Chapter 80

ācacakṣe'tha sadbhāvaṃ lakṣmaṇasya mahātmanaḥ |
bharatāyāprameyāya guho gahanagocaraḥ || 1 ||
[Analyze grammar]

taṃ jāgrataṃ guṇairyuktaṃ varacāpeṣudhāriṇam |
bhrātṛ guptyarthamatyantamahaṃ lakṣmaṇamabravam || 2 ||
[Analyze grammar]

iyaṃ tāta sukhā śayyā tvadarthamupakalpitā |
pratyāśvasihi śeṣvāsyāṃ sukhaṃ rāghavanandana || 3 ||
[Analyze grammar]

ucito'yaṃ janaḥ sarve duḥkhānāṃ tvaṃ sukhocitaḥ |
dharmātmaṃstasya guptyarthaṃ jāgariṣyāmahe vayam || 4 ||
[Analyze grammar]

na hi rāmāt priyataro mamāsti bhuvi kaścana |
motsuko bhūrbravīmyetadapyasatyaṃ tavāgrataḥ || 5 ||
[Analyze grammar]

asya prasādādāśaṃse loke'smin sumahad yaśaḥ |
dharmāvāptiṃ ca vipulāmarthāvāptiṃ ca kevalām || 6 ||
[Analyze grammar]

so'haṃ priyasakhaṃ rāmaṃ śayānaṃ saha sītayā |
rakṣiṣyāmi dhanuṣpāṇiḥ sarvaiḥ svairjñātibhiḥ saha || 7 ||
[Analyze grammar]

na hi me'viditaṃ kiṃ cidvane'smiṃścarataḥ sadā |
caturaṅgaṃ hyapi balaṃ prasahema vayaṃ yudhi || 8 ||
[Analyze grammar]

evamasmābhiruktena lakṣmaṇena mahātmanā |
anunītā vayaṃ sarve dharmamevānupaśyatā || 9 ||
[Analyze grammar]

kathaṃ dāśarathau bhūmau śayāne saha sītayā |
śakyā nidrāmayā labdhuṃ jīvitaṃ vā sukhāni vā || 10 ||
[Analyze grammar]

yo na devāsuraiḥ sarvaiḥ śakyaḥ prasahituṃ yudhi |
taṃ paśya guha saṃviṣṭaṃ tṛṇeṣu saha sītayā || 11 ||
[Analyze grammar]

mahatā tapasā labdho vividhaiśca pariśramaiḥ |
eko daśarathasyaiṣa putraḥ sadṛśalakṣaṇaḥ || 12 ||
[Analyze grammar]

asminpravrājite rājā na ciraṃ vartayiṣyati |
vidhavā medinī nūnaṃ kṣiprameva bhaviṣyati || 13 ||
[Analyze grammar]

vinadya sumahānādaṃ śrameṇoparatāḥ striyaḥ |
nirghoṣoparataṃ nūnamadya rājaniveśanam || 14 ||
[Analyze grammar]

kausalyā caiva rājā ca tathaiva jananī mama |
nāśaṃse yadi te sarve jīveyuḥ śarvarīmimām || 15 ||
[Analyze grammar]

jīvedapi hi me mātā śatrughnasyānvavekṣayā |
duḥkhitā yā tu kausalyā vīrasūrvinaśiṣyati || 16 ||
[Analyze grammar]

atikrāntamatikrāntamanavāpya manoratham |
rājye rāmamanikṣipya pitā me vinaśiṣyati || 17 ||
[Analyze grammar]

siddhārthāḥ pitaraṃ vṛttaṃ tasmin kāle hyupasthite |
pretakāryeṣu sarveṣu saṃskariṣyanti bhūmipam || 18 ||
[Analyze grammar]

ramyacatvarasaṃsthānāṃ suvibhaktamahāpathām |
harmyaprāsādasaṃpannāṃ sarvaratnavibhūṣitām || 19 ||
[Analyze grammar]

gajāśvarathasaṃbādhāṃ tūryanādavināditām |
sarvakalyāṇasaṃpūrṇāṃ hṛṣṭapuṣṭajanākulām || 20 ||
[Analyze grammar]

ārāmodyānasaṃpūrṇāṃ samājotsavaśālinīm |
sukhitā vicariṣyanti rājadhānīṃ piturmama || 21 ||
[Analyze grammar]

api satyapratijñena sārdhaṃ kuśalinā vayam |
nivṛtte samaye hyasmin sukhitāḥ praviśemahi || 22 ||
[Analyze grammar]

paridevayamānasya tasyaivaṃ sumahātmanaḥ |
tiṣṭhato rājaputrasya śarvarī sātyavartata || 23 ||
[Analyze grammar]

prabhāte vimale sūrye kārayitvā jaṭā ubhau |
asminbhāgīrathītīre sukhaṃ saṃtāritau mayā || 24 ||
[Analyze grammar]

jaṭādharau tau drumacīravāsasau mahābalau kuñjarayūthapopamau |
vareṣucāpāsidharau paraṃtapau vyavekṣamāṇau saha sītayā gatau || 25 ||
[Analyze grammar]