Chapter 19

snidhairdāraiḥ suhṛdbhiśca maitrīmātranibandhanaiḥ |
campāyāṃ ramamāṇasya kālaḥ kaścidagādmama || 1 ||
[Analyze grammar]

ekadā prāsakaiḥ krīḍan saha gandharvadattayā |
sahasā pramadāveṣamapaśyaṃ puruṣaṃ puraḥ || 2 ||
[Analyze grammar]

kapālaśikhipiñchābhyāṃ virājitakaradvayam |
ayuktendradhanuśchāyaśṛṅgāragalakaṇṭhikam || 3 ||
[Analyze grammar]

gandharvadattayā cāsau dattasvāsanayā svayam |
prakṣālya caraṇau bhaktyā svālaṃkārairalaṃkṛtaḥ || 4 ||
[Analyze grammar]

tacca me gurugāmbhīryaṃ kvāpi nītamasūyayā |
yathā kesariśāvasya gandhahastijighāṃsayā || 5 ||
[Analyze grammar]

mamāsīdiyamevātra sadoṣā kulamāninī |
eṣa strīpuruṣaḥ śocyo yo na strī na pumāniti || 6 ||
[Analyze grammar]

māmuddiśya tatastena krodhāruṇitacakṣuṣā |
vadatā nihato'sīti vimuktaḥ śikhipicchakaḥ || 7 ||
[Analyze grammar]

sa me keśakalāpāgramīṣadāmṛśya yātavān |
nāgeṣuriva karṇāstraḥ kirīṭāgraṃ kirīṭinaḥ || 8 ||
[Analyze grammar]

svayameva ca tattasya kapālamapatatkarāt |
niḥsthāmnaḥ kuñjarasyeva vidhānaṃ vinaśiṣyataḥ || 9 ||
[Analyze grammar]

so'tha grāmeyakeneva dhiyā dhūrto'tisaṃdhitaḥ |
dhūmrachāyaḥ śanairjalpandhigdhiṅ māmiti nirgataḥ || 10 ||
[Analyze grammar]

atha gandharvadattā māṃ dīptāmarṣamaśaṅkitā |
savāḍavamupāsarpannimnageva mahārṇavam || 11 ||
[Analyze grammar]

mama tvāsīdaho strīṇāmatrāsamatrapaṃ manaḥ |
yatpureva pragalbheyamupasarpati māmiti || 12 ||
[Analyze grammar]

sā māmavocadbhīteva śītalībhavata kṣaṇam |
kiṃcidvijñāpayāmyeṣa yātu vaḥ krodhapāvakaḥ || 13 ||
[Analyze grammar]

ayaṃ vikaciko nāma gaurīśikharavāsinaḥ |
vidyādharapaterbhrātā gaurimuṇḍasya sādhakaḥ || 14 ||
[Analyze grammar]

bhūtavrataṃ ca nāmedaṃ bahuvidhnaṃ caratyayam |
samāpte'sminnavighnena vandhyāḥ syurno manorathaḥ || 15 ||
[Analyze grammar]

yā ca pūjayate taṃ strī gaurīvratavicāriṇam |
tasyai varaṃ mahāgaurī dayate śāpamanyathā || 16 ||
[Analyze grammar]

vijñāpayāmi saṃkṣiptaṃ krodhādanyo mahābalaḥ |
vihantā sarvasiddhīnāṃ nāsti vighnavināyakaḥ || 17 ||
[Analyze grammar]

siddhakalpaṃ ca tasyedaṃ khaṇḍayatyā mahāvratam |
tuṣṭayā toṣitā gaurī mayā yūyaṃ ca roṣitāḥ || 18 ||
[Analyze grammar]

tadetasyāsya yuṣmabhyaṃ kruddhebhyaḥ krudhyatastathā |
gaurībhraṣṭā mahāvidyā vidyeva tanumedhasaḥ || 19 ||
[Analyze grammar]

tena yuṣmākamevedaṃ kāryaṃ kurvāṇayā guru |
yanmayā roṣitā yūyametanme mṛṣyatāmiti || 20 ||
[Analyze grammar]

sa ca krodhagrahaścaṇḍaḥ śanakaiḥ śanakairmama |
dayitāmantravādinyā hṛdayādapasarpitaḥ || 21 ||
[Analyze grammar]

iti saṃjanitotsāhastayāhaṃ mantrasādhanaiḥ |
āsīnaḥ sānudāsena kadāciditi bhāṣitaḥ || 22 ||
[Analyze grammar]

āsīdihaiva campāyāmiṣṭabhāryo mahīpatiḥ |
tena dohadakaṃ pṛṣṭā bhāryāvocattrapāvatī || 23 ||
[Analyze grammar]

krīḍanmakarakumbhīrakulīrajhaṣakacchape |
krīḍeyaṃ saha yuṣmābhirjale jalanidheriti || 24 ||
[Analyze grammar]

rājñāpi magadhair sāṅgairbandhayitvāśu nimnagām |
saraḥ sāgaravistāramavandhyājñena khānitam || 25 ||
[Analyze grammar]

tatra nakrādisaṃsthānadāruyantranirantare |
vimānākārapotasthau tau rājānau viceratuḥ || 26 ||
[Analyze grammar]

ārabhya ca tataḥ kālāttatra yātrā pravartitā |
āhṛṣṭaparapuṣṭeṣu divaseṣu mahībhujā || 27 ||
[Analyze grammar]

te caite divasāḥ prāptāḥ paṭukokilakūjitāḥ |
sā ca yātreyamāyātā ramyāmṛtabhujāmapi || 28 ||
[Analyze grammar]

iṣyate yadi ca draṣṭuṃ saha gandharvadattayā |
asmadādiparīvāraistataḥ sā dṛśyatāmiti || 29 ||
[Analyze grammar]

abhinīya tato rātriṃ prātaḥ pravahaṇāśritaḥ |
nirgacchāmi sma campāyāḥ pauranetrotpalārcitaḥ || 30 ||
[Analyze grammar]

cakṣurmanoharārāmacchāyāmadhyāsitaṃ tataḥ |
pakkaṇaṃ dṛṣṭavānasmi rājarājapurojjvalam || 31 ||
[Analyze grammar]

tasya madhye ca mātaṅgaṃ gandhamātaṅgadhīratam |
kālamapyujjvalāyāmaṃ ghanāghanamivāmbudam || 32 ||
[Analyze grammar]

kālindīnīlakālīṃ ca vṛddhāṃ piṅgaśiroruhām |
dīptasaudāmanīcakrāṃ prāvṛṣeṇyāmiva kṣapām || 33 ||
[Analyze grammar]

dolālilāvilolā ca tatrādṛśyata kanyakā |
nīlanīrajamāleva komalānilalāsitā || 34 ||
[Analyze grammar]

cintitaṃ ca mayā kāntā yadi me kālikā bhavet |
iyameva tatastanvī kṣiptakuṅkumagauratā || 35 ||
[Analyze grammar]

sthānāccācalitaivāsau dṛṣṭyā māṃ dūramanvagāt |
mālayeva palāśānāmaṃśumantaṃ suvarcalā || 36 ||
[Analyze grammar]

tāṃ cāliṅgitavānasmi dṛṣṭyā dūrībhavannapi |
nitāntasnigdhayā prācīṃ prabhayeva divākaraḥ || 37 ||
[Analyze grammar]

snigdhe dṛṣṭī visarjyeti dūtikāpratidūtike |
tayā mama mayā tasyānītāḥ prāṇā vidheyatām || 38 ||
[Analyze grammar]

athārāmānabhikrudhyannāvayorvyavadhāyakān |
mātaṅgīṃ manasāgacchaṃ śarīreṇa mahāsaraḥ || 39 ||
[Analyze grammar]

sa ca yātrotsavaścitro mayānyāhitacetasā |
tatrasthenaiva no dṛṣṭaḥ saṃsāra iva yoginā || 40 ||
[Analyze grammar]

atha yātrotsave tatra pītveva madhu bhāskaraḥ |
mandamandaparispandastāmramaṇḍalatāmayāt || 41 ||
[Analyze grammar]

mama tvāsīd yathā devaḥ prācīṃ kamalinīpriyaḥ |
aprasādyaiva tāṃ bhānuḥ pratīcimupasarpati || 42 ||
[Analyze grammar]

tathā gandharvadattāyāḥ pura evānuvarṇya tām |
mātaṅgīmanusarpāmi yathā rājā tathā prajāḥ || 43 ||
[Analyze grammar]

atha vā mānuṣaireva yaḥ panthāḥ kāmibhirgataḥ |
tamevānugamiṣyāmi na devacaritaṃ caret || 44 ||
[Analyze grammar]

sānudāsamathāvocaṃ bharadvājātmajā tvayā |
pūrvameva sayānena nagarīmabhinīyatām || 45 ||
[Analyze grammar]

paścājjanasamūhasya gacchantyāḥ pathi pāṃsavaḥ |
parādhūsarayantyasyāḥ sotpalāmalakāvalīm || 46 ||
[Analyze grammar]

śobhāṃ yātrikalokasya paśyanpraviśataḥ puram |
purastādahamāyāmi saha nāgarakairiti || 47 ||
[Analyze grammar]

atha gandharvadattāyāṃ pravṛttāyāṃ puraṃ prati |
dārike dve parāvṛtya vanditvā māmavocatām || 48 ||
[Analyze grammar]

āvāmājñāpite devyā svāminaṃ nirvinodanam |
vinodayatamālāpairyuvāmaparuṣairiti || 49 ||
[Analyze grammar]

tataste madayitvāhaṃ toṣayitvā ca bhūṣaṇaiḥ |
paṭuvegena yānena pakkaṇāntikamāgamam || 50 ||
[Analyze grammar]

sāpi tatraiva dolāyāṃ sthitā mātaṅgasundarī |
gacchantamiva nirvyājamāgacchantaṃ samaikṣata || 51 ||
[Analyze grammar]

viśrabdhamatha tāṃ draṣṭuṃ śanairyānamacodayam |
tatastadapi saṃprāptaṃ javena kulaṭādvayam || 52 ||
[Analyze grammar]

āsīcca mama yal loke prasiddhamabhidhīyate |
śreyāṃsi bahuvighnāni bhavantīti tathaiva tat || 53 ||
[Analyze grammar]

duḥkhena ca gṛhaṃ gatvā śūnyaḥ saṃmānya ca priyām |
nidrāmabhilaṣāmi sma mātaṅgīsaṃgamāśayā || 54 ||
[Analyze grammar]

ardharātre tu sahasā pratibuddhā muneḥ sutā |
prayukte mayi ye dāsyau te pānīyamayācata || 55 ||
[Analyze grammar]

dhautapramṛṣṭavadanā svāditānanabhūṣaṇā |
upaveśya puro'kleśairapṛcchadbandhakīdvayam || 56 ||
[Analyze grammar]

aryaputreṇa mātaṅgī tayā vā lolanetrayā |
dṛṣṭo'yaṃ taraleneti tatastābhyāṃ niveditam || 57 ||
[Analyze grammar]

na tathā sāryaputreṇa prekṣitā jīrṇakanyakā |
netrābhyāmanimeṣābhyāmaryaputrastayā yathā || 58 ||
[Analyze grammar]

tataḥ prākpratibuddhaṃ māmapṛcchatsuprabhāsutā |
jāgratha svapithetyuccairjāgramīti mayoditam || 59 ||
[Analyze grammar]

tayoktamayamārambho yuṣmākaṃ dṛśyate yathā |
tathā nalinikāṃ nūnaṃ kartumicchasi māmiti || 60 ||
[Analyze grammar]

kvāsau nalinikā kā vā kasya veti mayodite |
bharadvājasutākhyātumupākrāmata vṛttakam || 61 ||
[Analyze grammar]

asti paścātsamudrānte svācāradhanavatprajam |
nagaraṃ kānanadvīpaṃ mahendranagaropamam || 62 ||
[Analyze grammar]

amahendraguṇastatra manujendraḥ prajāpriyaḥ |
putro manoharastasya saṃjñāyāpi manoharaḥ || 63 ||
[Analyze grammar]

viditāśeṣavedyo'pi gandhaśāstrapriyo'dhikam |
nānāruciṣu sattveṣu kasyacitkiṃcidīpsitam || 64 ||
[Analyze grammar]

suhṛdau bakulāśokau vasantasyeva tasya yau |
vasantamiva taṃ premṇā na kadācidamuñcatām || 65 ||
[Analyze grammar]

kadāciddvārapālena vanditvā rājasūnave |
kumārāvasathasthāya samitrāya niveditam || 66 ||
[Analyze grammar]

yuṣmān sumaṅgalo nāma buddhagandhānuśāsanaḥ |
agrāmyo dhīravacanaḥ kasmādapi didṛkṣate || 67 ||
[Analyze grammar]

gaccha praveśayetyuktvā dvārapālaṃ manoharaḥ |
vilepanamupādatta dhūpaṃ ca tvarito'dahat || 68 ||
[Analyze grammar]

sumaṅgalo'pyanujñātaḥ praviśya dvāradeśataḥ |
śiro nipīḍya pāṇibhyāṃ saṃkocyāṅgamapāsarat || 69 ||
[Analyze grammar]

anena mama dhūpena gandhamālyavivādinā |
āghrātena śiraḥśūlamutpannamiti cāvadat || 70 ||
[Analyze grammar]

ākṛṣṭe sthagikāyāśca svasyāḥ phalakasaṃpuṭe |
manoharaṃ muhuḥ paśyan svayaṃ dhūpamayojayat || 71 ||
[Analyze grammar]

tataḥ kṛtanamaskāraḥ sa manoharamabravīt |
sumanogandhasaṃvādī dhūpo'yaṃ dāhyatāmiti || 72 ||
[Analyze grammar]

tataḥ sabakulāśokastasmin gandhe manoharaḥ |
pratīto gandhaśāstrajñaṃ sumaṅgalamapūjayat || 73 ||
[Analyze grammar]

evaṃ ca kṛtasatkāro rājaputraṃ sumaṅgalaḥ |
dinaistricaturaireva caturaḥ paryatoṣayat || 74 ||
[Analyze grammar]

ekadā bakulāśokasumaṅgalapuraḥsaraḥ |
manoharāmagāddraṣṭuṃ yakṣasattrāṃ manoharaḥ || 75 ||
[Analyze grammar]

tatra tatra tatastena paśyatā tattadadbhutam |
yakṣīpratikṛtirdṛṣṭā vinyastā citrakarmaṇi || 76 ||
[Analyze grammar]

nirjīvāpi sphurantīva mūkāpi mṛduvāgiva |
citre nyastāpi sā tena citte nyastātirāgiṇā || 77 ||
[Analyze grammar]

draṣṭavyaṃ cānyadujjhitvā ramaṇaṃ cittacakṣuṣām |
sumanogandhadhūpādyaistāmevaikāmasevata || 78 ||
[Analyze grammar]

balavanmanmathāpāstabhogyābhogyavicāraṇaḥ |
nitambādambaraṃ tasyāḥ sa kilākraṣṭumaihata || 79 ||
[Analyze grammar]

citrabhittimatha tyaktvā sāpi padmeva padminīm |
viṣṇorvakṣa iva śyāmamasevata nabhastalam || 80 ||
[Analyze grammar]

uvāca rājaputraṃ ca nāmnāhaṃ sukumārikā |
yakṣī yakṣapateḥ śāpātprāptālekhyaśarīratām || 81 ||
[Analyze grammar]

tena kṣaṇikaroṣeṇa nārīṣu ca dayālunā |
śāpāntamarthitenāhamiti nidhyāya dhīritā || 82 ||
[Analyze grammar]

citranyastatanuṃ yastvāṃ manuṣyo'bhibhaviṣyati |
sa eva kṛtaśāpāntastava bhartā bhaviṣyati || 83 ||
[Analyze grammar]

iti tvaṃ rājarājena bhartā me pratipāditaḥ |
sadṛśo varadānena śāpo'pi hi mahātmanām || 84 ||
[Analyze grammar]

yadi te'sti mayi prītistataḥ krīḍatsurāsuram |
śailaṃ śrīkuñjanāmānaṃ yakṣāvāsaṃ vrajeriti || 85 ||
[Analyze grammar]

athāntardhiṃ gatā yakṣī mahāmohaṃ manoharaḥ |
taṃ cālokya tathāvasthaṃ viṣādaṃ bakulādayaḥ || 86 ||
[Analyze grammar]

labdhasaṃjñaśca tairuktaḥ śrutvā yakṣīkathāmasau |
alamākulatāṃ gatvā sulabhā sukumārikā || 87 ||
[Analyze grammar]

yadyasau durgamaḥ śailastatastaṃ sukumārikā |
yuṣmatsaṃbhogamicchantī na tathā kathayediti || 88 ||
[Analyze grammar]

ekadā pitaraṃ draṣṭuṃ sa gataḥ sasuhṛdgaṇaḥ |
siddhayātraṃ parāvṛttamapaśyatpotavāṇijam || 89 ||
[Analyze grammar]

rājño dattamahāratnaḥ sa rājñā kṛtasatkriyaḥ |
pṛṣṭastena bhavān kiṃ kimāścaryaṃ dṛṣṭavāniti || 90 ||
[Analyze grammar]

tenoktamambudhestīre devena vasatā satā |
dṛṣṭaṃ kiṃ nāma nāścaryamāścaryanidhirambudhiḥ || 91 ||
[Analyze grammar]

kiṃ tvekadāhamadrākṣaṃ hṛtapoto nabhasvatā |
sāndrahemaprabhāpiṅgaṃ tuṅgaśṛṅgasrajaṃ nagam || 92 ||
[Analyze grammar]

kimetaditi pṛṣṭaśca mayā niryāmako'vadat |
vṛddhaireṣa samākhyātaḥ śrīkuñjaḥ śṛṅgavāniti || 93 ||
[Analyze grammar]

evamādi nivedyāsau vāṇijaḥ svagṛhānagāt |
rājaputro'pi rājānaṃ natvā vāṇijamanvagāt || 94 ||
[Analyze grammar]

pradadāvatha sarvasvaṃ tasmai trāsena vāṇijaḥ |
rājaputrādgṛhaprāptādāḍhyaḥ ko nāma na traset || 95 ||
[Analyze grammar]

tenāpi sumanomālāmātramālabhya bhāṣitam |
na satkārakhalīkāramarhanti śiśavo guroḥ || 96 ||
[Analyze grammar]

kiṃ tu yastātapādebhyaḥ śrīkuñjaḥ kathitastvayā |
sa kutūhaline mahyaṃ spaṣṭamākhyāyatāmiti || 97 ||
[Analyze grammar]

pratyāśvastastatastasya vacobhirmadhurairasau |
śrīkuñjaṃ sahitaṃ cihnairityākhyātuṃ pracakrame || 98 ||
[Analyze grammar]

athaikadā madeneva mahāvyālo mataṅgajaḥ |
marutā tyājitasthairyo yātaḥ potaḥ svatantratām || 99 ||
[Analyze grammar]

praśāntotpātavātatvātsāgare cāmbarasthire |
citrākārānapaśyāma prāṇino jalacāriṇaḥ || 100 ||
[Analyze grammar]

kvacitkesariśārdūladvīpikhaḍgarkṣaśambarān |
yūthaśaḥ prastutakrīḍānunmajjananimajjanaiḥ || 101 ||
[Analyze grammar]

anyatrāviddhakarṇānāṃ strīpuṃsānāmavāsasām |
dhvanimātrakabhāṣāṇāṃ dvaṃdvāni paśudharmaṇām || 102 ||
[Analyze grammar]

kvacidutpatatastuṅgānnāgānāyatapakṣatīn |
pakṣacchedabhayālīnānnagāniva mahārṇavāt || 103 ||
[Analyze grammar]

avācca sahasā modaḥ kauveryāḥ pavanāhṛtaḥ |
yasyāghrāṇāya saṃpannaṃ manye ghrāṇamayaṃ jagat || 104 ||
[Analyze grammar]

drakṣyantaḥ saṃbhavaṃ tasya sakutūhaladṛṣṭayaḥ |
dūrādgirimapaśyāma ratnakūṭasthakiṃnaram || 105 ||
[Analyze grammar]

kimetaditi prṣṭaśca mayā niryāmako'bravīt |
vṛddhaireṣa samākhyātaḥ śrīkuñjaḥ śṛṅgavāniti || 106 ||
[Analyze grammar]

ityādi kathitaṃ tena yad yattattanmanoharaḥ |
sahasāgaradigdeśaṃ spaṣṭaṃ saṃpuṭake'likhat || 107 ||
[Analyze grammar]

āgamayya tataḥ potamāptaniryāmakāsthitam |
bakulādisahāyo'sāvagāhata mahārṇavam || 108 ||
[Analyze grammar]

anukūlamahāvegasamīrapreritena saḥ |
āsīdadacireṇaiva potena diśamīpsitām || 109 ||
[Analyze grammar]

sadṛśaiḥ sphalakasthānāṃ cihnairjanitaniścayaḥ |
manaścakṣuḥśarīraiḥ saḥ śrīkuñjaṃ yugapadgataḥ || 110 ||
[Analyze grammar]

ambhodhijalakalloladhautanīlopalaṃ tataḥ |
ākāśāśaviśāloccaṃ potaḥ sopānamāsadat || 111 ||
[Analyze grammar]

tatraiva suhṛdastyaktvā yadutkaṇṭho manoharaḥ |
tena śailāgramārohaddharmeneva tripiṣṭapam || 112 ||
[Analyze grammar]

yakṣastrīpuṃsavṛndaiśca prekṣyamāṇaḥ sasaṃmadaiḥ |
saṃkalpacakṣuṣā paśyannagacchatsukumārikām || 113 ||
[Analyze grammar]

tatra kāścidabhāṣanta kṛtārthā sukumārikā |
yayāsminnāhitaṃ prema narāmarakumārake || 114 ||
[Analyze grammar]

surāsuranarāṇāṃ hi kasyāyaṃ na manoharaḥ |
yo vṛtaḥ sahajāhāryaiḥ śarīrādiguṇairiti || 115 ||
[Analyze grammar]

prakrīḍantīmathāpaśyadviśāle mandirājire |
sve saṃkalpamaye yakṣīṃ vakṣasīva manoharaḥ || 116 ||
[Analyze grammar]

pratyudgamya tayā cāsau rūpājīvāpragalbhayā |
svinnakaṇṭakite pāṇau gṛhītvāntaḥ praveśitaḥ || 117 ||
[Analyze grammar]

tasyāḥ pitaramadrākṣīttatrārabdhadurodaram |
raktākṣaṃ śātakaumbhābhaṃ samadaṃ medurodaram || 118 ||
[Analyze grammar]

upaveśya ca tenāṅke ghrātvā mūrdhni mahoharaḥ |
śvaśrūḥ paśyetyanujñātaḥ praviveśāvarodhanam || 119 ||
[Analyze grammar]

yatra saṃpūrṇatāruṇyāḥ karṇikārasragujjvalāḥ |
śvaśrūśvaśurayostasya pitāmahyo'pi yoṣitaḥ || 120 ||
[Analyze grammar]

abhivādya ca tāstatra sa tābhirabhinanditaḥ |
anujñātaśca sasnehaṃ prāviśatkanyakāgṛham || 121 ||
[Analyze grammar]

divyasya madhunaḥ pānaṃ divyatantrīrutiśrutiḥ |
divyastrīsaṃprayogāśca manoharamano'haran || 122 ||
[Analyze grammar]

ityasau kṣaṇamāsīnaḥ sukumārikayoditaḥ |
atītā divasāḥ pañca kumāra pratigamyatām || 123 ||
[Analyze grammar]

devalokaikadeśo'yaṃ yattato'sminna labhyate |
sthātuṃ mānuṣamātreṇa pañcamāddivasātparam || 124 ||
[Analyze grammar]

bhavantaṃ ca parityajya gaccheyuḥ potavāhakāḥ |
vahanasvāminaṃ pañca pratīkṣante dināni te || 125 ||
[Analyze grammar]

śrutvedaṃ rājaputrasya devaputrasya yādṛśī |
svargataścyavamānasya dhyāmadhyāmābhavatprabhā || 126 ||
[Analyze grammar]

taṃ dṛṣṭvā tādṛśākāramavocatsukumārikā |
adyārabhya gamiṣyāmi tavaivāhaṃ gṛhāniti || 127 ||
[Analyze grammar]

sa tayā dhīrito gatvā potamudvignavāhakam |
tatraiva suhṛdo'paśyaddivyaratnāmbarasrajaḥ || 128 ||
[Analyze grammar]

sthitāḥ stha divasānetān kva kathaṃ veti coditāḥ |
tena te kathayanti sma yathā yūyaṃ tathā vayaṃ || 129 ||
[Analyze grammar]

sukumārikayādiṣṭāḥ prahṛṣṭā guhyakāṅganāḥ |
asmānupacaranti sma surāniva surāṅganāḥ || 130 ||
[Analyze grammar]

mahādevamupāsīnāmṛtā gacchanti mānuṣāḥ |
sevamānā vayaṃ devaṃ devatāmamṛtā gatāḥ || 131 ||
[Analyze grammar]

iti yakṣīkathāraktāmahādhvānaṃ mahābhayam |
tāsāmevānubhāvena saṃteruste mahodadhim || 132 ||
[Analyze grammar]

vyāpārairujjhitaṃ sarvaistrivargaprāptihetubhiḥ |
prāviśaṃstadviyogārtaṃ śūnyarājapathaṃ puram || 133 ||
[Analyze grammar]

athaikā brāhmaṇī vṛddhā kimarthamapi nirgatā |
avaguṣṭhitamūrdhānaṃ paśyati sma manoharam || 134 ||
[Analyze grammar]

tamasau pratyabhijñāya paritoṣaskhaladgatiḥ |
gatvā dhyānaparāsthānaṃ mahīpālamatoṣayat || 135 ||
[Analyze grammar]

mantriprabhṛtayastena vāritāḥ puravāsinaḥ |
mā vocaddārakaṃ kaścitkva gato'bhūdbhavāniti || 136 ||
[Analyze grammar]

rājaputro'pi rājānamavandata vilakṣakaḥ |
so'pi tasyāṅkamāropya harati sma vilakṣatām || 137 ||
[Analyze grammar]

svaṃ ca mandiramāgatya sa sumaṅgalamuktavān |
gandhaśāstraphalaṃ sāraṃ dhūpamāyojyatāmiti || 138 ||
[Analyze grammar]

adyāgacchati yuṣmākaṃ sakhībhiḥ sahitā sakhī |
sugandhitāpradhānaṃ ca ratamāhuraninditam || 139 ||
[Analyze grammar]

gandharājaśca yo'smākaṃ ghuṣyate yakṣakardamaḥ |
sa kardamasamastāsāmato'sau yakṣakardamaḥ || 140 ||
[Analyze grammar]

tasmādādaramāsthāya śāstramadya prakāśyatām |
dhanurvedasya kṛtsnasya viddhasāraṃ hi sauṣṭhavam || 141 ||
[Analyze grammar]

iti protsāhitastena svārthena ca sumaṅgalaḥ |
dhūpasnānīyagandhādi yathādeśamayojayat || 142 ||
[Analyze grammar]

manoharastu sasuhṛtkṛtakāmukaḍambaraḥ |
āsannadayitāśūnyāṃ duḥkhaśayyāmasevata || 143 ||
[Analyze grammar]

tataḥ sa tādṛśo gandhastathāyatnena sādhitaḥ |
preritaḥ paṭunānyena samīreṇeva toyadaḥ || 144 ||
[Analyze grammar]

bhāsā vicchāyayantīva candrakāntādicandrikām |
praviśya sahasāchyāsta paryaṅkaṃ sukumārikā || 145 ||
[Analyze grammar]

tataḥ sasmitamālokya bakulādīnuvāca sā |
sasahāyāhamāyātā yāta viśramyatāmiti || 146 ||
[Analyze grammar]

praṇamya teṣu yāteṣu kumārasukumārike |
yathā tathāvidhotkaṇṭhe tathāgamayatāṃ niśām || 147 ||
[Analyze grammar]

saṃbhogaramaṇīyaiśca śarīrairbakulādayaḥ |
prabhāte rājaputrāya rātrivṛttaṃ nyavedayan || 148 ||
[Analyze grammar]

rātrau rātrau sametānāṃ viyuktānāṃ divā divā |
iti saṃvatsaro yātastābhisteṣāmacetitatḥ || 149 ||
[Analyze grammar]

ekadā syandamānāśruḥ sākrandā sā tamabravīt |
svādhīnānāṃ parādhīnaiḥ saha saṃgatirīdṛśī || 150 ||
[Analyze grammar]

adyārabhya mayā devaḥ sevitavyo dhaneśvaraḥ |
sakhīsahitayā varṣaṃ gṛhītabrahmacaryayā || 151 ||
[Analyze grammar]

pitarau vandituṃ cāhamaṣṭamyādiṣu parvasu |
svagṛhāya gamiṣyāmi tatra gacchedbhavāniti || 152 ||
[Analyze grammar]

tvatsaṅgasubhagā yā diktāmapi prekṣya jīvyate |
ninditāmṛtapānena kiṃ punardarśanena te || 153 ||
[Analyze grammar]

tasyāmuktveti yātāyāmāyātā bakulādayaḥ |
khaṃ paśyantamapaśyaṃstamiyaṃ yātīti vādinam || 154 ||
[Analyze grammar]

tataḥ sabakulāśoke saśoke pārthivātmaje |
toṣagadgadavāguccairabhāṣata sumaṅgalaḥ || 155 ||
[Analyze grammar]

kimastāne viṣādena potamāruhya māmakam |
dṛṣṭamārgā muhūrtena yāmastaṃ guhyakācalam || 156 ||
[Analyze grammar]

dhyāyantastatra tāḥ kāntāḥ paśyantaścāntarāntarā |
saṃgamāśādhanaprāṇāyāpayāma samāmiti || 157 ||
[Analyze grammar]

tataḥ sa tena potena prasthitaśca mahārṇavam |
sa ca potaḥ samīreṇa dūraṃ hṛtvā vipāditaḥ || 158 ||
[Analyze grammar]

rājaputrastu dayitāṃ siddhāṃ vidyāmiva smaran |
tāṃ na cetitavāneva vipattiṃ māradāruṇām || 159 ||
[Analyze grammar]

uttīrṇasyaiva jaladhervelārodhāsi sarpataḥ |
caurasainyena saṃyamya tasyālaṃkaraṇaṃ hṛtam || 160 ||
[Analyze grammar]

tatastaskarasainyaṃ tadvājisainyena sarvataḥ |
veṣṭitaṃ kuṭṭitaṃ baddhamudbaddhaṃ pādapeṣu ca || 161 ||
[Analyze grammar]

ekaścārutarākāraḥ puruṣaḥ praṇipatya tam |
kariṇīpṛṣṭhamāropya sasainyaḥ prasthitaḥ puraḥ || 162 ||
[Analyze grammar]

adūraṃ cāntaraṃ gatvā bandistutiguṇānvayaḥ |
manoharaḥ puraṃ prāpatkuṅkumāliptacatvaram || 163 ||
[Analyze grammar]

ratnavandanamālānāṃ sa śṛṇvanpaṭuśiñjitam |
āgacchatkalarāsānāṃ nānāpattrisrajāmiva || 164 ||
[Analyze grammar]

purānurūpaśobhaṃ ca prāviśatsa nṛpālayam |
viśālamaṇḍapāsīnaṃ śakrākāraṃ narādhipam || 165 ||
[Analyze grammar]

avatīrya ca hastinyāḥ sa rājānamavandata |
gāḍhamāliṅgya tenāpi ciraṃ prītyā nirūpitaḥ || 166 ||
[Analyze grammar]

śarīrāvayavāndṛṣṭvā muhustasyāvadattataḥ |
kutaḥ sumaṅgalādanyaścakṣuṣmāniti bhūpatiḥ || 167 ||
[Analyze grammar]

āsīcca rājaputrasya sa evāyaṃ sumaṅgalaḥ |
bhavedahamiva bhraṣṭaḥ potabhaṅgabhayāditi || 168 ||
[Analyze grammar]

gaccha viśramya tāteti rājñoktaḥ prāviśatpuram |
apaśyannatamūrdhānaṃ sa tameva sumaṅgalam || 169 ||
[Analyze grammar]

pṛcchati sma ca taṃ bhadra mitre prāṇasame tava |
bhujau me bakulāśokau kaccitkuśalināviti || 170 ||
[Analyze grammar]

tenoktaṃ bakulāśokau gṛhān kuśalinau gatau |
yathā cāhamihāyātastathāśrotuṃ prasīdata || 171 ||
[Analyze grammar]

punaruktaguṇākhyānametat nāgapuraṃ puram |
dṛṣṭameva hi yuṣmābhirnṛpaścaiṣa puraṃdaraḥ || 172 ||
[Analyze grammar]

jayanta iti putro'sya śūraḥ cāruḥ kaviḥ paṭuḥ |
sa yena yūyamānītāḥ sāgaropāntakānanāt || 173 ||
[Analyze grammar]

sutā nalinikā nāma nṛpatestasya tādṛśī |
yasyā na pramadāloke na cāsti sadṛśo varaḥ || 174 ||
[Analyze grammar]

varaṃ varayatā tasyāḥ pitrā dvīpāntarāṇyapi |
guṇarūpāntarajñānaśālinaḥ prahitā hatāḥ || 175 ||
[Analyze grammar]

anena ca prapañcena yadā kālo bahurgataḥ |
tadā māmayamāhūya sadainyasmitamuktavān || 176 ||
[Analyze grammar]

tvaṃ na kevalamasmākaṃ sarvādhyakṣagaṇāgraṇīḥ |
nātho'pi bhava nastāta saṃkaṭāduddharannitaḥ || 177 ||
[Analyze grammar]

kulaśīlavayorūpairyaḥ syādasyāḥ samo varaḥ |
ādareṇa tamanviṣyestyaja śrīmadirārujam || 178 ||
[Analyze grammar]

bhūrisāradhanāḍhyo'pi guṇadraviṇadurgataḥ |
durgatebhyaḥ sudūreṇa śocanīyaḥ satāmiti || 179 ||
[Analyze grammar]

tato nalinikārūpamālikhya phalake mayā |
mahī sāṣṭādaśadvīpā parikrāntā varārthinā || 180 ||
[Analyze grammar]

yadā tu paṭuyatno'pi nālabhe varamīpsitam |
tadā tyaktumanaḥ prāṇānprāvivikṣaṃ mahodadhim || 181 ||
[Analyze grammar]

gataśca kānanadvīpaṃ dṛṣṭavānasmi saṃcaran |
yuṣmadguṇakathāsaktāḥ saṃtatāḥ sādhusaṃpadaḥ || 182 ||
[Analyze grammar]

tataḥ sa me sthirādhairyastādṛṅmaraṇaniścayaḥ |
jyotsnayeva tamorāśiryuṣmatkīrtyā nirākṛtaḥ || 183 ||
[Analyze grammar]

gandhaśāstravyasanino yuṣmānbuddhvā ca lokataḥ |
ātmāpi gandhaśāstrajñastadā vaḥ śrāvito mayā || 184 ||
[Analyze grammar]

tulyajñānasvabhāvā hi bhartṝṇāmanujīvinaḥ |
rañjayanti manaḥ kṣipraṃ guṇairapi nirākṛtāḥ || 185 ||
[Analyze grammar]

gandhamālyavisaṃvādī dhūpo yaccāpi dāhitaḥ |
suhṛdbhiḥ saha yuṣmābhirahaṃ jijñāsitastadā || 186 ||
[Analyze grammar]

yacca yojitavānasmi gandhamālyānuvādinam |
dhūpaṃ tatphalake nyastāmapaśyaṃ bhartṛdārikām || 187 ||
[Analyze grammar]

tāmālokya tato yuṣmānmanye'haṃ dhanyajanmanām |
ātmano rājaputryāśca vidhātuśca kṛtārthatām || 188 ||
[Analyze grammar]

so'haṃ svārthaparo yuṣmānapahartumito gataḥ |
yāvad yuṣmadguṇaireva hṛtaḥ sādhumanoharaiḥ || 189 ||
[Analyze grammar]

tathāpi satkṛto yuṣmān hartumevāhamudyataḥ |
pāpamadhyācarantyeva bhṛtyā bhartṛpriyepsavaḥ || 190 ||
[Analyze grammar]

puṇyairnalinikāyāśca yuṣmatsaṃgamahetubhiḥ |
sevācārāpadeśena gataiva sukumārikā || 191 ||
[Analyze grammar]

idaṃ cāntaramāsādya mayā yūyaṃ tvarāvatā |
saṃnidhāpitapotena samudramavatāritāḥ || 192 ||
[Analyze grammar]

pradeśe yatra cāmbhodhirvipannaṃ vahanaṃ vahet |
vipannavahanastatra na ca kaścana vidyate || 193 ||
[Analyze grammar]

tena tau bakulāśokāvavipannau gṛhān gatau |
idaṃ ca puramāyātāyathā yūyaṃ tathā vayam || 194 ||
[Analyze grammar]

tasmānnalinikādyaiva yuṣmābhiranugamyatām |
na hi śrīḥ svayamāyāntī kālātikramamarhati || 195 ||
[Analyze grammar]

manoharastu tāṃ prāpya sarvākāramanoharām |
yathākāmamupābhuṅkta karī kamālinīmiva || 196 ||
[Analyze grammar]

sumaṅgalena sā coktā mā sma śethāḥ pṛthaṅniśi |
patyuste dayitā yakṣī maivaṃ naiṣīdasāviti || 197 ||
[Analyze grammar]

kupitā rājaputrāya rājaputrī kadācana |
unnidraiva sanidreva suptā kila pṛthakkṣaṇam || 198 ||
[Analyze grammar]

atha sevāvadhau pūrṇe varṣānte sukumārikā |
śayitaṃ pṛthagāsādya manoharamapāharat || 199 ||
[Analyze grammar]

yathā nalinikābhartā sukumārikayā hṛtaḥ |
yuṣmānapi haredeṣā tathā mātaṅgakanyakā || 200 ||
[Analyze grammar]

manyadhve yādṛśīmenāṃ kanyakā neyamīdṛśī |
na hi caṇḍālakanyāsu rajyante devasūnavaḥ || 201 ||
[Analyze grammar]

idaṃ nalinikāvṛttaṃ smṛtvā yūyaṃ mayoditāḥ |
na me nalinikāvārttā virasāntā bhavediti || 202 ||
[Analyze grammar]

ananyagatasaṃkalpamevaṃ māṃ mā sma kalpayaḥ |
iti jihmaṃ purastasyāḥ kāmukācāramācaram || 203 ||
[Analyze grammar]

gandharvadattāvacanātpriyatvaṃ mātaṅgakanyā sutarāmagānme |
madaṃ vidhatte madirā prakṛtyā kimaṅga kāntānanasaṅgaramyā || 204 ||
[Analyze grammar]