Chapter 48

aphalastu tataḥ śakro devānagnipurogamān |
abravīttrastavadanaḥ sarṣisaṃghān sacāraṇān || 1 ||
[Analyze grammar]

kurvatā tapaso vighnaṃ gautamasya mahātmanaḥ |
krodhamutpādya hi mayā surakāryamidaṃ kṛtam || 2 ||
[Analyze grammar]

aphalo'smi kṛtastena krodhāt sā ca nirākṛtā |
śāpamokṣeṇa mahatā tapo'syāpahṛtaṃ mayā || 3 ||
[Analyze grammar]

tanmāṃ suravarāḥ sarve sarṣisaṃghāḥ sacāraṇāḥ |
surasāhyakaraṃ sarve saphalaṃ kartumarhatha || 4 ||
[Analyze grammar]

śatakratorvacaḥ śrutvā devāḥ sāgnipurogamāḥ |
pitṛdevānupetyāhuḥ saha sarvairmarudgaṇaiḥ || 5 ||
[Analyze grammar]

ayaṃ meṣaḥ savṛṣaṇaḥ śakro hyavṛṣaṇaḥ kṛtaḥ |
meṣasya vṛṣaṇau gṛhya śakrāyāśu prayacchata || 6 ||
[Analyze grammar]

aphalastu kṛto meṣaḥ parāṃ tuṣṭiṃ pradāsyati |
bhavatāṃ harṣaṇārthāya ye ca dāsyanti mānavāḥ || 7 ||
[Analyze grammar]

agnestu vacanaṃ śrutvā pitṛdevāḥ samāgatāḥ |
utpāṭya meṣavṛṣaṇau sahasrākṣe nyavedayan || 8 ||
[Analyze grammar]

tadā prabhṛti kākutstha pitṛdevāḥ samāgatāḥ |
aphalānbhuñjate meṣānphalaisteṣāmayojayan || 9 ||
[Analyze grammar]

indrastu meṣavṛṣaṇastadā prabhṛti rāghava |
gautamasya prabhāvena tapasaśca mahātmanaḥ || 10 ||
[Analyze grammar]

tadāgaccha mahāteja āśramaṃ puṇyakarmaṇaḥ |
tārayaināṃ mahābhāgāmahalyāṃ devarūpiṇīm || 11 ||
[Analyze grammar]

viśvāmitravacaḥ śrutvā rāghavaḥ sahalakṣmaṇaḥ |
viśvāmitraṃ puraskṛtya āśramaṃ praviveśa ha || 12 ||
[Analyze grammar]

dadarśa ca mahābhāgāṃ tapasā dyotitaprabhām |
lokairapi samāgamya durnirīkṣyāṃ surāsuraiḥ || 13 ||
[Analyze grammar]

prayatnānnirmitāṃ dhātrā divyāṃ māyāmayīmiva |
dhūmenābhiparītāṅgīṃ pūrṇacandraprabhāmiva || 14 ||
[Analyze grammar]

satuṣārāvṛtāṃ sābhrāṃ pūrṇacandraprabhāmiva |
madhye'mbhaso durādharṣāṃ dīptāṃ sūryaprabhāmiva || 15 ||
[Analyze grammar]

sa hi gautamavākyena durnirīkṣyā babhūva ha |
trayāṇāmapi lokānāṃ yāvad rāmasya darśanam || 16 ||
[Analyze grammar]

rāghavau tu tatastasyāḥ pādau jagṛhatustadā |
smarantī gautamavacaḥ pratijagrāha sā ca tau || 17 ||
[Analyze grammar]

pādyamarghyaṃ tathātithyaṃ cakāra susamāhitā |
pratijagrāha kākutstho vidhidṛṣṭena karmaṇā || 18 ||
[Analyze grammar]

puṣpavṛṣṭirmahatyāsīddevadundubhinisvanaiḥ |
gandharvāpsarasāṃ cāpi mahānāsīt samāgamaḥ || 19 ||
[Analyze grammar]

sādhu sādhviti devāstāmahalyāṃ samapūjayan |
tapobalaviśuddhāṅgīṃ gautamasya vaśānugām || 20 ||
[Analyze grammar]

gautamo'pi mahātejā ahalyāsahitaḥ sukhī |
rāmaṃ saṃpūjya vidhivattapastepe mahātapāḥ || 21 ||
[Analyze grammar]

rāmo'pi paramāṃ pūjāṃ gautamasya mahāmuneḥ |
sakāśādvidhivat prāpya jagāma mithilāṃ tataḥ || 22 ||
[Analyze grammar]