Chapter 83

vyuṣya rātriṃ tu tatraiva gaṅgākūle sa rāghavaḥ |
bharataḥ kālyamutthāya śatrughnamidamabravīt || 1 ||
[Analyze grammar]

śatrughottiṣṭha kiṃ śeṣe niṣādādhipatiṃ guham |
śīghramānaya bhadraṃ te tārayiṣyati vāhinīm || 2 ||
[Analyze grammar]

jāgarmi nāhaṃ svapimi tathaivāryaṃ vicintayan |
ityevamabravīdbhrātrā śatrughno'pi pracoditaḥ || 3 ||
[Analyze grammar]

iti saṃvadatorevamanyonyaṃ narasiṃhayoḥ |
āgamya prāñjaliḥ kāle guho bharatamabravīt || 4 ||
[Analyze grammar]

kaccit sukhaṃ nadītīre'vātsīḥ kākutstha śarvarīm |
kaccicca saha sainyasya tava sarvamanāmayam || 5 ||
[Analyze grammar]

guhasya tattu vacanaṃ śrutvā snehādudīritam |
rāmasyānuvaśo vākyaṃ bharato'pīdamabravīt || 6 ||
[Analyze grammar]

sukhā naḥ śarvarī rājanpūjitāścāpi te vayam |
gaṅgāṃ tu naubhirbahvībhirdāśāḥ saṃtārayantu naḥ || 7 ||
[Analyze grammar]

tato guhaḥ saṃtvaritaḥ śrutvā bharataśāsanam |
pratipraviśya nagaraṃ taṃ jñātijanamabravīt || 8 ||
[Analyze grammar]

uttiṣṭhata prabudhyadhvaṃ bhadramastu hi vaḥ sadā |
nāvaḥ samanukarṣadhvaṃ tārayiṣyāma vāhinīm || 9 ||
[Analyze grammar]

te tathoktāḥ samutthāya tvaritā rājaśāsanāt |
pañca nāvāṃ śatānyeva samāninyuḥ samantataḥ || 10 ||
[Analyze grammar]

anyāḥ svastikavijñeyā mahāghaṇḍā dharā varāḥ |
śobhamānāḥ patākinyo yuktavātāḥ susaṃhatāḥ || 11 ||
[Analyze grammar]

tataḥ svastikavijñeyāṃ pāṇḍukambalasaṃvṛtām |
sanandighoṣāṃ kalyāṇīṃ guho nāvamupāharat || 12 ||
[Analyze grammar]

tāmāruroha bharataḥ śatrughnaśca mahābalaḥ |
kausalyā ca sumitrā ca yāścānyā rājayoṣitaḥ || 13 ||
[Analyze grammar]

purohitaśca tat pūrvaṃ gurave brāhmaṇāśca ye |
anantaraṃ rājadārāstathaiva śakaṭāpaṇāḥ || 14 ||
[Analyze grammar]

āvāsamādīpayatāṃ tīrthaṃ cāpyavagāhatām |
bhāṇḍāni cādadānānāṃ ghoṣastridivamaspṛśat || 15 ||
[Analyze grammar]

patākinyastu tā nāvaḥ svayaṃ dāśairadhiṣṭhitāḥ |
vahantyo janamārūḍhaṃ tadā saṃpeturāśugāḥ || 16 ||
[Analyze grammar]

nārīṇāmabhipūrṇāstu kāścit kāścittu vājinām |
kaścittatra vahanti sma yānayugyaṃ mahādhanam || 17 ||
[Analyze grammar]

tāḥ sma gatvā paraṃ tīramavaropya ca taṃ janam |
nivṛttāḥ kāṇḍacitrāṇi kriyante dāśabandhubhiḥ || 18 ||
[Analyze grammar]

savaijayantāstu gajā gajārohaiḥ pracoditāḥ |
tarantaḥ sma prakāśante sadhvajā iva parvatāḥ || 19 ||
[Analyze grammar]

nāvaścāruruhustvanye plavaisterustathāpare |
anye kumbhaghaṭaisteruranye teruśca bāhubhiḥ || 20 ||
[Analyze grammar]

sā puṇyā dhvajinī gaṅgāṃ dāśaiḥ saṃtāritā svayam |
maitre muhūrte prayayau prayāgavanamuttamam || 21 ||
[Analyze grammar]

āśvāsayitvā ca camūṃ mahātmā niveśayitvā ca yathopajoṣam |
draṣṭuṃ bharadvājamṛṣipravaryamṛtvigvṛtaḥ sanbharataḥ pratasthe || 22 ||
[Analyze grammar]