Chapter 37

[English text for this chapter is available]

pulastya uvāca |
nāgahradaṃ tato gacchettīrthaṃ pāpapraṇāśanam |
yatra nāgaistapastaptaṃ ramye parvatarodhasi || 1 ||
[Analyze grammar]

kadrūśāpaṃ purā śrutvā nāgāḥ sarve bhayāturāḥ |
papracchurnāgarājānaṃ śeṣaṃ praṇatakandharāḥ || 2 ||
[Analyze grammar]

mātṛśāpena saṃtaptā vayaṃ pannagasattama |
kiṃ kurmaḥ kva ca gacchāmaḥ śāpamokṣo bhavetkatham || 3 ||
[Analyze grammar]

śeṣa uvāca |
prasāditā mayā mātā śāpamuktikṛte purā |
tayoktaṃ ye tapoyuktā dharmātmānaḥ susaṃyatāḥ || 4 ||
[Analyze grammar]

na dahiṣyati tānvahniryajñe pārikṣitasya hi |
tasmādgatvārbudaṃnāma parvataṃ dharaṇītale || 5 ||
[Analyze grammar]

tatra yūyaṃ tapoyuktā bhavadhvaṃ susamāhitāḥ |
yatrāste sā svayaṃ devī caṃḍikā kāmarūpiṇī || 6 ||
[Analyze grammar]

yasyāḥ saṃkīrttanenāpi naśyaṃti vipado dhruvam |
ārādhayadhvamaniśaṃ tāṃ devīṃ mama vākyataḥ || 7 ||
[Analyze grammar]

tasyāḥ prasādataḥ sarve bhaviṣyatha gatajvarāḥ |
etamevātra paśyāmi upāyaṃ nāgasattamāḥ |
daivo vā mānuṣo vā'pi nānyo vo muktikārakaḥ || 8 ||
[Analyze grammar]

pulastya uvāca |
evamuktāstato nāgā nāgarājena pārthiva |
praṇamya taṃ tato jagmurarbudaṃ parvataṃ prati || 9 ||
[Analyze grammar]

te bhittvā dharaṇīpṛṣṭhaṃ parvate tadanantaram |
nijagmurbilamārgeṇa kṛtvā śvabhre suvistaram || 10 ||
[Analyze grammar]

tato dhṛtavratāḥ sarve devī bhaktiparāyaṇāḥ |
vasaṃti bhaktisaṃyuktāścaṇḍikārādhanāya te || 11 ||
[Analyze grammar]

tasthustatra sadā homaṃ kurvanto jāpyamuttamam |
ekāhārā nirāhārā vāyubhakṣāstathā pare || 12 ||
[Analyze grammar]

dantolūkhalinaḥ kecidaśmakuṭṭāstathā pare |
pañcāgnisādhakāścānye sadyaḥ prakṣālakāstathā || 13 ||
[Analyze grammar]

gītaṃ vādyaṃ tathā cakruranye devāḥ purastadā |
ananyaśradayopetāṃstāndṛṣṭvā pannagottamān || 14 ||
[Analyze grammar]

tato devī susantuṣṭā vākyametaduvāca ha || 15 ||
[Analyze grammar]

devyuvāca |
parituṣṭāsmi vo vatsāḥ kimarthaṃ tapyate tapaḥ |
varayadhvaṃ varaṃ matto yaḥ sthito bhavatāṃ hṛdi || 16 ||
[Analyze grammar]

nāgā ūcuḥ |
mātṛśāpena saṃtaptā vayaṃ devi nirāśrayāḥ |
nāgarājasamādeśāccharaṇaṃ tvāṃ samāgatāḥ || 17 ||
[Analyze grammar]

sā tvaṃ rakṣa bhayāttasmācchāpavahnisamudbhavāt |
vayaṃ mātrā purā śaptāḥ kasmiṃścitkāraṇāntare |
pārikṣitasya yajñe vaḥ pāvako bhakṣayiṣyati || 18 ||
[Analyze grammar]

devyuvāca |
yāvattasya bhavedyajña stāvadyūyaṃ mamāntike |
saṃtiṣṭhata vinā bhītyā bhogānbhuṅdhvaṃ supuṣkalān || 19 ||
[Analyze grammar]

samāpte ca kratau bhūyo gaṃtāraḥ svaṃ niketanam |
yuṣmābhirbheditaṃ yasmādetatparvatakandaram || 20 ||
[Analyze grammar]

nāgahradaṃ tu tattīrthametadbhāvi dharātale |
atra yaḥ śrāvaṇe māsi pañcamyāṃ bhaktitatparaḥ || 21 ||
[Analyze grammar]

kariṣyati naraḥ snānaṃ tasya nāhikṛtaṃ bhayam |
bhaviṣyati punaḥ śrāddhātpitṝnsaṃtārayiṣyati || 22 ||
[Analyze grammar]

ye bhogā bhūtale khyātā ye divyā ye ca mānuṣāḥ |
naro nityaṃ labhiṣyati na saṃśayaḥ || 23 ||
[Analyze grammar]

pulastya uvāca |
tato hṛṣṭā babhūvuste muktvā taddāruṇaṃ bhayam |
devyāḥ śaraṇamāpannāstasthustatra nagottame || 24 ||
[Analyze grammar]

tataḥ kālena mahatā satre pārikṣitasya ca |
nirvṛtte te tadā jagmuḥ sunirvṛttā rasātalam || 25 ||
[Analyze grammar]

devyā caivābhyanujñātāḥ praṇipatya muhurmuhuḥ |
kṛcchrātpārthivaśārdūla tadbhaktyā niścalīkṛtāḥ || 26 ||
[Analyze grammar]

adyāpi kṛṣṇapaṃcamyāṃ śrāvaṇe māsi pārthiva |
sānnidhyaṃ tatra kurvaṃti devīdarśanalālasāḥ || 27 ||
[Analyze grammar]

tasmātsarvaprayatnena śrāddhaṃ tatra samācaret |
snānaṃ ca pārthivaśreṣṭha ya icchecchreya ātmanaḥ || 28 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe tṛtīye'rbudakhaṇḍe nāgodbhavatīrthamāhātmya varṇanaṃnāma saptatriṃśo'dhyāyaḥ || 37 ||
[Analyze grammar]