Chapter 9

[English text for this chapter is available]

maitreya uvāca |
te evamutsannabhayā urukrame |
kṛtāvanāmāḥ prayayustriviṣṭapam |
sahasraśīrṣāpi tato garutmatā |
madhorvanaṃ bhṛtyadidṛkṣayā gataḥ || 1 ||
[Analyze grammar]

sa vai dhiyā yogavipākatīvrayā |
hṛtpadmakośe sphuritaṃ taḍitprabham |
tirohitaṃ sahasaivopalakṣya |
bahiḥsthitaṃ tadavasthaṃ dadarśa || 2 ||
[Analyze grammar]

taddarśanenāgatasādhvasaḥ kṣitau |
avandatāṅgaṃ vinamayya daṇḍavat |
dṛgbhyāṃ prapaśyan prapibannivārbhakaḥ |
cumbannivāsyena bhujairivāśliṣan || 3 ||
[Analyze grammar]

sa taṃ vivakṣantamatadvidaṃ hariḥ |
jñātvāsya sarvasya ca hṛdyavasthitaḥ |
kṛtāñjaliṃ brahmamayena kambunā |
pasparśa bālaṃ kṛpayā kapole || 4 ||
[Analyze grammar]

sa vai tadaiva pratipāditāṃ giraṃ |
daivīṃ parijñātaparātmanirṇayaḥ |
taṃ bhaktibhāvo'bhyagṛṇādasatvaraṃ |
pariśrutoruśravasaṃ dhruvakṣitiḥ || 5 ||
[Analyze grammar]

dhruva uvāca |
yo'ntaḥ praviśya mama vācamimāṃ prasuptāṃ |
saṃjīvayatyakhilaśaktidharaḥ svadhāmnā |
anyāṃśca hastacaraṇaśravaṇatvagādīn |
prāṇānnamo bhagavate puruṣāya tubhyam || 6 ||
[Analyze grammar]

ekastvameva bhagavan idamātmaśaktyā |
māyākhyayoruguṇayā mahadādyaśeṣam |
sṛṣṭvānuviśya puruṣastadasad‍guṇeṣu |
nāneva dāruṣu vibhāvasuvadvibhāsi || 7 ||
[Analyze grammar]

tvaddattayā vayunayedamacaṣṭa viśvaṃ |
suptaprabuddha iva nātha bhavatprapannaḥ |
tasyāpavargyaśaraṇaṃ tava pādamūlaṃ |
vismaryate kṛtavidā kathamārtabandho || 8 ||
[Analyze grammar]

nūnaṃ vimuṣṭamatayastava māyayā te |
ye tvāṃ bhavāpyayavimokṣaṇamanyahetoḥ |
arcanti kalpakataruṃ kuṇapopabhogyam |
icchanti yatsparśajaṃ niraye'pi nṝṇām || 9 ||
[Analyze grammar]

yā nirvṛtistanubhṛtāṃ tava pādapadma |
dhyānād‍bhavajjanakathāśravaṇena vā syāt |
sā brahmaṇi svamahimanyapi nātha mā bhūt |
kiṃ tvantakāsilulitātpatatāṃ vimānāt || 10 ||
[Analyze grammar]

bhaktiṃ muhuḥ pravahatāṃ tvayi me prasaṅgo |
bhūyādananta mahatāṃ amalāśayānām |
yenāñjasolbaṇamuruvyasanaṃ bhavābdhiṃ |
neṣye bhavad‍guṇakathāmṛtapānamattaḥ || 11 ||
[Analyze grammar]

te na smarantyatitarāṃ priyamīśa martyaṃ |
ye cānvadaḥ sutasuhṛd‍gṛhavittadārāḥ |
ye tvabjanābha bhavadīyapadāravinda |
saugandhyalubdhahṛdayeṣu kṛtaprasaṅgāḥ || 12 ||
[Analyze grammar]

tiryaṅnagadvijasarīsṛpadevadaitya |
martyādibhiḥ paricitaṃ sadasadviśeṣam |
rūpaṃ sthaviṣṭhamaja te mahadādyanekaṃ |
nātaḥ paraṃ parama vedmi na yatra vādaḥ || 13 ||
[Analyze grammar]

kalpānta etadakhilaṃ jaṭhareṇa gṛhṇan |
śete pumān svadṛganantasakhastadaṅke |
yannābhisindhuruhakāñcana lokapadma |
garbhe dyumānbhagavate praṇato'smi tasmai || 14 ||
[Analyze grammar]

tvaṃ nityamuktapariśuddhavibuddha ātmā |
kūṭastha ādipuruṣo bhagavān tryadhīśaḥ |
yad‍buddhyavasthitimakhaṇḍitayā svadṛṣṭyā |
draṣṭā sthitāvadhimakho vyatirikta āsse || 15 ||
[Analyze grammar]

yasmin viruddhagatayo hyaniśaṃ patanti |
vidyādayo vividhaśaktaya ānupūrvyāt |
tad‍brahma viśvabhavamekamanantamādyam |
ānandamātramavikāramahaṃ prapadye || 16 ||
[Analyze grammar]

satyāśiṣo hi bhagavan tava pādapadmam |
āśīstathānubhajataḥ puruṣārthamūrteḥ |
apyevamārya bhagavānparipāti dīnān |
vāśreva vatsakamanugrahakātaro'smān || 17 ||
[Analyze grammar]

maitreya uvāca |
athābhiṣṭuta evaṃ vai satsaṅkalpena dhīmatā |
bhṛtyānurakto bhagavān pratinandyedamabravīt || 18 ||
[Analyze grammar]

śrībhagavānuvāca |
vedāhaṃ te vyavasitaṃ hṛdi rājanyabālaka |
tatprayacchāmi bhadraṃ te durāpaṃ api suvrata || 19 ||
[Analyze grammar]

nānyairadhiṣṭhitaṃ bhadra yad‍bhrājiṣṇu dhruvakṣiti |
yatra graharkṣatārāṇāṃ jyotiṣāṃ cakramāhitam || 20 ||
[Analyze grammar]

meḍhyāṃ gocakravatsthāsnu parastātkalpavāsinām |
dharmo'gniḥ kaśyapaḥ śukro munayo ye vanaukasaḥ |
caranti dakṣiṇīkṛtya bhramanto yatsatārakāḥ || 21 ||
[Analyze grammar]

prasthite tu vanaṃ pitrā dattvā gāṃ dharmasaṃśrayaḥ |
ṣaṭtriṃśad varṣasāhasraṃ rakṣitāvyāhatendriyaḥ || 22 ||
[Analyze grammar]

tvad‍bhrātaryuttame naṣṭe mṛgayāyāṃ tu tanmanāḥ |
anveṣantī vanaṃ mātā dāvāgniṃ sā pravekṣyati || 23 ||
[Analyze grammar]

iṣṭvā māṃ yajñahṛdayaṃ yajñaiḥ puṣkaladakṣiṇaiḥ |
bhuktvā cehāśiṣaḥ satyā ante māṃ saṃsmariṣyasi || 24 ||
[Analyze grammar]

tato gantāsi matsthānaṃ sarvalokanamaskṛtam |
upariṣṭādṛṣibhyastvaṃ yato nāvartate gataḥ || 25 ||
[Analyze grammar]

maitreya uvāca |
ityarcitaḥ sa bhagavān atidiśyātmanaḥ padam |
bālasya paśyato dhāma svaṃ agād garuḍadhvajaḥ || 26 ||
[Analyze grammar]

so'pi saṅkalpajaṃ viṣṇoḥ pādasevopasāditam |
prāpya saṅkalpanirvāṇaṃ nātiprīto'bhyagātpuram || 27 ||
[Analyze grammar]

vidura uvāca |
sudurlabhaṃ yatparamaṃ padaṃ hareḥ |
māyāvinastat caraṇārcanārjitam |
labdhvāpyasiddhārthamivaikajanmanā |
kathaṃ svamātmānamamanyatārthavit || 28 ||
[Analyze grammar]

maitreya uvāca |
mātuḥ sapat‍nyā vāgbāṇaiḥ hṛdi viddhastu tān smaran |
naicchanmuktipatermuktiṃ tasmāt tāpamupeyivān || 29 ||
[Analyze grammar]

dhruva uvāca |
samādhinā naikabhavena yatpadaṃ |
viduḥ sanandādaya ūrdhvaretasaḥ |
māsairahaṃ ṣaḍbhiramuṣya pādayoḥ |
chāyāmupetyāpagataḥ pṛthaṅmatiḥ || 30 ||
[Analyze grammar]

aho bata mamānātmyaṃ mandabhāgyasya paśyata |
bhavacchidaḥ pādamūlaṃ gatvā yāce yadantavat || 31 ||
[Analyze grammar]

matirvidūṣitā devaiḥ patadbhiḥ asahiṣṇubhiḥ |
yo nāradavacastathyaṃ nāgrāhiṣamasattamaḥ || 32 ||
[Analyze grammar]

daivīṃ māyāmupāśritya prasupta iva bhinnadṛk |
tapye dvitīye'pyasati bhrātṛbhrātṛvyahṛdrujā || 33 ||
[Analyze grammar]

mayaitatprārthitaṃ vyarthaṃ cikitseva gatāyuṣi |
prasādya jagadātmānaṃ tapasā duṣprasādanam |
bhavacchidamayāce'haṃ bhavaṃ bhāgyavivarjitaḥ || 34 ||
[Analyze grammar]

svārājyaṃ yacchato mauḍhyān māno me bhikṣito bata |
īśvarātkṣīṇapuṇyena phalīkārānivādhanaḥ || 35 ||
[Analyze grammar]

maitreya uvāca |
na vai mukundasya padāravindayo |
rajojuṣastāta bhavādṛśā janāḥ |
vāñchanti taddāsyamṛte'rthamātmano |
yadṛcchayā labdhamanaḥsamṛddhayaḥ || 36 ||
[Analyze grammar]

ākarṇyātmajamāyāntaṃ samparetya yathā'gatam |
rājā na śraddadhe bhadraṃ abhadrasya kuto mama || 37 ||
[Analyze grammar]

śraddhāya vākyaṃ devarṣeḥ harṣavegena dharṣitaḥ |
vārtāharturatiprīto hāraṃ prādānmahādhanam || 38 ||
[Analyze grammar]

sadaśvaṃ rathamāruhya kārtasvarapariṣkṛtam |
brāhmaṇaiḥ kulavṛddhaiśca paryasto'mātyabandhubhiḥ || 39 ||
[Analyze grammar]

śaṅkhadundubhinādena brahmaghoṣeṇa veṇubhiḥ |
niścakrāma purāt tūrṇaṃ ātmajābhīkṣaṇotsukaḥ || 40 ||
[Analyze grammar]

sunītiḥ suruciścāsya mahiṣyau rukmabhūṣite |
āruhya śibikāṃ sārdhaṃ uttamenābhijagmatuḥ || 41 ||
[Analyze grammar]

taṃ dṛṣṭvopavanābhyāśa āyāntaṃ tarasā rathāt |
avaruhya nṛpastūrṇaṃ āsādya premavihvalaḥ || 42 ||
[Analyze grammar]

parirebhe'ṅgajaṃ dorbhyāṃ dīrghotkaṇṭhamanāḥ śvasan |
viṣvaksenāṅghrisaṃsparśa hatāśeṣāghabandhanam || 43 ||
[Analyze grammar]

athājighran muhurmūrdhni śītairnayanavāribhiḥ |
snāpayāmāsa tanayaṃ jātoddāmamanorathaḥ || 44 ||
[Analyze grammar]

abhivandya pituḥ pādau āśīrbhiścābhimantritaḥ |
nanāma mātarau śīrṣṇā satkṛtaḥ sajjanāgraṇīḥ || 45 ||
[Analyze grammar]

surucistaṃ samutthāpya pādāvanatamarbhakam |
pariṣvajyāha jīveti bāṣpagad‍gadayā girā || 46 ||
[Analyze grammar]

yasya prasanno bhagavān guṇairmaitryādibhirhariḥ |
tasmai namanti bhūtāni nimnamāpa iva svayam || 47 ||
[Analyze grammar]

uttamaśca dhruvaścobhau anyonyaṃ premavihvalau |
aṅgasaṅgād utpulakau asraughaṃ muhurūhatuḥ || 48 ||
[Analyze grammar]

sunītirasya jananī prāṇebhyo'pi priyaṃ sutam |
upaguhya jahāvādhiṃ tadaṅgasparśanirvṛtā || 49 ||
[Analyze grammar]

payaḥ stanābhyāṃ susrāva netrajaiḥ salilaiḥ śivaiḥ |
tadābhiṣicyamānābhyāṃ vīra vīrasuvo muhuḥ || 50 ||
[Analyze grammar]

tāṃ śaśaṃsurjanā rājñīṃ diṣṭyā te putra ārtihā |
pratilabdhaściraṃ naṣṭo rakṣitā maṇḍalaṃ bhuvaḥ || 51 ||
[Analyze grammar]

abhyarcitastvayā nūnaṃ bhagavān praṇatārtihā |
yadanudhyāyino dhīrā mṛtyuṃ jigyuḥ sudurjayam || 52 ||
[Analyze grammar]

lālyamānaṃ janairevaṃ dhruvaṃ sabhrātaraṃ nṛpaḥ |
āropya kariṇīṃ hṛṣṭaḥ stūyamāno'viśatpuram || 53 ||
[Analyze grammar]

tatra tatropasaṅkḷptaiḥ lasan makaratoraṇaiḥ |
savṛndaiḥ kadalīstambhaiḥ pūgapotaiśca tadvidhaiḥ || 54 ||
[Analyze grammar]

cūtapallavavāsaḥsraṅ muktādāmavilambibhiḥ |
upaskṛtaṃ pratidvāraṃ apāṃ kumbhaiḥ sadīpakaiḥ || 55 ||
[Analyze grammar]

prākāraiḥ gopurāgāraiḥ śātakumbhaparicchadaiḥ |
sarvato'laṅkṛtaṃ śrīmad vimānaśikharadyubhiḥ || 56 ||
[Analyze grammar]

mṛṣṭacatvararathyāṭṭa mārgaṃ candanacarcitam |
lājākṣataiḥ puṣpaphalaiḥ taṇḍulairbalibhiryutam || 57 ||
[Analyze grammar]

dhruvāya pathi dṛṣṭāya tatra tatra purastriyaḥ |
siddhārthākṣatadadhyambu dūrvāpuṣpaphalāni ca || 58 ||
[Analyze grammar]

upajahruḥ prayuñjānā vātsalyādāśiṣaḥ satīḥ |
śṛṇvan tadvalgugītāni prāviśad‍bhavanaṃ pituḥ || 59 ||
[Analyze grammar]

mahāmaṇivrātamaye sa tasmin bhavanottame |
lālito nitarāṃ pitrā nyavasad divi devavat || 60 ||
[Analyze grammar]

payaḥphenanibhāḥ śayyā dāntā rukmaparicchadāḥ |
āsanāni mahārhāṇi yatra raukmā upaskarāḥ || 61 ||
[Analyze grammar]

yatra sphaṭikakuḍyeṣu mahāmārakateṣu ca |
maṇipradīpā ābhānti lalanārat‍nasaṃyutāḥ || 62 ||
[Analyze grammar]

udyānāni ca ramyāṇi vicitrairamaradrumaiḥ |
kūjadvihaṅgamithunaiḥ gāyanmattamadhuvrataiḥ || 63 ||
[Analyze grammar]

vāpyo vaidūryasopānāḥ padmotpalakumudvatīḥ |
haṃsakāraṇḍavakulaiḥ juṣṭāścakrāhvasārasaiḥ || 64 ||
[Analyze grammar]

uttānapādo rājarṣiḥ prabhāvaṃ tanayasya tam |
śrutvā dṛṣṭvād‍bhutatamaṃ prapede vismayaṃ param || 65 ||
[Analyze grammar]

vīkṣyoḍhavayasaṃ taṃ ca prakṛtīnāṃ ca sammatam |
anuraktaprajaṃ rājā dhruvaṃ cakre bhuvaḥ patim || 66 ||
[Analyze grammar]

ātmānaṃ ca pravayasaṃ ākalayya viśāmpatiḥ |
vanaṃ viraktaḥ prātiṣṭhad vimṛśannātmano gatim || 67 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ |
caturthaskandhe dhruvarājyābhiṣeka varṇanaṃ nāma navamo'dhyāyaḥ || 9 ||
[Analyze grammar]