Chapter 82

tacchrutvā nipuṇaṃ sarvaṃ bharataḥ saha mantribhiḥ |
iṅgudīmūlamāgamya rāmaśayyāmavekṣya tām || 1 ||
[Analyze grammar]

abravījjananīḥ sarvā iha tena mahātmanā |
śarvarī śayitā bhūmāvidamasya vimarditam || 2 ||
[Analyze grammar]

mahābhāgakulīnena mahābhāgena dhīmatā |
jāto daśarathenorvyāṃ na rāmaḥ svaptumarhati || 3 ||
[Analyze grammar]

ajinottarasaṃstīrṇe varāstaraṇasaṃcaye |
śayitvā puruṣavyāghraḥ kathaṃ śete mahītale || 4 ||
[Analyze grammar]

prāsādāgra vimāneṣu valabhīṣu ca sarvadā |
haimarājatabhaumeṣu varāstaraṇaśāliṣu || 5 ||
[Analyze grammar]

puṣpasaṃcayacitreṣu candanāgarugandhiṣu |
pāṇḍurābhraprakāśeṣu śukasaṃgharuteṣu ca || 6 ||
[Analyze grammar]

gītavāditranirghoṣairvarābharaṇaniḥsvanaiḥ |
mṛdaṅgavaraśabdaiśca satataṃ pratibodhitaḥ || 7 ||
[Analyze grammar]

bandibhirvanditaḥ kāle bahubhiḥ sūtamāgadhaiḥ |
gāthābhiranurūpābhiḥ stutibhiśca paraṃtapaḥ || 8 ||
[Analyze grammar]

aśraddheyamidaṃ loke na satyaṃ pratibhāti mā |
muhyate khalu me bhāvaḥ svapno'yamiti me matiḥ || 9 ||
[Analyze grammar]

na nūnaṃ daivataṃ kiṃ cit kālena balavattaram |
yatra dāśarathī rāmo bhūmāvevaṃ śayīta saḥ || 10 ||
[Analyze grammar]

videharājasya sutā sītā ca priyadarśanā |
dayitā śayitā bhūmau snuṣā daśarathasya ca || 11 ||
[Analyze grammar]

iyaṃ śayyā mama bhrāturidaṃ hi parivartitam |
sthaṇḍile kaṭhine sarvaṃ gātrairvimṛditaṃ tṛṇam || 12 ||
[Analyze grammar]

manye sābharaṇā suptā sītāsmiñ śayane tadā |
tatra tatra hi dṛśyante saktāḥ kanakabindavaḥ || 13 ||
[Analyze grammar]

uttarīyamihāsaktaṃ suvyaktaṃ sītayā tadā |
tathā hyete prakāśante saktāḥ kauśeyatantavaḥ || 14 ||
[Analyze grammar]

manye bhartuḥ sukhā śayyā yena bālā tapasvinī |
sukumārī satī duḥkhaṃ na vijānāti maithilī || 15 ||
[Analyze grammar]

sārvabhauma kule jātaḥ sarvalokasukhāvahaḥ |
sarvalokapriyastyaktvā rājyaṃ priyamanuttamam || 16 ||
[Analyze grammar]

kathamindīvaraśyāmo raktākṣaḥ priyadarśanaḥ |
sukhabhāgī ca duḥkhārhaḥ śayito bhuvi rāghavaḥ || 17 ||
[Analyze grammar]

siddhārthā khalu vaidehī patiṃ yānugatā vanam |
vayaṃ saṃśayitāḥ sarve hīnāstena mahātmanā || 18 ||
[Analyze grammar]

akarṇadhārā pṛthivī śūnyeva pratibhāti mā |
gate daśarathe svarge rāme cāraṇyamāśrite || 19 ||
[Analyze grammar]

na ca prārthayate kaścinmanasāpi vasuṃdharām |
vane'pi vasatastasya bāhuvīryābhirakṣitām || 20 ||
[Analyze grammar]

śūnyasaṃvaraṇārakṣāmayantritahayadvipām |
apāvṛtapuradvārāṃ rājadhānīmarakṣitām || 21 ||
[Analyze grammar]

aprahṛṣṭabalāṃ nyūnāṃ viṣamasthāmanāvṛtām |
śatravo nābhimanyante bhakṣyān viṣakṛtāniva || 22 ||
[Analyze grammar]

adya prabhṛti bhūmau tu śayiṣye'haṃ tṛṇeṣu vā |
phalamūlāśano nityaṃ jaṭācīrāṇi dhārayan || 23 ||
[Analyze grammar]

tasyārthamuttaraṃ kālaṃ nivatsyāmi sukhaṃ vane |
taṃ pratiśravamāmucya nāsya mithyā bhaviṣyati || 24 ||
[Analyze grammar]

vasantaṃ bhrāturarthāya śatrughno mānuvatsyati |
lakṣmaṇena saha tvāryo ayodhyāṃ pālayiṣyati || 25 ||
[Analyze grammar]

abhiṣekṣyanti kākutsthamayodhyāyāṃ dvijātayaḥ |
api me devatāḥ kuryurimaṃ satyaṃ manoratham || 26 ||
[Analyze grammar]

prasādyamānaḥ śirasā mayā svayaṃ bahuprakāraṃ yadi na prapatsyate |
tato'nuvatsyāmi cirāya rāghavaṃ vane vasannārhati māmupekṣitum || 27 ||
[Analyze grammar]