Chapter 38

[English text for this chapter is available]

pulastya uvāca |
kuṃḍaṃ tu śivaliṃgākhyaṃ tato gacchenmahīpate |
yatra sā jāhnavī guptā tiṣṭhate bhūpasattama || 1 ||
[Analyze grammar]

tasyāṃ snāto naraḥ samyaksarvatīrthaphalaṃ labhet |
mucyate pātakātkṛtsnādājanmamaraṇāṃtikāt || 2 ||
[Analyze grammar]

yayāti ruvāca |
kimarthaṃ tatra sā guptā jāhnavī tiṣṭhate vibho |
kasminkāle samāyātā paraṃ kautūhalaṃ hi me || 3 ||
[Analyze grammar]

pulastya uvāca |
yadā prasādito devairbhagavānvṛṣabhadhvajaḥ |
arbude'sminsadā stheyamacalena tvayā vibho || 4 ||
[Analyze grammar]

tatra saṃsthāpite liṃge svayaṃ devena śaṃbhunā |
yatpātitaṃ purā liṃgaṃ vālakhilyairmaharṣibhiḥ || 5 ||
[Analyze grammar]

atikopasamāyuktaiḥ kasmiṃścitkāraṇāṃtare |
tadā devena pratijñātaṃ sarveṣāṃ tridivaukasām || 6 ||
[Analyze grammar]

acale tu mayātraiva sthātavyaṃ nātra saṃśayaḥ |
tataḥ kālena mahatā vasatastasya tatra ca || 7 ||
[Analyze grammar]

acaleśvararūpasya gaṃgā citte vyajāyata |
kathaṃ nityaṃ tayā sārddhaṃ bhaviṣyati samāgamaḥ || 8 ||
[Analyze grammar]

atha jānāti no gaurī māninī parameśvarī |
tasyaivaṃ cintayānasya bahuśo nṛpasattama || 9 ||
[Analyze grammar]

upāyaṃ sumahaddhyātvā jāhnavīsaṃgasaṃbhavam |
tenādiṣṭā gaṇāḥ sarve naṃdibhṛṅgipuraḥsarāḥ || 10 ||
[Analyze grammar]

abhiprāyo'sti me kaścijjalāśrayavratodbhavaḥ |
kriyatāmuttamaṃ kuṇḍamasminparvatarodhasi || 11 ||
[Analyze grammar]

tatrāhaṃ jalamadhyasthaḥ sthāsyāmi jalatatparaḥ |
tacchrutvā tvaritaṃ cakrurgaṇāḥ kuṇḍamanekaśaḥ || 12 ||
[Analyze grammar]

svacchodakasamākīrṇaṃ sutīrthaṃ susukhāvaham |
tato gaurīmanujñāpya jāhnavīsaṃgalālasaḥ || 13 ||
[Analyze grammar]

vratavyājena deveśo viveśa tadanantaram |
cintayāmāsa tatrastho gaṃgāṃ trailokyapāvinīm || 14 ||
[Analyze grammar]

sā dhyātā tatkṣaṇāttatra śivena saha saṃgatā |
evaṃ sa bhagavāṃstatra jāhnavīṃ bhajate sadā || 15 ||
[Analyze grammar]

vratavyājena rājendra na tu gaurī vyajānata |
kasyacittvatha kālasya nārado bhagavānmuniḥ |
kaivalyajñānasaṃpannastatrāyātaḥ paribhraman || 16 ||
[Analyze grammar]

sa tu dṛṣṭvā mahādevaṃ jalasthaṃ vratadhāriṇam |
kāmajairiṃgitairyuktaṃ tatrā'sau vismayānvitaḥ || 17 ||
[Analyze grammar]

vaktranetravikāro'yaṃ kimasya vratadhāriṇaḥ |
īdṛkkāmasamāyuktastato dhyānasthito muniḥ || 18 ||
[Analyze grammar]

athā'paśyaddhyānadṛṣṭyā gaṃgāsaktaṃ maheśvaram |
gauryā bhayena savyājaṃ tato vismayamāgataḥ || 19 ||
[Analyze grammar]

tadā sa kathayāmāsa sarvaṃ haraviceṣṭitam || 20 ||
[Analyze grammar]

tato devī tvarāyuktā yayau yatra maheśvaraḥ |
ātāmranayanā roṣādvepamānā muhurmuhuḥ || 21 ||
[Analyze grammar]

tāṃ dṛṣṭvā kopasaṃyuktāṃ samāyātāṃ maheśvarīm |
uvāca jāhnavī bhītā jñātvā divyena cakṣuṣā || 22 ||
[Analyze grammar]

āvayoḥ saṃgame devī nāradena niveditā |
seyaṃ ruṣṭā samāyāti kuruṣva yadanantaram || 23 ||
[Analyze grammar]

śrīmahādeva uvāca |
karttavyaṃ jāhnavi śreyaḥ puro gatvā nagātmajām |
atyarthaṃ māninī hyeṣā sāmnā ca vaśavartinī || 24 ||
[Analyze grammar]

tatkṣaṇājjāyate sādhvī tasmātsāmaparā bhava |
no cecchāpaṃ mayā sārdhaṃ tava dāsyatyasaṃśayam || 25 ||
[Analyze grammar]

evamuktā ca rudreṇa jāhnavī nṛpasattama |
kuṇḍānnirgatya sā gaṃgā sammukhaṃ prayayau tadā || 26 ||
[Analyze grammar]

pratyudyayau salajjā ca kṛtāṃjalipuraḥsarā |
praṇamya śirasā ceyaṃ tataḥ prāha svalaṃkṛtā || 27 ||
[Analyze grammar]

purā'haṃ tava kāṃtena nipatantī nabhastalāt |
dhṛtā devi tavā pyetadviditaṃ nṛpateḥ kṛte || 28 ||
[Analyze grammar]

bhagīrathābhidhānasya tataḥ sneho vyavardhata |
āvayostava bhītyā ca nābhūtkvāpi samāgamaḥ || 29 ||
[Analyze grammar]

adhunā tava vākyena jāne'haṃ na sureśvari |
samāhūtā'smi rudreṇa kiṃ vā svacchandataḥ śubhe || 30 ||
[Analyze grammar]

trailokyasya prabhurayaṃ tanniṣkramya kathañcana |
tasmādatraiva saṃprāptā satyametanmayoditam || 31 ||
[Analyze grammar]

pulastya upāca |
tasyāstadvacanaṃ śrutvā tato devī praharṣitā |
provāca madhuraṃ vākyaṃ satyametattva yoditam || 32 ||
[Analyze grammar]

tasmādvaraya bhadraṃ te varaṃ matto yathepsitam |
muktvaikaṃ patidharmmatve mama kāṃtaṃ maheśvaram || 33 ||
[Analyze grammar]

gaṃgovāca |
api daurbhāgyayuktā'haṃ bhāryā jātā'smi śūlinaḥ |
tasmādekaṃ dinaṃ dehi krīḍanārthamanena tu || 34 ||
[Analyze grammar]

caitraśuklatrayodaśyāmahorātraṃ sureśvari |
śivakuṃḍaṃ tathāstvetanmayā yasmātsamāvṛtam || 35 ||
[Analyze grammar]

śivagaṃgābhidhānaṃ ca tasmātkuṇḍaṃ dharātale |
khyātiṃ yātu prasādena tava parvatanaṃdini || 36 ||
[Analyze grammar]

pulastya uvāca |
evamastviti sā devī procya gaṃgāṃ mahānadīm |
tato visarjayāmāsa tāmāliṃgya muhurmuhuḥ || 37 ||
[Analyze grammar]

gatāyāmatha gaṃgāyāmadhovaktraṃ sulajjitam |
pāṇau gṛhya yayau rudraṃ bhramamāṇā gṛhaṃ prati || 38 ||
[Analyze grammar]

evametatpurāvṛttaṃ tasminkuṇḍe narādhipa |
tasmātsarvaprayatnena caturddaśyāṃ samāhitaḥ || 39 ||
[Analyze grammar]

śuklāyāṃ caitramāse tu snānaṃ tatra samācaret |
sāṃnidhyāddevadevasya gaṃgāyāśca nṛpottama || 40 ||
[Analyze grammar]

yatra saṃkṣayamāyāti sarvaṃ tatrāśubhaṃ kṛtam |
tatra yo vṛṣabhaṃ dadyādbrāhmaṇāya nṛpottama |
tadromasaṃkhyayāsvarge sa pumānvasati dhruvam || 41 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe tṛtīye'rbudakhaṃḍe śivagaṃgākuṇḍotpattimāhātmyavarṇanaṃnāmāṣṭātriṃśo'dhyāyaḥ || 38 ||
[Analyze grammar]