Chapter 375

śrīnārāyaṇa uvāca |
śṛṇu lakṣmi pativratā'halyāsāmarthyamadbhutam |
gautamasya ṛṣeḥ patnī tvahalyā'bhūt pativratā || 1 ||
[Analyze grammar]

kumāre śarīre yasyāstejorāśiḥ samantataḥ |
abhūccandrasya paridhiryathā tathā'tra sarvadā || 2 ||
[Analyze grammar]

gaṃgātīre'vasatkāśyāṃ gautamo jñānavānṛṣiḥ |
brahmapuryāṃ parṇakuṭyāṃ samucchrāye sthale sadā || 3 ||
[Analyze grammar]

ekadā himaśaile'bhūnmuśaladhāravarṣaṇam |
jalapūrāṇi taṭayormaryādā sarito jahuḥ || 4 ||
[Analyze grammar]

vipatheṣu pravāhāśca dadruvurvai bhayaṃkarāḥ |
grāmān kheṭān kharvaṭāṃśca nītvā pūrāṇi cāvahan || 5 ||
[Analyze grammar]

kāśīmabhitaḥ salilaṃ paryavartata cocchrayam |
ṛṣayo munayaścānye prajāśca nimnabhūmigāḥ || 6 ||
[Analyze grammar]

jale magnā mṛtāḥ sarve hāhākāro babhūva ha |
lakṣaśaḥ koṭiśastatra magnā jānapadasthitāḥ || 7 ||
[Analyze grammar]

mānavāḥ paśavaḥ pakṣasahāyā vaninastathā |
gautamo dhyānamagnaśca dṛṣṭavān viplavaṃ layam || 8 ||
[Analyze grammar]

dhyānād bahiḥ samāgamya prāha patnīmahalyikām |
are paśya layaṃ vārikṛtaṃ sarvasvanāśakam || 9 ||
[Analyze grammar]

jalānyetāni gaṃgāyā gṛhaṃ te'bhidravantyapi |
ucchraye'pi pradeśe vai samāgacchanti vegataḥ || 10 ||
[Analyze grammar]

parṇaśālā tathā'haṃ tvaṃ bahiṣyāmaśca dhenavaḥ |
bahudhā pralayo jāto nā'dyā'pi sa nivartate || 11 ||
[Analyze grammar]

kiṃ kāryaṃ vada kalyāṇi jalaṃ sopānamāgatam |
paśya vatsā vatsataryaḥ krośanti jaladarśanāt || 12 ||
[Analyze grammar]

kuru śīghraṃ tathā yatnaṃ jīvāmastu yathā vayam |
nā'smadgṛhādaparo'trocchrayadeśo gṛhaṃ vinā || 13 ||
[Analyze grammar]

manuṣyā drumamālambya jīviṣyanti yathākatham |
gavāṃ kā vā dṛśā sādhvi mahākaṣṭamupasthitam || 14 ||
[Analyze grammar]

ityuktvā gautamo devaḥ śuśocā'śrubhṛdīkṣaṇāḥ |
ahalyā prāha taṃ svāmin yadbhāvi tadbhaviṣyati || 15 ||
[Analyze grammar]

paraṃ patimupaspṛśya calo prayatāmi vai |
ityuktvā prayayau sādhvī śīghraṃ parṇagṛhāntaram || 16 ||
[Analyze grammar]

agniṃ prajvālayāmāsa ghṛtena homamācarat |
sasmāra gaṃgāṃ cāhalyā pātivratyabalena vai || 17 ||
[Analyze grammar]

ehi gaṃge bhagini me kathaṃ nāśaṃ karoṣi vai |
yadi nā''yāsi kalyāṇi karomi tvāṃ hi bhasmasāt || 18 ||
[Analyze grammar]

gaṃgā bhītā samāyātā mūrtirūpā sukanyakā |
vavande kiṃkarī bhūtvā'halyāṃ gautamayoṣitam || 19 ||
[Analyze grammar]

ahalyā prāha tāṃ tūrṇaṃ kā gaṃge durdaśā kṛtā |
pralayaṃ te jalānyadya kurvanti prāṇināmati || 20 ||
[Analyze grammar]

śīghraṃ vāryupasaṃhāraṃ kuru gaṃge'nyathā kṣaṇāt |
havanaṃ te kariṣyāmi mṛtā yāsyasi vai layam || 21 ||
[Analyze grammar]

cakampe tatsamāśrutya prāha dīnā satīṃ prati |
kiṃ karomi mahāsādhvi na me doṣo'tra vidyate || 22 ||
[Analyze grammar]

himālayo viśālādrirjalāni na ruṇaddhi hi |
rakṣatyeva nahi svasmiṃstenā'yaṃ viplavo'sti vai || 23 ||
[Analyze grammar]

śrutvā'hasya''ha tāṃ gaṃgāṃ tiṣṭha sundari madgṛhe |
āhvayāmi himādriṃ ca tadupāyaṃ karomyapi || 24 ||
[Analyze grammar]

ityuktvā gautamapatnī sasmāra vahnisannidhau |
himālaya samāyāhi tvanyathā havanaṃ tava || 25 ||
[Analyze grammar]

kariṣye mā ciraṃ paśya prāṇināṃ kadanaṃ mahat |
tāvaccakampe girirāṭ mūrtimān samupāgataḥ || 26 ||
[Analyze grammar]

kāśyāmahalyā yatrā'sti natvā provāca tāṃ satīm |
vada devi kathaṃ cā'haṃ smṛtaścātra drutaṃ diśa || 27 ||
[Analyze grammar]

paśya vāripralayaṃ tvaṃ kathaṃ vāri na rakṣasi |
nirodhaṃ kuru cā'raṇye vārīṇāṃ parvateṣu ca || 28 ||
[Analyze grammar]

himālayastadā prāha mātaḥ śakto'smi tatra na |
nāsti tatra mama doṣo mayā rakṣyaṃ jalaṃ sadā || 29 ||
[Analyze grammar]

śikhareṣu jalaṃ me'sti droṇīṣu ca guhāsu ca |
udare cocchraye cā'dhityakopatyakikāsvapi || 30 ||
[Analyze grammar]

araṇyeṣu vaneṣūrdhvaṃ nadīṣvapi sthalīṣvapi |
yāvacchakyaṃ jalānyeva dhārayāmi samantataḥ || 31 ||
[Analyze grammar]

kintu vṛṣṭirativṛṣṭiḥ satataṃ saptavāsarāt |
divāniśaṃ patatyeva muśaladhārasadṛśī || 32 ||
[Analyze grammar]

ahaṃ jale nimagno'smi kiṃ karomi na śaktimān |
matpramāṇājalānyadya vardhante'tipatanti ca || 33 ||
[Analyze grammar]

na saṃharanti meghā vai vṛṣṭiṃ pralayakāriṇīm |
yadi meghāḥ saṃhareyurjalāni saṃyayuḥ kṣayam || 34 ||
[Analyze grammar]

śrutvā'halyā tamuvāca tiṣṭhā''hṛyāmi vārdharam |
āhutyā jaladaṃ tatra sasmāra drutamānasā || 35 ||
[Analyze grammar]

meghā mṛtyubhayodvignāstūrṇaṃ tatra samāyayuḥ |
prakampantaḥ pratasthuśca tānāha gautamapriyā || 36 ||
[Analyze grammar]

re re meghā ghātakāḥ stha kiṃ prālayo vicāritaḥ |
jalānāmupasaṃhāraṃ kurvantu drāṅ na cenmṛtāḥ || 37 ||
[Analyze grammar]

bhayaṃkaraṃ tu tacchrutvā kampamānāstu tāṃ satīm |
prāhurmātarna no doṣo doṣastvindrasya vidyate || 38 ||
[Analyze grammar]

vayaṃ tu kiṃkarāstasya varṣāmo vai tadājñayā |
trastāḥ śāntāḥ pariśrāntā jalahīnāḥ krudhā'pi nu || 39 ||
[Analyze grammar]

vajreṇa nihatāḥ sarve varṣāmo'tra kṣamasva naḥ |
sadā'kiṃcitkarāścendranideśakṛtajīvanāḥ || 40 ||
[Analyze grammar]

na tadājñāṃ vinā kiṃcit kartuṃ śaktāḥ sma sādhvike |
iti śrutvā ca meghānāṃ vacanāni mahāsatī || 41 ||
[Analyze grammar]

indraṃ sasmāra mantreṇa vahnimadhye juhāva ca |
tāvadindrāsanādindraḥ patito mantrakarṣitaḥ || 42 ||
[Analyze grammar]

vyomamārgeṇa tu śīghraṃ parṇakuṭyāṃ samāpatat |
mṛto'haṃ nāśito'haṃ ca rakṣantu devatāgaṇāḥ || 43 ||
[Analyze grammar]

iti bruvan parṇakuṭyāṃ tasthau sādhvīpratāpataḥ |
natvovāca mahāsādhvī mahendraṃ devabhūbhṛtam || 44 ||
[Analyze grammar]

are cendra pṛthivyāṃ vai prāṇināṃ kadanaṃ mahat |
jātaṃ vṛṣṭyā'nayā kasmāt saṃhāraṃ na karoṣi vai || 45 ||
[Analyze grammar]

jalasaṃhāramevā'dya śīghraṃ vai rodhanaṃ kuru |
anyathā te vahnimadhye kariṣye havanaṃ sura || 46 ||
[Analyze grammar]

ityuktaḥ sa mahākruddhaḥ kintu dṛṣṭvā pativratām |
vināśaṃ kṣaṇamadhye ca samupasthitamīkṣya ca || 47 ||
[Analyze grammar]

samayaṃ taṃ pravijñāya namratāyāḥ purandaraḥ |
provāca vai tadā meghān śīghraṃ kurvantu rodhanam || 48 ||
[Analyze grammar]

meghāḥ saṃkucitāstatra himādrau ca tathāpi vai |
jalānāṃ nimnatā nāsīt tadā prāha pativratā || 49 ||
[Analyze grammar]

indra meghāḥ gire gaṃge kathaṃ nāvataranti vai |
nimnagāni na dṛśyante jalāni pravadantu mām || 50 ||
[Analyze grammar]

indraḥ prāha mahāsādhvi varuṇo vāriṣu sthitaḥ |
sa saṃkocaṃ jale kuryāt syurniṃmnagāni vai tadā || 51 ||
[Analyze grammar]

sasmāra tu tadā sādhvī varuṇaṃ yādasāṃ patim |
jalādhidevarūpaṃ ca tāvatso'pi samāgataḥ || 52 ||
[Analyze grammar]

prāhā'halyā jaleśaṃ taṃ naiva paśyasi mardanam |
kīdṛśo'yaṃ layo jātaḥ saṃkocaya jalāni vai || 53 ||
[Analyze grammar]

anyathā te bhavenmṛtyurvahnau nātra vicāraṇā |
tāvatso'pi drutaṃ natvā prāṇāyāmāṃścakāra ha || 54 ||
[Analyze grammar]

tāvajjalāni saṃvegājjātāni ghaṭṭakāni hi |
nimnagāni babhūvuśca saṃkucitāni sarvataḥ || 55 ||
[Analyze grammar]

atha dṛṣṭvā duḥkhitān vai mṛtān sambandhibāndhavān |
dayāvatī tadā'halyā vahniṃ papraccha jīvanam || 56 ||
[Analyze grammar]

mṛtānāṃ vai punaścātra bhavedupāya ucyatām |
vahniścendro varuṇaśca gaṃgā meghāśca parvataḥ || 57 ||
[Analyze grammar]

sarve prāhuryamarājo jīvā'jīvaprado mataḥ |
ahalyā taṃ prasasmāra samāyāto yamastadā || 58 ||
[Analyze grammar]

samuvāca prāṃjalistāṃ kiṃ kāryaṃ me'tra sādhvike |
tamuvāca satī śīghraṃ jale'tra pralaye'tige || 59 ||
[Analyze grammar]

mṛtān manuṣyān vanino gṛhiṇo'raṇyavāsinaḥ |
paśūṃśca prāṇinaḥ pakṣijātīścānyān sarīsṛpān || 60 ||
[Analyze grammar]

sarvānakālānidhanān samujjīvaya madbalāt |
yadi nojjīvayeścādya tava mṛtyurupasthitaḥ || 61 ||
[Analyze grammar]

hoṣyāmi tvāṃ tṛṇamātraṃ śīghraṃ jīvaya vai mṛtān |
so'pi cakampe yamarāṭ provāca dīnamānasaḥ || 62 ||
[Analyze grammar]

ahaṃ rudrādhīnasattvaḥ saṃkarṣaṇānugaḥ sadā |
maraṇaṃ vai tadadhīnaṃ yathākarma ca dehinām || 63 ||
[Analyze grammar]

satī sasmāra rudraṃ taṃ saṃkarṣaṇaṃ ca tatkṣaṇāt |
kālakālau samāyātau satīṃ natvā hyupasthitau || 64 ||
[Analyze grammar]

satī prāha mṛtānsarvānujjīvayatāṃ ceśvarau |
anyathā pātivratyena hariṣye vāṃ prajīvanam || 65 ||
[Analyze grammar]

rudraḥ saṃkarṣaṇaścāha sṛṣṭiḥ puṣṭirvināśanam |
bhavatyeva kramāttvatra nārāyaṇavinirmitam || 66 ||
[Analyze grammar]

vayaṃ kartuṃ tathā'kartumanyathākartumityapi |
na samarthā bhavāmo'tra samarthaḥ śrīhariḥ paraḥ || 67 ||
[Analyze grammar]

satī sasmāra ca tadā kṛṣṇanārāyaṇaṃ harim |
pātivratyapratāpena haristatrā''yayau kṣaṇāt || 68 ||
[Analyze grammar]

hariṃ prāha satī natvā mahāvinayamānasā |
aho nārāyaṇa svāmin kṛṣṇanārāyaṇa prabho || 69 ||
[Analyze grammar]

mahāvṛṣṭilaye cātra koṭiśaḥ prāṇino mṛtāḥ |
mānavāḥ paśavaḥ pakṣijātayo jantavastathā || 70 ||
[Analyze grammar]

jīvayaitān hare kṛṣṇa tvakālamṛtyumāsthitān |
bhagavāṃstāṃ tadā prāha kuru saṃkalpameva ha || 71 ||
[Analyze grammar]

yadi dharmaḥ pātivratyātmakaḥ saṃpālito mayā |
tadā vṛṣṭipravegena mṛtā jīvantu jantavaḥ || 72 ||
[Analyze grammar]

ityājñayā harestatra tayā'halyākhyayā kṛtaḥ |
saṃkalpastāvadevaite jīvitā dehino'khilāḥ || 73 ||
[Analyze grammar]

teṣāṃ yatra śavānyāsaṃstatra tatra samutthitāḥ |
āsamudrapraparyantaṃ yāvanto jīvitāstadā || 74 ||
[Analyze grammar]

tāṃstu haryājñayā gaṃgā meghāścendrādayaḥ surāḥ |
himādriḥ salileśaśca rudraḥ saṃkarṣaṇastathā || 75 ||
[Analyze grammar]

nārāyaṇo yamaḥ kālo mṛtyuśca pārṣadā hareḥ |
sarvānnītvā yathāpūrvasthānaṃ teṣāṃ gṛhāṇi ca || 76 ||
[Analyze grammar]

prāpayāmāsureveśāḥ pātivratyaprabhāvataḥ |
surūpāṃ susamarthāṃ tāṃ navayauvanasundarīm || 77 ||
[Analyze grammar]

natvā sarve yayurdevāstato naijālayāṃstadā |
januṣā jīvitā ye jātāḥ sukhina eva te || 78 ||
[Analyze grammar]

indro dṛṣṭvā mumohā'tra gautamasya tu yoṣiti |
pativratāyāṃ devendro dūraṃ gatvā''jagāma ha || 79 ||
[Analyze grammar]

tadā dṛṣṭvā'pi paścāttāṃ nā'paśyad devarāḍ yataḥ |
yayau nirāśaḥ svargaṃ vai punaḥ kālāntare'gamat || 80 ||
[Analyze grammar]

tadāpi parṇakuṭyāṃ tāṃ sthitāṃ naiva dadarśa saḥ |
yato malinahṛdayo na dadarśa pativratām || 81 ||
[Analyze grammar]

punargatvā tataḥ svargaṃ kālāntare sa āyayau |
tadāpi tāṃ parṇakuṭyāṃ naivā'paśyat sthitāmapi || 82 ||
[Analyze grammar]

pāpānāṃ cā'pyaśuddhānāṃ malinā'guṇaśālinām |
nāryaḥ pativratāḥ kvāpi nā''yānti dṛṣṭigocaram || 83 ||
[Analyze grammar]

evamindro bahuvāraṃ samāgato gato'pi ca |
dharṣaṇārthamahalyāyāḥ kampamāno'pi mūrchitaḥ || 84 ||
[Analyze grammar]

kāmāndho na vijānāti mṛtyuṃ svasya parasya ca |
tataḥ kālāntare rātrau samāyāto bhuvastalam || 85 ||
[Analyze grammar]

yatrā''ste sā dharmamayī sādhvyahalyā pativratā |
tatra rātrau tvandhakāre paritaḥ prāsaranmahat || 86 ||
[Analyze grammar]

tejo dṛṣṭaṃ mahendreṇa gautamasyā''śramā'bhitaḥ |
so'vātaratpṛthivyāṃ vai tejaḥ paśyati kevalam || 87 ||
[Analyze grammar]

yathā vai pūrṇimācandrakaumudīmaṇḍalaṃ nvidam |
tatrā'halyāṃ na cā'paśyat punarnākaṃ yayau tadā || 88 ||
[Analyze grammar]

candrāya kathayāmāsa mānasīṃ vikṛtiṃ tathā |
tejomayaṃ divyarūpaṃ bhogyāhaṃ ciravāñchitam || 89 ||
[Analyze grammar]

candreṇā''veditaṃ tasmai bhavān gautamarūpadhṛk |
ahaṃ bhavāmi brāhmasya sūcakaḥ kukkuṭaḥ khalu || 90 ||
[Analyze grammar]

gacchāvo yatra sā cāste kurvaṃśchadmaṃ phalaṃ bhavet |
na bhaveccedbhavenmṛtyurnātra kāryā vicāraṇā || 91 ||
[Analyze grammar]

iti sammantrya tāvāstāṃ tadā biḍālakukkuṭau |
ardharātrottaraṃ gatvā gautamasya gṛhāntikam || 92 ||
[Analyze grammar]

jagau tu kukkuṭaścandro brāhmamuhūrtakūjanam |
gautamastattadā śrutvā yayau snānāya svarṇadīm || 93 ||
[Analyze grammar]

biḍālastu mahendro vai praviveśa gṛhe nalāt |
dhṛtvā gautamarūpaṃ sa jagāma śayane priyāḥ || 94 ||
[Analyze grammar]

ahalyā tu patiṃ dṛṣṭvā kāmabhāvena cāgatam |
cūmbanaṃ tvarpitavatī kāmabhogehayā''dṛtā || 95 ||
[Analyze grammar]

tāvattu gautamāya dyunadyā drāk saṃprabhāṣitam |
na brāhmo'yaṃ ṛṣe kālo gṛhe te kapaṭaṃ bhavet || 96 ||
[Analyze grammar]

yāhi śīghraṃ satīṃ paśya śrutvaitat gotamo drutam |
samāyāt svagṛhaṃ yāvattāvadbhoktuṃ sthitaṃ harim || 17 ||
[Analyze grammar]

indraṃ svarūpamāpannaṃ dadarśa kapaṭānvitam |
gautamastaṃ turāṣāhaṃ bhagalubdhaṃ vibhāvya vai || 98 ||
[Analyze grammar]

muniḥ śaśāpa śakraṃ ca bhagāṃgastvaṃ bhaveti hi |
ahalyā'pi jñātavatī patyanyaṃ taṃ tathāpi sā || 99 ||
[Analyze grammar]

patipratimārūpaṃ taṃ na śaśāpa pativratā |
nā''liṃganaṃ dadau yāvad gautamā'nyaṃ viveda sā || 100 ||
[Analyze grammar]

gautamāya svarūpāya daṇḍayogyāya cāpi sā |
samarthāpi mahādaṇḍaṃ na dadau patirūpiṇe || 101 ||
[Analyze grammar]

patireva samāyāti jānāti gautamaḥ svayam |
yāvannā''liṃganaṃ kurve tāvad daṇḍaṃ pradāsyati || 102 ||
[Analyze grammar]

iti kṛtvā tadā'halyā patirūpā'timāninī |
na dadau śāpamindrāya pratirdaṇḍaṃ dadau svayam || 103 ||
[Analyze grammar]

indro yonisahasrāḍhyo yayau svargaṃ malānvitaḥ |
candro guptatayā tasmād dudrāva bhayavihvalaḥ || 104 ||
[Analyze grammar]

gautamaḥ svāṃ tadā patnīṃ prāha saumye kimicchasi |
nātirūpaṃ sukhadā tu nārīmattvaṃ ca duḥkhadam || 105 ||
[Analyze grammar]

tvaṃ priye dharmamūrdhanyaṃ pālayasyeva sarvathā |
ahaṃ taptumanāḥ śaśvat dvayoḥ sāhyaṃ na saukhyadam || 106 ||
[Analyze grammar]

yadi tyajāmi vairāgyād duḥkhitā tvaṃ bhaviṣyasi |
yadi rakṣāmi matpārśve cintedṛśī hi jāyate || 107 ||
[Analyze grammar]

tasmād vada priye tvāṃ vai kiṃ karomi yathā punaḥ |
mama cintā na te dharmavighno mā ca bhavetpunaḥ || 108 ||
[Analyze grammar]

iti patyuḥ satī śrutvā patiṃ prāha pativratā |
nivasāmi sadā svāmin sthālyāmatrā''tmapārvatī || 109 ||
[Analyze grammar]

tathā tavā''sanarūpā hyupalā saṃvasāmyaham |
nityaṃ tavā''śritā svāmin tvayā'dhiṣṭhitabhūmikā || 110 ||
[Analyze grammar]

bhavāmi tena te cintā na syānna dharmavighnatā |
pātivratyaṃ sadā me ca rakṣitaṃ saṃbhaviṣyati || 111 ||
[Analyze grammar]

samuddhāraśca vai svāmiṃstava yogādbhaviṣyati |
ityuktvā sā patiṃ natvā'bhiṣiktā svāminā drutam || 112 ||
[Analyze grammar]

babhūva hyupalā tatra patipādāśrayā sadā |
patiḥ prāha dayitā svāṃ rāmaḥ śrībhagavān svayam || 113 ||
[Analyze grammar]

āgamiṣyati cātraiva viśrāntiṃ yāsyati tvayi |
tadā mayā saha patni vaikuṇṭhaṃ yāsyasi dhruvam || 114 ||
[Analyze grammar]

tāvattatra mano'bhīṣṭaṃ tapaḥ karomyahaṃ sadā |
nirāśino mahāśāntirmama te ca sadā'tra vai || 115 ||
[Analyze grammar]

āśāvantaḥ sadā duḥkhasāgarābdhau nimajjitāḥ |
pāraṃ yānti na saṃsārivāsanānāṃ kadācana || 116 ||
[Analyze grammar]

muktiḥ pāṣāṇakalpā ca priye vighnādivarjitā |
tvayā labdhā patisevā śilāsanamayī sadā || 117 ||
[Analyze grammar]

ahaṃ sthāsye śilāmūrdhni kariṣye'tra tapaściram |
tretāyāṃ rāmayogena yāsyāvaḥ paramaṃ padam || 118 ||
[Analyze grammar]

divyarūpeṇa tu sādhvi dvitīyena sadā mama |
sevāyā susthirā bhūtvā vartasvedaṃ mamepsitam || 119 ||
[Analyze grammar]

ityukto sā'bhavattatropalā'halyā pativratā |
svāmī tasyā upalāyāṃ tepe tu gautamastapaḥ || 120 ||
[Analyze grammar]

tretāyāṃ rāmayogena matau tau paramaṃ padam |
iti te kathitaṃ lakṣmi tvahalyaiśvaryamadbhutam |
paṭhanācchravaṇāccāsya pātivratyaṃ dṛḍhaṃ bhavet || 121 ||
[Analyze grammar]

iti śrīlakṣmīnārāyāṇīya saṃhitāyāṃ prathame kṛtayugasantāne pativratāmāhātmye'halyāyāḥ pātivratyapratāpenā'tivṛṣṭau kāśīsamplave gaṃgāhimādrimeghendravaruṇarudrasaṃkarṣaṇayamanārāyaṇādyāgamo'tivṛṣṭiśamanaṃ mṛtānāṃ jīvanamindrasyā'halyāsparśamātre bhagāṃgatā'halyāyā |
upalātvaṃ mokṣaṇaṃ cetyādinirūpaṇanāmā pañcasaptatyadhikatriśatatamo'dhyāyaḥ || 375 ||
[Analyze grammar]