Chapter 2

taṃ tu śokaparidyūnaṃ rāmaṃ daśarathātmajam |
uvāca vacanaṃ śrīmān sugrīvaḥ śokanāśanam || 1 ||
[Analyze grammar]

kiṃ tvaṃ saṃtapyase vīra yathānyaḥ prākṛtastathā |
maivaṃ bhūstyaja saṃtāpaṃ kṛtaghna iva sauhṛdam || 2 ||
[Analyze grammar]

saṃtāpasya ca te sthānaṃ na hi paśyāmi rāghava |
pravṛttāv upalabdhāyāṃ jñāte ca nilaye ripoḥ || 3 ||
[Analyze grammar]

dhṛtimāñ śāstravit prājñaḥ paṇḍitaścāsi rāghava |
tyajemāṃ pāpikāṃ buddhiṃ kṛtvātmevārthadūṣaṇīm || 4 ||
[Analyze grammar]

samudraṃ laṅghayitvā tu mahānakrasamākulam |
laṅkāmārohayiṣyāmo haniṣyāmaśca te ripum || 5 ||
[Analyze grammar]

nirutsāhasya dīnasya śokaparyākulātmanaḥ |
sarvārthā vyavasīdanti vyasanaṃ cādhigacchati || 6 ||
[Analyze grammar]

ime śūrāḥ samarthāśca sarve no hariyūthapāḥ |
tvatpriyārthaṃ kṛtotsāhāḥ praveṣṭumapi pāvakam || 7 ||
[Analyze grammar]

eṣāṃ harṣeṇa jānāmi tarkaścāsmindṛḍho mama |
vikrameṇa samāneṣye sītāṃ hatvā yathā ripum || 8 ||
[Analyze grammar]

seturatra yathā vadhyed yathā paśyema tāṃ purīm |
tasya rākṣasarājasya tathā tvaṃ kuru rāghava || 9 ||
[Analyze grammar]

dṛṣṭvā tāṃ hi purīṃ laṅkāṃ trikūṭaśikhare sthitām |
hataṃ ca rāvaṇaṃ yuddhe darśanādupadhāraya || 10 ||
[Analyze grammar]

setubaddhaḥ samudre ca yāval laṅkā samīpataḥ |
sarvaṃ tīrṇaṃ ca vai sainyaṃ jitamityupadhāryatām || 11 ||
[Analyze grammar]

ime hi samare śūrā harayaḥ kāmarūpiṇaḥ |
tadalaṃ viklavā buddhī rājan sarvārthanāśanī || 12 ||
[Analyze grammar]

puruṣasya hi loke'smiñ śokaḥ śauryāpakarṣaṇaḥ |
yattu kāryaṃ manuṣyeṇa śauṇḍīryamavalambatā |
śūrāṇāṃ hi manuṣyāṇāṃ tvadvidhānāṃ mahātmanām || 13 ||
[Analyze grammar]

vinaṣṭe vā pranaṣṭe vā śokaḥ sarvārthanāśanaḥ |
tvaṃ tu buddhimatāṃ śreṣṭhaḥ sarvaśāstrārthakovidaḥ || 14 ||
[Analyze grammar]

madvidhaiḥ sacivaiḥ sārthamariṃ jetumihārhasi |
na hi paśyāmyahaṃ kaṃ cittriṣu lokeṣu rāghava || 15 ||
[Analyze grammar]

gṛhītadhanuṣo yaste tiṣṭhedabhimukho raṇe |
vānareṣu samāsaktaṃ na te kāryaṃ vipatsyate || 16 ||
[Analyze grammar]

acirāddrakṣyase sītāṃ tīrtvā sāgaramakṣayam |
tadalaṃ śokamālambya krodhamālamba bhūpate || 17 ||
[Analyze grammar]

niśceṣṭāḥ kṣatriyā mandāḥ sarve caṇḍasya bibhyati |
laṅganārthaṃ ca ghorasya samudrasya nadīpateḥ || 18 ||
[Analyze grammar]

sahāsmābhirihopetaḥ sūkṣmabuddhirvicāraya |
ime hi samare śūrā harayaḥ kāmarūpiṇaḥ || 19 ||
[Analyze grammar]

tānarīn vidhamiṣyanti śilāpādapavṛṣṭibhiḥ |
kathaṃ cit paripaśyāmaste vayaṃ varuṇālayam || 20 ||
[Analyze grammar]

kimuktvā bahudhā cāpi sarvathā vijayī bhavān || 21 ||
[Analyze grammar]