Chapter 27

[English text for this chapter is available]

śrībhagavānuvāca |
prakṛtistho'pi puruṣo nājyate prākṛtairguṇaiḥ |
avikārāt akartṛtvāt nirguṇatvājjalārkavat || 1 ||
[Analyze grammar]

sa eṣa yarhi prakṛteḥ guṇeṣvabhiviṣajjate |
ahaṅkriyāvimūḍhātmā kartāsmīti abhimanyate || 2 ||
[Analyze grammar]

tena saṃsārapadavīṃ avaśo'bhyetyanirvṛtaḥ |
prāsaṅgikaiḥ karmadoṣaiḥ sadasan miśrayoniṣu || 3 ||
[Analyze grammar]

arthe hi avidyamāne'pi saṃsṛtirna nivartate |
dhyāyato viṣayānasya svapne'narthāgamo yathā || 4 ||
[Analyze grammar]

ata eva śanaiścittaṃ prasaktaṃ asatāṃ pathi |
bhaktiyogena tīvreṇa viraktyā ca nayedvaśam || 5 ||
[Analyze grammar]

yamādibhiḥ yogapathaiḥ abhyasan śraddhayānvitaḥ |
mayi bhāvena satyena matkathāśravaṇena ca || 6 ||
[Analyze grammar]

sarvabhūtasamatvena nirvaireṇāprasaṅgataḥ |
brahmacaryeṇa maunena svadharmeṇa balīyasā || 7 ||
[Analyze grammar]

yadṛcchayopalabdhena santuṣṭo mitabhuṅ muniḥ |
viviktaśaraṇaḥ śānto maitraḥ karuṇa ātmavān || 8 ||
[Analyze grammar]

sānubandhe ca dehe'smin akurvan asadāgraham |
jñānena dṛṣṭatattvena prakṛteḥ puruṣasya ca || 9 ||
[Analyze grammar]

nivṛttabuddhyavasthāno dūrībhūtānyadarśanaḥ |
upalabhyātmanātmānaṃ cakṣuṣevārkamātmadṛk || 10 ||
[Analyze grammar]

muktaliṅgaṃ sadābhāsaṃ asati pratipadyate |
sato bandhumasaccakṣuḥ sarvānusyūtamadvayam || 11 ||
[Analyze grammar]

yathā jalastha ābhāsaḥ sthalasthenāvadṛśyate |
svābhāsena tathā sūryo jalasthena divi sthitaḥ || 12 ||
[Analyze grammar]

evaṃ trivṛd ahaṅkāro bhūtendriyamanomayaiḥ |
svābhāsaiḥ lakṣito'nena sadābhāsena satyadṛk || 13 ||
[Analyze grammar]

bhūtasūkṣmendriyamano buddhyādiṣviha nidrayā |
līneṣvasati yastatra vinidro nirahaṅkriyaḥ || 14 ||
[Analyze grammar]

manyamānastadātmānaṃ anaṣṭo naṣṭavanmṛṣā |
naṣṭe'haṅkaraṇe draṣṭā naṣṭavitta ivāturaḥ || 15 ||
[Analyze grammar]

evaṃ pratyavamṛśyāsau ātmānaṃ pratipadyate |
sāhaṅkārasya dravyasya yo'vasthānamanugrahaḥ || 16 ||
[Analyze grammar]

devahūtiruvāca |
puruṣaṃ prakṛtirbrahman na vimuñcati karhicit |
anyonyāpāśrayatvācca nityatvād anayoḥ prabho || 17 ||
[Analyze grammar]

yathā gandhasya bhūmeśca na bhāvo vyatirekataḥ |
apāṃ rasasya ca yathā tathā buddheḥ parasya ca || 18 ||
[Analyze grammar]

akartuḥ karmabandho'yaṃ puruṣasya yadāśrayaḥ |
guṇeṣu satsu prakṛteḥ kaivalyaṃ teṣvataḥ katham || 19 ||
[Analyze grammar]

kvacit tattvāvamarśena nivṛttaṃ bhayamulbaṇam |
anivṛttanimittatvāt punaḥ pratyavatiṣṭhate || 20 ||
[Analyze grammar]

śrībhagavānuvāca |
animittanimittena svadharmeṇāmalātmanā |
tīvrayā mayi bhaktyā ca śrutasambhṛtayā ciram || 21 ||
[Analyze grammar]

jñānena dṛṣṭatattvena vairāgyeṇa balīyasā |
tapoyuktena yogena tīvreṇātmasamādhinā || 22 ||
[Analyze grammar]

prakṛtiḥ puruṣasyeha dahyamānā tvaharniśam |
tirobhavitrī śanakaiḥ agneryonirivāraṇiḥ || 23 ||
[Analyze grammar]

bhuktabhogā parityaktā dṛṣṭadoṣā ca nityaśaḥ |
neśvarasyāśubhaṃ dhatte sve mahimni sthitasya ca || 24 ||
[Analyze grammar]

yathā hi apratibuddhasya prasvāpo bahvanarthabhṛt |
sa eva pratibuddhasya na vai mohāya kalpate || 25 ||
[Analyze grammar]

evaṃ viditatattvasya prakṛtirmayi mānasam |
yuñjato nāpakuruta ātmārāmasya karhicit || 26 ||
[Analyze grammar]

yadaivamadhyātmarataḥ kālena bahujanmanā |
sarvatra jātavairāgya ābrahmabhuvanānmuniḥ || 27 ||
[Analyze grammar]

mad‍bhaktaḥ pratibuddhārtho matprasādena bhūyasā |
niḥśreyasaṃ svasaṃsthānaṃ kaivalyākhyaṃ madāśrayam || 28 ||
[Analyze grammar]

prāpnotīhāñjasā dhīraḥ svadṛśā cchinnasaṃśayaḥ |
yad‍gatvā na nivarteta yogī liṅgād vinirgame || 29 ||
[Analyze grammar]

yadā na yogopacitāsu ceto |
māyāsu siddhasya viṣajjate'ṅga |
ananyahetuṣvatha me gatiḥ syād |
ātyantikī yatra na mṛtyuhāsaḥ || 30 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ |
tṛtīyaskandhe saptaviṃśo'dhyāyaḥ || 27 ||
[Analyze grammar]