Chapter 31 - Pretībhūta-avadāna

athāśoko mahīpālaḥ kṛtāṃjaliḥ puraḥsthitaḥ |
upaguptaṃ tamānamya mudaivaṃ punarabravīt || 1 || {1}
[Analyze grammar]

bhadanta śrotumichāmi punaranyatsubhāṣitaṃ |
tadyathā guruṇākhyātaṃ tathādeṣṭuṃ ca me 'rhati || 2 || {2}
[Analyze grammar]

iti saṃprārthite rājñā sa yatīśaḥ prasannadhīḥ |
tamaśokaṃ mahārājaṃ samālokyaivamādiśat || 3 || {3}
[Analyze grammar]

śṛṇu sādhu mahārāja yathā me guruṇoditaṃ |
tathāhaṃ te pravakṣyāmi śrutvānumodanāṃ kuru || 4 || {4}
[Analyze grammar]

tadyathā bhagavānbuddhaḥ śākyasiṃho munīśvaraḥ |
sarvajño 'rhañjagacchāstā dharmarājastathāgataḥ || 5 || {5}
[Analyze grammar]

puraikasamaye tatra śrāvastyā bahirāśrame |
jetavane mahodyāne vihāre maṇimaṃḍite || 6 || {6}
[Analyze grammar]

sarvasatvahitārthena bodhicaryāṃ prakāśayan |
saddharmaṃ samupādiśya vijahāra sasāṃghikaḥ || 7 || {7}
[Analyze grammar]

tatra te bhikṣavo 'rhantaḥ sāṃghikāścailakā api |
bodhisatvā mahāsatvāḥ sarvasatvahitārthinaḥ || 8 || {8}
[Analyze grammar]

bhikṣuṇyaḥ śuddhaśīlāśca vratinaśca śubhāśayāḥ |
triratnasevakāḥ śrāddhā upāsakā upāsikāḥ || 9 || {9}
[Analyze grammar]

sarve 'pi sāṃghikāstatra saddharmaṃ śrotumāgatāḥ |
kramāttaṃ śrīghanaṃ natvā kṛtvā tridhā pradakṣiṇāṃ || 10 || {10}
[Analyze grammar]

tatsabhāyāṃ krameṇaiva puraskṛtya samaṃtataḥ |
kṛtāṃjalipuṭo dṛṣṭvā samupatasthurādarāt || 11 || {11}
[Analyze grammar]

tadā tatra sureṃdrāśca saśakrojamaheśvaraḥ |
sarve 'pi lokapālāśca sasainyabalavāhanaḥ || 12 || {12}
[Analyze grammar]

asurendrāḥ sasainyāśca yakṣagaṃdharvakiṃnarāḥ |
rākṣasā garuḍā nāgāḥ siddhā vidyādharādayaḥ || 13 || {13}
[Analyze grammar]

evamanye 'pi lokāśca brāhmaṇāśca maharṣayaḥ |
yatayo yoginaścāpi tīrthikāśca tapaśvinaḥ || 14 || {14}
[Analyze grammar]

rājānaḥ kṣatriyāścāpi nṛpo rājakumārakāḥ |
vaiśyāśca maṃtriṇaḥ śreṣṭhā amātyāśca mahājanāḥ || 15 || {15}
[Analyze grammar]

senānyaḥ sabalāścāpi gṛhasthāḥ paurikā janāḥ |
vaṇijaḥ sārthavāhāśca dhaninaḥ śilpino 'pi ca || 16 || {16}
[Analyze grammar]

anye jānapadāścāpi grāmyāḥ kārpaṭikā api |
evamanye 'pi lokāśca saddharmaguṇavāṃchinaḥ || 17 || {17}
[Analyze grammar]

sarve tatra samāyātā dṛṣṭvā taṃ śrīghanaṃ muniṃ |
natvā pradakṣiṇīkṛtya samabhyarcya kramānmudā || 18 || {18}
[Analyze grammar]

tataḥ sarve 'pi te natvā puraskṛtya samaṃtataḥ |
tatsaddharmāmṛtaṃ pātumupatasthuḥ samāhitāḥ || 19 || {19}
[Analyze grammar]

tadā sa bhagavāndṛṣṭvā tān sarvān samupasthitān |
bodhicaryāṃ samārabhya dideśa dharmamuttamaṃ || 20 || {20}
[Analyze grammar]

tatsaddharmāmṛtaṃ pītvā sarve lokāḥ prabodhitāḥ |
saṃbodhisādhanotsāhaṃ labdhvā saṃmumudurbhṛśaṃ || 21 || {21}
[Analyze grammar]

tasmiṃśca samaye tatra śrāvastye yo gṛhādhipaḥ |
āḍhyo mahādhanaḥ śrāddhaḥ śrīmāñcchrīdopamaḥ kṛtī || 22 || {22}
[Analyze grammar]

sa tadā tatra saṃbuddhaṃ śrīghanaṃ taṃ munīśvaraṃ |
draṣṭuṃ jetāśrame ramye vihāre samupācarat || 23 || {23}
[Analyze grammar]

tatra sabhāsamāsīnaṃ śrīghanaṃ taṃ munīśvaraṃ |
dṛṣṭvā sa muditaḥ śreṣṭhī praṇatvā samupācarat || 24 || {24}
[Analyze grammar]

tatra pradakṣiṇīkṛtvā praṇatvā sāṃjalirmudā |
tatsaddharmāmṛtaṃ pātuṃ purataḥ samupāśrayat || 25 || {25}
[Analyze grammar]

taṃ dṛṣṭvā samupāsīnaṃ bhagavān sa munīśvaraḥ |
matvā tasyāśayaṃ śuddhamāryasatyamupādiśat || 26 || {26}
[Analyze grammar]

tadāryasatyamākarṇya sa śreṣṭhī pratibodhitaḥ |
saṃsāraviratastatra pravrajituṃ samaichata || 27 || {27}
[Analyze grammar]

tatra sa suprasannātmā śreṣṭhī mudā samutthitaḥ |
sāṃjalistaṃ muniṃ natvā pravrajyāṃ samayācata || 28 || {28}
[Analyze grammar]

bhagavannātha sarvajña bhavatāṃ śaraṇaṃ vraje |
tatpravrajyāṃ vrataṃ mahyaṃ kṛpayā dātumarhati || 29 || {29}
[Analyze grammar]

iti saṃprārthite tena dṛṣṭvā sa bhagavānmuniḥ |
tasyāśayaṃ viśuddhatvaṃ samālokyaivamādiśat || 30 || {30}
[Analyze grammar]

yadi śrāddhāsti te vatsa saugataśāsane vrate |
ehi cara samādhāya brahmacaryaṃ vratottamaṃ || 31 || {31}
[Analyze grammar]

ityuktvā sa jagacchāstā savyahastena tacchiraḥ |
saṃspṛṣṭvā śāsane bauddhe śreṣṭhinaṃ taṃ samagrahīt || 32 || {32}
[Analyze grammar]

tatra pravrajitastena munīndreṇa sa muṇḍitaḥ |
khikkhirīpātradhṛgbhikṣu rarāja cīvarāvṛtaḥ || 33 || {33}
[Analyze grammar]

tataḥ sa bhikṣurātmajño lābhī lokābhipūjitaḥ |
āgṛhītapariṣkārā labdhadravyaṃ samācinot || 34 || {34}
[Analyze grammar]

tallabdhaṃ saṃcitaṃ dravyaṃ sa saha brahmacāribhiḥ |
saṃvibhāgaṃ guroḥ kiṃcidapyakarotkadā cana || 35 || {35}
[Analyze grammar]

tathā sa matsarākrāntahṛdayo duritāśayaḥ |
svayameva prabhuṃjānaḥ kiṃcinnaiva dadau kvacit || 36 || {36}
[Analyze grammar]

tataḥ sa samaye kāladharmayukto rujāturaḥ |
taddravyasaṃcayaṃ smṛtvā nitaḥ pretālayaṃ yayau || 37 || {37}
[Analyze grammar]

pretībhūto 'pi sa smṛtvā taddravyasaṃcayaṃ punaḥ |
svakoṣṭhālaya āgatya tasthau svāsana āśrayan || 38 || {38}
[Analyze grammar]

tataste bhikṣavaḥ sarve tatkoṣṭhe taṃ mṛtakaṃ yatiṃ |
dṛṣṭvā gaṇḍīṃ parāhatya saṃskārtuṃ vidhi cārcayan || 39 || {39}
[Analyze grammar]

tato nītvā bahirdeśe saṃskṛtya vahnināpitaṃ |
tataḥ pratyāgatāḥ sarve tatkoṣṭhadvāramāyayuḥ || 40 || {40}
[Analyze grammar]

tatastal layanadvāraṃ vimucya pātracīvaraṃ |
pratyaveksitumālabdhāstaṃ pretaṃ samapaśyata || 41 || {41}
[Analyze grammar]

taṃ pretaṃ vikṛtaṃ pātraṃ dhṛtaṃ cīvaraprāvṛtaṃ |
dṛṣṭvā te bhikṣavaḥ sarve samudvignā vicerire || 42 || {42}
[Analyze grammar]

tataste bhikṣavaḥ sarve bhagavataḥ purogatāḥ |
etatsarvapravṛttāṃtaṃ praṇatvā saṃnyavedayat || 43 || {43}
[Analyze grammar]

tacchrutvā bhagavāṃstasya pretasyānugrahārthataḥ |
sa lokodvejanārthaṃ ca taddeśaṃ samupācarat || 44 || {44}
[Analyze grammar]

tatrāsau preta ārāttaṃ bhagavaṃtamupāgataṃ |
dvātriṃsallakṣaṇāśītivyaṃjanapratimaṇḍitaṃ || 45 || {45}
[Analyze grammar]

śatasūryādhikodbhāsaṃ vyāmābhāsamalaṃkṛtaṃ |
ratnāṃgamiva bhadrāṃśaṃ dadarśa śrīghanaṃ muniṃ || 46 || {46}
[Analyze grammar]

tatra sa preta ālokya lajjāvibheditāśayaḥ |
prarudan sāṃjalirnatvā tasthau prasāditāśayaḥ || 47 || {47}
[Analyze grammar]

tataḥ sa bhagavāndṛṣṭvā taṃ pretaṃ saṃprasāditaṃ |
brahmagambhīranirghoṣavacasā paryabhāṣata || 48 || {48}
[Analyze grammar]

bhadramukha tvayaivaitadātmavadhāya durdhiyā |
pātracīvaramādhāya caritaṃ saṃvaraṃ vṛthā || 49 || {49}
[Analyze grammar]

yenāpāyasamutpannaḥ pretībhūto durākṛtiḥ |
kimidānīṃ ruditvātra svakṛtaṃ paribhuktavān || 50 || {50}
[Analyze grammar]

sādhvatra sāṃprataṃ cittaṃ prasādaya mamāntike |
asmāccāpi pariṣkāradravyāccittaṃ virāgaya || 51 || {51}
[Analyze grammar]

mā haivetaḥ punaḥ kālaṃ kṛtvā yāsyasi nairaye |
tatsaṃghe śaraṇaṃ gaccha tena tvaṃ sadgatiṃ vraje || 52 || {52}
[Analyze grammar]

ityādiṣṭaṃ munīndreṇa śrutvā sa preta utthitaḥ |
sa pātracīvaraṃ dravyaṃ saṃghebhyo nirayātayat || 53 || {53}
[Analyze grammar]

tataḥ saṃghānpraṇatvaiva bhagavatpādayo pure |
nipatya svakṛtaṃ pāpaṃ dideśa sāṃjalirmudā || 54 || {54}
[Analyze grammar]

bhagavannātha sarvajña yatpāpaṃ prakṛtaṃ mayā |
mātsaryākrāntacittena mahāmūḍhena durdhiyā || 55 || {55}
[Analyze grammar]

tatsarvaṃ sāṃprataṃ śāstardarśayāmi bhavatpuraḥ |
tatkṣamasvāparādhaṃ me prasīdatu bhavān guruḥ || 56 || {56}
[Analyze grammar]

iti saṃprārthite tena bhagavān sa kṛpānvitaḥ |
tatpretaṃ sudṛśālokya samapaśyacciraṃ mudā || 57 || {57}
[Analyze grammar]

tataśca bhagavāṃstasya tadupāyavimuktaye |
sadgatipreraṇārthena dakṣiṇāmevamādiśat || 58 || {58}
[Analyze grammar]

etaddānāddhi yatpuṇyaṃ tatpuṇyaṃ tvamavāpnuyāḥ |
uttiṣṭha kṣiprametasmātpretalokātsudāruṇāt || 59 || {59}
[Analyze grammar]

ityādiṣṭaṃ munīndreṇa śrutvā pretaḥ sa moditaḥ |
tatheti pratinaṃditvā natvānumodito 'bhavat || 60 || {60}
[Analyze grammar]

tataḥ sa bhagavāṃstasya pretasya śubhasādhanaṃ |
saddharmaṃ samupādiśya sasaṃghaḥ svāśraye yathā || 61 || {61}
[Analyze grammar]

tathā sa preta ākarṇya saddharmaṃ tajjinoditaṃ |
triratnaśaraṇaṃ kṛtvā bheje nityaṃ prabodhitaḥ || 62 || {62}
[Analyze grammar]

tataḥ kāle samāghrātaḥ ca preto jvaradāhitaḥ |
triratnasmaraṇaṃ kṛtvā mṛto yayau yamālayaṃ || 63 || {63}
[Analyze grammar]

tataḥ pretaḥ sa satpuṇyaistriratnasmaraṇodbhavaṃ |
yamena preritastasmātpretamaharddhike yāyau || 64 || {64}
[Analyze grammar]

tatrāpi sa samutpanne vismitastaṃ munīśvaraṃ |
smṛtvā nityaṃ sadā bheje śraddhayā śaraṇaṃ gataḥ || 65 || {65}
[Analyze grammar]

tataḥ so cintayedevaṃ kutaḥ kutrāhamāgataḥ |
kena puṇyānubhāvena mahatsaukhyaṃ labhe nviti || 66 || {66}
[Analyze grammar]

iti ciṃtāhate tasya cittapuṇyānubhāvataḥ |
triratnasmaraṇātpuṇyāditi mene sa puṇyabhāk || 67 || {67}
[Analyze grammar]

tataścāsau parijñāya triratnabhajanotsukaḥ |
saṃbuddhadarśanaṃ karttuṃ manasaivaṃ vyaciṃtayat || 68 || {68}
[Analyze grammar]

aho mayā sukhaṃ labdhaṃ tatsaṃbuddhaprasādataḥ |
tadidāniṃ munīṃdraṃ taṃ draṣṭumarhāmi sarvathā || 69 || {69}
[Analyze grammar]

ityevaṃ manasā dhyātvā so 'pi pretamaharddhikaḥ |
snātva śuddhāmvaro divyaratnālaṃkārabhūṣitaḥ || 70 || {70}
[Analyze grammar]

paṃcagaṃdhaviliptāṃgaṃ pariśuddhāśayaḥ śuciḥ |
pūjāpaṃcopahārāṇi dhṛtvā jetāśrame 'sarat || 71 || {71}
[Analyze grammar]

tatra jetāśrame bhābhiravabhāsya samaṃtataḥ |
vihāre śrīghanaṃ draṣṭuṃ muditaḥ samudācarat || 72 || {72}
[Analyze grammar]

tatra taṃ śrīghanaṃ dṛṣṭvānaṃditaḥ sa kṛtāṃjaliḥ |
natvā pradakṣiṇīkṛtya purataḥ samupācarat || 73 || {73}
[Analyze grammar]

tatastaṃ sugataṃ nāthaṃ samabhyarcya pramoditaḥ |
natvā sa sāṃjalirdharmaṃ śrotumekāṃta āśrayat || 74 || {74}
[Analyze grammar]

tataḥ sa bhagavāṃstasya dṛṣṭvā cittaṃ viśodhitaṃ |
bodhicaryāṃ samārabhya saddharmamevamādiśat || 75 || {75}
[Analyze grammar]

śṛṇu sādho 'tra saṃsāre sukhaduḥkhārthakāraṇaṃ |
vakṣyāmyetatparijñāya samādhāya śubhe cara || 76 || {76}
[Analyze grammar]

yaḥ pumānatra saṃsāre satsaukhyaṃ sarvadechati |
sa ādau śraddhayā bhaktyā triratnaśaraṇaṃ gataḥ || 77 || {77}
[Analyze grammar]

sarvasatvahitārthena dānaṃ dadyād yathepsitaṃ |
etatpuṇyavipākaṃ saṃbodhau me pariṇāmayet || 78 || {78}
[Analyze grammar]

itthaṃ kṛtaṃ pradānaṃ yattadvipāke mahatphalaṃ |
kramādvṛddhitaraṃ yāyānna kṣiṇuyātkadā cana || 79 || {79}
[Analyze grammar]

etatpuṇyaparītātmā cakravarttī narādhipaḥ |
śāstā dharmādhipo rājā bodhisatvaḥ sudhīrbhavet || 80 || {80}
[Analyze grammar]

tadāpi sa mahādātā sarvasatvahitechayā |
triratnabhajaṇaṃ kṛtvā dadyāddānaṃ yathepsitaṃ || 81 || {81}
[Analyze grammar]

etatpuṇyavipākena sa viśuddhāśayaḥ sudhīḥ |
suśīlasaṃvaraṃ dhṛtvā triratnaṃ sarvadā bhajan || 82 || {82}
[Analyze grammar]

etatpuṇyavipākena sa bhavettridaśādhipaḥ |
tatrāpi śraddhayā nityaṃ triratnaṃ sarvadā bhajan || 83 || {83}
[Analyze grammar]

sarvasatvahitārthena śīlapāramitā caran |
tatpuṇyaṃ bodhisaṃprāptyai manasā pariṇāmayet || 84 || {84}
[Analyze grammar]

etatpuṇyavipākena sa suyāmādhipo bhavet |
tatrāpi śraddhayā nityaṃ triratnabhajanodyataḥ || 85 || {85}
[Analyze grammar]

sarvasatvahitārthena kṣāṃtipāramitā caran |
saṃbodhipadalābhāya tatpuṇyaṃ pariṇāmayet || 86 || {86}
[Analyze grammar]

etatpuṇyavipākena sa bhavettuṣitādhipaḥ |
tatrāpi śraddhayā nityaṃ triratnaśaraṇaṃ gataḥ || 87 || {87}
[Analyze grammar]

sarvasatvahitārthena vīryapāramitodyataḥ |
saṃbodhipadasaṃprāptyai tatpuṇyaṃ pariṇāmayet || 88 || {81!}
[Analyze grammar]

etatpuṇyavipākaiḥ sa nirmāṇaratiyo bhavet |
tatrāpi śraddhayā nityaṃ triratnabhajanodyatat || 89 || {82}
[Analyze grammar]

sarvasatvahitārthena dhyānapāramitārataḥ |
saṃbodhijñānasaṃprāptyai tatpuṇyaṃ pariṇāmayet || 90 || {83}
[Analyze grammar]

etatpuṇyavipākaiḥ sa vaśavartīśvaro bhavet |
tatrāpi śraddhayā nityaṃ triratnabhajano rataḥ || 91 || {84}
[Analyze grammar]

sarvasatvahitārthena prajñāpāramitārataḥ |
tatpuṇyaṃ bodhisaṃprāptyai manasā pariṇāmayet || 92 || {85}
[Analyze grammar]

etatpuṇyavipākena sa brahmādhipatirbhavet |
tatrāpi śraddhayā nityaṃ triratnārāgaṇodyataḥ || 93 || {86}
[Analyze grammar]

sarvasatvahitārthāya samupāyavidhānadhṛk |
tatpuṇyaṃ bodhisaṃprāptyai cetasā pariṇāmayet || 94 || {87}
[Analyze grammar]

etatpuṇyavipākena mahābrahmādhipo bhavet |
tatrāpi śraddhayā nityaṃ triratnārādhanodyataḥ || 95 || {88}
[Analyze grammar]

sarvasatvahitārthāya praṇidhānasamāhitaḥ |
tatpuṇyaṃ bodhisaṃprāptyai sarvathā pariṇāmayet || 96 || {89}
[Analyze grammar]

etatpuṇyavipākena sa maheśādhipo bhavet |
tatrāpi śraddhayā nityaṃ triratnabhajanodyataḥ || 97 || {90}
[Analyze grammar]

sarvasatvahitārthena balapāramitodyataḥ |
tatpuṇyaṃ bodhisaṃprāptyai pradhyānaṃ pariṇāmayet || 98 || {91}
[Analyze grammar]

etatpuṇyavipākena bodhisatvādhipo bhavet |
tatrāpi śraddhayā nityaṃ triratnasaṃprasāditaḥ || 99 || {92}
[Analyze grammar]

sarvasatvahitārthasya jñānapāramitārataḥ |
tatpuṇyairbodhisaṃprāpto dharmarājo jino bhavet || 100 || {93}
[Analyze grammar]

tataḥ sa sugataḥ śāstā jagannātho vināyakaḥ |
sarvajño 'rhanmahābhijñastathāgato munīśvaraḥ || 101 || {94}
[Analyze grammar]

tato māragaṇāñjitvā bodhicaryāṃ prakāśayan |
sarvasatvāñchubhe sthāpya nirvṛtaḥ saugatiṃ vrajet || 102 || {95}
[Analyze grammar]

evaṃ matvātra saṃsāre ya ichati śivāṃ gatiṃ |
sa evaṃ śraddhayā nityaṃ triratnabhajanodyataḥ || 103 || {96}
[Analyze grammar]

sarvasatvahitārthena karotu dānamādarāt |
tataḥ kramātsa tatpuṇyaiḥ sarvāḥ pāramitā api || 104 || {97}
[Analyze grammar]

paripūrya mahābhijñā prāpto bodhimavāpnuyāt |
iti matvā śubhe nityaṃ caritavyaṃ śubhārthibhiḥ || 105 || {98}
[Analyze grammar]

śubhena sadgatiṃ yāyā pāpena durgatīṃ vrajet |
pāpastu jāyate lobhātmātsaryamalināśrayāt || 106 || {99}
[Analyze grammar]

vopakārāṃ sukhecho 'pi na kiṃ citsukhamāpnuyāt |
sarvadā durmatirduṣṭo durgatinirayāśrayaḥ || 107 || {100}
[Analyze grammar]

saddharmmanindako mūḍho pāpakarmarato bhavet |
tasmātmātsaryamutsṛjya sarvasatvahitārthabhṛt |
saṃbodhipraṇidhiṃ kṛtvā carennityaṃ susaṃvare || 108 || {1}
[Analyze grammar]

etatpuṇyavipākena saṃsārasukhabhāksadā |
triratnabhajanotsāhī bodhicaryārato bhavet || 109 || {2}
[Analyze grammar]

tataḥ pāramitāḥ sarvāḥ paripūrya yathākramaṃ |
śivāṃ bodhiṃ samāsādya saṃbuddhapadamāpnuyāt || 110 || {3}
[Analyze grammar]

evaṃ tvaṃ vā parijñāya triratnaśaraṇaṃ gataḥ |
bodhicittaṃ samādhāya cara nityaṃ susaṃvare || 111 || {4}
[Analyze grammar]

tathā te sarvadā bhadraṃ bhavennityaṃ samantataḥ |
kramādbodhiṃ samāsādya saṃbuddhapadamāpnuyāḥ || 112 || {5}
[Analyze grammar]

ityādiṣṭaṃ munīndreṇa śrutvā sa paribodhitaḥ |
tatheti hi pratiśrutvā prābhyanaṃdatprasāditaḥ || 113 || {6}
[Analyze grammar]

tataḥ sa taṃ jagannāthaṃ praṇatvā sāṃjalirmudā |
tridhā pradakṣiṇīkṛtvā praṇatvā svālaye 'carat || 114 || {7}
[Analyze grammar]

tatra prāptaḥ prasannātmā so 'pi pretamaharddhikaḥ |
triratnaṃ śaraṇaṃ kṛtvā pracaran sarvadā mudā || 115 || {8}
[Analyze grammar]

tad rātrau tatprabhāṃ dṛṣṭvā bhikṣavo vismayānvitāḥ |
sarve te prātarutthāya natvāpṛchanmunīśvaraṃ || 116 || {9}
[Analyze grammar]

bhagavannātha sarvajña ko 'dya rātrāvihāgataḥ |
etadvṛttaṃ samākhyāya sarvānnaḥ paribodhaya || 117 || {10}
[Analyze grammar]

iti tairbhikṣubhiḥ pṛṣṭe bhagavān sa munīśvaraḥ |
tān sarvān sāṃghikāndṛṣṭvā bodhayitumupādiśat || 118 || {11}
[Analyze grammar]

śṛṇuta bhikṣavaḥ sarve yo 'dya rātrāvihāgataḥ |
etatsarvaṃ pravṛttāṃtaṃ pravakṣyāmi suvistaraṃ || 119 || {12}
[Analyze grammar]

yo 'sau śreṣṭhī mahāśrāddhaḥ saugate śāsane mudā |
śraddhayā pravrajitvātra brahmacaryaṃ mudā caran || 120 || {13}
[Analyze grammar]

pravrajitaḥ sa mātsaryaparibhūto durāśayaḥ |
labdhadravyaṃ na kasmai ciddadau kiñcitkadā cana || 121 || {14}
[Analyze grammar]

kevalaṃ saṃcayaṃ kṛtvā koṣṭhāgāre nidhāya tat |
guptīkṛtvā prayatnena vyabhajannaiva kiṃ cana || 122 || {15}
[Analyze grammar]

tataḥ kāle samāghrāte dhyātvā taddravyasaṃcayaṃ |
mṛtaḥ pretālayotpannaḥ pretodbhavadbhayānakaḥ || 123 || {16}
[Analyze grammar]

taddravyasaṃcayaṃ smṛtvā mātsaryākulitāśayaḥ |
punaḥ pratyāgatastatra svālaye saṃnyaṣīdata || 124 || {17}
[Analyze grammar]

tatra taṃ saṃsthitaṃ pretaṃ dṛṣṭvāhaṃ samupācaran |
āryadharmamupādiśya prābodhayaṃ prasādayan || 125 || {18}
[Analyze grammar]

tataḥ sa suprasannātmā sasaṃghasya mamāṃtike |
sa pātracīvaraṃ sarvaṃ taddravyaṃ nirayātayat || 126 || {19}
[Analyze grammar]

etatpuṇyānubhāvena triratnaśaraṇaṃ gataḥ |
kāle tataḥ paricyutvā pretamaharddhiko 'bhavat || 127 || {20}
[Analyze grammar]

tatra sa suprasannātmā smṛtvā ratnatrayaṃ mudā |
matsaddharmāmṛtaṃ pātumiha rātrau samāgataḥ || 128 || {21}
[Analyze grammar]

sa saddharmāmṛtaṃ pītvā mamāntike prasāditaḥ |
saṃbodhisādhanotsāhī muditaḥ svālaye 'carat || 129 || {22}
[Analyze grammar]

yo 'yaṃ śreṣṭhī na cānyo hi rātrāviha samāgataḥ |
yatsa mṛto 'bhavatpretasmātsaryaduritāśrayāt || 130 || {23}
[Analyze grammar]

tasmātmātsaryamuddhṛtya tyajantu śubhavāṃchinaḥ |
mātsaryaṃ hi trilokeṣu pāpamūlaṃ nigadyate || 131 || {24}
[Analyze grammar]

evaṃ matvātra saṃsāre duḥkhākaraṃ sukhāṃtakaṃ |
mātsaryaṃ sumaduṣṭaṃ ripuṃ jayata sarvathā || 132 || {25}
[Analyze grammar]

mātsaryaṃ jīyate yairhi samuddhṛtya svamānasāt |
te eva mānino vīrāḥ śūrāḥ prājñā vicakṣaṇāḥ || 133 || {26}
[Analyze grammar]

ye ca jetuṃ na mātsaryaṃ śaknuvaṃti kathaṃ cana |
kiṃ te śūrā vijetāro virā na kleśabhojinaḥ || 134 || {27}
[Analyze grammar]

yeṣāṃ na jāyate citte mātsaryanduḥkṛtākaraṃ |
te eva sukhino virā jayinaḥ kleśaghātakāḥ || 135 || {28}
[Analyze grammar]

yāvanna jīyate citte mātsaryaṃ duritāśayaṃ |
tāvatkiṃ te suvīrā vā kṣaṇātkleśānucāriṇaḥ || 136 || {29}
[Analyze grammar]

ye ca kleśavaśā vīrā na te dhīrā vicakṣaṇāḥ |
kṣaṇātkiṃ cinnimitteti careyurvikṛtāśayāḥ || 137 || {30}
[Analyze grammar]

tataste kleśasaṃtaptā mūḍhā rāgāgnidāhitāḥ |
duṣṭāḥ krodhāgnisaṃdagdhāḥ saṃpaśyeyurna kiṃ cana || 138 || {31}
[Analyze grammar]

tataste 'ndhā ivāloke careyurna ca satpathe |
kumārga eva saṃraktāḥ pracareyuḥ pramāditāḥ || 139 || {32}
[Analyze grammar]

tato durjanasaṃraktā māracaryānucāriṇaḥ |
asanmitropadeśena pracareyurmṛṣādṛśaḥ || 140 || {33}
[Analyze grammar]

tataḥ saddharmanindāṃ kṛtvā dānādi saṃcare |
vighnaṃ kartuṃ samudyogaṃ kuryurnityaṃ samāhitāḥ || 141 || {34}
[Analyze grammar]

tataste pāpino duṣṭā unmattā iva tāyinaḥ |
svayaṃ naṣṭāḥ parāṃścāpi nāśayeyuḥ pravaṃcakāḥ || 142 || {35}
[Analyze grammar]

tataste kleśasaṃtaptā mahopāyānurāgiṇaḥ |
sughorāṇi pāpāni kuryāttiḥ śaṃkitāśayāḥ || 143 || {36}
[Analyze grammar]

tato bhakṣamapīchaṃtaṃ bhuktvāgamye 'pi saṃratāḥ |
viparītasamācārāḥ pracāreyurvirodhitāḥ || 144 || {37}
[Analyze grammar]

tataste pātakālīḍhā mahāduḥkhābhighātitāḥ |
tīvrātivedanāghrātā mṛtā yāyuryamālayaṃ || 145 || {38}
[Analyze grammar]

tatra yamo mahārājā dṛṣṭvā taṃ duritāśayaṃ |
sahasā karmaśāsibhyaḥ samarpya saṃpracodayan || 146 || {39}
[Analyze grammar]

tatra tairyamadūtāstāṃ gṛhītvā sahasā balāt |
yathā karmānusāreṇa śāsayeyuryathāvidhiṃ || 147 || {40}
[Analyze grammar]

tatra te daivabhogyāṃ bhuktvā bhoktuṃ samaṃtataḥ |
coditā yamadūtaiśca bhrameyurnarakeṣvapi || 148 || {41}
[Analyze grammar]

tatra te daivabhogyāni bhuktvātitīvraduḥkhitāḥ |
asahyavedanākrāṃtā niṣīdeyuḥ prakheṭitāḥ || 149 || {42}
[Analyze grammar]

evaṃ te daivabhogyāṃ bhuktvā tathā ciraṃ sadā |
narakānnarake gatvā duḥkhānyevāśnuyu vabha || 150 || {43}
[Analyze grammar]

yadā te daivayogānte tīvrātivedanāhatāḥ |
triratnasaṃsmṛtiṃ kṛtvā praṇameyuḥ samānatāḥ || 151 || {44}
[Analyze grammar]

tadā tān sugatāndṛṣṭvā kṛpayā saṃpracoditāḥ |
dṛkprabhābhiḥ samuddhṛtya preṣayeyuḥ surālaye || 152 || {45}
[Analyze grammar]

tatra te sukhasaṃpannāḥ smṛtvā ratnatrayaṃ mudā |
sarvadā śaraṇaṃ kṛtvā pracareyuḥ samāhitāḥ || 153 || {46}
[Analyze grammar]

tathaitatpuṇyapākena saṃbuddhaśāsane gatāḥ |
śraddhayā satkṛtiṃ kṛtvā śṛṇuyurdharmamādarāt || 154 || {47}
[Analyze grammar]

tatsaddharmāmṛtāsvādaṃ labdhvā te parimoditāḥ |
bodhicittaṃ samāsādya prakuryu dānamādarāt || 155 || {48}
[Analyze grammar]

tatastatpuṇyapākena suśīlāḥ saṃvarodyatāḥ |
sarvasatvahitaṃ kṛtvā sādhayeyuḥ śubhāṃ cariṃ || 156 || {49}
[Analyze grammar]

tato vīryabalenaiva jitvā kleśagaṇān ripūn |
tataste vimalātmāno dhyātvā yogasamāhitāḥ || 157 || {50}
[Analyze grammar]

prajñābdhipāramāsādya jñānaratnamavāpnuyuḥ |
tato māragaṇāṃ jitvā pariśuddhāstrimaṇḍalāḥ || 158 || {51}
[Analyze grammar]

samyakṣaṃbodhimāsādya saṃbuddhapadamāpnuyuḥ || 159 || {52}
[Analyze grammar]

evaṃ matvātra saṃsāre mātsaryaṃ mūlamenasāṃ |
bodhicittāsinochitvā caritavyaṃ śubhe sadā || 160 || {53}
[Analyze grammar]

tato vo maṃgalaṃ nityaṃ bhavedbhave samaṃtataḥ |
kramādbodhiṃ samāsādya saṃbuddhapadamāpsyatha || 161 || {54}
[Analyze grammar]

ityādiṣṭaṃ munīndreṇa śrutvā te sāṃghikā mudā |
sarve 'pi pratibuddhitvā prābhyanaṃdanprasāditāḥ || 162 || {55}
[Analyze grammar]

iti me guruṇādiṣṭaṃ śrutaṃ mayā tathocyate |
evaṃ tvaṃ nṛpa mātsaryaṃ tyaktvā cara śubhe sadā || 163 || {56}
[Analyze grammar]

prajāścāpi tvayā rājanbodhayitvā prayatnataḥ |
bodhicaryāśayāḥ kṛtvā pratiṣṭhāpyāḥ śubhe sadā || 164 || {57}
[Analyze grammar]

evaṃ te sarvadā bhadraṃ bhavedbhave samaṃtataḥ |
kramādbodhiṃ samāsādya saṃbuddhapadamāpnuyāḥ || 165 || {58}
[Analyze grammar]

iti tenārhatādiṣṭaṃ śrutvāśokaḥ sa bhūpatiḥ |
tatheti prativijñapya prābhyanandatsapārṣadaḥ || 166 || {89!}
[Analyze grammar]

pretībhūtāvadānaṃ duritahṛtamataiḥ śreṣṭhino lobhino ye śṛṇvaṃti śravayaṃti pramuditamanasaḥ śraddhayedaṃ manuṣyāḥ |
mātsaryaṃ te vihāya trimaṇiśaraṇagāḥ sarvasatvānurāgā dānaṃ datvā prasannāḥ satataśubhacarā yānti buddhālayaṃ te || 167 || {60}
[Analyze grammar]