Chapter 41

[English text for this chapter is available]

pulastya uvāca |
tato gacchennṛpaśreṣṭha mārkaṃḍeyasya cāśramam |
yatra pūrvaṃ tapastaptaṃ mārkaṃḍena mahātmanā || 1 ||
[Analyze grammar]

mṛkaṇḍo brāhmaṇonāma purā'sīcchaṃsitavrataḥ |
ante vayasi saṃjātastasya putro'tisundaraḥ || 2 ||
[Analyze grammar]

sarvalakṣaṇasaṃpūrṇaḥ śāṃtaḥ sūryasamaprabhaḥ |
kasyacittvatha kālasya tasyāśramapade nṛpa || 3 ||
[Analyze grammar]

āgato brāhmaṇo jñānī kaścitsāmudravicchubhaḥ |
tato'sau krīḍamānastu bālakaḥ paṃcavārṣikaḥ || 4 ||
[Analyze grammar]

ānāsāgraśikhāgrābhyāṃ ciraṃ caivāvalokitaḥ |
tato'hasatsa sahasā taṃ mṛkaṇḍo hyalakṣayat || 5 ||
[Analyze grammar]

athā'bravīcciraṃ dṛṣṭastvayā putro mama dvija |
tato hasitavānbhūyaḥ kimidaṃ kāraṇaṃ vada || 6 ||
[Analyze grammar]

asakṛtsa mṛkaṇḍena yāvatpṛṣṭo dvijottamaḥ |
uparodhavaśāttasmai yathārthaṃ saṃnyavedayat || 7 ||
[Analyze grammar]

asya bālasya cihnāni yāni kāye dvijottama |
ajaraścāmaraścaiva tairbhavetpuruṣaḥ kila || 8 ||
[Analyze grammar]

ṣaṇmāsenāsya bālasya nūnaṃ mṛtyurbhaviṣyati |
etasmātkāraṇāddhāsyaṃ mayā'kāri dvijottama |
anṛtaṃ noktapūrvaṃ me vairiṣvapi kadācana || 9 ||
[Analyze grammar]

pulastya uvāca |
evamuktvā tu sa jñānī uṣitvā tatra śarvarīm |
mṛkaṃḍenābhyanujñāta iṣṭaṃ deśaṃ jagāma ha || 10 ||
[Analyze grammar]

mṛkaṃḍopi sutaṃ jñātvā tataḥ kṣīṇāyuṣaṃ nṛpa |
paṃcavārṣikamapyārttaścakāropanayānvitam || 11 ||
[Analyze grammar]

śrutādhyayanasaṃpannaṃ yaṃyaṃ paśyasi cāgrataḥ |
tasyābhivādanaṃ kāryaṃ tvayā putraka nityaśaḥ || 12 ||
[Analyze grammar]

tataścakre brahmacārī piturvākyaṃ viśeṣataḥ || 13 ||
[Analyze grammar]

bālaṃ vṛddhaṃ yuvānaṃ ca yaṃyaṃ paśyati cakṣuṣā |
namaskaroti taṃ sarvaṃ brāhmaṇaṃ vinayānvitaḥ || 14 ||
[Analyze grammar]

kasyacittvatha kālasya tasyāśramasamīpataḥ |
saptarṣayaḥ samāyātāstīrthayātrāparāyaṇāḥ || 15 ||
[Analyze grammar]

atha tānsatvaraṃ gatvā vaṃdayāmāsa pārthiva |
bālaḥ savinayopetaḥ sarvāṃścaiva yathākramam || 16 ||
[Analyze grammar]

dīrghāyurbhava tairuktaḥ sa bālastuṣṭitatparaiḥ |
āsthitāśca yathābhīṣṭaṃ deśaṃ bālaṃ visarjya tam || 17 ||
[Analyze grammar]

teṣāṃ madhyeṃ'girānāma divyajñānasamanvitaḥ |
tenāvalokito bālaḥ sūkṣmadṛṣṭyā paraṃtapa || 18 ||
[Analyze grammar]

atha tānabravītsarvānmunīnkiṃcitsavismayaḥ |
dīrghāyurna ca bālo'yaṃ yuṣmābhiḥ saṃprakīrtitaḥ || 19 ||
[Analyze grammar]

gamiṣyati kumāro'yaṃ nidhanaṃ paṃcame dine |
tanna yuktaṃ hi no vākyamasatyaṃ dvijasattamāḥ || 20 ||
[Analyze grammar]

yathā'yaṃ cirajīvī syāttathā nītirvidhīyatām |
atha te munayo bhītā mithyā vākyasya pārthiva || 21 ||
[Analyze grammar]

bālakaṃ taṃ samādāya brahmalokaṃ gatāstadā |
tatra dṛṣṭvā caturvaktraṃ namaścakrurmunīśvarāḥ || 22 ||
[Analyze grammar]

teṣāmanaṃtaraṃ tena bālake nābhivāditaḥ |
dīrghāyurbhava tenā'pi brahmaṇoktaḥ sa bālakaḥ || 23 ||
[Analyze grammar]

tataḥ saptarṣayo hṛṣṭāḥ svacitte nṛpasattama |
sukhāsīnānsaviśrāṃtānabravīnmunipuṃgavān || 24 ||
[Analyze grammar]

brahmovāca |
paripṛcchata kiṃ kāryaṃ kuto yūyamihāgatāḥ || 25 ||
[Analyze grammar]

ṛṣaya ūcuḥ |
tīrthayātrāprasaṃgena bhramamāṇā mahītalam |
arbudaṃ parvataṃ nāma tasya tīrtheṣu vai gatāḥ || 26 ||
[Analyze grammar]

athāgatya drutaṃ dūrādbālenānena vaṃditāḥ |
dīrghāyurbhava saṃdiṣṭastataścāyamanekadhā |
paṃcame divase'syāpi mṛtyurdeva bhaviṣyati || 27 ||
[Analyze grammar]

yathā vayaṃ tvayā sārddhamasatyā na caturmukha |
bhavāmo'sya kṛte deva tathā kiṃcidvidhīyatām || 28 ||
[Analyze grammar]

atha brahmā prahṛṣṭātmā dṛṣṭvā taṃ munidārakam |
matprasādādayaṃ bālo bhāvī kalpāyurabravīt || 29 ||
[Analyze grammar]

tataste munayo hṛṣṭāstamādāya gṛhaṃ prati |
prasthitā brahmalokāttu namaskṛtvā caturmukham || 30 ||
[Analyze grammar]

atha tasya pitā tatra mṛkaṃḍo munisattamaḥ |
tato bhāryāsamāyukto vilalāpa suduḥkhitaḥ || 31 ||
[Analyze grammar]

hā putraputra karuṇaṃ ruditvā dharmavatsalaḥ |
anāmaṃtrya ca māṃ kasmāddīrghaṃ paṃthānamāśritaḥ || 32 ||
[Analyze grammar]

akṛtvāpi kriyāḥ kāryāḥ kathaṃ mṛtyuvaśaṃ gataḥ |
so'haṃ tvayā vinā putra na jīvāmi kathaṃcana || 33 ||
[Analyze grammar]

evaṃ vilapatastasya bahudhā nṛpasattama |
bālaścābhyāgatastatra yatra deśe purā sthitaḥ || 34 ||
[Analyze grammar]

athāsau prayayau bālaḥ prahṛṣṭenāṃtarātmanā |
taṃ dṛṣṭvā pathi tātaśca saṃprahṛṣṭo babhūva ha || 35 ||
[Analyze grammar]

papracchāṃkaṃ samāropya cirāgamana kāraṇam |
tataḥ sa kathayāmāsa sarvaṃ muniviceṣṭitam |
darśanaṃ brahmalokasya padmayonervaraṃ tathā || 36 ||
[Analyze grammar]

bālaka uvāca |
ajaraścāmaraścāhaṃ kṛtastāta svayaṃbhuvā |
tasmātsatyaṃ madarthe te vyetvasau mānaso jvaraḥ || 37 ||
[Analyze grammar]

so'hamārādhayiṣyāmi tathaiva caturānanam |
kṛtvā'śramapadaṃ ramyamarbude parvatottame || 38 ||
[Analyze grammar]

amṛtasrāvi tadvākyaṃ śrutvā putrasya sa dvijaḥ |
mṛkaṃḍo harṣasaṃyukto vācamityabravīcca tam || 39 ||
[Analyze grammar]

mārkkaṃḍo'pi drutaṃ gatvā ramya marbudaparvatam |
tapastepe suvistīrṇaṃ dhyāyandevaṃ pitāmaham || 40 ||
[Analyze grammar]

tasyāśramapade puṇye śrāvaṇe māsi pārthiva |
paurṇamāsyāṃ viśeṣeṇa yaḥ kuryātpitṛtarpaṇam |
 pitṛmedhaphalaṃ tasya sakalaṃ syādasaṃśayam || 41 ||
[Analyze grammar]

ṛṣiyogena yastatra tarpayedbrāhmaṇottamān |
brahmaloke ciraṃ vāsastasya saṃjāyate nṛpa || 42 ||
[Analyze grammar]

yaḥ snānaṃ kurute tatra samyakchraddhāsamanvitaḥ |
nālpamṛtyubhayaṃ tasya kule kvāpi prajāyate || 43 ||
[Analyze grammar]

iti śrīskānde mahāpurāṇa ekāśīti sāhasryāṃ saṃhitāyāṃ saptame prabhāsakhaṇḍa tṛtīye'rbudakhaṇḍe mārkaṃḍeyāśramapadotpattivarṇanaṃnāmaikacatvāriṃśo'dhyāyaḥ || 41 ||
[Analyze grammar]