Chapter 44

hatānmantrisutānbuddhvā vānareṇa mahātmanā |
rāvaṇaḥ saṃvṛtākāraścakāra matimuttamām || 1 ||
[Analyze grammar]

sa virūpākṣayūpākṣau durdharaṃ caiva rākṣasaṃ |
praghasaṃ bhāsakarṇaṃ ca pañcasenāgranāyakān || 2 ||
[Analyze grammar]

saṃdideśa daśagrīvo vīrānnayaviśāradān |
hanūmadgrahaṇe vyagrān vāyuvegasamānyudhi || 3 ||
[Analyze grammar]

yāta senāgragāḥ sarve mahābalaparigrahāḥ |
savājirathamātaṅgāḥ sa kapiḥ śāsyatāmiti || 4 ||
[Analyze grammar]

yattaiśca khalu bhāvyaṃ syāttamāsādya vanālayam |
karma cāpi samādheyaṃ deśakālavirodhitam || 5 ||
[Analyze grammar]

na hyahaṃ taṃ kapiṃ manye karmaṇā pratitarkayan |
sarvathā tanmahadbhūtaṃ mahābalaparigraham |
bhavedindreṇa vā sṛṣṭamasmadarthaṃ tapobalāt || 6 ||
[Analyze grammar]

sanāgayakṣagandharvā devāsuramaharṣayaḥ |
yuṣmābhiḥ sahitaiḥ sarvairmayā saha vinirjitāḥ || 7 ||
[Analyze grammar]

tairavaśyaṃ vidhātavyaṃ vyalīkaṃ kiṃ cideva naḥ |
tadeva nātra saṃdehaḥ prasahya parigṛhyatām || 8 ||
[Analyze grammar]

nāvamanyo bhavadbhiśca hariḥ krūraparākramaḥ |
dṛṣṭā hi harayaḥ śīghrā mayā vipulavikramāḥ || 9 ||
[Analyze grammar]

vālī ca saha sugrīvo jāmbavāṃśca mahābalaḥ |
nīlaḥ senāpatiścaiva ye cānye dvividādayaḥ || 10 ||
[Analyze grammar]

naiva teṣāṃ gatirbhīmā na tejo na parākramaḥ |
na matirna balotsāho na rūpaparikalpanam || 11 ||
[Analyze grammar]

mahat sattvamidaṃ jñeyaṃ kapirūpaṃ vyavasthitam |
prayatnaṃ mahadāsthāya kriyatāmasya nigrahaḥ || 12 ||
[Analyze grammar]

kāmaṃ lokāstrayaḥ sendrāḥ sasurāsuramānavāḥ |
bhavatāmagrataḥ sthātuṃ na paryāptā raṇājire || 13 ||
[Analyze grammar]

tathāpi tu nayajñena jayamākāṅkṣatā raṇe |
ātmā rakṣyaḥ prayatnena yuddhasiddhirhi cañcalā || 14 ||
[Analyze grammar]

te svāmivacanaṃ sarve pratigṛhya mahaujasaḥ |
samutpeturmahāvegā hutāśasamatejasaḥ || 15 ||
[Analyze grammar]

rathaiśca mattairnāgaiśca vājibhiśca mahājavaiḥ |
śastraiśca vividhaistīkṣṇaiḥ sarvaiścopacitā balaiḥ || 16 ||
[Analyze grammar]

tatastaṃ dadṛśurvīrā dīpyamānaṃ mahākapim |
raśmimantamivodyantaṃ svatejoraśmimālinam || 17 ||
[Analyze grammar]

toraṇasthaṃ mahāvegaṃ mahāsattvaṃ mahābalam |
mahāmatiṃ mahotsāhaṃ mahākāyaṃ mahābalam || 18 ||
[Analyze grammar]

taṃ samīkṣyaiva te sarve dikṣu sarvāsvavasthitāḥ |
taistaiḥ praharaṇairbhīmairabhipetustatastataḥ || 19 ||
[Analyze grammar]

tasya pañcāyasāstīkṣṇāḥ sitāḥ pītamukhāḥ śarāḥ |
śirastyutpalapatrābhā durdhareṇa nipātitāḥ || 20 ||
[Analyze grammar]

sa taiḥ pañcabhirāviddhaḥ śaraiḥ śirasi vānaraḥ |
utpapāta nadan vyomni diśo daśa vinādayan || 21 ||
[Analyze grammar]

tatastu durdharo vīraḥ sarathaḥ sajjakārmukaḥ |
kirañ śaraśatairnaikairabhipede mahābalaḥ || 22 ||
[Analyze grammar]

sa kapirvārayāmāsa taṃ vyomni śaravarṣiṇam |
vṛṣṭimantaṃ payodānte payodamiva mārutaḥ || 23 ||
[Analyze grammar]

ardyamānastatastena durdhareṇānilātmajaḥ |
cakāra ninadaṃ bhūyo vyavardhata ca vegavān || 24 ||
[Analyze grammar]

sa dūraṃ sahasotpatya durdharasya rathe hariḥ |
nipapāta mahāvego vidyudrāśirgirāviva || 25 ||
[Analyze grammar]

tatastaṃ mathitāṣṭāśvaṃ rathaṃ bhagnākṣakūvaram |
vihāya nyapatadbhūmau durdharastyaktajīvitaḥ || 26 ||
[Analyze grammar]

taṃ virūpākṣayūpākṣau dṛṣṭvā nipatitaṃ bhuvi |
saṃjātaroṣau durdharṣāv utpetaturariṃdamau || 27 ||
[Analyze grammar]

sa tābhyāṃ sahasotpatya viṣṭhito vimale'mbare |
mudgarābhyāṃ mahābāhurvakṣasyabhihataḥ kapiḥ || 28 ||
[Analyze grammar]

tayorvegavatorvegaṃ vinihatya mahābalaḥ |
nipapāta punarbhūmau suparṇasamavikramaḥ || 29 ||
[Analyze grammar]

sa sālavṛkṣamāsādya samutpāṭya ca vānaraḥ |
tāv ubhau rākṣasau vīrau jaghāna pavanātmajaḥ || 30 ||
[Analyze grammar]

tatastāṃstrīn hatāñjñātvā vānareṇa tarasvinā |
abhipede mahāvegaḥ prasahya praghaso harim || 31 ||
[Analyze grammar]

bhāsakarṇaśca saṃkruddhaḥ śūlamādāya vīryavān |
ekataḥ kapiśārdūlaṃ yaśasvinamavasthitau || 32 ||
[Analyze grammar]

paṭṭiśena śitāgreṇa praghasaḥ pratyapothayat |
bhāsakarṇaśca śūlena rākṣasaḥ kapisattamam || 33 ||
[Analyze grammar]

sa tābhyāṃ vikṣatairgātrairasṛgdigdhatanūruhaḥ |
abhavadvānaraḥ kruddho bālasūryasamaprabhaḥ || 34 ||
[Analyze grammar]

samutpāṭya gireḥ śṛṅgaṃ samṛgavyālapādapam |
jaghāna hanumān vīro rākṣasau kapikuñjaraḥ || 35 ||
[Analyze grammar]

tatasteṣvavasanneṣu senāpatiṣu pañcasu |
balaṃ tadavaśeṣaṃ tu nāśayāmāsa vānaraḥ || 36 ||
[Analyze grammar]

aśvairaśvān gajairnāgānyodhairyodhān rathai rathān |
sa kapirnāśayāmāsa sahasrākṣa ivāsurān || 37 ||
[Analyze grammar]

hatairnāgaiśca turagairbhagnākṣaiśca mahārathaiḥ |
hataiśca rākṣasairbhūmī ruddhamārgā samantataḥ || 38 ||
[Analyze grammar]

tataḥ kapistāndhvajinīpatīn raṇe nihatya vīrān sabalān savāhanān |
tadeva vīraḥ parigṛhya toraṇaṃ kṛtakṣaṇaḥ kāla iva prajākṣaye || 39 ||
[Analyze grammar]