Chapter 3

sugrīvasya vacaḥ śrutvā hetumat paramārthavit |
pratijagrāha kākutstho hanūmantamathābravīt || 1 ||
[Analyze grammar]

tarasā setubandhena sāgarocchoṣaṇena vā |
sarvathā susamartho'smi sāgarasyāsya laṅghane || 2 ||
[Analyze grammar]

kati durgāṇi durgāyā laṅkāyāstadbravīhi me |
jñātumicchāmi tat sarvaṃ darśanādiva vānara || 3 ||
[Analyze grammar]

balasya parimāṇaṃ ca dvāradurgakriyāmapi |
gupti karma ca laṅkāyā rakṣasāṃ sadanāni ca || 4 ||
[Analyze grammar]

yathāsukhaṃ yathāvacca laṅkāyāmasi dṛṣṭavān |
saramācakṣva tattvena sarvathā kuśalo hyasi || 5 ||
[Analyze grammar]

śrutvā rāmasya vacanaṃ hanūmānmārutātmajaḥ |
vākyaṃ vākyavidāṃ śreṣṭho rāmaṃ punarathābravīt || 6 ||
[Analyze grammar]

śrūyatāṃ sarvamākhyāsye durgakarmavidhānataḥ |
guptā purī yathā laṅkā rakṣitā ca yathā balaiḥ || 7 ||
[Analyze grammar]

parāṃ samṛddhiṃ laṅkāyāḥ sāgarasya ca bhīmatām |
vibhāgaṃ ca balaughasya nirdeśaṃ vāhanasya ca || 8 ||
[Analyze grammar]

prahṛṣṭā muditā laṅkā mattadvipasamākulā |
mahatī rathasaṃpūrṇā rakṣogaṇasamākulā || 9 ||
[Analyze grammar]

dṛḍhabaddhakavāṭāni mahāparighavanti ca |
dvārāṇi vipulānyasyāścatvāri sumahānti ca || 10 ||
[Analyze grammar]

vapreṣūpalayantrāṇi balavanti mahānti ca |
āgataṃ parasainyaṃ taistatra pratinivāryate || 11 ||
[Analyze grammar]

dvāreṣu saṃskṛtā bhīmāḥ kālāyasamayāḥ śitāḥ |
śataśo rocitā vīraiḥ śataghnyo rakṣasāṃ gaṇaiḥ || 12 ||
[Analyze grammar]

sauvarṇaśca mahāṃstasyāḥ prākāro duṣpradharṣaṇaḥ |
maṇividrumavaidūryamuktāvicaritāntaraḥ || 13 ||
[Analyze grammar]

sarvataśca mahābhīmāḥ śītatoyā mahāśubhāḥ |
agādhā grāhavatyaśca parikhā mīnasevitāḥ || 14 ||
[Analyze grammar]

dvāreṣu tāsāṃ catvāraḥ saṃkramāḥ paramāyatāḥ |
yantrairupetā bahubhirmahadbhirdṛḍhasaṃdhibhiḥ || 15 ||
[Analyze grammar]

trāyante saṃkramāstatra parasainyāgame sati |
yantraistairavakīryante parikhāsu samantataḥ || 16 ||
[Analyze grammar]

ekastvakampyo balavān saṃkramaḥ sumahādṛḍhaḥ |
kāñcanairbahubhiḥ stambhairvedikābhiśca śobhitaḥ || 17 ||
[Analyze grammar]

svayaṃ prakṛtisaṃpanno yuyutsū rāma rāvaṇaḥ |
utthitaścāpramattaśca balānāmanudarśane || 18 ||
[Analyze grammar]

laṅkā purī nirālambā devadurgā bhayāvahā |
nādeyaṃ pārvataṃ vanyaṃ kṛtrimaṃ ca caturvidham || 19 ||
[Analyze grammar]

sthitā pāre samudrasya dūrapārasya rāghava |
naupathaścāpi nāstyatra nirādeśaśca sarvataḥ || 20 ||
[Analyze grammar]

śailāgre racitā durgā sā pūrdevapuropamā |
vājivāraṇasaṃpūrṇā laṅkā paramadurjayā || 21 ||
[Analyze grammar]

parighāśca śataghnyaśca yantrāṇi vividhāni ca |
śobhayanti purīṃ laṅkāṃ rāvaṇasya durātmanaḥ || 22 ||
[Analyze grammar]

ayutaṃ rakṣasāmatra paścimadvāramāśritam |
śūlahastā durādharṣāḥ sarve khaḍgāgrayodhinaḥ || 23 ||
[Analyze grammar]

niyutaṃ rakṣasāmatra dakṣiṇadvāramāśritam |
caturaṅgeṇa sainyena yodhāstatrāpyanuttamāḥ || 24 ||
[Analyze grammar]

prayutaṃ rakṣasāmatra pūrvadvāraṃ samāśritam |
carmakhaḍgadharāḥ sarve tathā sarvāstrakovidāḥ || 25 ||
[Analyze grammar]

arbudaṃ rakṣasāmatra uttaradvāramāśritam |
rathinaścāśvavāhāśca kulaputrāḥ supūjitāḥ || 26 ||
[Analyze grammar]

śataṃ śatasahasrāṇāṃ madhyamaṃ gulmamāśritam |
yātudhānā durādharṣāḥ sāgrakoṭiśca rakṣasām || 27 ||
[Analyze grammar]

te mayā saṃkramā bhagnāḥ parikhāścāvapūritāḥ |
dagdhā ca nagarī laṅkā prākārāścāvasāditāḥ || 28 ||
[Analyze grammar]

yena kena tu mārgeṇa tarāma varuṇālayam |
hateti nagarī laṅkāṃ vānarairavadhāryatām || 29 ||
[Analyze grammar]

aṅgado dvivido maindo jāmbavānpanaso nalaḥ |
nīlaḥ senāpatiścaiva balaśeṣeṇa kiṃ tava || 30 ||
[Analyze grammar]

plavamānā hi gatvā tāṃ rāvaṇasya mahāpurīm |
saprakārāṃ sabhavanāmānayiṣyanti maithilīm || 31 ||
[Analyze grammar]

evamājñāpaya kṣipraṃ balānāṃ sarvasaṃgraham |
muhūrtena tu yuktena prasthānamabhirocaya || 32 ||
[Analyze grammar]