Chapter 102

kruddhamājñāya rāmaṃ tu vasiṣṭhaḥ pratyuvāca ha |
jābālirapi jānīte lokasyāsya gatāgatim |
nivartayitukāmastu tvāmetadvākyamabravīt || 1 ||
[Analyze grammar]

imāṃ lokasamutpattiṃ lokanātha nibodha me |
sarvaṃ salilamevāsīt pṛthivī yatra nirmitā |
tataḥ samabhavadbrahmā svayambhūrdaivataiḥ saha || 2 ||
[Analyze grammar]

sa varāhastato bhūtvā projjahāra vasuṃdharām |
asṛjacca jagat sarvaṃ saha putraiḥ kṛtātmabhiḥ || 3 ||
[Analyze grammar]

ākāśaprabhavo brahmā śāśvato nitya avyayaḥ |
tasmānmarīciḥ saṃjajñe marīceḥ kaśyapaḥ sutaḥ || 4 ||
[Analyze grammar]

vivasvān kaśyapājjajñe manurvaivasvataḥ smṛtaḥ |
sa tu prajāpatiḥ pūrvamikṣvākustu manoḥ sutaḥ || 5 ||
[Analyze grammar]

yasyeyaṃ prathamaṃ dattā samṛddhā manunā mahī |
tamikṣvākumayodhyāyāṃ rājānaṃ viddhi pūrvakam || 6 ||
[Analyze grammar]

ikṣvākostu sutaḥ śrīmān kukṣireveti viśrutaḥ |
kukṣerathātmajo vīro vikukṣirudapadyata || 7 ||
[Analyze grammar]

vikukṣestu mahātejā bāṇaḥ putraḥ pratāpavān |
bāṇasya tu mahābāhuranaraṇyo mahāyaśāḥ || 8 ||
[Analyze grammar]

nānāvṛṣṭirbabhūvāsminna durbhikṣaṃ satāṃ vare |
anaraṇye mahārāje taskaro vāpi kaścana || 9 ||
[Analyze grammar]

anaraṇyānmahābāhuḥ pṛthū rājā babhūva ha |
tasmāt pṛthormahārājastriśaṅkurudapadyata |
sa satyavacanādvīraḥ saśarīro divaṃ gataḥ || 10 ||
[Analyze grammar]

triśaṅkorabhavat sūnurdhundhumāro mahāyaśāḥ |
dhundhumārānmahātejā yuvanāśvo vyajāyata || 11 ||
[Analyze grammar]

yuvanāśva sutaḥ śrīmānmāndhātā samapadyata |
māndhātustu mahātejāḥ susaṃdhirudapadyata || 12 ||
[Analyze grammar]

susaṃdherapi putrau dvau dhruvasaṃdhiḥ prasenajit |
yaśasvī dhruvasaṃdhestu bharato ripusūdanaḥ || 13 ||
[Analyze grammar]

bharatāttu mahābāhorasito nāma jāyata |
yasyaite pratirājāna udapadyanta śatravaḥ |
haihayāstālajaṅghāśca śūrāśca śaśabindavaḥ || 14 ||
[Analyze grammar]

tāṃstu sarvānprativyūhya yuddhe rājā pravāsitaḥ |
sa ca śailavare ramye babhūvābhirato muniḥ |
dve cāsya bhārye garbhiṇyau babhūvaturiti śrutiḥ || 15 ||
[Analyze grammar]

bhārgavaścyavano nāma himavantamupāśritaḥ |
tamṛṣiṃ samupāgamya kālindī tvabhyavādayat || 16 ||
[Analyze grammar]

sa tāmabhyavadadvipro varepsuṃ putrajanmani |
tataḥ sā gṛhamāgamya devī putraṃ vyajāyata || 17 ||
[Analyze grammar]

sapatnyā tu garastasyai datto garbhajighāṃsayā |
gareṇa saha tenaiva jātaḥ sa sagaro'bhavat || 18 ||
[Analyze grammar]

sa rājā sagaro nāma yaḥ samudramakhānayat |
iṣṭvā parvaṇi vegena trāsayantamimāḥ prajāḥ || 19 ||
[Analyze grammar]

asamañjastu putro'bhūt sagarasyeti naḥ śrutam |
jīvanneva sa pitrā tu nirastaḥ pāpakarmakṛt || 20 ||
[Analyze grammar]

aṃśumāniti putro'bhūdasamañjasya vīryavān |
dilīpo'ṃśumataḥ putro dilīpasya bhagīrathaḥ || 21 ||
[Analyze grammar]

bhagīrathāt kakutsthastu kākutsthā yena tu smṛtāḥ |
kakutsthasya tu putro'bhūd raghuryena tu rāghavaḥ || 22 ||
[Analyze grammar]

raghostu putrastejasvī pravṛddhaḥ puruṣādakaḥ |
kalmāṣapādaḥ saudāsa ityevaṃ prathito bhuvi || 23 ||
[Analyze grammar]

kalmāṣapādaputro'bhūcchaṅkhaṇastviti viśrutaḥ |
yastu tadvīryamāsādya sahaseno vyanīnaśat || 24 ||
[Analyze grammar]

śaṅkhaṇasya tu putro'bhūcchūraḥ śrīmān sudarśanaḥ |
sudarśanasyāgnivarṇa agnivarṣasya śīghragaḥ || 25 ||
[Analyze grammar]

śīghragasya maruḥ putro maroḥ putraḥ praśuśrukaḥ |
praśuśrukasya putro'bhūdambarīṣo mahādyutiḥ || 26 ||
[Analyze grammar]

ambarīṣasya putro'bhūnnahuṣaḥ satyavikramaḥ |
nahuṣasya ca nābhāgaḥ putraḥ paramadhārmikaḥ || 27 ||
[Analyze grammar]

ajaśca suvrataścaiva nābhāgasya sutāv ubhau |
ajasya caiva dharmātmā rājā daśarathaḥ sutaḥ || 28 ||
[Analyze grammar]

tasya jyeṣṭho'si dāyādo rāma ityabhiviśrutaḥ |
tadgṛhāṇa svakaṃ rājyamavekṣasva jagannṛpa || 29 ||
[Analyze grammar]

ikṣvākūṇāṃ hi sarveṣāṃ rājā bhavati pūrvajaḥ |
pūrvaje nāvaraḥ putro jyeṣṭho rājye'bhiṣicyate || 30 ||
[Analyze grammar]

sa rāghavāṇāṃ kuladharmamātmanaḥ sanātanaṃ nādya vihātumarhasi |
prabhūtaratnāmanuśādhi medinīṃ prabhūtarāṣṭrāṃ pitṛvanmahāyaśāḥ || 31 ||
[Analyze grammar]