Chapter 2

[English text for this chapter is available]

vasiṣṭha uvāca |
āsītpūrvaṃ munirnāmnā gautamaśca mahātapāḥ |
ahilyā dayitā tasya dharmapatnī yaśasvinī || 1 ||
[Analyze grammar]

śiṣyānadhyāpayāmāsa sa muniḥ śataśastadā |
śrutādhyayanasaṃpannānvisasarja tato gṛhān || 2 ||
[Analyze grammar]

tasyānyo'pi ca yaḥ śiṣyo gurubhaktiparāyaṇaḥ |
uttaṃko nāma medhāvī nyavasattasya mandire || 3 ||
[Analyze grammar]

na taṃ visarjayāmāsa jarayāpi pariplutam |
uttaṃko'pi suśiṣyatvānno vetti palitaṃ śiraḥ || 4 ||
[Analyze grammar]

jātakāryasamāyukto vidyāpāraṃgato'pi saḥ |
kenacittvatha kālena kāṣṭhārthaṃ sa bahiryayau || 5 ||
[Analyze grammar]

prabhūtāni samādāya āśramaṃ paramaṃ gataḥ |
athāsau nyakṣipattatra bhūtale kāṣṭhasaṃcayam || 6 ||
[Analyze grammar]

kāṣṭhalagnāṃ tadā śvetāṃ jaṭāmekāṃ dadarśa saḥ |
sa dṛṣṭvā duḥkhamāpannaḥ kṛpaṇaṃ paryacintayat || 7 ||
[Analyze grammar]

dhigdhiṅme jīvitaṃ naṣṭaṃ kutaḥ kāryaratasya ca |
kalatra saṃgrahaṃ naiva mayā kṛtamabuddhinā || 8 ||
[Analyze grammar]

bhaviṣyati kulacchedaḥ śaithilyānmama durmateḥ |
gurupatnyā ca saṃdṛṣṭa uttaṃko duḥkhitastadā || 9 ||
[Analyze grammar]

tasya duḥkhaṃ tathā kṣipraṃ gautamāya niेveditam |
gautamena tathetyuktvā mṛduvāṇyā sa bhāṣitaḥ || 10 ||
[Analyze grammar]

vatsa gaccha gṛhaṃ tvaṃ ca agnihotrādikāḥ kriyāḥ |
pālayasva vidhānena patnyā saha na saṃśayaḥ || 11 ||
[Analyze grammar]

ityukto guruṇā so'pi pratyuvāca guruṃ prati |
dakṣiṇāṃ prārthaya svāminnahaṃ dāsyāmyasaṃśayam || 12 ||
[Analyze grammar]

gautama uvāca |
sevā kṛtā tvayā vatsa mahatī mama sarvadā |
tenaiva paripūrṇatvaṃ jātaṃ me nātra saṃśayaḥ || 13 ||
[Analyze grammar]

uttaṃka uvāca |
kiṃcidgrāhyaṃ tvayā svāminsantoṣo jāyate mama |
tvatprasādānmuniśreṣṭha vidyāpāraṃgato'smyaham || 14 ||
[Analyze grammar]

gautama uvāca |
na grāhyaṃ ca mayā putra santuṣṭaḥ sevayāsmyaham |
necchāmyahaṃ dhanaṃ tvattaḥ sukhaṃ gaccha gṛhaṃ prati || 15 ||
[Analyze grammar]

ityukto guruṇā so'pi mātaraṃ cābhyabhāṣata |
kiṃcidgrāhyaṃ mayā mātaḥ santoṣo dīyatāṃ mama || 16 ||
[Analyze grammar]

gurupatnyuvāca |
saudāsaṃ gaccha putra tvaṃ mamājñāṃ kuru satvaram |
madayantī priyā tasya dharmapatnī yaśasvinī || 17 ||
[Analyze grammar]

kuṇḍale'thānaya kṣipraṃ madayaṃtyāśca putraka |
no cecchāpaṃ pradāsyāmi pañcame'hni na āgataḥ || 18 ||
[Analyze grammar]

ityukto gurupatnyā sa prasthitaḥ satvaraṃ tadā |
saudāsasyagṛhaṃ prāpa vyāghrāsyaṃ taṃ ca dṛṣṭavān || 19 ||
[Analyze grammar]

dṛṣṭvā prāha tadā vipraṃ bhakṣaṇārthamupasthitam |
bhakṣayiṣyāmi vai vipra tvāmahaṃ nātra saṃśayaḥ || 20 ||
[Analyze grammar]

uttaṃka uvāca |
avaśyaṃ bhakṣaya tvaṃ māmekaṃ śṛṇu narādhipa |
dehi me kuṇḍale tāta dattvā'haṃ gurave punaḥ |
āgamiṣyāmi bhakṣasva mā tvaṃ kāryavivarjitam || 21 ||
[Analyze grammar]

saudāsa uvāca |
gaccha tvaṃ mandire durge yatrā'ste dayitā mama |
tāṃ tvamāsādya yatnena jīvitavyabhayāddvija || 22 ||
[Analyze grammar]

yācyatāṃ mama vākyena sā te dāsyati kuṇḍale |
tvayā ca nānyathā kāryaṃ yatsatyaṃ dvijasattama || 23 ||
[Analyze grammar]

vasiṣṭha uvāca |
madayantyāḥ samīpaṃ tu gatvovāca dvijottamaḥ |
dehi me kuṇḍale devi saudāsastvāṃ samādiśat || 24 ||
[Analyze grammar]

madayaṃtyuvāca |
sandeho'dyāpi me vipra kuṇḍale dvijasattama |
abhijñānaṃ tvamānīya nṛpasya dvija darśaya || 25 ||
[Analyze grammar]

sa gatvā tvaritaṃ bhūpamabhijñānamayācata || 26 ||
[Analyze grammar]

saudāsa uvāca |
yairvinā sugatirnāsti durgatiṃ ye nayaṃti vai |
gatvaivaṃ brūhi tāṃ sādhvīṃ mama vākyaṃ dvijottama |
pradāsyati tato nūnaṃ kuṇḍale ratnamaṃḍite || 27 ||
[Analyze grammar]

vasiṣṭha uvāca |
pratyabhijñānamādāya gatvā tasyai nyavedayat || 28 ||
[Analyze grammar]

tato'sau pradadau tasmai gṛhṇa me kuṇḍale dvija |
uvāca yatnamāsthāya nīyatāṃ dvijasattama || 29 ||
[Analyze grammar]

ete ca vāṃchate nityaṃ takṣako dvija kuṇḍale |
sa tatheti samādāya vismayotphullalocanaḥ |
kautukātpunarāgatya rājānaṃ vākyamabravīt || 30 ||
[Analyze grammar]

abhijñānānmayā bhūpa samprāpte dīptakuṇḍale |
vākyārthastu na vijñātastato'haṃ punarāgataḥ || 31 ||
[Analyze grammar]

kautukādvada me rājansvakārye ca yathāsthitam |
kairvinā sugatirnāsti durgatiṃ ke nayaṃti ca || 32 ||
[Analyze grammar]

saudāsa uvāca |
ārādhitā dvijā vipra bhavaṃti sugatipradāḥ |
asantuṣṭā durgatidāḥ sadyo mama yathā purā || 33 ||
[Analyze grammar]

etāvānmama śāpo'yaṃ vasiṣṭhasya mahātmanaḥ |
tenoktaṃ tvāṃ yadā kaścitpraśnaṃ vikhyāpayiṣyati || 34 ||
[Analyze grammar]

tadā doṣavinirmukto bhaviṣyasi na saṃśayaḥ |
tvatprasādādvinirmukto hyahaṃ śāpāddvijottama |
sāttvikaṃ dhāma cāpanno gaccha vipra namo'stu te || 35 ||
[Analyze grammar]

vasiṣṭha uvāca |
uttaṃkastena nirmuktaḥ satvaraṃ pathamāśritaḥ |
gacchaṃścātikṣudhāviṣṭo 'paśyadbilvaphalāni saḥ || 36 ||
[Analyze grammar]

tataḥ kṛṣṇājine baddhvā kuṇḍale nyasya bhūtale |
āruroha phalākāṃkṣī sa muniḥ kṣudhayā'nvitaḥ || 37 ||
[Analyze grammar]

etasminneva kāle tu takṣakaḥ pannagottamaḥ |
gṛhītvā kuṇḍale tūrṇamagamaddakṣiṇāmukhaḥ || 38 ||
[Analyze grammar]

athottaṃkaḥ phalāhārī avatīrya dharātale |
sarvato'nveṣayāmāsa vegena mahatā vṛtaḥ || 39 ||
[Analyze grammar]

sa dṛṣṭvā sammukhaṃ prāptaṃ samīpaṃ pannagottamaḥ |
praviveśa bilaṃ raudramandhakāreṇa saṃvṛtam || 40 ||
[Analyze grammar]

uttaṃko'pi bilaṃ prāptaḥ praviśya tamasāvṛtam |
daṇḍakāṣṭhaṃ samādāya kupitohyakhanattadā || 41 ||
[Analyze grammar]

taṃ tathā duḥkhitaṃ dṛṣṭvā sakleśaṃ gurukāryataḥ |
vajramāropayāmāsa daṇḍāṃte pākaśāsanaḥ || 42 ||
[Analyze grammar]

tato vidārayāmāsa sa śīghraṃ dharaṇītalam |
praviṣṭaścaiva pātālaṃ kuṇḍalārthaṃ paribhraman || 43 ||
[Analyze grammar]

so'paśyadvājinaṃ tatra sarvaśvetaṃ guṇānvitam |
tenoktaḥ spṛśa me guhyaṃ tataḥ kāryaṃ bhaviṣyati || 44 ||
[Analyze grammar]

sa cakāra tathā śīghraṃ tato dhūmo vyajāyata |
pātālaṃ tena sarvatra vyāptaṃ bhūdhara vahninā || 45 ||
[Analyze grammar]

tataśca vyākulāḥ sarve pannagāḥ samupādravan |
takṣakaṃ purataḥ kṛtvā saṃprāptāḥ kuṇḍalānvitāḥ |
uttaṃkāya tato dattvā praṇipatya yayurgṛham || 46 ||
[Analyze grammar]

vasiṣṭha uvāca |
athāśvastamuvācedamahamagnirdvijottama |
yastvayā'rādhitaḥ pūrvamupādhyāyanideśataḥ || 47 ||
[Analyze grammar]

jñātvā tvāṃ duḥkhitaṃ prāptamiha prāptaḥ kṛpāparaḥ |
sarvathā tvaṃ ca me pṛṣṭhaṃ bhagavañchīghramāruha || 48 ||
[Analyze grammar]

nayāmi tatra yatrāste guruḥ sarvaguṇālayaḥ |
ārūḍhastasya pṛṣṭhe sa pratasthe hyāśramaṃ prati || 49 ||
[Analyze grammar]

tatkṣaṇātsamanuprāpto gautamasya niveśanam |
etasminneva kāle tu ahilyā kṛtamaṃḍanā || 50 ||
[Analyze grammar]

snātā cābhyetya bhartāraṃ sādhvī vākyamuvāca ha |
uttaṃko'dya na saṃprāptaḥ śāpaṃ dāsyāmyahaṃ dhruvam || 51 ||
[Analyze grammar]

śithilo gurukṛtyeṣu sa yadālakṣito mayā |
tasyā vākyāvasāne tu uttaṃkaḥ paryyadṛśyata || 52 ||
[Analyze grammar]

prasannavadano hṛṣṭaḥ kuṇḍalābhyāṃ samanvitaḥ |
praṇipatya sa tāṃ bhaktyā kuṇḍale saṃnyavedayat || 53 ||
[Analyze grammar]

sā dṛṣṭvā tatkṣaṇātsādhvī karṇābhyāṃ saṃnyaveśayat |
svagṛhāya tatastūrṇamuttaṃkaṃ visasarja ha || 54 ||
[Analyze grammar]

vasiṣṭha uvāca |
evaṃ sa vivaro jātastakṣakottaṃkakāraṇāt |
yathā me ciṃtyate nityaṃ dhenvarthaṃ śvabhrapūraṇe || 55 ||
[Analyze grammar]

tasmāttvaṃ pūraya kṣipraṃ nānyaḥ śakto'tra karmaṇi |
śīghraṃ kuru nagaśreṣṭha mama kāryamasaṃśayam || 56 ||
[Analyze grammar]

iti śrīskāṃde mahāpurāṇa ekā śītisāhasryāṃ saṃhitāyāṃ saptame prabhāsakhaṇḍe tṛtīye'rbudakhaṃḍe vivarotpattivṛttāṃte gautamaśiṣyottaṃkacaritravarṇanaṃnāma dvitīyo'dhyāyaḥ || 2 ||
[Analyze grammar]