Chapter 28

[English text for this chapter is available]

śrībhagavānuvāca |
yogasya lakṣaṇaṃ vakṣye sabījasya nṛpātmaje |
mano yenaiva vidhinā prasannaṃ yāti satpatham || 1 ||
[Analyze grammar]

svadharmācaraṇaṃ śaktyā vidharmācca nivartanam |
daivāllabdhena santoṣa ātmavit caraṇārcanam || 2 ||
[Analyze grammar]

grāmyadharmanivṛttiśca mokṣadharmaratistathā |
mitamedhyādanaṃ śaśvad viviktakṣemasevanam || 3 ||
[Analyze grammar]

ahiṃsā satyamasteyaṃ yāvadarthaparigrahaḥ |
brahmacaryaṃ tapaḥ śaucaṃ svādhyāyaḥ puruṣārcanam || 4 ||
[Analyze grammar]

maunaṃ sadā'sanajayaḥ sthairyaṃ prāṇajayaḥ śanaiḥ |
pratyāhāraścendriyāṇāṃ viṣayānmanasā hṛdi || 5 ||
[Analyze grammar]

svadhiṣṇyānāṃ ekadeśe manasā prāṇadhāraṇam |
vaikuṇṭhalīlābhidhyānaṃ samādhānaṃ tathātmanaḥ || 6 ||
[Analyze grammar]

etaiḥ anyaiśca pathibhiḥ mano duṣṭamasatpatham |
buddhyā yuñjīta śanakaiḥ jitaprāṇo hyatandritaḥ || 7 ||
[Analyze grammar]

śucau deśe pratiṣṭhāpya vijitāsana āsanam |
tasmin svasti samāsīna ṛjukāyaḥ samabhyaset || 8 ||
[Analyze grammar]

prāṇasya śodhayenmārgaṃ pūrakumbhakarecakaiḥ |
pratikūlena vā cittaṃ yathā sthiraṃ acañcalam || 9 ||
[Analyze grammar]

mano'cirātsyād virajaṃ jitaśvāsasya yoginaḥ |
vāyvagnibhyāṃ yathā lohaṃ dhmātaṃ tyajati vai malam || 10 ||
[Analyze grammar]

prāṇāyāmaiḥ dahed doṣān dhāraṇābhiśca kilbiṣān |
pratyāhāreṇa saṃsargān dhyānenānīśvarānguṇān || 11 ||
[Analyze grammar]

yadā manaḥ svaṃ virajaṃ yogena susamāhitam |
kāṣṭhāṃ bhagavato dhyāyet svanāsāgrāvalokanaḥ || 12 ||
[Analyze grammar]

prasannavadanāmbhojaṃ padmagarbhāruṇekṣaṇam |
nīlotpaladalaśyāmaṃ śaṅkhacakragadādharam || 13 ||
[Analyze grammar]

lasatpaṅkaja kiñjalka pītakauśeyavāsasam |
śrīvatsavakṣasaṃ bhrājat kaustubhāmuktakandharam || 14 ||
[Analyze grammar]

mattadvirephakalayā parītaṃ vanamālayā |
parārdhyahāravalaya kirīṭāṅgadanūpuram || 15 ||
[Analyze grammar]

kāñcīguṇollasat śroṇiṃ hṛdayāmbhojaviṣṭaram |
darśanīyatamaṃ śāntaṃ manonayana vardhanam || 16 ||
[Analyze grammar]

apīcyadarśanaṃ śaśvat sarvalokanamaskṛtam |
santaṃ vayasi kaiśore bhṛtyānugrahakātaram || 17 ||
[Analyze grammar]

kīrtanyatīrthayaśasaṃ puṇyaślokayaśaskaram |
dhyāyeddevaṃ samagrāṅgaṃ yāvanna cyavate manaḥ || 18 ||
[Analyze grammar]

sthitaṃ vrajantamāsīnaṃ śayānaṃ vā guhāśayam |
prekṣaṇīyehitaṃ dhyāyet śuddhabhāvena cetasā || 19 ||
[Analyze grammar]

tasminlabdhapadaṃ cittaṃ sarvāvayavasaṃsthitam |
vilakṣyaikatra saṃyujyād aṅge bhagavato muniḥ || 20 ||
[Analyze grammar]

sañcintayed bhagavataścaraṇāravindaṃ |
vajrāṅkuśadhvaja saroruha lāñchanāḍhyam |
uttuṅgaraktavilasan nakhacakravāla |
jyotsnābhirāhatamahad hṛdayāndhakāram || 21 ||
[Analyze grammar]

yacchaucaniḥsṛtasarit pravarodakena |
tīrthena mūrdhnyadhikṛtena śivaḥ śivo'bhūt |
dhyāturmanaḥśamalaśailanisṛṣṭavajraṃ |
dhyāyecciraṃ bhagavataścaraṇāravindam || 22 ||
[Analyze grammar]

jānudvayaṃ jalajalocanayā jananyā |
lakṣmyākhilasya suravanditayā vidhātuḥ |
ūrvornidhāya karapallavarociṣā yat |
saṃlālitaṃ hṛdi vibhorabhavasya kuryāt || 23 ||
[Analyze grammar]

ūrū suparṇabhujayoradhi śobhamānau |
ojonidhī atasikākusumāvabhāsau |
vyālambipītavaravāsasi vartamāna |
kāñcīkalāpaparirambhi nitambabimbam || 24 ||
[Analyze grammar]

nābhihradaṃ bhuvanakośaguhodarasthaṃ |
yatrātmayonidhiṣaṇākhilalokapadmam |
vyūḍhaṃ harinmaṇivṛṣastanayoramuṣya |
dhyāyed dvayaṃ viśadahāramayūkhagauram || 25 ||
[Analyze grammar]

vakṣo'dhivāsamṛṣabhasya mahāvibhūteḥ |
puṃsāṃ manonayananirvṛtimādadhānam |
kaṇṭhaṃ ca kaustubhamaṇeradhibhūṣaṇārthaṃ |
kuryānmanasyakhila lokanamaskṛtasya || 26 ||
[Analyze grammar]

bāhūṃśca mandaragireḥ parivartanena |
nirṇiktabāhuvalayān adhilokapālān |
sañcintayed daśaśatāramasahyatejaḥ |
śaṅkhaṃ ca tatkarasaroruharājahaṃsam || 27 ||
[Analyze grammar]

kaumodakīṃ bhagavato dayitāṃ smareta |
digdhāmarātibhaṭaśoṇitakardamena |
mālāṃ madhuvratavarūthagiropaghuṣṭāṃ |
caityasya tattvamamalaṃ maṇimasya kaṇṭhe || 28 ||
[Analyze grammar]

bhṛtyānukampitadhiyeha gṛhītamūrteḥ |
sañcintayed bhagavato vadanāravindam |
yadvisphuran makarakuṇḍalavalgitena |
vidyotitāmalakapolamudāranāsam || 29 ||
[Analyze grammar]

yacchrīniketamalibhiḥ parisevyamānaṃ |
bhūtyā svayā kuṭilakuntalavṛndajuṣṭam |
mīnadvayāśrayamadhikṣipadabjanetraṃ |
dhyāyen manomayamatandrita ullasad‍bhru || 30 ||
[Analyze grammar]

tasyāvalokamadhikaṃ kṛpayātighora |
tāpatrayopaśamanāya nisṛṣṭamakṣṇoḥ |
snigdhasmitānuguṇitaṃ vipulaprasādaṃ |
dhyāyecciraṃ vipulabhāvanayā guhāyām || 31 ||
[Analyze grammar]

hāsaṃ hareravanatākhilalokatīvra |
śokāśrusāgaraviśoṣaṇamatyudāram |
sammohanāya racitaṃ nijamāyayāsya |
bhrūmaṇḍalaṃ munikṛte makaradhvajasya || 32 ||
[Analyze grammar]

dhyānāyanaṃ prahasitaṃ bahulādharoṣṭha |
bhāsāruṇāyitatanudvijakundapaṅkti |
dhyāyetsvadehakuhare'vasitasya viṣṇoḥ |
bhaktyārdrayārpitamanā na pṛthagdidṛkṣet || 33 ||
[Analyze grammar]

evaṃ harau bhagavati pratilabdhabhāvo |
bhaktyā dravaddhṛdaya utpulakaḥ pramodāt |
autkaṇṭhyabāṣpakalayā muhurardyamānaḥ |
taccāpi cittabaḍiśaṃ śanakairviyuṅkte || 34 ||
[Analyze grammar]

muktāśrayaṃ yarhi nirviṣayaṃ viraktaṃ |
nirvāṇamṛcchati manaḥ sahasā yathārciḥ |
ātmānamatra puruṣo'vyavadhānamekam |
anvīkṣate pratinivṛttaguṇapravāhaḥ || 35 ||
[Analyze grammar]

so'pyetayā caramayā manaso nivṛttyā |
tasmin mahimnyavasitaḥ sukhaduḥkhabāhye |
hetutvamapyasati kartari duḥkhayoryat |
svātmanvidhatta upalabdhaparātmakāṣṭhaḥ || 36 ||
[Analyze grammar]

dehaṃ ca taṃ na caramaḥ sthitamutthitaṃ vā |
siddho vipaśyati yato'dhyagamatsvarūpam |
daivādupetamatha daivavaśādapetaṃ |
vāso yathā parikṛtaṃ madirāmadāndhaḥ || 37 ||
[Analyze grammar]

deho'pi daivavaśagaḥ khalu karma yāvat |
svārambhakaṃ pratisamīkṣata eva sāsuḥ |
taṃ saprapañcamadhirūḍhasamādhiyogaḥ |
svāpnaṃ punarna bhajate pratibuddhavastuḥ || 38 ||
[Analyze grammar]

yathā putrācca vittācca pṛthaṅmartyaḥ pratīyate |
apyātmatvenābhimatād dehādeḥ puruṣastathā || 39 ||
[Analyze grammar]

yatholmukād visphuliṅgād dhūmādvāpi svasambhavāt |
apyātmatvenābhimatād yathāgniḥ pṛthagulmukāt || 40 ||
[Analyze grammar]

bhūtendriyāntaḥkaraṇāt pradhānāt jīvasaṃjñitāt |
ātmā tathā pṛthagdraṣṭā bhagavān brahmasaṃjñitaḥ || 41 ||
[Analyze grammar]

sarvabhūteṣu cātmānaṃ sarvabhūtāni cātmani |
īkṣetān anyabhāvena bhūteṣviva tadātmatām || 42 ||
[Analyze grammar]

svayoniṣu yathā jyotiḥ ekaṃ nānā pratīyate |
yonīnāṃ guṇavaiṣamyāt tathātmā prakṛtau sthitaḥ || 43 ||
[Analyze grammar]

tasmād imāṃ svāṃ prakṛtiṃ daivīṃ sadasadātmikām |
durvibhāvyāṃ parābhāvya svarūpeṇāvatiṣṭhate || 44 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ |
tṛtīyaskandhe aṣṭāviṃśo'dhyāyaḥ || 28 ||
[Analyze grammar]