Chapter 35

sa tasya gatimanvicchan rājaputraḥ pratāpavān |
dideśātibalo rāmo daśavānarayūthapān || 1 ||
[Analyze grammar]

dvau suṣeṇasya dāyādau nīlaṃ ca plavagarṣabham |
aṅgadaṃ vāliputraṃ ca śarabhaṃ ca tarasvinam || 2 ||
[Analyze grammar]

vinataṃ jāmbavantaṃ ca sānuprasthaṃ mahābalam |
ṛṣabhaṃ carṣabhaskandhamādideśa paraṃtapaḥ || 3 ||
[Analyze grammar]

te saṃprahṛṣṭā harayo bhīmānudyamya pādapān |
ākāśaṃ viviśuḥ sarve mārgāmāṇā diśo daśa || 4 ||
[Analyze grammar]

teṣāṃ vegavatāṃ vegamiṣubhirvegavattaraiḥ |
astravit paramāstreṇa vārayāmāsa rāvaṇiḥ || 5 ||
[Analyze grammar]

taṃ bhīmavegā harayo nārācaiḥ kṣatavikṣatāḥ |
andhakāre na dadṛśurmeghaiḥ sūryamivāvṛtam || 6 ||
[Analyze grammar]

rāmalakṣmaṇayoreva sarvamarmabhidaḥ śarān |
bhṛśamāveśayāmāsa rāvaṇiḥ samitiṃjayaḥ || 7 ||
[Analyze grammar]

nirantaraśarīrau tu bhrātarau rāmalakṣmaṇau |
kruddhenendrajitā vīrau pannagaiḥ śaratāṃ gataiḥ || 8 ||
[Analyze grammar]

tayoḥ kṣatajamārgeṇa susrāva rudhiraṃ bahu |
tāv ubhau ca prakāśete puṣpitāviva kiṃśukau || 9 ||
[Analyze grammar]

tataḥ paryantaraktākṣo bhinnāñjanacayopamaḥ |
rāvaṇirbhrātarau vākyamantardhānagato'bravīt || 10 ||
[Analyze grammar]

yudhyamānamanālakṣyaṃ śakro'pi tridaśeśvaraḥ |
draṣṭumāsādituṃ vāpi na śaktaḥ kiṃ punaryuvām || 11 ||
[Analyze grammar]

prāvṛtāviṣujālena rāghavau kaṅkapatriṇā |
eṣa roṣaparītātmā nayāmi yamasādanam || 12 ||
[Analyze grammar]

evamuktvā tu dharmajñau bhrātarau rāmalakṣmaṇau |
nirbibheda śitairbāṇaiḥ prajaharṣa nanāda ca || 13 ||
[Analyze grammar]

bhinnāñjanacayaśyāmo visphārya vipulaṃ dhanuḥ |
bhūyo bhūyaḥ śarān ghorān visasarja mahāmṛdhe || 14 ||
[Analyze grammar]

tato marmasu marmajño majjayanniśitāñ śarān |
rāmalakṣmaṇayorvīro nanāda ca muhurmuhuḥ || 15 ||
[Analyze grammar]

baddhau tu śarabandhena tāv ubhau raṇamūrdhani |
nimeṣāntaramātreṇa na śekaturudīkṣitum || 16 ||
[Analyze grammar]

tato vibhinnasarvāṅgau śaraśalyācitāv ubhau |
dhvajāviva mahendrasya rajjumuktau prakampitau || 17 ||
[Analyze grammar]

tau saṃpracalitau vīrau marmabhedena karśitau |
nipetaturmaheṣvāsau jagatyāṃ jagatīpatī || 18 ||
[Analyze grammar]

tau vīraśayane vīrau śayānau rudhirokṣitau |
śaraveṣṭitasarvāṅgāvārtau paramapīḍitau || 19 ||
[Analyze grammar]

na hyaviddhaṃ tayorgātraṃ babhūvāṅgulamantaram |
nānirbhinnaṃ na cāstabdhamā karāgrādajihmagaiḥ || 20 ||
[Analyze grammar]

tau tu krūreṇa nihatau rakṣasā kāmarūpiṇā |
asṛksusruvatustīvraṃ jalaṃ prasravaṇāviva || 21 ||
[Analyze grammar]

papāta prathamaṃ rāmo viddho marmasu mārgaṇaiḥ |
krodhādindrajitā yena purā śakro vinirjitaḥ || 22 ||
[Analyze grammar]

nāracairardhanārācairbhallairañjalikairapi |
vivyādha vatsadantaiśca siṃhadaṃṣṭraiḥ kṣuraistathā || 23 ||
[Analyze grammar]

sa vīraśayane śiśye vijyamādāya kārmukam |
bhinnamuṣṭiparīṇāhaṃ triṇataṃ rukmabhūṣitam || 24 ||
[Analyze grammar]

bāṇapātāntare rāmaṃ patitaṃ puruṣarṣabham |
sa tatra lakṣmaṇo dṛṣṭvā nirāśo jīvite'bhavat || 25 ||
[Analyze grammar]

baddhau tu vīrau patitau śayānau tau vānarāḥ saṃparivārya tasthuḥ |
samāgatā vāyusutapramukhyā viṣadamārtāḥ paramaṃ ca jagmuḥ || 26 ||
[Analyze grammar]