Chapter 81

guhasya vacanaṃ śrutvā bharato bhṛśamapriyam |
dhyānaṃ jagāma tatraiva yatra tacchrutamapriyam || 1 ||
[Analyze grammar]

sukumāro mahāsattvaḥ siṃhaskandho mahābhujaḥ |
puṇḍarīka viśālākṣastaruṇaḥ priyadarśanaḥ || 2 ||
[Analyze grammar]

pratyāśvasya muhūrtaṃ tu kālaṃ paramadurmanāḥ |
papāta sahasā totrairhṛdi viddha iva dvipaḥ || 3 ||
[Analyze grammar]

tadavasthaṃ tu bharataṃ śatrughno'nantara sthitaḥ |
pariṣvajya rurodoccairvisaṃjñaḥ śokakarśitaḥ || 4 ||
[Analyze grammar]

tataḥ sarvāḥ samāpeturmātaro bharatasya tāḥ |
upavāsa kṛśā dīnā bhartṛvyasanakarśitāḥ || 5 ||
[Analyze grammar]

tāśca taṃ patitaṃ bhūmau rudantyaḥ paryavārayan |
kausalyā tvanusṛtyainaṃ durmanāḥ pariṣasvaje || 6 ||
[Analyze grammar]

vatsalā svaṃ yathā vatsamupagūhya tapasvinī |
paripapraccha bharataṃ rudantī śokalālasā || 7 ||
[Analyze grammar]

putravyādhirna te kacciccharīraṃ paribādhate |
adya rājakulasyāsya tvadadhīnaṃ hi jīvitam || 8 ||
[Analyze grammar]

tvāṃ dṛṣṭvā putra jīvāmi rāme sabhrātṛke gate |
vṛtte daśarathe rājñi nātha ekastvamadya naḥ || 9 ||
[Analyze grammar]

kaccinna lakṣmaṇe putra śrutaṃ te kiṃ cidapriyam |
putra vā hyekaputrāyāḥ sahabhārye vanaṃ gate || 10 ||
[Analyze grammar]

sa muhūrtaṃ samāśvasya rudanneva mahāyaśāḥ |
kausalyāṃ parisāntvyedaṃ guhaṃ vacanamabravīt || 11 ||
[Analyze grammar]

bhrātā me kvāvasad rātriṃ kva sītā kva ca lakṣmaṇaḥ |
asvapacchayane kasmin kiṃ bhuktvā guha śaṃsa me || 12 ||
[Analyze grammar]

so'bravīdbharataṃ pṛṣṭo niṣādādhipatirguhaḥ |
yadvidhaṃ pratipede ca rāme priyahite'tithau || 13 ||
[Analyze grammar]

annamuccāvacaṃ bhakṣyāḥ phalāni vividhāni ca |
rāmāyābhyavahārārthaṃ bahucopahṛtaṃ mayā || 14 ||
[Analyze grammar]

tat sarvaṃ pratyanujñāsīd rāmaḥ satyaparākramaḥ |
na hi tat pratyagṛhṇāt sa kṣatradharmamanusmaran || 15 ||
[Analyze grammar]

na hyasmābhiḥ pratigrāhyaṃ sakhe deyaṃ tu sarvadā |
iti tena vayaṃ rājannanunītā mahātmanā || 16 ||
[Analyze grammar]

lakṣmaṇena samānītaṃ pītvā vāri mahāyaśāḥ |
aupavāsyaṃ tadākārṣīd rāghavaḥ saha sītayā || 17 ||
[Analyze grammar]

tatastu jalaśeṣeṇa lakṣmaṇo'pyakarottadā |
vāg yatāste trayaḥ saṃdhyāmupāsata samāhitāḥ || 18 ||
[Analyze grammar]

saumitristu tataḥ paścādakarot svāstaraṃ śubham |
svayamānīya barhīṃṣi kṣipraṃ rāghava kāraṇāt || 19 ||
[Analyze grammar]

tasmin samāviśad rāmaḥ svāstare saha sītayā |
prakṣālya ca tayoḥ pādāvapacakrāma lakṣmaṇaḥ || 20 ||
[Analyze grammar]

etattadiṅgudīmūlamidameva ca tattṛṇam |
yasmin rāmaśca sītā ca rātriṃ tāṃ śayitāv ubhau || 21 ||
[Analyze grammar]

niyamya pṛṣṭhe tu talāṅgulitravāñ śaraiḥ supūrṇāviṣudhī paraṃtapaḥ |
mahaddhanuḥ sajyamupohya lakṣmaṇo niśāmatiṣṭhat parito'sya kevalam || 22 ||
[Analyze grammar]

tatastvahaṃ cottamabāṇacāpadhṛk sthito'bhavaṃ tatra sa yatra lakṣmaṇaḥ |
atandribhirjñātibhirāttakārmukairmahendrakalpaṃ paripālayaṃstadā || 23 ||
[Analyze grammar]