Chapter 68

saṃjaya uvāca |
hate sudakṣiṇe rājanvīre caiva śrutāyudhe |
javenābhyadravanpārthaṃ kupitāḥ sainikāstava || 1 ||
[Analyze grammar]

abhīṣāhāḥ śūrasenāḥ śibayo'tha vasātayaḥ |
abhyavarṣaṃstato rājañśaravarṣairdhanaṃjayam || 2 ||
[Analyze grammar]

teṣāṃ ṣaṣṭiśatānāryānprāmathnātpāṇḍavaḥ śaraiḥ |
te sma bhītāḥ palāyanta vyāghrātkṣudramṛgā iva || 3 ||
[Analyze grammar]

te nivṛtya punaḥ pārthaṃ sarvataḥ paryavārayan |
raṇe sapatnānnighnantaṃ jigīṣantanparānyudhi || 4 ||
[Analyze grammar]

teṣāmāpatatāṃ tūrṇaṃ gāṇḍīvapreṣitaiḥ śaraiḥ |
śirāṃsi pātayāmāsa bāhūṃścaiva dhanaṃjayaḥ || 5 ||
[Analyze grammar]

śirobhiḥ patitaistatra bhūmirāsīnnirantarā |
abhracchāyeva caivāsīddhvāṅkṣagṛdhravaḍairyudhi || 6 ||
[Analyze grammar]

teṣu tūtsādyamāneṣu krodhāmarṣasamanvitau |
śrutāyuścācyutāyuśca dhanaṃjayamayudhyatām || 7 ||
[Analyze grammar]

balinau spardhinau vīrau kulajau bāhuśālinau |
tāvenaṃ śaravarṣāṇi savyadakṣiṇamasyatām || 8 ||
[Analyze grammar]

tvarāyuktau mahārāja prārthayānau mahadyaśaḥ |
arjunasya vadhaprepsū putrārthe tava dhanvinau || 9 ||
[Analyze grammar]

tāvarjunaṃ sahasreṇa patriṇāṃ nataparvaṇām |
pūrayāmāsatuḥ kruddhau taḍāgaṃ jaladau yathā || 10 ||
[Analyze grammar]

śrutāyuśca tataḥ kruddhastomareṇa dhanaṃjayam |
ājaghāna rathaśreṣṭhaḥ pītena niśitena ca || 11 ||
[Analyze grammar]

so'tividdho balavatā śatruṇā śatrukarśanaḥ |
ājagāma paraṃ mohaṃ mohayankeśavaṃ raṇe || 12 ||
[Analyze grammar]

etasminneva kāle tu so'cyutāyurmahārathaḥ |
śūlena bhṛśatīkṣṇena tāḍayāmāsa pāṇḍavam || 13 ||
[Analyze grammar]

kṣate kṣāraṃ sa hi dadau pāṇḍavasya mahātmanaḥ |
pārtho'pi bhṛśasaṃviddho dhvajayaṣṭiṃ samāśritaḥ || 14 ||
[Analyze grammar]

tataḥ sarvasya sainyasya tāvakasya viśāṃ pate |
siṃhanādo mahānāsīddhataṃ matvā dhanaṃjayam || 15 ||
[Analyze grammar]

kṛṣṇaśca bhṛśasaṃtapto dṛṣṭvā pārthaṃ vicetasam |
āśvāsayatsuhṛdyābhirvāgbhistatra dhanaṃjayam || 16 ||
[Analyze grammar]

tatastau rathināṃ śreṣṭhau labdhalakṣau dhanaṃjayam |
vāsudevaṃ ca vārṣṇeyaṃ śaravarṣaiḥ samantataḥ || 17 ||
[Analyze grammar]

sacakrakūbararathaṃ sāśvadhvajapatākinam |
adṛśyaṃ cakraturyuddhe tadadbhutamivābhavat || 18 ||
[Analyze grammar]

pratyāśvastastu bībhatsuḥ śanakairiva bhārata |
pretarājapuraṃ prāpya punaḥ pratyāgato yathā || 19 ||
[Analyze grammar]

saṃchannaṃ śarajālena rathaṃ dṛṣṭvā sakeśavam |
śatrū cābhimukhau dṛṣṭvā dīpyamānāvivānalau || 20 ||
[Analyze grammar]

prāduścakre tataḥ pārthaḥ śākramastraṃ mahārathaḥ |
tasmādāsansahasrāṇi śarāṇāṃ nataparvaṇām || 21 ||
[Analyze grammar]

te jaghnustau maheṣvāsau tābhyāṃ sṛṣṭāṃśca sāyakān |
vicerurākāśagatāḥ pārthabāṇavidāritāḥ || 22 ||
[Analyze grammar]

pratihatya śarāṃstūrṇaṃ śaravegena pāṇḍavaḥ |
pratasthe tatra tatraiva yodhayanvai mahārathān || 23 ||
[Analyze grammar]

tau ca phalgunabāṇaughairvibāhuśirasau kṛtau |
vasudhāmanvapadyetāṃ vātanunnāviva drumau || 24 ||
[Analyze grammar]

śrutāyuṣaśca nidhanaṃ vadhaścaivācyutāyuṣaḥ |
lokavismāpanamabhūtsamudrasyeva śoṣaṇam || 25 ||
[Analyze grammar]

tayoḥ padānugānhatvā punaḥ pañcaśatānrathān |
abhyagādbhāratīṃ senāṃ nighnanpārtho varānvarān || 26 ||
[Analyze grammar]

śrutāyuṣaṃ ca nihataṃ prekṣya caivācyutāyuṣam |
ayutāyuśca saṃkruddho dīrghāyuścaiva bhārata || 27 ||
[Analyze grammar]

putrau tayornaraśreṣṭhau kaunteyaṃ pratijagmatuḥ |
kirantau vividhānbāṇānpitṛvyasanakarśitau || 28 ||
[Analyze grammar]

tāvarjuno muhūrtena śaraiḥ saṃnataparvabhiḥ |
preṣayatparamakruddho yamasya sadanaṃ prati || 29 ||
[Analyze grammar]

loḍayantamanīkāni dvipaṃ padmasaro yathā |
nāśaknuvanvārayituṃ pārthaṃ kṣatriyapuṃgavāḥ || 30 ||
[Analyze grammar]

aṅgāstu gajavāreṇa pāṇḍavaṃ paryavārayan |
kruddhāḥ sahasraśo rājañśikṣitā hastisādinaḥ || 31 ||
[Analyze grammar]

duryodhanasamādiṣṭāḥ kuñjaraiḥ parvatopamaiḥ |
prācyāśca dākṣiṇātyāśca kaliṅgapramukhā nṛpāḥ || 32 ||
[Analyze grammar]

teṣāmāpatatāṃ śīghraṃ gāṇḍīvapreṣitaiḥ śaraiḥ |
nicakarta śirāṃsyugrau bāhūnapi subhūṣaṇān || 33 ||
[Analyze grammar]

taiḥ śirobhirmahī kīrṇā bāhubhiśca sahāṅgadaiḥ |
babhau kanakapāṣāṇā bhujagairiva saṃvṛtā || 34 ||
[Analyze grammar]

bāhavo viśikhaiśchinnāḥ śirāṃsyunmathitāni ca |
cyavamānānyadṛśyanta drumebhya iva pakṣiṇaḥ || 35 ||
[Analyze grammar]

śaraiḥ sahasraśo viddhā dvipāḥ prasrutaśoṇitāḥ |
vyadṛśyantādrayaḥ kāle gairikāmbusravā iva || 36 ||
[Analyze grammar]

nihatāḥ śerate smānye bībhatsorniśitaiḥ śaraiḥ |
gajapṛṣṭhagatā mlecchā nānāvikṛtadarśanāḥ || 37 ||
[Analyze grammar]

nānāveṣadharā rājannānāśastraughasaṃvṛtāḥ |
rudhireṇānuliptāṅgā bhānti citraiḥ śarairhatāḥ || 38 ||
[Analyze grammar]

śoṇitaṃ nirvamanti sma dvipāḥ pārthaśarāhatāḥ |
sahasraśaśchinnagātrāḥ sārohāḥ sapadānugāḥ || 39 ||
[Analyze grammar]

cukruśuśca nipetuśca babhramuścāpare diśaḥ |
bhṛśaṃ trastāśca bahudhā svānena mamṛdurgajāḥ |
sāntarāyudhikā mattā dvipāstīkṣṇaviṣopamāḥ || 40 ||
[Analyze grammar]

vidantyasuramāyāṃ ye sughorā ghoracakṣuṣaḥ |
yavanāḥ pāradāścaiva śakāśca sunikaiḥ saha || 41 ||
[Analyze grammar]

goyoniprabhavā mlecchāḥ kālakalpāḥ prahāriṇaḥ |
dārvābhisārā daradāḥ puṇḍrāśca saha bāhlikaiḥ || 42 ||
[Analyze grammar]

na te sma śakyāḥ saṃkhyātuṃ vrātāḥ śatasahasraśaḥ |
vṛṣṭistathāvidhā hyāsīcchalabhānāmivāyatiḥ || 43 ||
[Analyze grammar]

abhracchāyāmiva śaraiḥ sainye kṛtvā dhanaṃjayaḥ |
muṇḍārdhamuṇḍajaṭilānaśucīñjaṭilānanān |
mlecchānaśātayatsarvānsametānastramāyayā || 44 ||
[Analyze grammar]

śaraiśca śataśo viddhāste saṃghāḥ saṃghacāriṇaḥ |
prādravanta raṇe bhītā girigahvaravāsinaḥ || 45 ||
[Analyze grammar]

gajāśvasādimlecchānāṃ patitānāṃ śataiḥ śaraiḥ |
vaḍāḥ kaṅkā vṛkā bhūmāvapibanrudhiraṃ mudā || 46 ||
[Analyze grammar]

pattyaśvarathanāgaiśca pracchannakṛtasaṃkramām |
śaravarṣaplavāṃ ghorāṃ keśaśaivalaśāḍvalām |
prāvartayannadīmugrāṃ śoṇitaughataraṅgiṇīm || 47 ||
[Analyze grammar]

śirastrāṇakṣudramatsyāṃ yugānte kālasaṃbhṛtām |
akarodgajasaṃbādhāṃ nadīmuttaraśoṇitām |
dehebhyo rājaputrāṇāṃ nāgāśvarathasādinām || 48 ||
[Analyze grammar]

yathā sthalaṃ ca nimnaṃ ca na syādvarṣati vāsave |
tathāsītpṛthivī sarvā śoṇitena pariplutā || 49 ||
[Analyze grammar]

ṣaṭsahasrānvarānvīrānpunardaśaśatānvarān |
prāhiṇonmṛtyulokāya kṣatriyānkṣatriyarṣabhaḥ || 50 ||
[Analyze grammar]

śaraiḥ sahasraśo viddhā vidhivatkalpitā dvipāḥ |
śerate bhūmimāsādya śailā vajrahatā iva || 51 ||
[Analyze grammar]

sa vājirathamātaṅgānnighnanvyacaradarjunaḥ |
prabhinna iva mātaṅgo mṛdnannaḍavanaṃ yathā || 52 ||
[Analyze grammar]

bhūridrumalatāgulmaṃ śuṣkendhanatṛṇolapam |
nirdahedanalo'raṇyaṃ yathā vāyusamīritaḥ || 53 ||
[Analyze grammar]

sainyāraṇyaṃ tava tathā kṛṣṇānilasamīritaḥ |
śarārciradahatkruddhaḥ pāṇḍavāgnirdhanaṃjayaḥ || 54 ||
[Analyze grammar]

śūnyānkurvanrathopasthānmānavaiḥ saṃstaranmahīm |
prānṛtyadiva saṃbādhe cāpahasto dhanaṃjayaḥ || 55 ||
[Analyze grammar]

vajrakalpaiḥ śarairbhūmiṃ kurvannuttaraśoṇitām |
prāviśadbhāratīṃ senāṃ saṃkruddho vai dhanaṃjayaḥ |
taṃ śrutāyustathāmbaṣṭho vrajamānaṃ nyavārayat || 56 ||
[Analyze grammar]

tasyārjunaḥ śaraistīkṣṇaiḥ kaṅkapatraparicchadaiḥ |
nyapātayaddhayāñśīghraṃ yatamānasya māriṣa |
dhanuścāsyāparaiśchittvā śaraiḥ pārtho vicakrame || 57 ||
[Analyze grammar]

ambaṣṭhastu gadāṃ gṛhya krodhaparyākulekṣaṇaḥ |
āsasāda raṇe pārthaṃ keśavaṃ ca mahāratham || 58 ||
[Analyze grammar]

tataḥ sa prahasanvīro gadāmudyamya bhārata |
rathamāvārya gadayā keśavaṃ samatāḍayat || 59 ||
[Analyze grammar]

gadayā tāḍitaṃ dṛṣṭvā keśavaṃ paravīrahā |
arjuno bhṛśasaṃkruddhaḥ so'mbaṣṭhaṃ prati bhārata || 60 ||
[Analyze grammar]

tataḥ śarairhemapuṅkhaiḥ sagadaṃ rathināṃ varam |
chādayāmāsa samare meghaḥ sūryamivoditam || 61 ||
[Analyze grammar]

tato'paraiḥ śaraiścāpi gadāṃ tasya mahātmanaḥ |
acūrṇayattadā pārthastadadbhutamivābhavat || 62 ||
[Analyze grammar]

atha tāṃ patitāṃ dṛṣṭvā gṛhyānyāṃ mahatīṃ gadām |
arjunaṃ vāsudevaṃ ca punaḥ punaratāḍayat || 63 ||
[Analyze grammar]

tasyārjunaḥ kṣuraprābhyāṃ sagadāvudyatau bhujau |
cicchedendradhvajākārau śiraścānyena patriṇā || 64 ||
[Analyze grammar]

sa papāta hato rājanvasudhāmanunādayan |
indradhvaja ivotsṛṣṭo yantranirmuktabandhanaḥ || 65 ||
[Analyze grammar]

rathānīkāvagāḍhaśca vāraṇāśvaśatairvṛtaḥ |
so'dṛśyata tadā pārtho ghanaiḥ sūrya ivāvṛtaḥ || 66 ||
[Analyze grammar]