ |
aśobhata mahārāja devairiva śatakratuḥ || 21 ||
[Analyze grammar]

aśvatthāmā kurūṇāṃ ca ye pravīrā mahārathāḥ |
nityamattāśca mātaṅgāḥ śūrairmlecchairadhiṣṭhitāḥ |
anvayustadrathānīkaṃ kṣaranta iva toyadāḥ || 22 ||
[Analyze grammar]

te dhvajairvaijayantībhirjvaladbhiḥ paramāyudhaiḥ |
sādibhiścāsthitā rejurdrumavanta ivācalāḥ || 23 ||
[Analyze grammar]

teṣāṃ padātināgānāṃ pādarakṣāḥ sahasraśaḥ |
paṭṭiśāsidharāḥ śūrā babhūvuranivartinaḥ || 24 ||
[Analyze grammar]

sādibhiḥ syandanairnāgairadhikaṃ samalaṃkṛtaiḥ |
sa vyūharājo vibabhau devāsuracamūpamaḥ || 25 ||
[Analyze grammar]

bārhaspatyaḥ suvihito nāyakena vipaścitā |
nṛtyatīva mahāvyūhaḥ pareṣāmādadhadbhayam || 26 ||
[Analyze grammar]

tasya pakṣaprapakṣebhyo niṣpatanti yuyutsavaḥ |
pattyaśvarathamātaṅgāḥ prāvṛṣīva balāhakāḥ || 27 ||
[Analyze grammar]

tataḥ senāmukhe karṇaṃ dṛṣṭvā rājā yudhiṣṭhiraḥ |
dhanaṃjayamamitraghnamekavīramuvāca ha || 28 ||
[Analyze grammar]

paśyārjuna mahāvyūhaṃ karṇena vihitaṃ raṇe |
yuktaṃ pakṣaiḥ prapakṣaiśca senānīkaṃ prakāśate || 29 ||
[Analyze grammar]

tadetadvai samālokya pratyamitraṃ mahadbalam |
yathā nābhibhavatyasmāṃstathā nītirvidhīyatām || 30 ||
[Analyze grammar]

evamukto'rjuno rājñā prāñjalirnṛpamabravīt |
yathā bhavānāha tathā tatsarvaṃ na tadanyathā || 31 ||
[Analyze grammar]

yastvasya vihito ghātastaṃ kariṣyāmi bhārata |
pradhānavadha evāsya vināśastaṃ karomyaham || 32 ||
[Analyze grammar]

yudhiṣṭhira uvāca |
tasmāttvameva rādheyaṃ bhīmasenaḥ suyodhanam |
vṛṣasenaṃ ca nakulaḥ sahadevo'pi saubalam || 33 ||
[Analyze grammar]

duḥśāsanaṃ śatānīko hārdikyaṃ śinipuṃgavaḥ |
dhṛṣṭadyumnastathā drauṇiṃ svayaṃ yāsyāmyahaṃ kṛpam || 34 ||
[Analyze grammar]

draupadeyā dhārtarāṣṭrāñśiṣṭānsaha śikhaṇḍinā |
te te ca tāṃstānahitānasmākaṃ ghnantu māmakāḥ || 35 ||
[Analyze grammar]

saṃjaya uvāca |
ityukto dharmarājena tathetyuktvā dhanaṃjayaḥ |
vyādideśa svasainyāni svayaṃ cāgāccamūmukham || 36 ||
[Analyze grammar]

atha taṃ rathamāyāntaṃ dṛṣṭvātyadbhutadarśanam |
uvācādhirathiṃ śalyaḥ punastaṃ yuddhadurmadam || 37 ||
[Analyze grammar]

ayaṃ sa ratha āyāti śvetāśvaḥ kṛṣṇasārathiḥ |
nighnannamitrānkaunteyo yaṃ yaṃ tvaṃ paripṛcchasi || 38 ||
[Analyze grammar]

śrūyate tumulaḥ śabdo rathanemisvano mahān |
eṣa reṇuḥ samudbhūto divamāvṛtya tiṣṭhati || 39 ||
[Analyze grammar]

cakranemipraṇunnā ca kampate karṇa medinī |
pravātyeṣa mahāvāyurabhitastava vāhinīm |
kravyādā vyāharantyete mṛgāḥ kurvanti bhairavam || 40 ||
[Analyze grammar]

paśya karṇa mahāghoraṃ bhayadaṃ lomaharṣaṇam |
kabandhaṃ meghasaṃkāśaṃ bhānumāvṛtya saṃsthitam || 41 ||
[Analyze grammar]

paśya yūthairbahuvidhairmṛgāṇāṃ sarvatodiśam |
balibhirdṛptaśārdūlairādityo'bhinirīkṣyate || 42 ||
[Analyze grammar]

paśya kaṅkāṃśca gṛdhrāṃśca samavetānsahasraśaḥ |
sthitānabhimukhānghorānanyonyamabhibhāṣataḥ || 43 ||
[Analyze grammar]

sitāścāśvāḥ samāyuktāstava karṇa mahārathe |
pradarāḥ prajvalantyete dhvajaścaiva prakampate || 44 ||
[Analyze grammar]

udīryato hayānpaśya mahākāyānmahājavān |
plavamānāndarśanīyānākāśe garuḍāniva || 45 ||
[Analyze grammar]

dhruvameṣu nimitteṣu bhūmimāvṛtya pārthivāḥ |
svapsyanti nihatāḥ karṇa śataśo'tha sahasraśaḥ || 46 ||
[Analyze grammar]

śaṅkhānāṃ tumulaḥ śabdaḥ śrūyate lomaharṣaṇaḥ |
ānakānāṃ ca rādheya mṛdaṅgānāṃ ca sarvaśaḥ || 47 ||
[Analyze grammar]

bāṇaśabdānbahuvidhānnarāśvarathanisvanān |
jyātalatreṣuśabdāṃśca śṛṇu karṇa mahātmanām || 48 ||
[Analyze grammar]

hemarūpyapramṛṣṭānāṃ vāsasāṃ śilpinirmitāḥ |
nānāvarṇā rathe bhānti śvasanena prakampitāḥ || 49 ||
[Analyze grammar]

sahemacandratārārkāḥ patākāḥ kiṅkiṇīyutāḥ |
paśya karṇārjunasyaitāḥ saudāminya ivāmbude || 50 ||
[Analyze grammar]

dhvajāḥ kaṇakaṇāyante vātenābhisamīritāḥ |
sapatākā rathāścāpi pāñcālānāṃ mahātmanām || 51 ||
[Analyze grammar]

nāgāśvarathapattyaughāṃstāvakānsamabhighnataḥ |
dhvajāgraṃ dṛśyate tvasya jyāśabdaścāpi śrūyate || 52 ||
[Analyze grammar]

adya draṣṭāsi taṃ vīraṃ śvetāśvaṃ kṛṣṇasārathim |
nighnantaṃ śātravānsaṃkhye yaṃ karṇa paripṛcchasi || 53 ||
[Analyze grammar]

adya tau puruṣavyāghrau lohitākṣau paraṃtapau |
vāsudevārjunau karṇa draṣṭāsyekarathasthitau || 54 ||
[Analyze grammar]

sārathiryasya vārṣṇeyo gāṇḍīvaṃ yasya kārmukam |
taṃ ceddhantāsi rādheya tvaṃ no rājā bhaviṣyasi || 55 ||
[Analyze grammar]

eṣa saṃśaptakāhūtastānevābhimukho gataḥ |
karoti kadanaṃ caiṣāṃ saṃgrāme dviṣatāṃ balī |
iti bruvāṇaṃ madreśaṃ karṇaḥ prāhātimanyumān || 56 ||
[Analyze grammar]

paśya saṃśaptakaiḥ kruddhaiḥ sarvataḥ samabhidrutaḥ |
eṣa sūrya ivāmbhodaiśchannaḥ pārtho na dṛśyate |
etadanto'rjunaḥ śalya nimagnaḥ śokasāgare || 57 ||
[Analyze grammar]

śalya uvāca |
varuṇaṃ ko'mbhasā hanyādindhanena ca pāvakam |
ko vānilaṃ nigṛhṇīyātpibedvā ko mahārṇavam || 58 ||
[Analyze grammar]

īdṛgrūpamahaṃ manye pārthasya yudhi nigraham |
na hi śakyo'rjuno jetuṃ sendraiḥ sarvaiḥ surāsuraiḥ || 59 ||
[Analyze grammar]

athaivaṃ paritoṣaste vācoktvā sumanā bhava |
na sa śakyo yudhā jetumanyaṃ kuru manoratham || 60 ||
[Analyze grammar]

bāhubhyāmuddharedbhūmiṃ dahetkruddha imāḥ prajāḥ |
pātayettridivāddevānyo'rjunaṃ samare jayet || 61 ||
[Analyze grammar]

paśya kuntīsutaṃ vīraṃ bhīmamakliṣṭakāriṇam |
prabhāsantaṃ mahābāhuṃ sthitaṃ merumivācalam || 62 ||
[Analyze grammar]

amarṣī nityasaṃrabdhaściraṃ vairamanusmaran |
eṣa bhīmo jayaprepsuryudhi tiṣṭhati vīryavān || 63 ||
[Analyze grammar]

eṣa dharmabhṛtāṃ śreṣṭho dharmarājo yudhiṣṭhiraḥ |
tiṣṭhatyasukaraḥ saṃkhye paraiḥ parapuraṃjayaḥ || 64 ||
[Analyze grammar]

etau ca puruṣavyāghrāvaśvināviva sodarau |
nakulaḥ sahadevaśca tiṣṭhato yudhi durjayau || 65 ||
[Analyze grammar]

dṛśyanta ete kārṣṇeyāḥ pañca pañcācalā iva |
vyavasthitā yotsyamānāḥ sarve'rjunasamā yudhi || 66 ||
[Analyze grammar]

ete drupadaputrāśca dhṛṣṭadyumnapurogamāḥ |
hīnāḥ satyajitā vīrāstiṣṭhanti paramaujasaḥ || 67 ||
[Analyze grammar]

iti saṃvadatoreva tayoḥ puruṣasiṃhayoḥ |
te sene samasajjetāṃ gaṅgāyamunavadbhṛśam || 68 ||
[Analyze grammar]