Chapter 69

nidarśayitvā rāmāya sītāyāḥ pratipādane |
vākyamanvarthamarthajñaḥ kabandhaḥ punarabravīt || 1 ||
[Analyze grammar]

eṣa rāma śivaḥ panthā yatraite puṣpitā drumāḥ |
pratīcīṃ diśamāśritya prakāśante manoramāḥ || 2 ||
[Analyze grammar]

jambūpriyālapanasāḥ plakṣanyagrodhatindukāḥ |
aśvatthāḥ karṇikārāśca cūtāścānye ca pādapāḥ || 3 ||
[Analyze grammar]

tānāruhyātha vā bhūmau pātayitvā ca tānbalāt |
phalānyamṛtakalpāni bhakṣayantau gamiṣyathaḥ || 4 ||
[Analyze grammar]

caṅkramantau varāndeśāñ śailācchailaṃ vanādvanam |
tataḥ puṣkariṇīṃ vīrau pampāṃ nāma gamiṣyathaḥ || 5 ||
[Analyze grammar]

aśarkarāmavibhraṃśāṃ samatīrthamaśaivalām |
rāma saṃjātavālūkāṃ kamalotpalaśobhitām || 6 ||
[Analyze grammar]

tatra haṃsāḥ plavāḥ krauñcāḥ kurarāścaiva rāghava |
valgusvarā nikūjanti pampāsalilagocarāḥ || 7 ||
[Analyze grammar]

nodvijante narāndṛṣṭvā vadhasyākovidāḥ śubhāḥ |
ghṛtapiṇḍopamān sthūlāṃstāndvijānbhakṣayiṣyathaḥ || 8 ||
[Analyze grammar]

rohitān vakratuṇḍāṃśca nalamīnāṃśca rāghava |
pampāyāmiṣubhirmatsyāṃstatra rāma varān hatān || 9 ||
[Analyze grammar]

nistvakpakṣānayastaptānakṛśānekakaṇṭakān |
tava bhaktyā samāyukto lakṣmaṇaḥ saṃpradāsyati || 10 ||
[Analyze grammar]

bhṛśaṃ te khādato matsyānpampāyāḥ puṣpasaṃcaye |
padmagandhi śivaṃ vāri sukhaśītamanāmayam || 11 ||
[Analyze grammar]

uddhṛtya sa tadākliṣṭaṃ rūpyasphaṭikasaṃnibham |
atha puṣkaraparṇena lakṣmaṇaḥ pāyayiṣyati || 12 ||
[Analyze grammar]

sthūlān giriguhāśayyān varāhān vanacāriṇaḥ |
apāṃ lobhādupāvṛttān vṛṣabhāniva nardataḥ |
rūpānvitāṃśca pampāyāṃ drakṣyasi tvaṃ narottama || 13 ||
[Analyze grammar]

sāyāhne vicaran rāma viṭapī mālyadhāriṇaḥ |
śītodakaṃ ca pampāyāṃ dṛṣṭvā śokaṃ vihāsyasi || 14 ||
[Analyze grammar]

sumanobhiścitāṃstatra tilakānnaktamālakān |
utpalāni ca phullāni paṅkajāni ca rāghava || 15 ||
[Analyze grammar]

na tāni kaścinmālyāni tatrāropayitā naraḥ |
mataṅgaśiṣyāstatrāsannṛṣayaḥ susamāhitaḥ || 16 ||
[Analyze grammar]

teṣāṃ bhārābhitaptānāṃ vanyamāharatāṃ guroḥ |
ye prapeturmahīṃ tūrṇaṃ śarīrāt svedabindavaḥ || 17 ||
[Analyze grammar]

tāni mālyāni jātāni munīnāṃ tapasā tadā |
svedabindusamutthāni na vinaśyanti rāghava || 18 ||
[Analyze grammar]

teṣāmadyāpi tatraiva dṛśyate paricāriṇī |
śramaṇī śabarī nāma kākutstha cirajīvinī || 19 ||
[Analyze grammar]

tvāṃ tu dharme sthitā nityaṃ sarvabhūtanamaskṛtam |
dṛṣṭvā devopamaṃ rāma svargalokaṃ gamiṣyati || 20 ||
[Analyze grammar]

tatastad rāma pampāyāstīramāśritya paścimam |
āśramasthānamatulaṃ guhyaṃ kākutstha paśyasi || 21 ||
[Analyze grammar]

na tatrākramituṃ nāgāḥ śaknuvanti tamāśramam |
ṛṣestasya mataṅgasya vidhānāttacca kānanam || 22 ||
[Analyze grammar]

tasminnandanasaṃkāśe devāraṇyopame vane |
nānāvihagasaṃkīrṇe raṃsyase rāma nirvṛtaḥ || 23 ||
[Analyze grammar]

ṛṣyamūkastu pampāyāḥ purastāt puṣpitadrumaḥ |
suduḥkhārohaṇo nāma śiśunāgābhirakṣitaḥ |
udāro brahmaṇā caiva pūrvakāle vinirmitaḥ || 24 ||
[Analyze grammar]

śayānaḥ puruṣo rāma tasya śailasya mūrdhani |
yat svapne labhate vittaṃ tat prabuddho'dhigacchati || 25 ||
[Analyze grammar]

na tvenaṃ viṣamācāraḥ pāpakarmādhirohati |
tatraiva praharantyenaṃ suptamādāya rākṣasāḥ || 26 ||
[Analyze grammar]

tato'pi śiśunāgānāmākrandaḥ śrūyate mahān |
krīḍatāṃ rāma pampāyāṃ mataṅgāraṇyavāsinām || 27 ||
[Analyze grammar]

siktā rudhiradhārābhiḥ saṃhatya paramadvipāḥ |
pracaranti pṛthakkīrṇā meghavarṇāstarasvinaḥ || 28 ||
[Analyze grammar]

te tatra pītvā pānīyaṃ vimalaṃ śītamavyayam |
nivṛttāḥ saṃvigāhante vanāni vanagocarāḥ || 29 ||
[Analyze grammar]

rāma tasya tu śailasya mahatī śobhate guhā |
śilāpidhānā kākutstha duḥkhaṃ cāsyāḥ praveśanam || 30 ||
[Analyze grammar]

tasyā guhāyāḥ prāgdvāre mahāñ śītodako hradaḥ |
bahumūlaphalo ramyo nānānagasamāvṛtaḥ || 31 ||
[Analyze grammar]

tasyāṃ vasati sugrīvaścaturbhiḥ saha vānaraiḥ |
kadā cicchikhare tasya parvatasyāvatiṣṭhate || 32 ||
[Analyze grammar]

kabandhastvanuśāsyaivaṃ tāv ubhau rāmalakṣmaṇau |
sragvī bhāskaravarṇābhaḥ khe vyarocata vīryavān || 33 ||
[Analyze grammar]

taṃ tu khasthaṃ mahābhāgaṃ kabandhaṃ rāmalakṣmaṇau |
prasthitau tvaṃ vrajasveti vākyamūcaturantikāt || 34 ||
[Analyze grammar]

gamyatāṃ kāryasiddhyarthamiti tāvabravīcca saḥ |
suprītau tāvanujñāpya kabandhaḥ prasthitastadā || 35 ||
[Analyze grammar]

sa tat kabandhaḥ pratipadya rūpaṃ vṛtaḥ śriyā bhāskaratulyadehaḥ |
nidarśayan rāmamavekṣya khasthaḥ sakhyaṃ kuruṣveti tadābhyuvāca || 36 ||
[Analyze grammar]