Chapter 73

atha tasyāmavasthāyāṃ lakṣmaṇaṃ rāvaṇānujaḥ |
pareṣāmahitaṃ vākyamarthasādhakamabravīt || 1 ||
[Analyze grammar]

asyānīkasya mahato bhedane yatalakṣmaṇa |
rākṣasendrasuto'pyatra bhinne dṛśyo bhaviṣyati || 2 ||
[Analyze grammar]

sa tvamindrāśaniprakhyaiḥ śarairavakiranparān |
abhidravāśu yāvadvai naitat karma samāpyate || 3 ||
[Analyze grammar]

jahi vīradurātmānaṃ māyāparamadhārmikam |
rāvaṇiṃ krūrakarmāṇaṃ sarvalokabhayāvaham || 4 ||
[Analyze grammar]

vibhīṣaṇavacaḥ śrutvā lakṣmaṇaḥ śubhalakṣaṇaḥ |
vavarṣa śaravarṣāṇi rākṣasendrasutaṃ prati || 5 ||
[Analyze grammar]

ṛkṣāḥ śākhāmṛgāścaiva drumādrivarayodhinaḥ |
abhyadhāvanta sahitāstadanīkamavasthitam || 6 ||
[Analyze grammar]

rākṣasāśca śitairbāṇairasibhiḥ śaktitomaraiḥ |
udyataiḥ samavartanta kapisainyajighāṃsavaḥ || 7 ||
[Analyze grammar]

sa saṃprahārastumulaḥ saṃjajñe kapirakṣasām |
śabdena mahatā laṅkāṃ nādayan vai samantataḥ || 8 ||
[Analyze grammar]

śastrairbahuvidhākāraiḥ śitairbāṇaiśca pādapaiḥ |
udyatairgiriśṛṅgaiśca ghorairākāśamāvṛtam || 9 ||
[Analyze grammar]

te rākṣasā vānareṣu vikṛtānanabāhavaḥ |
niveśayantaḥ śastrāṇi cakruste sumahadbhayam || 10 ||
[Analyze grammar]

tathaiva sakalairvṛkṣairgiriśṛṅgaiśca vānarāḥ |
abhijaghnurnijaghnuśca samare rākṣasarṣabhān || 11 ||
[Analyze grammar]

ṛkṣavānaramukhyaiśca mahākāyairmahābalaiḥ |
rakṣasāṃ vadhyamānānāṃ mahadbhayamajāyata || 12 ||
[Analyze grammar]

svamanīkaṃ viṣaṇṇaṃ tu śrutvā śatrubhirarditam |
udatiṣṭhata durdharṣastat karmaṇyananuṣṭhite || 13 ||
[Analyze grammar]

vṛkṣāndhakārānniṣkramya jātakrodhaḥ sa rāvaṇiḥ |
āruroha rathaṃ sajjaṃ pūrvayuktaṃ sa rākṣasaḥ || 14 ||
[Analyze grammar]

sa bhīmakārmukaśaraḥ kṛṣṇāñjanacayopamaḥ |
raktāsyanayanaḥ krūro babhau mṛtyurivāntakaḥ || 15 ||
[Analyze grammar]

dṛṣṭvaiva tu rathasthaṃ taṃ paryavartata tadbalam |
rakṣasāṃ bhīmavegānāṃ lakṣmaṇena yuyutsatām || 16 ||
[Analyze grammar]

tasmin kāle tu hanumānudyamya sudurāsadam |
dharaṇīdharasaṃkāśī mahāvṛkṣamariṃdamaḥ || 17 ||
[Analyze grammar]

sa rākṣasānāṃ tat sainyaṃ kālāgniriva nirdahan |
cakāra bahubhirvṛkṣairniḥsaṃjñaṃ yudhi vānaraḥ || 18 ||
[Analyze grammar]

vidhvaṃsayantaṃ tarasā dṛṣṭvaiva pavanātmajam |
rākṣasānāṃ sahasrāṇi hanūmantamavākiran || 19 ||
[Analyze grammar]

śitaśūladharāḥ śūlairasibhiścāsipāṇayaḥ |
śaktibhiḥ śaktihastāśca paṭṭasaiḥ paṭṭasāyudhāḥ || 20 ||
[Analyze grammar]

parighaiśca gadābhiśca kuntaiśca śubhadarśanaiḥ |
śataśaśca śataghnībhirāyasairapi mudgaraiḥ || 21 ||
[Analyze grammar]

ghoraiḥ paraśubhiścaiva bhiṇḍipālaiśca rākṣasāḥ |
muṣṭibhirvajravegaiśca talairaśanisaṃnibhaiḥ || 22 ||
[Analyze grammar]

abhijaghnuḥ samāsādya samantāt parvatopamam |
teṣāmapi ca saṃkruddhaścakāra kadanaṃ mahat || 23 ||
[Analyze grammar]

sa dadarśa kapiśreṣṭhamacalopamamindrajit |
sūdayānamamitraghnamamitrānpavanātmajam || 24 ||
[Analyze grammar]

sa sārathimuvācedaṃ yāhi yatraiṣa vānaraḥ |
kṣayameva hi naḥ kuryād rākṣasānāmupekṣitaḥ || 25 ||
[Analyze grammar]

ityuktaḥ sārathistena yayau yatra sa mārutiḥ |
vahanparamadurdharṣaṃ sthitamindrajitaṃ rathe || 26 ||
[Analyze grammar]

so'bhyupetya śarān khaḍgānpaṭṭasāsiparaśvadhān |
abhyavarṣata durdharṣaḥ kapimūrdhni sa rākṣasaḥ || 27 ||
[Analyze grammar]

tāni śastrāṇi ghorāṇi pratigṛhya sa mārutiḥ |
roṣeṇa mahatāviṣo vākyaṃ cedamuvāca ha || 28 ||
[Analyze grammar]

yudhyasva yadi śūro'si rāvaṇātmaja durmate |
vāyuputraṃ samāsādya na jīvanpratiyāsyasi || 29 ||
[Analyze grammar]

bāhubhyāṃ saṃprayudhyasva yadi me dvandvamāhave |
vegaṃ sahasva durbuddhe tatastvaṃ rakṣasāṃ varaḥ || 30 ||
[Analyze grammar]

hanūmantaṃ jighāṃsantaṃ samudyataśarāsanam |
rāvaṇātmajamācaṣṭe lakṣmaṇāya vibhīṣaṇaḥ || 31 ||
[Analyze grammar]

yastu vāsavanirjetā rāvaṇasyātmasaṃbhavaḥ |
sa eṣa rathamāsthāya hanūmantaṃ jighāṃsati || 32 ||
[Analyze grammar]

tamapratimasaṃsthānaiḥ śaraiḥ śatruvidāraṇaiḥ |
jīvitāntakarairghoraiḥ saumitre rāvaṇiṃ jahi || 33 ||
[Analyze grammar]

ityevamuktastu tadā mahātmā vibhīṣaṇenārivibhīṣaṇena |
dadarśa taṃ parvatasaṃnikāśaṃ rathasthitaṃ bhīmabalaṃ durāsadam || 34 ||
[Analyze grammar]