Chapter 72

tasya tadvacanaṃ śrutvā rāghavaḥ śokakarśitaḥ |
nopadhārayate vyaktaṃ yaduktaṃ tena rakṣasā || 1 ||
[Analyze grammar]

tato dhairyamavaṣṭabhya rāmaḥ parapuraṃjayaḥ |
vibhīṣaṇamupāsīnamuvāca kapisaṃnidhau || 2 ||
[Analyze grammar]

nairṛtādhipate vākyaṃ yaduktaṃ te vibhīṣaṇa |
bhūyastacchrotumicchāmi brūhi yatte vivakṣitam || 3 ||
[Analyze grammar]

rāghavasya vacaḥ śrutvā vākyaṃ vākyaviśāradaḥ |
yattat punaridaṃ vākyaṃ babhāṣe sa vibhīṣaṇaḥ || 4 ||
[Analyze grammar]

yathājñaptaṃ mahābāho tvayā gulmaniveśanam |
tattathānuṣṭhitaṃ vīra tvadvākyasamanantaram || 5 ||
[Analyze grammar]

tānyanīkāni sarvāṇi vibhaktāni samantataḥ |
vinyastā yūthapāścaiva yathānyāyaṃ vibhāgaśaḥ || 6 ||
[Analyze grammar]

bhūyastu mama vijāpyaṃ tacchṛṇuṣva mahāyaśaḥ |
tvayyakāraṇasaṃtapte saṃtaptahṛdayā vayam || 7 ||
[Analyze grammar]

tyaja rājannimaṃ śokaṃ mithyā saṃtāpamāgatam |
tadiyaṃ tyajyatāṃ cintā śatruharṣavivardhanī || 8 ||
[Analyze grammar]

udyamaḥ kriyatāṃ vīra harṣaḥ samupasevyatām |
prāptavyā yadi te sītā hantavyaśca niśācarāḥ || 9 ||
[Analyze grammar]

raghunandana vakṣyāmi śrūyatāṃ me hitaṃ vacaḥ |
sādhvayaṃ yātu saumitrirbalena mahatā vṛtaḥ |
nikumbhilāyāṃ saṃprāpya hantuṃ rāvaṇimāhave || 10 ||
[Analyze grammar]

dhanurmaṇḍalanirmuktairāśīviṣaviṣopamaiḥ |
śarairhantuṃ maheṣvāso rāvaṇiṃ samitiṃjayaḥ || 11 ||
[Analyze grammar]

tena vīreṇa tapasā varadānāt svayambhutaḥ |
astraṃ brahmaśiraḥ prāptaṃ kāmagāśca turaṃgamāḥ || 12 ||
[Analyze grammar]

nikumbhilāmasaṃprāptamahutāgniṃ ca yo ripuḥ |
tvāmātatāyinaṃ hanyādindraśatro sa te vadhaḥ |
ityevaṃ vihito rājan vadhastasyaiva dhīmataḥ || 13 ||
[Analyze grammar]

vadhāyendrajito rāma taṃ diśasva mahābalam |
hate tasmin hataṃ viddhi rāvaṇaṃ sasuhṛjjanam || 14 ||
[Analyze grammar]

vibhīṣaṇavacaḥ śrutva rāmo vākyamathābravīt |
jānāmi tasya raudrasya māyāṃ satyaparākrama || 15 ||
[Analyze grammar]

sa hi brahmāstravit prājño mahāmāyo mahābalaḥ |
karotyasaṃjñān saṃgrāme devān savaruṇānapi || 16 ||
[Analyze grammar]

tasyāntarikṣe carato rathasthasya mahāyaśaḥ |
na gatirjñāyate vīrasūryasyevābhrasaṃplave || 17 ||
[Analyze grammar]

rāghavastu riporjñātvā māyāvīryaṃ durātmanaḥ |
lakṣmaṇaṃ kīrtisaṃpannamidaṃ vacanamabravīt || 18 ||
[Analyze grammar]

yadvānarendrasya balaṃ tena sarveṇa saṃvṛtaḥ |
hanūmatpramukhaiścaiva yūthapaiḥ sahalakṣmaṇa || 19 ||
[Analyze grammar]

jāmbavenarkṣapatinā saha sainyena saṃvṛtaḥ |
jahi taṃ rākṣasasutaṃ māyābalaviśāradam || 20 ||
[Analyze grammar]

ayaṃ tvāṃ sacivaiḥ sārdhaṃ mahātmā rajanīcaraḥ |
abhijñastasya deśasya pṛṣṭhato'nugamiṣyati || 21 ||
[Analyze grammar]

rāghavasya vacaḥ śrutvā lakṣmaṇaḥ savibhīṣaṇaḥ |
jagrāha kārmukaṃ śreṣṭhamanyadbhīmaparākramaḥ || 22 ||
[Analyze grammar]

saṃnaddhaḥ kavacī khaḍgī sa śarī hemacāpadhṛk |
rāmapādāv upaspṛśya hṛṣṭaḥ saumitrirabravīt || 23 ||
[Analyze grammar]

adya matkārmukonmukhāḥ śarā nirbhidya rāvaṇim |
laṅkāmabhipatiṣyanti haṃsāḥ puṣkariṇīmiva || 24 ||
[Analyze grammar]

adyaiva tasya raudrasya śarīraṃ māmakāḥ śarāḥ |
vidhamiṣyanti hatvā taṃ mahācāpaguṇacyutāḥ || 25 ||
[Analyze grammar]

sa evamuktvā dyutimān vacanaṃ bhrāturagrataḥ |
sa rāvaṇivadhākāṅkṣī lakṣmaṇastvarito yayau || 26 ||
[Analyze grammar]

so'bhivādya guroḥ pādau kṛtvā cāpi pradakṣiṇam |
nikumbhilāmabhiyayau caityaṃ rāvaṇipālitam || 27 ||
[Analyze grammar]

vibhīṣaṇena sahito rājaputraḥ pratāpavān |
kṛtasvastyayano bhrātrā lakṣmaṇastvarito yayau || 28 ||
[Analyze grammar]

vānarāṇāṃ sahasraistu hanūmānbahubhirvṛtaḥ |
vibhīṣaṇaḥ sahāmātyastadā lakṣmaṇamanvagāt || 29 ||
[Analyze grammar]

mahatā harisainyena savegamabhisaṃvṛtaḥ |
ṛkṣarājabalaṃ caiva dadarśa pathi viṣṭhitam || 30 ||
[Analyze grammar]

sa gatvā dūramadhvānaṃ saumitrirmitranandanaḥ |
rākṣasendrabalaṃ dūrādapaśyadvyūhamāsthitam || 31 ||
[Analyze grammar]

sa saṃprāpya dhanuṣpāṇirmāyāyogamariṃdama |
tasthau brahmavidhānena vijetuṃ raghunandanaḥ || 32 ||
[Analyze grammar]

vividhamamalaśastrabhāsvaraṃ taddhvajagahanaṃ vipulaṃ mahārathaiśca |
pratibhayatamamaprameyavegaṃ timiramiva dviṣatāṃ balaṃ viveśa || 33 ||
[Analyze grammar]