Chapter 47

pṛṣṭvā tu kuśalaṃ tatra parasparasamāgame |
kathānte sumatirvākyaṃ vyājahāra mahāmunim || 1 ||
[Analyze grammar]

imau kumārau bhadraṃ te devatulyaparākramau |
gajasiṃhagatī vīrau śārdūlavṛṣabhopamau || 2 ||
[Analyze grammar]

padmapatraviśālākṣau khaḍgatūṇīdhanurdharau |
aśvināviva rūpeṇa samupasthitayauvanau || 3 ||
[Analyze grammar]

yadṛcchayaiva gāṃ prāptau devalokādivāmarau |
kathaṃ padbhyāmiha prāptau kimarthaṃ kasya vā mune || 4 ||
[Analyze grammar]

bhūṣayantāvimaṃ deśaṃ candrasūryāvivāmbaram |
parasparasya sadṛśau pramāṇeṅgitaceṣṭitaiḥ || 5 ||
[Analyze grammar]

kimarthaṃ ca naraśreṣṭhau saṃprāptau durgame pathi |
varāyudhadharau vīrau śrotumicchāmi tattvataḥ || 6 ||
[Analyze grammar]

tasya tadvacanaṃ śrutvā yathāvṛttaṃ nyavedayat |
siddhāśramanivāsaṃ ca rākṣasānāṃ vadhaṃ tathā || 7 ||
[Analyze grammar]

viśvāmitravacaḥ śrutvā rājā paramaharṣitaḥ |
atithī paramau prāptau putrau daśarathasya tau |
pūjayāmāsa vidhivat satkārārhau mahābalau || 8 ||
[Analyze grammar]

tataḥ paramasatkāraṃ sumateḥ prāpya rāghavau |
uṣya tatra niśāmekāṃ jagmaturmithilāṃ tataḥ || 9 ||
[Analyze grammar]

tāṃ dṛṣṭvā munayaḥ sarve janakasya purīṃ śubhām |
sādhu sādhviti śaṃsanto mithilāṃ samapūjayan || 10 ||
[Analyze grammar]

mithilopavane tatra āśramaṃ dṛśya rāghavaḥ |
purāṇaṃ nirjanaṃ ramyaṃ papraccha munipuṃgavam || 11 ||
[Analyze grammar]

śrīmadāśramasaṃkāśaṃ kiṃ nvidaṃ munivarjitam |
śrotumicchāmi bhagavan kasyāyaṃ pūrva āśramaḥ || 12 ||
[Analyze grammar]

tacchrutā rāghaveṇoktaṃ vākyaṃ vākyaviśāradaḥ |
pratyuvāca mahātejā viśvamitro mahāmuniḥ || 13 ||
[Analyze grammar]

hanta te kathayiṣyāmi śṛṇu tattvena rāghava |
yasyaitadāśramapadaṃ śaptaṃ kopānmahātmanā || 14 ||
[Analyze grammar]

gautamasya naraśreṣṭha pūrvamāsīnmahātmanaḥ |
āśramo divyasaṃkāśaḥ surairapi supūjitaḥ || 15 ||
[Analyze grammar]

sa ceha tapa ātiṣṭhadahalyāsahitaḥ purā |
varṣapūgānyanekāni rājaputra mahāyaśaḥ || 16 ||
[Analyze grammar]

tasyāntaraṃ viditvā tu sahasrākṣaḥ śacīpatiḥ |
muniveṣadharo'halyāmidaṃ vacanamabravīt || 17 ||
[Analyze grammar]

ṛtukālaṃ pratīkṣante nārthinaḥ susamāhite |
saṃgamaṃ tvahamicchāmi tvayā saha sumadhyame || 18 ||
[Analyze grammar]

muniveṣaṃ sahasrākṣaṃ vijñāya raghunandana |
matiṃ cakāra durmedhā devarājakutūhalāt || 19 ||
[Analyze grammar]

athābravīt suraśreṣṭhaṃ kṛtārthenāntarātmanā |
kṛtārtho'si suraśreṣṭha gaccha śīghramitaḥ prabho |
ātmānaṃ māṃ ca deveśa sarvadā rakṣa mānadaḥ || 20 ||
[Analyze grammar]

indrastu prahasan vākyamahalyāmidamabravīt |
suśroṇi parituṣṭo'smi gamiṣyāmi yathāgatam || 21 ||
[Analyze grammar]

evaṃ saṃgamya tu tayā niścakrāmoṭajāttataḥ |
sa saṃbhramāttvaran rāma śaṅkito gautamaṃ prati || 22 ||
[Analyze grammar]

gautamaṃ sa dadarśātha praviśantaṃ mahāmunim |
devadānavadurdharṣaṃ tapobalasamanvitam |
tīrthodakapariklinnaṃ dīpyamānamivānalam |
gṛhītasamidhaṃ tatra sakuśaṃ munipuṅgavam || 23 ||
[Analyze grammar]

dṛṣṭvā surapatistrasto viṣaṇṇavadano'bhavat || 24 ||
[Analyze grammar]

atha dṛṣṭvā sahasrākṣaṃ muniveṣadharaṃ muniḥ |
durvṛttaṃ vṛttasaṃpanno roṣādvacanamabravīt || 25 ||
[Analyze grammar]

mama rūpaṃ samāsthāya kṛtavānasi durmate |
akartavyamidaṃ yasmādviphalastvaṃ bhaviṣyati || 26 ||
[Analyze grammar]

gautamenaivamuktasya saroṣeṇa mahātmanā |
petaturvṛṣaṇau bhūmau sahasrākṣasya tatkṣaṇāt || 27 ||
[Analyze grammar]

tathā śaptvā sa vai śakraṃ bhāryāmapi ca śaptavān |
iha varṣasahasrāṇi bahūni tvaṃ nivatsyasi || 28 ||
[Analyze grammar]

vāyubhakṣā nirāhārā tapyantī bhasmaśāyinī |
adṛśyā sarvabhūtānāmāśrame'sminnivatsyasi || 29 ||
[Analyze grammar]

yadā caitadvanaṃ ghoraṃ rāmo daśarathātmajaḥ |
āgamiṣyati durdharṣastadā pūtā bhaviṣyasi || 30 ||
[Analyze grammar]

tasyātithyena durvṛtte lobhamohavivarjitā |
matsakāśe mudā yuktā svaṃ vapurdhārayiṣyasi || 31 ||
[Analyze grammar]

evamuktvā mahātejā gautamo duṣṭacāriṇīm |
imamāśramamutsṛjya siddhacāraṇasevite |
himavacchikhare ramye tapastepe mahātapāḥ || 32 ||
[Analyze grammar]