Chapter 23

saṃjaya uvāca |
putrastava mahārāja madrarājamidaṃ vacaḥ |
vinayenopasaṃgamya praṇayādvākyamabravīt || 1 ||
[Analyze grammar]

satyavrata mahābhāga dviṣatāmaghavardhana |
madreśvara raṇe śūra parasainyabhayaṃkara || 2 ||
[Analyze grammar]

śrutavānasi karṇasya bruvato vadatāṃ vara |
yathā nṛpatisiṃhānāṃ madhye tvāṃ varayatyayam || 3 ||
[Analyze grammar]

tasmātpārthavināśārthaṃ hitārthaṃ mama caiva hi |
sārathyaṃ rathināṃ śreṣṭha sumanāḥ kartumarhasi || 4 ||
[Analyze grammar]

asyābhīśugraho loke nānyo'sti bhavatā samaḥ |
sa pātu sarvataḥ karṇaṃ bhavānbrahmeva śaṃkaram || 5 ||
[Analyze grammar]

pārthasya sacivaḥ kṛṣṇo yathābhīśugraho varaḥ |
tathā tvamapi rādheyaṃ sarvataḥ paripālaya || 6 ||
[Analyze grammar]

bhīṣmo droṇaḥ kṛpaḥ karṇo bhavānbhojaśca vīryavān |
śakuniḥ saubalo drauṇirahameva ca no balam |
eṣāmeva kṛto bhāgo navadhā pṛtanāpate || 7 ||
[Analyze grammar]

naiva bhāgo'tra bhīṣmasya droṇasya ca mahātmanaḥ |
tābhyāmatītya tau bhāgau nihatā mama śatravaḥ || 8 ||
[Analyze grammar]

vṛddhau hi tau naravyāghrau chalena nihatau ca tau |
kṛtvā nasukaraṃ karma gatau svargamito'nagha || 9 ||
[Analyze grammar]

tathānye puruṣavyāghrāḥ parairvinihatā yudhi |
asmadīyāśca bahavaḥ svargāyopagatā raṇe |
tyaktvā prāṇānyathāśakti ceṣṭāḥ kṛtvā ca puṣkalāḥ || 10 ||
[Analyze grammar]

karṇo hyeko mahābāhurasmatpriyahite rataḥ |
bhavāṃśca puruṣavyāghra sarvalokamahārathaḥ |
tasmiñjayāśā vipulā mama madrajanādhipa || 11 ||
[Analyze grammar]

pārthasya samare kṛṣṇo yathābhīśuvaragrahaḥ |
tena yukto raṇe pārtho rakṣyamāṇaśca pārthiva |
yāni karmāṇi kurute pratyakṣāṇi tathaiva te || 12 ||
[Analyze grammar]

pūrvaṃ na samare hyevamavadhīdarjuno ripūn |
ahanyahani madreśa drāvayandṛśyate yudhi || 13 ||
[Analyze grammar]

bhāgo'vaśiṣṭaḥ karṇasya tava caiva mahādyute |
taṃ bhāgaṃ saha karṇena yugapannāśayāhave || 14 ||
[Analyze grammar]

sūryāruṇau yathā dṛṣṭvā tamo naśyati māriṣa |
tathā naśyantu kaunteyāḥ sapāñcālāḥ sasṛñjayāḥ || 15 ||
[Analyze grammar]

rathānāṃ pravaraḥ karṇo yantṝṇāṃ pravaro bhavān |
saṃnipātaḥ samo loke bhavatornāsti kaścana || 16 ||
[Analyze grammar]

yathā sarvāsvavasthāsu vārṣṇeyaḥ pāti pāṇḍavam |
tathā bhavānparitrātu karṇaṃ vaikartanaṃ raṇe || 17 ||
[Analyze grammar]

tvayā sārathinā hyeṣa apradhṛṣyo bhaviṣyati |
devatānāmapi raṇe saśakrāṇāṃ mahīpate |
kiṃ punaḥ pāṇḍaveyānāṃ mātiśaṅkīrvaco mama || 18 ||
[Analyze grammar]

duryodhanavacaḥ śrutvā śalyaḥ krodhasamanvitaḥ |
triśikhāṃ bhrukuṭīṃ kṛtvā dhunvanhastau punaḥ punaḥ || 19 ||
[Analyze grammar]

krodharakte mahānetre parivartya mahābhujaḥ |
kulaiśvaryaśrutibalairdṛptaḥ śalyo'bravīdidam || 20 ||
[Analyze grammar]

avamanyase māṃ gāndhāre dhruvaṃ māṃ pariśaṅkase |
yanmāṃ bravīṣi visrabdhaṃ sārathyaṃ kriyatāmiti || 21 ||
[Analyze grammar]

asmatto'bhyadhikaṃ karṇaṃ manyamānaḥ praśaṃsasi |
na cāhaṃ yudhi rādheyaṃ gaṇaye tulyamātmanā || 22 ||
[Analyze grammar]

ādiśyatāmabhyadhiko mamāṃśaḥ pṛthivīpate |
tamahaṃ samare hatvā gamiṣyāmi yathāgatam || 23 ||
[Analyze grammar]

atha vāpyeka evāhaṃ yotsyāmi kurunandana |
paśya vīryaṃ mamādya tvaṃ saṃgrāme dahato ripūn || 24 ||
[Analyze grammar]

na cābhikāmānkauravya vidhāya hṛdaye pumān |
asmadvidhaḥ pravarteta mā mā tvamatiśaṅkithāḥ || 25 ||
[Analyze grammar]

yudhi cāpyavamāno me na kartavyaḥ kathaṃcana |
paśya hīmau mama bhujau vajrasaṃhananopamau || 26 ||
[Analyze grammar]

dhanuḥ paśya ca me citraṃ śarāṃścāśīviṣopamān |
rathaṃ paśya ca me kḷptaṃ sadaśvairvātavegitaiḥ |
gadāṃ ca paśya gāndhāre hemapaṭṭavibhūṣitām || 27 ||
[Analyze grammar]

dārayeyaṃ mahīṃ kruddho vikireyaṃ ca parvatān |
śoṣayeyaṃ samudrāṃśca tejasā svena pārthiva || 28 ||
[Analyze grammar]

tanmāmevaṃvidhaṃ jānansamarthamarinigrahe |
kasmādyunakṣi sārathye nyūnasyādhirathernṛpa || 29 ||
[Analyze grammar]

na nāma dhuri rājendra prayoktuṃ tvamihārhasi |
na hi pāpīyasaḥ śreyānbhūtvā preṣyatvamutsahe || 30 ||
[Analyze grammar]

yo hyabhyupagataṃ prītyā garīyāṃsaṃ vaśe sthitam |
vaśe pāpīyaso dhatte tatpāpamadharottaram || 31 ||
[Analyze grammar]

brāhmaṇā brahmaṇā sṛṣṭā mukhātkṣatramathorasaḥ |
ūrubhyāmasṛjadvaiśyāñśūdrānpadbhyāmiti śrutiḥ |
tebhyo varṇaviśeṣāśca pratilomānulomajāḥ || 32 ||
[Analyze grammar]

athānyonyasya saṃyogāccāturvarṇyasya bhārata |
goptāraḥ saṃgrahītāro dātāraḥ kṣatriyāḥ smṛtāḥ || 33 ||
[Analyze grammar]

yājanādhyāpanairviprā viśuddhaiśca pratigrahaiḥ |
lokasyānugrahārthāya sthāpitā brahmaṇā bhuvi || 34 ||
[Analyze grammar]

kṛṣiśca pāśupālyaṃ ca viśāṃ dānaṃ ca sarvaśaḥ |
brahmakṣatraviśāṃ śūdrā vihitāḥ paricārakāḥ || 35 ||
[Analyze grammar]

brahmakṣatrasya vihitāḥ sūtā vai paricārakāḥ |
na viṭśūdrasya tatraiva śṛṇu vākyaṃ mamānagha || 36 ||
[Analyze grammar]

so'haṃ mūrdhāvasiktaḥ sanrājarṣikulasaṃbhavaḥ |
mahārathaḥ samākhyātaḥ sevyaḥ stavyaśca bandinām || 37 ||
[Analyze grammar]

so'hametādṛśo bhūtvā nehārikulamardana |
sūtaputrasya saṃgrāme sārathyaṃ kartumutsahe || 38 ||
[Analyze grammar]

avamānamahaṃ prāpya na yotsyāmi kathaṃcana |
āpṛcchya tvādya gāndhāre gamiṣyāmi yathāgatam || 39 ||
[Analyze grammar]

evamuktvā naravyāghraḥ śalyaḥ samitiśobhanaḥ |
utthāya prayayau tūrṇaṃ rājamadhyādamarṣitaḥ || 40 ||
[Analyze grammar]

praṇayādbahumānācca taṃ nigṛhya sutastava |
abravīnmadhuraṃ vākyaṃ sāma sarvārthasādhakam || 41 ||
[Analyze grammar]

yathā śalya tvamātthedamevametadasaṃśayam |
abhiprāyastu me kaścittaṃ nibodha janeśvara || 42 ||
[Analyze grammar]

na karṇo'bhyadhikastvattaḥ śaṅke naiva kathaṃcana |
na hi madreśvaro rājā kuryādyadanṛtaṃ bhavet || 43 ||
[Analyze grammar]

ṛtameva hi pūrvāste vahanti puruṣottamāḥ |
tasmādārtāyaniḥ prokto bhavāniti matirmama || 44 ||
[Analyze grammar]

śalyabhūtaśca śatrūṇāṃ yasmāttvaṃ bhuvi mānada |
tasmācchalyeti te nāma kathyate pṛthivīpate || 45 ||
[Analyze grammar]

yadeva vyāhṛtaṃ pūrvaṃ bhavatā bhūridakṣiṇa |
tadeva kuru dharmajña madarthaṃ yadyaducyase || 46 ||
[Analyze grammar]

na ca tvatto hi rādheyo na cāhamapi vīryavān |
vṛṇīmastvāṃ hayāgryāṇāṃ yantāramiti saṃyuge || 47 ||
[Analyze grammar]

yathā hyabhyadhikaṃ karṇaṃ guṇaistāta dhanaṃjayāt |
vāsudevādapi tvāṃ ca loko'yamiti manyate || 48 ||
[Analyze grammar]

karṇo hyabhyadhikaḥ pārthādastraireva nararṣabha |
bhavānapyadhikaḥ kṛṣṇādaśvayāne bale tathā || 49 ||
[Analyze grammar]

yathāśvahṛdayaṃ veda vāsudevo mahāmanāḥ |
dviguṇaṃ tvaṃ tathā vettha madrarāja na saṃśayaḥ || 50 ||
[Analyze grammar]

śalya uvāca |
yanmā bravīṣi gāndhāre madhye sainyasya kaurava |
viśiṣṭaṃ devakīputrātprītimānasmyahaṃ tvayi || 51 ||
[Analyze grammar]

eṣa sārathyamātiṣṭhe rādheyasya yaśasvinaḥ |
yudhyataḥ pāṇḍavāgryeṇa yathā tvaṃ vīra manyase || 52 ||
[Analyze grammar]

samayaśca hi me vīra kaścidvaikartanaṃ prati |
utsṛjeyaṃ yathāśraddhamahaṃ vāco'sya saṃnidhau || 53 ||
[Analyze grammar]

saṃjaya uvāca |
tatheti rājanputraste saha karṇena bhārata |
abravīnmadrarājasya sutaṃ bharatasattama || 54 ||
[Analyze grammar]