Chapter 24

duryodhana uvāca |
bhūya eva tu madreśa yatte vakṣyāmi tacchṛṇu |
yathā purā vṛttamidaṃ yuddhe devāsure vibho || 1 ||
[Analyze grammar]

yaduktavānpiturmahyaṃ mārkaṇḍeyo mahānṛṣiḥ |
tadaśeṣeṇa bruvato mama rājarṣisattama |
tvaṃ nibodha na cāpyatra kartavyā te vicāraṇā || 2 ||
[Analyze grammar]

devānāmasurāṇāṃ ca mahānāsītsamāgamaḥ |
babhūva prathamo rājansaṃgrāmastārakāmayaḥ |
nirjitāśca tadā daityā daivatairiti naḥ śrutam || 3 ||
[Analyze grammar]

nirjiteṣu ca daityeṣu tārakasya sutāstrayaḥ |
tārākṣaḥ kamalākṣaśca vidyunmālī ca pārthiva || 4 ||
[Analyze grammar]

tapa ugraṃ samāsthāya niyame parame sthitāḥ |
tapasā karśayāmāsurdehānsvāñśatrutāpana || 5 ||
[Analyze grammar]

damena tapasā caiva niyamena ca pārthiva |
teṣāṃ pitāmahaḥ prīto varadaḥ pradadau varān || 6 ||
[Analyze grammar]

avadhyatvaṃ ca te rājansarvabhūteṣu sarvadā |
sahitā varayāmāsuḥ sarvalokapitāmaham || 7 ||
[Analyze grammar]

tānabravīttadā devo lokānāṃ prabhurīśvaraḥ |
nāsti sarvāmaratvaṃ hi nivartadhvamato'surāḥ |
varamanyaṃ vṛṇīdhvaṃ vai yādṛśaṃ saṃprarocate || 8 ||
[Analyze grammar]

tataste sahitā rājansaṃpradhāryāsakṛdbahu |
sarvalokeśvaraṃ vākyaṃ praṇamyainamathābruvan || 9 ||
[Analyze grammar]

asmākaṃ tvaṃ varaṃ deva prayacchemaṃ pitāmaha |
vayaṃ purāṇi trīṇyeva samāsthāya mahīmimām |
vicariṣyāma loke'smiṃstvatprasādapuraskṛtāḥ || 10 ||
[Analyze grammar]

tato varṣasahasre tu sameṣyāmaḥ parasparam |
ekībhāvaṃ gamiṣyanti purāṇyetāni cānagha || 11 ||
[Analyze grammar]

samāgatāni caitāni yo hanyādbhagavaṃstadā |
ekeṣuṇā devavaraḥ sa no mṛtyurbhaviṣyati |
evamastviti tāndevaḥ pratyuktvā prāviśaddivam || 12 ||
[Analyze grammar]

te tu labdhavarāḥ prītāḥ saṃpradhārya parasparam |
puratrayavisṛṣṭyarthaṃ mayaṃ vavrurmahāsuram |
viśvakarmāṇamajaraṃ daityadānavapūjitam || 13 ||
[Analyze grammar]

tato mayaḥ svatapasā cakre dhīmānpurāṇi ha |
trīṇi kāñcanamekaṃ tu raupyaṃ kārṣṇāyasaṃ tathā || 14 ||
[Analyze grammar]

kāñcanaṃ divi tatrāsīdantarikṣe ca rājatam |
āyasaṃ cābhavadbhūmau cakrasthaṃ pṛthivīpate || 15 ||
[Analyze grammar]

ekaikaṃ yojanaśataṃ vistārāyāmasaṃmitam |
gṛhāṭṭāṭṭālakayutaṃ bṛhatprākāratoraṇam || 16 ||
[Analyze grammar]

guṇaprasavasaṃbādhamasaṃbādhamanāmayam |
prāsādairvividhaiścaiva dvāraiścāpyupaśobhitam || 17 ||
[Analyze grammar]

pureṣu cābhavanrājanrājāno vai pṛthakpṛthak |
kāñcanaṃ tārakākṣasya citramāsīnmahātmanaḥ |
rājataṃ kamalākṣasya vidyunmālina āyasam || 18 ||
[Analyze grammar]

trayaste daityarājānastrīṃllokānāśu tejasā |
ākramya tasthurvarṣāṇāṃ pūgānnāma prajāpatiḥ || 19 ||
[Analyze grammar]

teṣāṃ dānavamukhyānāṃ prayutānyarbudāni ca |
koṭyaścāprativīrāṇāṃ samājagmustatastataḥ |
mahadaiśvaryamicchantastripuraṃ durgamāśritāḥ || 20 ||
[Analyze grammar]

sarveṣāṃ ca punasteṣāṃ sarvayogavaho mayaḥ |
tamāśritya hi te sarve avartantākutobhayāḥ || 21 ||
[Analyze grammar]

yo hi yaṃ manasā kāmaṃ dadhyau tripurasaṃśrayaḥ |
tasmai kāmaṃ mayastaṃ taṃ vidadhe māyayā tadā || 22 ||
[Analyze grammar]

tārakākṣasutaścāsīddharirnāma mahābalaḥ |
tapastepe paramakaṃ yenātuṣyatpitāmahaḥ || 23 ||
[Analyze grammar]

sa tuṣṭamavṛṇoddevaṃ vāpī bhavatu naḥ pure |
śastrairvinihatā yatra kṣiptāḥ syurbalavattarāḥ || 24 ||
[Analyze grammar]

sa tu labdhvā varaṃ vīrastārakākṣasuto hariḥ |
sasṛje tatra vāpīṃ tāṃ mṛtānāṃ jīvanīṃ prabho || 25 ||
[Analyze grammar]

yena rūpeṇa daityastu yena veṣeṇa caiva ha |
mṛtastasyāṃ parikṣiptastādṛśenaiva jajñivān || 26 ||
[Analyze grammar]

tāṃ prāpya traipurasthāstu sarvāṃllokānbabādhire |
mahatā tapasā siddhāḥ surāṇāṃ bhayavardhanāḥ |
na teṣāmabhavadrājankṣayo yuddhe kathaṃcana || 27 ||
[Analyze grammar]

tataste lobhamohābhyāmabhibhūtā vicetasaḥ |
nirhrīkāḥ saṃsthitiṃ sarve sthāpitāṃ samalūlupan || 28 ||
[Analyze grammar]

vidrāvya sagaṇāndevāṃstatra tatra tadā tadā |
viceruḥ svena kāmena varadānena darpitāḥ || 29 ||
[Analyze grammar]

devāraṇyāni sarvāṇi priyāṇi ca divaukasām |
ṛṣīṇāmāśramānpuṇyānyūpāñjanapadāṃstathā |
vyanāśayanta maryādā dānavā duṣṭacāriṇaḥ || 30 ||
[Analyze grammar]

te devāḥ sahitāḥ sarve pitāmahamariṃdama |
abhijagmustadākhyātuṃ viprakāraṃ suretaraiḥ || 31 ||
[Analyze grammar]

te tattvaṃ sarvamākhyāya śirasābhipraṇamya ca |
vadhopāyamapṛcchanta bhagavantaṃ pitāmaham || 32 ||
[Analyze grammar]

śrutvā tadbhagavāndevo devānidamuvāca ha |
asurāśca durātmānaste cāpi vibudhadviṣaḥ |
aparādhyanti satataṃ ye yuṣmānpīḍayantyuta || 33 ||
[Analyze grammar]

ahaṃ hi tulyaḥ sarveṣāṃ bhūtānāṃ nātra saṃśayaḥ |
adhārmikāstu hantavyā ityahaṃ prabravīmi vaḥ || 34 ||
[Analyze grammar]

te yūyaṃ sthāṇumīśānaṃ jiṣṇumakliṣṭakāriṇam |
yoddhāraṃ vṛṇutādityāḥ sa tānhantā suretarān || 35 ||
[Analyze grammar]

iti tasya vacaḥ śrutvā devāḥ śakrapurogamāḥ |
brahmāṇamagrataḥ kṛtvā vṛṣāṅkaṃ śaraṇaṃ yayuḥ || 36 ||
[Analyze grammar]

tapaḥ paraṃ samātasthurgṛṇanto brahma śāśvatam |
ṛṣibhiḥ saha dharmajñā bhavaṃ sarvātmanā gatāḥ || 37 ||
[Analyze grammar]

tuṣṭuvurvāgbhirarthyābhirbhayeṣvabhayakṛttamam |
sarvātmānaṃ mahātmānaṃ yenāptaṃ sarvamātmanā || 38 ||
[Analyze grammar]

tapoviśeṣairbahubhiryogaṃ yo veda cātmanaḥ |
yaḥ sāṃkhyamātmano veda yasya cātmā vaśe sadā || 39 ||
[Analyze grammar]

te taṃ dadṛśurīśānaṃ tejorāśimumāpatim |
ananyasadṛśaṃ loke vratavantamakalmaṣam || 40 ||
[Analyze grammar]

ekaṃ ca bhagavantaṃ te nānārūpamakalpayan |
ātmanaḥ pratirūpāṇi rūpāṇyatha mahātmani |
parasparasya cāpaśyansarve paramavismitāḥ || 41 ||
[Analyze grammar]

sarvabhūtamayaṃ ceśaṃ tamajaṃ jagataḥ patim |
devā brahmarṣayaścaiva śirobhirdharaṇīṃ gatāḥ || 42 ||
[Analyze grammar]

tānsvastivākyenābhyarcya samutthāpya ca śaṃkaraḥ |
brūta brūteti bhagavānsmayamāno'bhyabhāṣata || 43 ||
[Analyze grammar]

tryambakeṇābhyanujñātāstataste'svasthacetasaḥ |
namo namaste'stu vibho tata ityabruvanbhavam || 44 ||
[Analyze grammar]

namo devātidevāya dhanvine cātimanyave |
prajāpatimakhaghnāya prajāpatibhirīḍyase || 45 ||
[Analyze grammar]

namaḥ stutāya stutyāya stūyamānāya mṛtyave |
vilohitāya rudrāya nīlagrīvāya śūline || 46 ||
[Analyze grammar]

amoghāya mṛgākṣāya pravarāyudhayodhine |
durvāraṇāya śukrāya brahmaṇe brahmacāriṇe || 47 ||
[Analyze grammar]

īśānāyāprameyāya niyantre carmavāsase |
taponityāya piṅgāya vratine kṛttivāsase || 48 ||
[Analyze grammar]

kumārapitre tryakṣāya pravarāyudhadhāriṇe |
prapannārtivināśāya brahmadviṭsaṃghaghātine || 49 ||
[Analyze grammar]

vanaspatīnāṃ pataye narāṇāṃ pataye namaḥ |
gavāṃ ca pataye nityaṃ yajñānāṃ pataye namaḥ || 50 ||
[Analyze grammar]

namo'stu te sasainyāya tryambakāyogratejase |
manovākkarmabhirdeva tvāṃ prapannānbhajasva naḥ || 51 ||
[Analyze grammar]

tataḥ prasanno bhagavānsvāgatenābhinandya tān |
provāca vyetu vastrāso brūta kiṃ karavāṇi vaḥ || 52 ||
[Analyze grammar]

pitṛdevarṣisaṃghebhyo vare datte mahātmanā |
satkṛtya śaṃkaraṃ prāha brahmā lokahitaṃ vacaḥ || 53 ||
[Analyze grammar]

tavātisargāddeveśa prājāpatyamidaṃ padam |
mayādhitiṣṭhatā datto dānavebhyo mahānvaraḥ || 54 ||
[Analyze grammar]

tānatikrāntamaryādānnānyaḥ saṃhartumarhati |
tvāmṛte bhūtabhavyeśa tvaṃ hyeṣāṃ pratyarirvadhe || 55 ||
[Analyze grammar]

sa tvaṃ deva prapannānāṃ yācatāṃ ca divaukasām |
kuru prasādaṃ deveśa dānavāñjahi śūlabhṛt || 56 ||
[Analyze grammar]

śrībhagavānuvāca |
hantavyāḥ śatravaḥ sarve yuṣmākamiti me matiḥ |
na tveko'haṃ vadhe teṣāṃ samartho vai suradviṣām || 57 ||
[Analyze grammar]

te yūyaṃ sahitāḥ sarve madīyenāstratejasā |
jayadhvaṃ yudhi tāñśatrūnsaṃghāto hi mahābalaḥ || 58 ||
[Analyze grammar]

devā ūcuḥ |
asmattejobalaṃ yāvattāvaddviguṇameva ca |
teṣāmiti ha manyāmo dṛṣṭatejobalā hi te || 59 ||
[Analyze grammar]

bhagavānuvāca |
vadhyāste sarvataḥ pāpā ye yuṣmāsvaparādhinaḥ |
mama tejobalārdhena sarvāṃstānghnata śātravān || 60 ||
[Analyze grammar]

devā ūcuḥ |
bibhartuṃ tejaso'rdhaṃ te na śakṣyāmo maheśvara |
sarveṣāṃ no balārdhena tvameva jahi śātravān || 61 ||
[Analyze grammar]

duryodhana uvāca |
tatastatheti deveśastairukto rājasattama |
ardhamādāya sarvebhyastejasābhyadhiko'bhavat || 62 ||
[Analyze grammar]

sa tu devo balenāsītsarvebhyo balavattaraḥ |
mahādeva iti khyātastadāprabhṛti śaṃkaraḥ || 63 ||
[Analyze grammar]

tato'bravīnmahādevo dhanurbāṇadharastvaham |
haniṣyāmi rathenājau tānripūnvai divaukasaḥ || 64 ||
[Analyze grammar]

te yūyaṃ me rathaṃ caiva dhanurbāṇaṃ tathaiva ca |
paśyadhvaṃ yāvadadyaitānpātayāmi mahītale || 65 ||
[Analyze grammar]

devā ūcuḥ |
mūrtisarvasvamādāya trailokyasya tatastataḥ |
rathaṃ te kalpayiṣyāma deveśvara mahaujasam || 66 ||
[Analyze grammar]

tathaiva buddhyā vihitaṃ viśvakarmakṛtaṃ śubham |
tato vibudhaśārdūlāstaṃ rathaṃ samakalpayan || 67 ||
[Analyze grammar]

vandhuraṃ pṛthivīṃ devīṃ viśālapuramālinīm |
saparvatavanadvīpāṃ cakrurbhūtadharāṃ tadā || 68 ||
[Analyze grammar]

mandaraṃ parvataṃ cākṣaṃ jaṅghāstasya mahānadīḥ |
diśaśca pradiśaścaiva parivāraṃ rathasya hi || 69 ||
[Analyze grammar]

anukarṣāngrahāndīptānvarūthaṃ cāpi tārakāḥ |
dharmārthakāmasaṃyuktaṃ triveṇuṃ cāpi bandhuram |
oṣadhīrvividhāstatra nānāpuṣpaphalodgamāḥ || 70 ||
[Analyze grammar]

sūryācandramasau kṛtvā cakre rathavarottame |
pakṣau pūrvāparau tatra kṛte rātryahanī śubhe || 71 ||
[Analyze grammar]

daśa nāgapatīnīṣāṃ dhṛtarāṣṭramukhāndṛḍhām |
dyāṃ yugaṃ yugacarmāṇi saṃvartakabalāhakān || 72 ||
[Analyze grammar]

śamyāṃ dhṛtiṃ ca medhāṃ ca sthitiṃ saṃnatimeva ca |
grahanakṣatratārābhiścarma citraṃ nabhastalam || 73 ||
[Analyze grammar]

surāmbupretavittānāṃ patīṃllokeśvarānhayān |
sinīvālīmanumatiṃ kuhūṃ rākāṃ ca suvratām |
yoktrāṇi cakrurvāhānāṃ rohakāṃścāpi kaṇṭhakam || 74 ||
[Analyze grammar]

karma satyaṃ tapo'rthaśca vihitāstatra raśmayaḥ |
adhiṣṭhānaṃ manastvāsītparirathyaṃ sarasvatī || 75 ||
[Analyze grammar]

nānāvarṇāśca citrāśca patākāḥ pavaneritāḥ |
vidyudindradhanurnaddhaṃ rathaṃ dīptaṃ vyadīpayat || 76 ||
[Analyze grammar]

evaṃ tasminmahārāja kalpite rathasattame |
devairmanujaśārdūla dviṣatāmabhimardane || 77 ||
[Analyze grammar]

svānyāyudhāni mukhyāni nyadadhācchaṃkaro rathe |
rathayaṣṭiṃ viyatkṛṣṭāṃ sthāpayāmāsa govṛṣam || 78 ||
[Analyze grammar]

brahmadaṇḍaḥ kāladaṇḍo rudradaṇḍastathā jvaraḥ |
pariskandā rathasyāsya sarvatodiśamudyatāḥ || 79 ||
[Analyze grammar]

atharvāṅgirasāvāstāṃ cakrarakṣau mahātmanaḥ |
ṛgvedaḥ sāmavedaśca purāṇaṃ ca puraḥsarāḥ || 80 ||
[Analyze grammar]

itihāsayajurvedau pṛṣṭharakṣau babhūvatuḥ |
divyā vācaśca vidyāśca paripārśvacarāḥ kṛtāḥ || 81 ||
[Analyze grammar]

tottrādayaśca rājendra vaṣaṭkārastathaiva ca |
oṃkāraśca mukhe rājannatiśobhākaro'bhavat || 82 ||
[Analyze grammar]

vicitramṛtubhiḥ ṣaḍbhiḥ kṛtvā saṃvatsaraṃ dhanuḥ |
tasmānnṝṇāṃ kālarātrirjyā kṛtā dhanuṣo'jarā || 83 ||
[Analyze grammar]

iṣuścāpyabhavadviṣṇurjvalanaḥ soma eva ca |
agnīṣomau jagatkṛtsnaṃ vaiṣṇavaṃ cocyate jagat || 84 ||
[Analyze grammar]

viṣṇuścātmā bhagavato bhavasyāmitatejasaḥ |
tasmāddhanurjyāsaṃsparśaṃ na viṣehurharasya te || 85 ||
[Analyze grammar]

tasmiñśare tigmamanyurmumocāviṣahaṃ prabhuḥ |
bhṛgvaṅgiromanyubhavaṃ krodhāgnimatiduḥsaham || 86 ||
[Analyze grammar]

sa nīlalohito dhūmraḥ kṛttivāsā bhayaṃkaraḥ |
ādityāyutasaṃkāśastejojvālāvṛto jvalan || 87 ||
[Analyze grammar]

duścyāvaścyāvano jetā hantā brahmadviṣāṃ haraḥ |
nityaṃ trātā ca hantā ca dharmādharmāśritāñjanān || 88 ||
[Analyze grammar]

pramāthibhirghorarūpairbhīmodagrairgaṇairvṛtaḥ |
vibhāti bhagavānsthāṇustairevātmaguṇairvṛtaḥ || 89 ||
[Analyze grammar]

tasyāṅgāni samāśritya sthitaṃ viśvamidaṃ jagat |
jaṅgamājaṅgamaṃ rājañśuśubhe'dbhutadarśanam || 90 ||
[Analyze grammar]

dṛṣṭvā tu taṃ rathaṃ divyaṃ kavacī sa śarāsanī |
bāṇamādatta taṃ divyaṃ somaviṣṇvagnisaṃbhavam || 91 ||
[Analyze grammar]

tasya vājāṃstato devāḥ kalpayāṃ cakrire vibhoḥ |
puṇyagandhavahaṃ rājañśvasanaṃ rājasattama || 92 ||
[Analyze grammar]

tamāsthāya mahādevastrāsayandaivatānyapi |
āruroha tadā yattaḥ kampayanniva rodasī || 93 ||
[Analyze grammar]

sa śobhamāno varadaḥ khaḍgī bāṇī śarāsanī |
hasannivābravīddevo sārathiḥ ko bhaviṣyati || 94 ||
[Analyze grammar]

tamabruvandevagaṇā yaṃ bhavānsaṃniyokṣyate |
sa bhaviṣyati deveśa sārathiste na saṃśayaḥ || 95 ||
[Analyze grammar]

tānabravītpunardevo mattaḥ śreṣṭhataro hi yaḥ |
taṃ sārathiṃ kurudhvaṃ me svayaṃ saṃcintya māciram || 96 ||
[Analyze grammar]

etacchrutvā tato devā vākyamuktaṃ mahātmanā |
gatvā pitāmahaṃ devaṃ prasādyaivaṃ vaco'bruvan || 97 ||
[Analyze grammar]

deva tvayedaṃ kathitaṃ tridaśārinibarhaṇam |
tathā ca kṛtamasmābhiḥ prasanno vṛṣabhadhvajaḥ || 98 ||
[Analyze grammar]

rathaśca vihito'smābhirvicitrāyudhasaṃvṛtaḥ |
sārathiṃ tu na jānīmaḥ kaḥ syāttasminrathottame || 99 ||
[Analyze grammar]

tasmādvidhīyatāṃ kaścitsārathirdevasattama |
saphalāṃ tāṃ giraṃ deva kartumarhasi no vibho || 100 ||
[Analyze grammar]

evamasmāsu hi purā bhagavannuktavānasi |
hitaṃ kartāsmi bhavatāmiti tatkartumarhasi || 101 ||
[Analyze grammar]

sa deva yukto rathasattamo no durāvaro drāvaṇaḥ śātravāṇām |
pinākapāṇirvihito'tra yoddhā vibhīṣayandānavānudyato'sau || 102 ||
[Analyze grammar]

tathaiva vedāścaturo hayāgryā dharā saśailā ca ratho mahātman |
nakṣatravaṃśo'nugato varūthe yasminyoddhā sārathinābhirakṣyaḥ || 103 ||
[Analyze grammar]

tatra sārathireṣṭavyaḥ sarvairetairviśeṣavān |
tatpratiṣṭho ratho deva hayā yoddhā tathaiva ca |
kavacāni ca śastrāṇi kārmukaṃ ca pitāmaha || 104 ||
[Analyze grammar]

tvāmṛte sārathiṃ tatra nānyaṃ paśyāmahe vayam |
tvaṃ hi sarvairguṇairyukto devatābhyo'dhikaḥ prabho |
sārathye tūrṇamāroha saṃyaccha paramānhayān || 105 ||
[Analyze grammar]

iti te śirasā natvā trilokeśaṃ pitāmaham |
devāḥ prasādayāmāsuḥ sārathyāyeti naḥ śrutam || 106 ||
[Analyze grammar]

brahmovāca |
nātra kiṃcinmṛṣā vākyaṃ yaduktaṃ vo divaukasaḥ |
saṃyacchāmi hayāneṣa yudhyato vai kapardinaḥ || 107 ||
[Analyze grammar]

tataḥ sa bhagavāndevo lokasraṣṭā pitāmahaḥ |
sārathye kalpito devairīśānasya mahātmanaḥ || 108 ||
[Analyze grammar]

tasminnārohati kṣipraṃ syandanaṃ lokapūjite |
śirobhiragamaṃstūrṇaṃ te hayā vātaraṃhasaḥ || 109 ||
[Analyze grammar]

maheśvare tvāruhati jānubhyāmagamanmahīm || 110 ||
[Analyze grammar]

abhīśūnhi trilokeśaḥ saṃgṛhya prapitāmahaḥ |
tānaśvāṃścodayāmāsa manomārutaraṃhasaḥ || 111 ||
[Analyze grammar]

tato'dhirūḍhe varade prayāte cāsurānprati |
sādhu sādhviti viśveśaḥ smayamāno'bhyabhāṣata || 112 ||
[Analyze grammar]

yāhi deva yato daityāścodayāśvānatandritaḥ |
paśya bāhvorbalaṃ me'dya nighnataḥ śātravānraṇe || 113 ||
[Analyze grammar]

tatastāṃścodayāmāsa vāyuvegasamāñjave |
yena tattripuraṃ rājandaityadānavarakṣitam || 114 ||
[Analyze grammar]

athādhijyaṃ dhanuḥ kṛtvā śarvaḥ saṃdhāya taṃ śaram |
yuktvā pāśupatāstreṇa tripuraṃ samacintayat || 115 ||
[Analyze grammar]

tasminsthite tadā rājankruddhe vidhṛtakārmuke |
purāṇi tāni kālena jagmurekatvatāṃ tadā || 116 ||
[Analyze grammar]

ekībhāvaṃ gate caiva tripure samupāgate |
babhūva tumulo harṣo daivatānāṃ mahātmanām || 117 ||
[Analyze grammar]

tato devagaṇāḥ sarve siddhāśca paramarṣayaḥ |
jayeti vāco mumucuḥ saṃstuvanto mudānvitāḥ || 118 ||
[Analyze grammar]

tato'grataḥ prādurabhūttripuraṃ jaghnuṣo'surān |
anirdeśyogravapuṣo devasyāsahyatejasaḥ || 119 ||
[Analyze grammar]

sa tadvikṛṣya bhagavāndivyaṃ lokeśvaro dhanuḥ |
trailokyasāraṃ tamiṣuṃ mumoca tripuraṃ prati |
tatsāsuragaṇaṃ dagdhvā prākṣipatpaścimārṇave || 120 ||
[Analyze grammar]

evaṃ tattripuraṃ dagdhaṃ dānavāścāpyaśeṣataḥ |
maheśvareṇa kruddhena trailokyasya hitaiṣiṇā || 121 ||
[Analyze grammar]

sa cātmakrodhajo vahnirhāhetyuktvā nivāritaḥ |
mā kārṣīrbhasmasāllokāniti tryakṣo'bravīcca tam || 122 ||
[Analyze grammar]

tataḥ prakṛtimāpannā devā lokāstatharṣayaḥ |
tuṣṭuvurvāgbhirarthyābhiḥ sthāṇumapratimaujasam || 123 ||
[Analyze grammar]

te'nujñātā bhagavatā jagmuḥ sarve yathāgatam |
kṛtakāmāḥ prasannena prajāpatimukhāḥ surāḥ || 124 ||
[Analyze grammar]

yathaiva bhagavānbrahmā lokadhātā pitāmahaḥ |
saṃyaccha tvaṃ hayānasya rādheyasya mahātmanaḥ || 125 ||
[Analyze grammar]

tvaṃ hi kṛṣṇācca karṇācca phalgunācca viśeṣataḥ |
viśiṣṭo rājaśārdūla nāsti tatra vicāraṇā || 126 ||
[Analyze grammar]

yuddhe hyayaṃ rudrakalpastvaṃ ca brahmasamo'nagha |
tasmācchaktau yuvāṃ jetuṃ macchatrūṃstāvivāsurān || 127 ||
[Analyze grammar]

yathā śalyādya karṇo'yaṃ śvetāśvaṃ kṛṣṇasārathim |
pramathya hanyātkaunteyaṃ tathā śīghraṃ vidhīyatām |
tvayi karṇaśca rājyaṃ ca vayaṃ caiva pratiṣṭhitāḥ || 128 ||
[Analyze grammar]

imaṃ cāpyaparaṃ bhūya itihāsaṃ nibodha me |
piturmama sakāśe yaṃ brāhmaṇaḥ prāha dharmavit || 129 ||
[Analyze grammar]

śrutvā caitadvacaścitraṃ hetukāryārthasaṃhitam |
kuru śalya viniścitya mā bhūdatra vicāraṇā || 130 ||
[Analyze grammar]

bhārgavāṇāṃ kule jāto jamadagnirmahātapāḥ |
tasya rāmeti vikhyātaḥ putrastejoguṇānvitaḥ || 131 ||
[Analyze grammar]

sa tīvraṃ tapa āsthāya prasādayitavānbhavam |
astrahetoḥ prasannātmā niyataḥ saṃyatendriyaḥ || 132 ||
[Analyze grammar]

tasya tuṣṭo mahādevo bhaktyā ca praśamena ca |
hṛdgataṃ cāsya vijñāya darśayāmāsa śaṃkaraḥ || 133 ||
[Analyze grammar]

īśvara uvāca |
rāma tuṣṭo'smi bhadraṃ te viditaṃ me tavepsitam |
kuruṣva pūtamātmānaṃ sarvametadavāpsyasi || 134 ||
[Analyze grammar]

dāsyāmi te tadāstrāṇi yadā pūto bhaviṣyasi |
apātramasamarthaṃ ca dahantyastrāṇi bhārgava || 135 ||
[Analyze grammar]

ityukto jāmadagnyastu devadevena śūlinā |
pratyuvāca mahātmānaṃ śirasāvanataḥ prabhum || 136 ||
[Analyze grammar]

yadā jānāsi deveśa pātraṃ māmastradhāraṇe |
tadā śuśrūṣate'strāṇi bhavānme dātumarhati || 137 ||
[Analyze grammar]

duryodhana uvāca |
tataḥ sa tapasā caiva damena niyamena ca |
pūjopahārabalibhirhomamantrapuraskṛtaiḥ || 138 ||
[Analyze grammar]

ārādhayitavāñśarvaṃ bahūnvarṣagaṇāṃstadā |
prasannaśca mahādevo bhārgavasya mahātmanaḥ || 139 ||
[Analyze grammar]

abravīttasya bahuśo guṇāndevyāḥ samīpataḥ |
bhaktimāneṣa satataṃ mayi rāmo dṛḍhavrataḥ || 140 ||
[Analyze grammar]

evaṃ tasya guṇānprīto bahuśo'kathayatprabhuḥ |
devatānāṃ pitṝṇāṃ ca samakṣamarisūdanaḥ || 141 ||
[Analyze grammar]

etasminneva kāle tu daityā āsanmahābalāḥ |
taistadā darpamohāndhairabādhyanta divaukasaḥ || 142 ||
[Analyze grammar]

tataḥ saṃbhūya vibudhāstānhantuṃ kṛtaniścayāḥ |
cakruḥ śatruvadhe yatnaṃ na śekurjetumeva te || 143 ||
[Analyze grammar]

abhigamya tato devā maheśvaramathābruvan |
prasādayantastaṃ bhaktyā jahi śatrugaṇāniti || 144 ||
[Analyze grammar]

pratijñāya tato devo devatānāṃ ripukṣayam |
rāmaṃ bhārgavamāhūya so'bhyabhāṣata śaṃkaraḥ || 145 ||
[Analyze grammar]

ripūnbhārgava devānāṃ jahi sarvānsamāgatān |
lokānāṃ hitakāmārthaṃ matprītyarthaṃ tathaiva ca || 146 ||
[Analyze grammar]

rāma uvāca |
akṛtāstrasya deveśa kā śaktirme maheśvara |
nihantuṃ dānavānsarvānkṛtāstrānyuddhadurmadān || 147 ||
[Analyze grammar]

īśvara uvāca |
gaccha tvaṃ madanudhyānānnihaniṣyasi dānavān |
vijitya ca ripūnsarvānguṇānprāpsyasi puṣkalān || 148 ||
[Analyze grammar]

duryodhana uvāca |
etacchrutvā ca vacanaṃ pratigṛhya ca sarvaśaḥ |
rāmaḥ kṛtasvastyayanaḥ prayayau dānavānprati || 149 ||
[Analyze grammar]

avadhīddevaśatrūṃstānmadadarpabalānvitān |
vajrāśanisamasparśaiḥ prahāraireva bhārgavaḥ || 150 ||
[Analyze grammar]

sa dānavaiḥ kṣatatanurjāmadagnyo dvijottamaḥ |
saṃspṛṣṭaḥ sthāṇunā sadyo nirvraṇaḥ samajāyata || 151 ||
[Analyze grammar]

prītaśca bhagavāndevaḥ karmaṇā tena tasya vai |
varānprādādbrahmavide bhārgavāya mahātmane || 152 ||
[Analyze grammar]

uktaśca devadevena prītiyuktena śūlinā |
nipātāttava śastrāṇāṃ śarīre yābhavadrujā || 153 ||
[Analyze grammar]

tayā te mānuṣaṃ karma vyapoḍhaṃ bhṛgunandana |
gṛhāṇāstrāṇi divyāni matsakāśādyathepsitam || 154 ||
[Analyze grammar]

tato'strāṇi samastāni varāṃśca manasepsitān |
labdhvā bahuvidhānrāmaḥ praṇamya śirasā śivam || 155 ||
[Analyze grammar]

anujñāṃ prāpya deveśājjagāma sa mahātapāḥ |
evametatpurāvṛttaṃ tadā kathitavānṛṣiḥ || 156 ||
[Analyze grammar]

bhārgavo'pyadadātsarvaṃ dhanurvedaṃ mahātmane |
karṇāya puruṣavyāghra suprītenāntarātmanā || 157 ||
[Analyze grammar]

vṛjinaṃ hi bhavetkiṃcidyadi karṇasya pārthiva |
nāsmai hyastrāṇi divyāni prādāsyadbhṛgunandanaḥ || 158 ||
[Analyze grammar]

nāpi sūtakule jātaṃ karṇaṃ manye kathaṃcana |
devaputramahaṃ manye kṣatriyāṇāṃ kulodbhavam || 159 ||
[Analyze grammar]

sakuṇḍalaṃ sakavacaṃ dīrghabāhuṃ mahāratham |
kathamādityasadṛśaṃ mṛgī vyāghraṃ janiṣyati || 160 ||
[Analyze grammar]

paśya hyasya bhujau pīnau nāgarājakaropamau |
vakṣaḥ paśya viśālaṃ ca sarvaśatrunibarhaṇam || 161 ||
[Analyze grammar]