Chapter 71

rāmamāśvāsayāne tu lakṣmaṇe bhrātṛvatsale |
nikṣipya gulmān svasthāne tatrāgacchadvibhīṣaṇaḥ || 1 ||
[Analyze grammar]

nānāpraharaṇairvīraiścaturbhiḥ sacivairvṛtaḥ |
nīlāñjanacayākārairmātaṃgairiva yūthapaḥ || 2 ||
[Analyze grammar]

so'bhigamya mahātmānaṃ rāghavaṃ śokalālasaṃ |
vānarāṃścaiva dadṛśe bāṣpaparyākulekṣaṇān || 3 ||
[Analyze grammar]

rāghavaṃ ca mahātmānamikṣvākukulanandanam |
dadarśa mohamāpannaṃ lakṣmaṇasyāṅkamāśritam || 4 ||
[Analyze grammar]

vrīḍitaṃ śokasaṃtaptaṃ dṛṣṭvā rāmaṃ vibhīṣaṇaḥ |
antarduḥkhena dīnātmā kimetaditi so'bravīt || 5 ||
[Analyze grammar]

vibhīṣaṇa mukhaṃ dṛṣṭvā sugrīvaṃ tāṃśca vānarān |
uvāca lakṣmaṇo vākyamidaṃ bāṣpapariplutaḥ || 6 ||
[Analyze grammar]

hatāmindrajitā sītāmiha śrutvaiva rāghavaḥ |
hanūmadvacanāt saumya tato mohamupāgataḥ || 7 ||
[Analyze grammar]

kathayantaṃ tu saumitriṃ saṃnivārya vibhīṣaṇaḥ |
puṣkalārthamidaṃ vākyaṃ visaṃjñaṃ rāmamabravīt || 8 ||
[Analyze grammar]

manujendrārtarūpeṇa yaduktastvaṃ hanūmatā |
tadayuktamahaṃ manye sāgarasyeva śoṣaṇam || 9 ||
[Analyze grammar]

abhiprāyaṃ tu jānāmi rāvaṇasya durātmanaḥ |
sītāṃ prati mahābāho na ca ghātaṃ kariṣyati || 10 ||
[Analyze grammar]

yācyamānaḥ subahuśo mayā hitacikīrṣuṇā |
vaidehīmutsṛjasveti na ca tat kṛtavān vacaḥ || 11 ||
[Analyze grammar]

naiva sāmnā na bhedena na dānena kuto yudhā |
sā draṣṭumapi śakyeta naiva cānyena kena cit || 12 ||
[Analyze grammar]

vānarānmohayitvā tu pratiyātaḥ sa rākṣasaḥ |
caityaṃ nikumbhilāṃ nāma yatra homaṃ kariṣyati || 13 ||
[Analyze grammar]

hutavānupayāto hi devairapi savāsavaiḥ |
durādharṣo bhavatyeṣa saṃgrāme rāvaṇātmajaḥ || 14 ||
[Analyze grammar]

tena mohayatā nūnameṣā māyā prayojitā |
vighnamanvicchatā tāta vānarāṇāṃ parākrame |
sasainyāstatra gacchāmo yāvattanna samāpyate || 15 ||
[Analyze grammar]

tyajemaṃ naraśārdūlamithyā saṃtāpamāgatam |
sīdate hi balaṃ sarvaṃ dṛṣṭvā tvāṃ śokakarśitam || 16 ||
[Analyze grammar]

iha tvaṃ svastha hṛdayastiṣṭha sattvasamucchritaḥ |
lakṣmaṇaṃ preṣayāsmābhiḥ saha sainyānukarṣibhiḥ || 17 ||
[Analyze grammar]

eṣa taṃ naraśārdūlo rāvaṇiṃ niśitaiḥ śaraiḥ |
tyājayiṣyati tat karma tato vadhyo bhaviṣyati || 18 ||
[Analyze grammar]

tasyaite niśitāstīkṣṇāḥ patripatrāṅgavājinaḥ |
patatriṇa ivāsaumyāḥ śarāḥ pāsyanti śoṇitam || 19 ||
[Analyze grammar]

tat saṃdiśa mahābāho lakṣmaṇaṃ śubhalakṣaṇam |
rākṣasasya vināśāya vajraṃ vajradharo yathā || 20 ||
[Analyze grammar]

manujavara na kālaviprakarṣo ripunidhanaṃ prati yat kṣamo'dya kartum |
tvamatisṛja riporvadhāya bāṇīmasurapuronmathane yathā mahendraḥ || 21 ||
[Analyze grammar]

samāptakarmā hi sa rākṣasendro bhavatyadṛśyaḥ samare surāsuraiḥ |
yuyutsatā tena samāptakarmaṇā bhavet surāṇāmapi saṃśayo mahān || 22 ||
[Analyze grammar]