Chapter 39

[English text for this chapter is available]

yayātiruvāca |
yattvayā kīrtitaṃ brahmanpūrvaṃ devaiḥ prasāditaḥ |
liṃgaṃ saṃsthāpayāmāsa sthirarūpo maheśvaraḥ || 1 ||
[Analyze grammar]

kasmāttatpātitaṃ liṃgaṃ vālakhilyairmahātmabhiḥ |
kasmāttatrācalo jāto devadevo maheśvaraḥ || 2 ||
[Analyze grammar]

etanme kautukaṃ sarvaṃ yathāvadvaktumarhasi |
tasmindṛṣṭe ca kiṃ puṇyaṃ narāṇāṃ tatra jāyate || 3 ||
[Analyze grammar]

pulastya uvāca |
maheśvarasya māhātmyaṃ śṛṇu pārthivasattama |
atra te kīrtayiṣyāmi pūrvavṛttaṃ kathāṃtaram || 4 ||
[Analyze grammar]

yadā pañcatvamāpannā satī satyaparākramā |
apamānena dakṣasya yajñe na ca nimaṃtritā || 5 ||
[Analyze grammar]

tadā kāmo drutaṃ gṛhya puṣpacāpaṃ tamabhyagāt |
kandarppaṃ sahasā dṛṣṭvā sandhiteṣuṃ sudurjayam || 6 ||
[Analyze grammar]

āpatantaṃ bhayāttasya praṇaṣṭastripurāṃtakaḥ |
sa tadā bhramamāṇaśca itaścetaśca pārthiva || 7 ||
[Analyze grammar]

vālakhilyāśramaṃ prāptaḥ puṇyaṃ sadvṛkṣaśobhitam |
sa tatra bhagavāṃsteṣāṃ dārairdṛṣṭaḥ surūpavān || 8 ||
[Analyze grammar]

digvāsāḥ supriyālāpastatastāḥ kāmamohitāḥ |
 tyaktvā putragṛhādyaṃ ca sarvāstatpṛṣṭhasaṃsthitāḥ |
babhūvuścāniśaṃ rājanmāṃ bhajasveti cābruvan || 9 ||
[Analyze grammar]

cakrurāliṃganaṃ kāściccumbanaṃ ca tathāparāḥ |
anyāstasya hi liṃgaṃ tatspṛśaṃti ca muhurmuhuḥ || 10 ||
[Analyze grammar]

sa cāpi bhagavāñchambhurniṣkāmaḥ parameśvaraḥ |
jagadvyāptiṃ samāśritya sarvaprāṇiṣu vartate || 11 ||
[Analyze grammar]

sa cāpi bhagavācchaṃbhustāsāṃ sarati prāṅmukhaḥ |
bhrāṃtastatrāśrame teṣāṃ dārānkāmena pīḍayan || 12 ||
[Analyze grammar]

atha te munayo dṛṣṭvā vikṛtiṃ dārasaṃbhavām |
ajānanto mahādevaṃ ruṣṭāstasya mahātmanaḥ || 13 ||
[Analyze grammar]

daduḥ śāpaṃ susaṃtaptāḥ kalatrārthe paraṃtapa |
patatāṃ patatāṃ liṅgametatte pāpakṛttama || 14 ||
[Analyze grammar]

viḍambayasi no dārānajasraṃ cāsya darśanāt |
tataścaivāpatalliṃgaṃ tatkṣaṇāttatpuradviṣaḥ || 15 ||
[Analyze grammar]

brahmavākyena rājarṣe cakampe vasudhā tataḥ |
śīrṇāni giriśṛṃgāṇi cukṣubhurmakarālayāḥ || 16 ||
[Analyze grammar]

tato devagaṇāḥ sarve bhayatrastā narādhipa |
akāle pralayaṃ matvā trailokye paryavasthitam || 17 ||
[Analyze grammar]

tata pitāmahaṃ jagmu stasmai sarvaṃ nyavedayan |
pralayasyeva cihnāni dṛśyante parameśvara || 18 ||
[Analyze grammar]

kiṃ nimittaṃ suraśreṣṭha na jānīmo vayaṃ prabho |
teṣāṃ tadvacanaṃ śrutvā ciraṃ dhyātvā pitāmahaḥ || 19 ||
[Analyze grammar]

abravītpātitaṃ liṃgaṃ vālakhilyaiḥ pinākinaḥ |
tenaite dāruṇotpātāḥ saṃjātā bhayasūcakāḥ || 20 ||
[Analyze grammar]

tasmānmayā samāyuktāḥ sarve tatra divaukasaḥ |
vrajaṃtu yena talliṃgaṃ sthāne saṃsthāpayecchivaḥ || 21 ||
[Analyze grammar]

yāvanno jāyate loke pralayo' kālasaṃbhavaḥ |
evaṃ saṃmaṃtrya te sarve tato'rbudamupāyayuḥ || 22 ||
[Analyze grammar]

vālakhilyāśrame yatra talliṃgaṃ nipapāta ha |
tuṣṭuvurvividhaiḥ sūktairvedoktairvinayānvitāḥ || 23 ||
[Analyze grammar]

devā ūcuḥ |
namaste devadeveśa bhaktānāṃ cābhayaṃkara |
namaste sarvavāsāya sarvayajñamayāya ca || 24 ||
[Analyze grammar]

sarveśvarāya devāya paramajyotiṣe namaḥ |
namaḥ sphuṭatara jñānagamyāya vedhase || 25 ||
[Analyze grammar]

tryaṃbakāya ca bhīmāya pinākavarapāṇaye |
tvayi sarvamidaṃ protaṃ sūtre maṇigaṇā iva || 26 ||
[Analyze grammar]

saṃsāre vibudhaśreṣṭha jagatsthāvarajaṃgamam |
na tadasti triloke'sminsusūkṣmamapi śaṃkara |
yattvayā na prabho vyāptaṃ sṛṣṭisaṃhārakāraṇāt || 27 ||
[Analyze grammar]

pṛthivyādīni bhūtāni tvayā sṛṣṭāni kāmataḥ |
yāsyaṃti tāni bhūyo'pi tava kāye jagatpate || 28 ||
[Analyze grammar]

prasīda bhagavaṃstasmālliṃgametatsureśvara |
sthāne sthāpaya bhadraṃ te yāvanna syātprajākṣayaḥ || 29 ||
[Analyze grammar]

śrībhagavānuvāca |
nirvikārasya malliṃgaṃ vālakhilyaiḥ prapātitam |
kathaṃ bhūyaḥ pragṛhṇāmi yāvacchuddhirna jāyate || 30 ||
[Analyze grammar]

śakto'haṃ vālakhilyānāṃ nigrahaṃ karttumañjasā |
kintu me brāhmaṇā mānyāḥ pūjyāśca surasattamāḥ || 31 ||
[Analyze grammar]

acalaṃ liṃgametaddhi noddharttuṃ śakyate vibho |
eka evātra nirdiṣṭa upāyo nāparaḥ smṛtaḥ || 32 ||
[Analyze grammar]

yadi me tvaṃ purā liṃgaṃ pūjayethāḥ pitāmaha |
tato devagaṇāḥ sarve tato viprāstato'pare || 33 ||
[Analyze grammar]

tato nau śāṃtimāgacchejjagatsthāvarajaṃgamam || 34 ||
[Analyze grammar]

pulastya uvāca |
evamuktaḥ sa bhagavāñchaṃkareṇa nṛpottama |
tatastaṃ pūjayāmāsa brahmā pūrvaṃ subhaktitaḥ || 35 ||
[Analyze grammar]

brahmaṇo'nantaraṃ viṣṇustataḥ śakra stato'pare |
vālakhilyādayo viprā mantraiśca śatarudriyaiḥ || 36 ||
[Analyze grammar]

tataste dāruṇotpātā upaśāṃtāśca tatkṣaṇāt |
abhavatsumukho loko vṛtto gandhavaho mṛduḥ || 37 ||
[Analyze grammar]

athovāca mahādevaḥ sarvāṃstāṃstridaśālayān |
vṛṇudhvaṃ suvaraṃ sarve matto yanmanasīpsitam || 38 ||
[Analyze grammar]

devā ūcuḥ |
tava liṃgasya saṃsparśādapi pāpakṛto narāḥ |
svargaṃ yāsyaṃti deveśa nāśaṃ yāsyati kilbiṣam |
vratadānāni sarvāṇi tīrthayātrāyutāni ca || 39 ||
[Analyze grammar]

tasmādvajreṇa devendrastavaitalliṃgamuttamam |
chādayiṣyati sarvatra yadi tvaṃ manyase prabho || 40 ||
[Analyze grammar]

śrībhagavānuvāca |
abhiprāyo mamāpyeṣa vartate hṛdi padmaja |
evaṃ karotu devendraḥ sarvadharmavivṛddhaye || 41 ||
[Analyze grammar]

pulastya uvāca |
tataḥ saṃchādayāmāsa vajreṇa tridaśādhipaḥ |
talliṃgaṃ sarvamartyānāṃ yathā'dṛśyaṃ vyajāyata || 42 ||
[Analyze grammar]

adyāpi vajrasaṃsparśāttatsānnidhyaṃ gato naraḥ |
ājanmamaraṇātpāpānmucyate nātra saṃśayaḥ || 43 ||
[Analyze grammar]

māhātmyaṃ kīrtitaṃ yasmāttalliṃge śaṃkareṇa tu |
vastreṇācchāditaṃ caiva śakreṇaiva dharātale || 44 ||
[Analyze grammar]

tataḥprabhṛti liṃgasya marttye pūjā vyajāyata |
purāsīcchaṃkaraḥ pūjyo yathānye tridaśālayāḥ || 45 ||
[Analyze grammar]

evametatpurāvṛttamarbude parvatottame |
liṃgasya patanātpūjāṃ yanmāṃ tvaṃ pari pṛcchasi || 46 ||
[Analyze grammar]

phālgunāntacaturddaśyāṃ naivedyaṃ nūtanairyavaiḥ |
yo dadātyacaleśāya sa bhūyo neha jāyate || 47 ||
[Analyze grammar]

brāhmaṇānbhojayedyastu bhaktyā tasminnavairyavaiḥ |
yavasaṃkhyāpramāṇāni yugāni divi modate || 48 ||
[Analyze grammar]

tatra dānaṃ praśaṃsanti saktūnāṃ munisattamāḥ |
nūtanānāṃ mahārāja yataḥ proktaṃ purāriṇā || 49 ||
[Analyze grammar]

kiṃ dānairvividhairdattaiḥ kiṃ yajñaiśca suvistaraiḥ |
kiṃ tīrthairvividhaihomaistapobhiḥ kiṃ ca kaṣṭadaiḥ || 50 ||
[Analyze grammar]

phālgunāntacaturddaśyāṃ sumaheśvarasannidhau |
dharmāṇyetāni sarvāṇi kalāṃ nārhaṃti ṣoḍaśīm || 51 ||
[Analyze grammar]

śṛṇu rājanpurā vṛttaṃ tatrāścaryaṃ yaduttamam |
kaścitpāpasamācāraḥ kuṣṭhī kṣāmatanurnaraḥ || 52 ||
[Analyze grammar]

bhikṣārthamāgatastatra lokairanyaiḥ samanvitaḥ |
tena bhikṣārjitaṃ tatra saktūnāṃ kuḍavaṃ nṛpa || 53 ||
[Analyze grammar]

tato roga parikleśādbhojanaṃ na cakāra saḥ |
dāghārdito jale tasminsnāto bhaktivivarjitaḥ |
saktūnkṛtvopadhāne tānsa ca supto niśāgame || 54 ||
[Analyze grammar]

tato nidrābhibhūtasya sārameyo jahāra ca |
bhakṣayāmāsa yukto'nyaiḥ sārameyairbubhukṣitaḥ || 55 ||
[Analyze grammar]

athāsau vismayādrājanpaṃcatvaṃ samupasthitaḥ |
tato jātismaro jāto vidarbhādhipatergṛhe || 56 ||
[Analyze grammar]

bhīmonāma nṛpaśreṣṭha damayantīpitā hi yaḥ |
taṃ prabhāvaṃ hi vijñāya saktūnāṃ tatra parvate || 57 ||
[Analyze grammar]

phālgunāṃtacaturdaśyāṃ varṣe varṣe jagāma saḥ |
kṛtvā caivopavāsaṃ tu rātrau jāgaraṇaṃ tathā || 58 ||
[Analyze grammar]

acaleśvarasānnidhye dadau saktūṃstato bahūn |
sahiraṇyāndvijendrāṇāṃ paśupakṣimṛgeṣu ca || 59 ||
[Analyze grammar]

atha te munayaḥ sarve gālavapramukhā nṛpa |
papracchuḥ kautukāviṣṭāḥ saktudānakṛte nṛpam || 60 ||
[Analyze grammar]

ṛṣaya ūcuḥ |
hastvaśvarathadānānāṃ śaktirasti tavādbhutā |
kasmātsaktūnpramuktvā tvaṃ nānyaddātumihecchasi || 61 ||
[Analyze grammar]

pulastya uvāca |
athā'sau kathayāmāsa pūrvametatsamudbhavam |
saktudānasya māhātmyaṃ munīnāṃ bhāvitātmanām || 62 ||
[Analyze grammar]

pūrvaṃ bhaktyā vihīnasya śunā vai saktavo hṛtāḥ |
tatprabhāvādiyaṃ prāptirmama jātā dvijottamāḥ || 63 ||
[Analyze grammar]

sāṃprataṃ bhaktida ttānāṃ kiṃ syājjānāmi no phalam |
etasmātkāraṇāddānaṃ saktūnāṃ prakaromyaham |
tīrthe'sminbhaktisaṃyuktaḥ satyenātmānamālabhe || 64 ||
[Analyze grammar]

pulastya uvāca |
tataste munayo hṛṣṭāḥ sādhusādhviti cābruvan |
cakruścaivātmaśaktyā te saktūnāṃ dānamuttamam || 65 ||
[Analyze grammar]

eṣa prabhāvo rājarṣe saktudānasya kīrttitaḥ |
maheśvarasya māhātmyaṃ satyaṃ cāpi prakīrttitam || 66 ||
[Analyze grammar]

yaścaitacchṛṇuyādbhaktyā kathyamānaṃ dvijānanāt |
ahorātra kṛtātpāpānmucyate nātra saṃśayaḥ || 67 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe tṛtīye'rbudakhaṃḍe śivaliṃga maheśvaramāhātmyavarṇanaṃpuraḥsara saktudānamāhātmyavarṇanaṃnāmaikonacatvāriṃśo'dhyāyaḥ || 39 ||
[Analyze grammar]