Chapter 108

pratiprayāte bharate vasan rāmastapovane |
lakṣayāmāsa sodvegamathautsukyaṃ tapasvinām || 1 ||
[Analyze grammar]

ye tatra citrakūṭasya purastāttāpasāśrame |
rāmamāśritya niratāstānalakṣayadutsukān || 2 ||
[Analyze grammar]

nayanairbhṛkuṭībhiśca rāmaṃ nirdiśya śaṅkitāḥ |
anyonyamupajalpantaḥ śanaiścakrurmithaḥ kathāḥ || 3 ||
[Analyze grammar]

teṣāmautsukyamālakṣya rāmastvātmani śaṅkitaḥ |
kṛtāñjaliruvācedamṛṣiṃ kulapatiṃ tataḥ || 4 ||
[Analyze grammar]

na kaccidbhagavan kiṃ cit pūrvavṛttamidaṃ mayi |
dṛśyate vikṛtaṃ yena vikriyante tapasvinaḥ || 5 ||
[Analyze grammar]

pramādāccaritaṃ kaccit kiṃ cinnāvarajasya me |
lakṣmaṇasyarṣibhirdṛṣṭaṃ nānurūpamivātmanaḥ || 6 ||
[Analyze grammar]

kaccicchuśrūṣamāṇā vaḥ śuśrūṣaṇaparā mayi |
pramadābhyucitāṃ vṛttiṃ sītā yuktaṃ na vartate || 7 ||
[Analyze grammar]

atharṣirjarayā vṛddhastapasā ca jarāṃ gataḥ |
vepamāna ivovāca rāmaṃ bhūtadayāparam || 8 ||
[Analyze grammar]

kutaḥ kalyāṇasattvāyāḥ kalyāṇābhiratestathā |
calanaṃ tāta vaidehyāstapasviṣu viśeṣataḥ || 9 ||
[Analyze grammar]

tvannimittamidaṃ tāvattāpasānprati vartate |
rakṣobhyastena saṃvignāḥ kathayanti mithaḥ kathāḥ || 10 ||
[Analyze grammar]

rāvaṇāvarajaḥ kaścit kharo nāmeha rākṣasaḥ |
utpāṭya tāpasān sarvāñjanasthānaniketanān || 11 ||
[Analyze grammar]

dhṛṣṭaśca jitakāśī ca nṛśaṃsaḥ puruṣādakaḥ |
avaliptaśca pāpaśca tvāṃ ca tāta na mṛṣyate || 12 ||
[Analyze grammar]

tvaṃ yadā prabhṛti hyasminnāśrame tāta vartase |
tadā prabhṛti rakṣāṃsi viprakurvanti tāpasān || 13 ||
[Analyze grammar]

darśayanti hi bībhatsaiḥ krūrairbhīṣaṇakairapi |
nānā rūpairvirūpaiśca rūpairasukhadarśanaiḥ || 14 ||
[Analyze grammar]

apraśastairaśucibhiḥ saṃprayojya ca tāpasān |
pratighnantyaparān kṣipramanāryāḥ purataḥ sthitaḥ || 15 ||
[Analyze grammar]

teṣu teṣvāśramasthāneṣvabuddhamavalīya ca |
ramante tāpasāṃstatra nāśayanto'lpacetasaḥ || 16 ||
[Analyze grammar]

apakṣipanti srugbhāṇḍānagnīn siñcanti vāriṇā |
kalaśāṃśca pramṛdnanti havane samupasthite || 17 ||
[Analyze grammar]

tairdurātmabhirāviṣṭānāśramānprajihāsavaḥ |
gamanāyānyadeśasya codayanty ṛṣayo'dya mām || 18 ||
[Analyze grammar]

tat purā rāma śārīrāmupahiṃsāṃ tapasviṣu |
darśayati hi duṣṭāste tyakṣyāma imamāśramam || 19 ||
[Analyze grammar]

bahumūlaphalaṃ citramavidūrādito vanam |
purāṇāśramamevāhaṃ śrayiṣye sagaṇaḥ punaḥ || 20 ||
[Analyze grammar]

kharastvayyapi cāyuktaṃ purā tāta pravartate |
sahāsmābhirito gaccha yadi buddhiḥ pravartate || 21 ||
[Analyze grammar]

sakalatrasya saṃdeho nityaṃ yattasya rāghava |
samarthasyāpi hi sato vāso duḥkha ihādya te || 22 ||
[Analyze grammar]

ityuktavantaṃ rāmastaṃ rājaputrastapasvinam |
na śaśākottarairvākyairavaroddhuṃ samutsukam || 23 ||
[Analyze grammar]

abhinandya samāpṛcchya samādhāya ca rāghavam |
sa jagāmāśramaṃ tyaktvā kulaiḥ kulapatiḥ saha || 24 ||
[Analyze grammar]

rāmaḥ saṃsādhya tv ṛṣigaṇamanugamanāddeśāttasmāccit kulapatimabhivādyarṣim |
samyakprītaistairanumata upadiṣṭārthaḥ puṇyaṃ vāsāya svanilayamupasaṃpede || 25 ||
[Analyze grammar]

āśramaṃ tv ṛṣivirahitaṃ prabhuḥ kṣaṇamapi na jahau sa rāghavaḥ |
rāghavaṃ hi satatamanugatāstāpasāścarṣicaritadhṛtaguṇāḥ || 26 ||
[Analyze grammar]