Chapter 36

tato dyāṃ pṛthivīṃ caiva vīkṣamāṇā vanaukasaḥ |
dadṛśuḥ saṃtatau bāṇairbhrātarau rāmalakṣmaṇau || 1 ||
[Analyze grammar]

vṛṣṭvevoparate deve kṛtakarmaṇi rākṣase |
ājagāmātha taṃ deśaṃ sasugrīvo vibhīṣaṇaḥ || 2 ||
[Analyze grammar]

nīladvividamaindāśca suṣeṇasumukhāṅgadāḥ |
tūrṇaṃ hanumatā sārdhamanvaśocanta rāghavau || 3 ||
[Analyze grammar]

niśceṣṭau mandaniḥśvāsau śoṇitaughapariplutau |
śarajālācitau stabdhau śayānau śaratalpayoḥ || 4 ||
[Analyze grammar]

niḥśvasantau yathā sarpau niśceṣṭau mandavikramau |
rudhirasrāvadigdhāṅgau tāpanīyāviva dhvajau || 5 ||
[Analyze grammar]

tau vīraśayane vīrau śayānau mandaceṣṭitau |
yūthapaistaiḥ parivṛtau bāṣpavyākulalocanaiḥ || 6 ||
[Analyze grammar]

rāghavau patitau dṛṣṭvā śarajālasamāvṛtau |
babhūvurvyathitāḥ sarve vānarāḥ savibhīṣaṇāḥ || 7 ||
[Analyze grammar]

antarikṣaṃ nirīkṣanto diśaḥ sarvāśca vānarāḥ |
na cainaṃ māyayā channaṃ dadṛśū rāvaṇiṃ raṇe || 8 ||
[Analyze grammar]

taṃ tu māyāpraticchinnaṃ māyayaiva vibhīṣaṇaḥ |
vīkṣamāṇo dadarśātha bhrātuḥ putramavasthitam || 9 ||
[Analyze grammar]

tamapratima karmāṇamapratidvandvamāhave |
dadarśāntarhitaṃ vīraṃ varadānādvibhīṣaṇaḥ || 10 ||
[Analyze grammar]

indrajittvātmanaḥ karma tau śayānau samīkṣya ca |
uvāca paramaprīto harṣayan sarvanairṛtān || 11 ||
[Analyze grammar]

dūṣaṇasya ca hantārau kharasya ca mahābalau |
sāditau māmakairbāṇairbhrātarau rāmalakṣmaṇau || 12 ||
[Analyze grammar]

nemau mokṣayituṃ śakyāvetasmādiṣubandhanāt |
sarvairapi samāgamya sarṣisaṅghaiḥ surāsuraiḥ || 13 ||
[Analyze grammar]

yatkṛte cintayānasya śokārtasya piturmama |
aspṛṣṭvā śayanaṃ gātraistriyāmā yāti śarvatī || 14 ||
[Analyze grammar]

kṛtsneyaṃ yatkṛte laṅkā nadī varṣāsvivākulā |
so'yaṃ mūlaharo'narthaḥ sarveṣāṃ nihato mayā || 15 ||
[Analyze grammar]

rāmasya lakṣmaṇasyaiva sarveṣāṃ ca vanaukasām |
vikramā niṣphalāḥ sarve yathā śaradi toyadāḥ || 16 ||
[Analyze grammar]

evamuktvā tu tān sarvān rākṣasānparipārśvagān |
yūthapānapi tān sarvāṃstāḍayāmāsa rāvaṇiḥ || 17 ||
[Analyze grammar]

tānardayitvā bāṇaughaistrāsayitvā ca vānarān |
prajahāsa mahābāhurvacanaṃ cedamabravīt || 18 ||
[Analyze grammar]

śarabandhena ghoreṇa mayā baddhau camūmukhe |
sahitau bhrātarāvetau niśāmayata rākṣasāḥ || 19 ||
[Analyze grammar]

evamuktāstu te sarve rākṣasāḥ kūṭayodhinaḥ |
paraṃ vismayamājagmuḥ karmaṇā tena toṣitāḥ || 20 ||
[Analyze grammar]

vineduśca mahānādān sarve te jaladopamāḥ |
hato rāma iti jñātvā rāvaṇiṃ samapūjayan || 21 ||
[Analyze grammar]

niṣpandau tu tadā dṛṣṭvā tāv ubhau rāmalakṣmaṇau |
vasudhāyāṃ nirucchvāsau hatāvityanvamanyata || 22 ||
[Analyze grammar]

harṣeṇa tu samāviṣṭa indrajit samitiṃjayaḥ |
praviveśa purīṃ laṅkāṃ harṣayan sarvanairṛtān || 23 ||
[Analyze grammar]

rāmalakṣmaṇayordṛṣṭvā śarīre sāyakaiścite |
sarvāṇi cāṅgopāṅgāni sugrīvaṃ bhayamāviśat || 24 ||
[Analyze grammar]

tamuvāca paritrastaṃ vānarendraṃ vibhīṣaṇaḥ |
sabāṣpavadanaṃ dīnaṃ śokavyākulalocanam || 25 ||
[Analyze grammar]

alaṃ trāsena sugrīva bāṣpavego nigṛhyatām |
evaṃ prāyāṇi yuddhāni vijayo nāsti naiṣṭhikaḥ || 26 ||
[Analyze grammar]

saśeṣabhāgyatāsmākaṃ yadi vīra bhaviṣyati |
mohametau prahāsyete bhrātarau rāmalakṣmaṇau || 27 ||
[Analyze grammar]

paryavasthāpayātmānamanāthaṃ māṃ ca vānara |
satyadharmānuraktānāṃ nāsti mṛtyukṛtaṃ bhayam || 28 ||
[Analyze grammar]

evamuktvā tatastasya jalaklinnena pāṇinā |
sugrīvasya śubhe netre pramamārja vibhīṣaṇaḥ || 29 ||
[Analyze grammar]

pramṛjya vadanaṃ tasya kapirājasya dhīmataḥ |
abravīt kālasaṃprātamasaṃbhrāntamidaṃ vacaḥ || 30 ||
[Analyze grammar]

na kālaḥ kapirājendra vaiklavyamanuvartitum |
atisneho'pyakāle'sminmaraṇāyopapadyate || 31 ||
[Analyze grammar]

tasmādutsṛjya vaiklavyaṃ sarvakāryavināśanam |
hitaṃ rāmapurogāṇāṃ sainyānāmanucintyatām || 32 ||
[Analyze grammar]

atha vā rakṣyatāṃ rāmo yāvat saṃjñā viparyayaḥ |
labdhasaṃjñau tu kākutsthau bhayaṃ no vyapaneṣyataḥ || 33 ||
[Analyze grammar]

naitat kiṃ cana rāmasya na ca rāmo mumūrṣati |
na hyenaṃ hāsyate lakṣmīrdurlabhā yā gatāyuṣām || 34 ||
[Analyze grammar]

tasmādāśvāsayātmānaṃ balaṃ cāśvāsaya svakam |
yāvat sarvāṇi sainyāni punaḥ saṃsthāpayāmyaham || 35 ||
[Analyze grammar]

ete hyutphullanayanāstrāsādāgatasādhvasāḥ |
karṇe karṇe prakathitā harayo haripuṃgava || 36 ||
[Analyze grammar]

māṃ tu dṛṣṭvā pradhāvantamanīkaṃ saṃpraharṣitum |
tyajantu harayastrāsaṃ bhuktapūrvāmiva srajam || 37 ||
[Analyze grammar]

samāśvāsya tu sugrīvaṃ rākṣasendro vibhīṣaṇaḥ |
vidrutaṃ vānarānīkaṃ tat samāśvāsayat punaḥ || 38 ||
[Analyze grammar]

indrajittu mahāmāyaḥ sarvasainyasamāvṛtaḥ |
viveśa nagarīṃ laṅkāṃ pitaraṃ cābhyupāgamat || 39 ||
[Analyze grammar]

tatra rāvaṇamāsīnamabhivādya kṛtāñjaliḥ |
ācacakṣe priyaṃ pitre nihatau rāmalakṣmaṇau || 40 ||
[Analyze grammar]

utpapāta tato hṛṣṭaḥ putraṃ ca pariṣasvaje |
rāvaṇo rakṣasāṃ madhye śrutvā śatrū nipātitau || 41 ||
[Analyze grammar]

upāghrāya sa mūrdhnyenaṃ papraccha prītamānasaḥ |
pṛcchate ca yathāvṛttaṃ pitre sarvaṃ nyavedayat || 42 ||
[Analyze grammar]

sa harṣavegānugatāntarātmā śrutvā vacastasya mahārathasya |
jahau jvaraṃ dāśaratheḥ samutthitaṃ prahṛṣya vācābhinananda putram || 43 ||
[Analyze grammar]