Chapter 166

dhṛtarāṣṭra uvāca |
adharmeṇa hataṃ śrutvā dhṛṣṭadyumnena saṃjaya |
brāhmaṇaṃ pitaraṃ vṛddhamaśvatthāmā kimabravīt || 1 ||
[Analyze grammar]

mānuṣaṃ vāruṇāgneyaṃ brāhmamastraṃ ca vīryavān |
aindraṃ nārāyaṇaṃ caiva yasminnityaṃ pratiṣṭhitam || 2 ||
[Analyze grammar]

tamadharmeṇa dharmiṣṭhaṃ dhṛṣṭadyumnena saṃjaya |
śrutvā nihatamācāryamaśvatthāmā kimabravīt || 3 ||
[Analyze grammar]

yena rāmādavāpyeha dhanurvedaṃ mahātmanā |
proktānyastrāṇi divyāni putrāya gurukāṅkṣiṇe || 4 ||
[Analyze grammar]

ekameva hi loke'sminnātmano guṇavattaram |
icchanti putraṃ puruṣā loke nānyaṃ kathaṃcana || 5 ||
[Analyze grammar]

ācāryāṇāṃ bhavantyeva rahasyāni mahātmanām |
tāni putrāya vā dadyuḥ śiṣyāyānugatāya vā || 6 ||
[Analyze grammar]

sa śilpaṃ prāpya tatsarvaṃ saviśeṣaṃ ca saṃjaya |
śūraḥ śāradvatīputraḥ saṃkhye droṇādanantaraḥ || 7 ||
[Analyze grammar]

rāmasyānumataḥ śāstre puraṃdarasamo yudhi |
kārtavīryasamo vīrye bṛhaspatisamo matau || 8 ||
[Analyze grammar]

mahīdharasamo dhṛtyā tejasāgnisamo yuvā |
samudra iva gāmbhīrye krodhe sarpaviṣopamaḥ || 9 ||
[Analyze grammar]

sa rathī prathamo loke dṛḍhadhanvā jitaklamaḥ |
śīghro'nila ivākrande carankruddha ivāntakaḥ || 10 ||
[Analyze grammar]

asyatā yena saṃgrāme dharaṇyabhinipīḍitā |
yo na vyathati saṃgrāme vīraḥ satyaparākramaḥ || 11 ||
[Analyze grammar]

vedasnāto vratasnāto dhanurvede ca pāragaḥ |
mahodadhirivākṣobhyo rāmo dāśarathiryathā || 12 ||
[Analyze grammar]

tamadharmeṇa dharmiṣṭhaṃ dhṛṣṭadyumnena saṃyuge |
śrutvā nihatamācāryamaśvatthāmā kimabravīt || 13 ||
[Analyze grammar]

dhṛṣṭadyumnasya yo mṛtyuḥ sṛṣṭastena mahātmanā |
yathā droṇasya pāñcālyo yajñasenasuto'bhavat || 14 ||
[Analyze grammar]

taṃ nṛśaṃsena pāpena krūreṇātyalpadarśinā |
śrutvā nihatamācāryamaśvatthāmā kimabravīt || 15 ||
[Analyze grammar]

saṃjaya uvāca |
chadmanā nihataṃ śrutvā pitaraṃ pāpakarmaṇā |
bāṣpeṇāpūryata drauṇī roṣeṇa ca nararṣabha || 16 ||
[Analyze grammar]

tasya kruddhasya rājendra vapurdivyamadṛśyata |
antakasyeva bhūtāni jihīrṣoḥ kālaparyaye || 17 ||
[Analyze grammar]

aśrupūrṇe tato netre apamṛjya punaḥ punaḥ |
uvāca kopānniḥśvasya duryodhanamidaṃ vacaḥ || 18 ||
[Analyze grammar]

pitā mama yathā kṣudrairnyastaśastro nipātitaḥ |
dharmadhvajavatā pāpaṃ kṛtaṃ tadviditaṃ mama |
anāryaṃ sunṛśaṃsasya dharmaputrasya me śrutam || 19 ||
[Analyze grammar]

yuddheṣvapi pravṛttānāṃ dhruvau jayaparājayau |
dvayametadbhavedrājanvadhastatra praśasyate || 20 ||
[Analyze grammar]

nyāyavṛtto vadho yastu saṃgrāme yudhyato bhavet |
na sa duḥkhāya bhavati tathā dṛṣṭo hi sa dvijaḥ || 21 ||
[Analyze grammar]

gataḥ sa vīralokāya pitā mama na saṃśayaḥ |
na śocyaḥ puruṣavyāghrastathā sa nidhanaṃ gataḥ || 22 ||
[Analyze grammar]

yattu dharmapravṛttaḥ sankeśagrahaṇamāptavān |
paśyatāṃ sarvasainyānāṃ tanme marmāṇi kṛntati || 23 ||
[Analyze grammar]

kāmātkrodhādavajñānāddarpādbālyena vā punaḥ |
vaidharmikāni kurvanti tathā paribhavena ca || 24 ||
[Analyze grammar]

tadidaṃ pārṣateneha mahadādharmikaṃ kṛtam |
avajñāya ca māṃ nūnaṃ nṛśaṃsena durātmanā || 25 ||
[Analyze grammar]

tasyānubandhaṃ sa draṣṭā dhṛṣṭadyumnaḥ sudāruṇam |
anāryaṃ paramaṃ kṛtvā mithyāvādī ca pāṇḍavaḥ || 26 ||
[Analyze grammar]

yo hyasau chadmanācāryaṃ śastraṃ saṃnyāsayattadā |
tasyādya dharmarājasya bhūmiḥ pāsyati śoṇitam || 27 ||
[Analyze grammar]

sarvopāyairyatiṣyāmi pāñcālānāmahaṃ vadhe |
dhṛṣṭadyumnaṃ ca samare hantāhaṃ pāpakāriṇam || 28 ||
[Analyze grammar]

karmaṇā yena teneha mṛdunā dāruṇena vā |
pāñcālānāṃ vadhaṃ kṛtvā śāntiṃ labdhāsmi kaurava || 29 ||
[Analyze grammar]

yadarthaṃ puruṣavyāghra putramicchanti mānavāḥ |
pretya ceha ca saṃprāptaṃ trāṇāya mahato bhayāt || 30 ||
[Analyze grammar]

pitrā tu mama sāvasthā prāptā nirbandhunā yathā |
mayi śailapratīkāśe putre śiṣye ca jīvati || 31 ||
[Analyze grammar]

dhiṅmamāstrāṇi divyāni dhigbāhū dhikparākramam |
yanmāṃ droṇaḥ sutaṃ prāpya keśagrahaṇamāptavān || 32 ||
[Analyze grammar]

sa tathāhaṃ kariṣyāmi yathā bharatasattama |
paralokagatasyāpi gamiṣyāmyanṛṇaḥ pituḥ || 33 ||
[Analyze grammar]

āryeṇa tu na vaktavyā kadācitstutirātmanaḥ |
piturvadhamamṛṣyaṃstu vakṣyāmyadyeha pauruṣam || 34 ||
[Analyze grammar]

adya paśyantu me vīryaṃ pāṇḍavāḥ sajanārdanāḥ |
mṛdnataḥ sarvasainyāni yugāntamiva kurvataḥ || 35 ||
[Analyze grammar]

na hi devā na gandharvā nāsurā na ca rākṣasāḥ |
adya śaktā raṇe jetuṃ rathasthaṃ māṃ nararṣabha || 36 ||
[Analyze grammar]

madanyo nāsti loke'sminnarjunādvāstravittamaḥ |
ahaṃ hi jvalatāṃ madhye mayūkhānāmivāṃśumān |
prayoktā devasṛṣṭānāmastrāṇāṃ pṛtanāgataḥ || 37 ||
[Analyze grammar]

kṛśāśvatanayā hyadya matprayuktā mahāmṛdhe |
darśayanto''tmano vīryaṃ pramathiṣyanti pāṇḍavān || 38 ||
[Analyze grammar]

adya sarvā diśo rājandhārābhiriva saṃkulāḥ |
āvṛtāḥ patribhistīkṣṇairdraṣṭāro māmakairiha || 39 ||
[Analyze grammar]

kiranhi śarajālāni sarvato bhairavasvaram |
śatrūnnipātayiṣyāmi mahāvāta iva drumān || 40 ||
[Analyze grammar]

na ca jānāti bībhatsustadastraṃ na janārdanaḥ |
na bhīmaseno na yamau na ca rājā yudhiṣṭhiraḥ || 41 ||
[Analyze grammar]

na pārṣato durātmāsau na śikhaṇḍī na sātyakiḥ |
yadidaṃ mayi kauravya sakalyaṃ sanivartanam || 42 ||
[Analyze grammar]

nārāyaṇāya me pitrā praṇamya vidhipūrvakam |
upahāraḥ purā datto brahmarūpa upasthite || 43 ||
[Analyze grammar]

taṃ svayaṃ pratigṛhyātha bhagavānsa varaṃ dadau |
vavre pitā me paramamastraṃ nārāyaṇaṃ tataḥ || 44 ||
[Analyze grammar]

athainamabravīdrājanbhagavāndevasattamaḥ |
bhavitā tvatsamo nānyaḥ kaścidyudhi naraḥ kvacit || 45 ||
[Analyze grammar]

na tvidaṃ sahasā brahmanprayoktavyaṃ kathaṃcana |
na hyetadastramanyatra vadhācchatrornivartate || 46 ||
[Analyze grammar]

na caitacchakyate jñātuṃ ko na vadhyediti prabho |
avadhyamapi hanyāddhi tasmānnaitatprayojayet || 47 ||
[Analyze grammar]

vadhaḥ saṃkhye dravaścaiva śastrāṇāṃ ca visarjanam |
prayācanaṃ ca śatrūṇāṃ gamanaṃ śaraṇasya ca || 48 ||
[Analyze grammar]

ete praśamane yogā mahāstrasya paraṃtapa |
sarvathā pīḍito hi syādavadhyānpīḍayanraṇe || 49 ||
[Analyze grammar]

tajjagrāha pitā mahyamabravīccaiva sa prabhuḥ |
tvaṃ varṣiṣyasi divyāni śastravarṣāṇyanekaśaḥ |
anenāstreṇa saṃgrāme tejasā ca jvaliṣyasi || 50 ||
[Analyze grammar]

evamuktvā sa bhagavāndivamācakrame prabhuḥ |
etannārāyaṇādastraṃ tatprāptaṃ mama bandhunā || 51 ||
[Analyze grammar]

tenāhaṃ pāṇḍavāṃścaiva pāñcālānmatsyakekayān |
vidrāvayiṣyāmi raṇe śacīpatirivāsurān || 52 ||
[Analyze grammar]

yathā yathāhamiccheyaṃ tathā bhūtvā śarā mama |
nipateyuḥ sapatneṣu vikramatsvapi bhārata || 53 ||
[Analyze grammar]

yatheṣṭamaśmavarṣeṇa pravarṣiṣye raṇe sthitaḥ |
ayomukhaiśca vihagairdrāvayiṣye mahārathān |
paraśvadhāṃśca vividhānprasakṣye'hamasaṃśayam || 54 ||
[Analyze grammar]

so'haṃ nārāyaṇāstreṇa mahatā śatrutāpana |
śatrūnvidhvaṃsayiṣyāmi kadarthīkṛtya pāṇḍavān || 55 ||
[Analyze grammar]

mitrabrahmagurudveṣī jālmakaḥ suvigarhitaḥ |
pāñcālāpasadaścādya na me jīvanvimokṣyate || 56 ||
[Analyze grammar]

tacchrutvā droṇaputrasya paryavartata vāhinī |
tataḥ sarve mahāśaṅkhāndadhmuḥ puruṣasattamāḥ || 57 ||
[Analyze grammar]

bherīścābhyahananhṛṣṭā ḍiṇḍimāṃśca sahasraśaḥ |
tathā nanāda vasudhā khuranemiprapīḍitā |
sa śabdastumulaḥ khaṃ dyāṃ pṛthivīṃ ca vyanādayat || 58 ||
[Analyze grammar]

taṃ śabdaṃ pāṇḍavāḥ śrutvā parjanyaninadopamam |
sametya rathināṃ śreṣṭhāḥ sahitāḥ saṃnyamantrayan || 59 ||
[Analyze grammar]

tathoktvā droṇaputro'pi tadopaspṛśya bhārata |
prāduścakāra taddivyamastraṃ nārāyaṇaṃ tadā || 60 ||
[Analyze grammar]