Chapter 3

[English text for this chapter is available]

sūta uvāca |
śrutvā himācalo vākyaṃ vasiṣṭhasya mahātmanaḥ |
cintayāmāsa tatkāryaṃ vivarasya prapūraṇe || 1 ||
[Analyze grammar]

ciraṃ vicārya tamṛṣimidamāha nagottamaḥ |
ka upāyo nagānāṃ vai tatra gaṃtuṃ vadasva me || 2 ||
[Analyze grammar]

pakṣacchedastu śakreṇa sarveṣāṃ ca purā kṛtaḥ |
tasmādasya muniśreṣṭha kāryasya paśya niścayam || 3 ||
[Analyze grammar]

vasiṣṭha uvāca |
astyupāyo nagānāṃ tu tatra netuṃ mahānaga |
tavāyaṃ tanayastatra vikhyāto naṃdivarddhanaḥ || 4 ||
[Analyze grammar]

tasyārbuda iti khpāto vayasyaḥ paramaṃ priyaḥ |
nāgaḥ prāṇabhṛtāṃ śreṣṭhaḥ khecaro'pi ca vīryavān || 5 ||
[Analyze grammar]

sa vā ūrdhvagatiḥ kṣipraṃ kṣaṇānneṣyatyasaṃśayaḥ |
līlayā sarvakṛtyeṣu taṃ viditvā'hamāgataḥ || 6 ||
[Analyze grammar]

ādeśo dīyatāmasya duḥkhaṃ kartuṃ ca nārhasi |
avaśyaṃ yadi bhakto'si tatra preṣaya satvaram || 7 ||
[Analyze grammar]

sūta uvāca |
vasiṣṭhasya vacaḥ śrutvā himavānputravatsalaḥ |
duḥkhena mahatā'viṣṭaściṃtayāmāsa bhūdharaḥ || 8 ||
[Analyze grammar]

mainākastanayo'smākaṃ praviṣṭaḥ sāgare bhayāt |
jyeṣṭhaṃ tu sarvathā cātha vasiṣṭho netumāgataḥ |
kiṃ kṛtyamadhunā'smākaṃ kathaṃ śreyo bhaviṣyati || 9 ||
[Analyze grammar]

itaḥ śāpabhayaṃ tīvramito duḥkhaṃ ca putrajam |
varaṃ putraviyogo'stu na śāpo dvijasaṃbhavaḥ || 10 ||
[Analyze grammar]

sa evaṃ niścayaṃ kṛtvā naṃdivardhanamuktavān |
gaccha tvaṃ putra me vākyādvasiṣṭhasyāśramaṃ prati || 11 ||
[Analyze grammar]

tatrāsti vivaro raudrastaṃ prapūraya satvaram |
arbudaṃ nāgamādāya mitraṃ prāṇabhṛtāṃ varam || 12 ||
[Analyze grammar]

naṃdivarddhana uvāca |
pāpīyānsa vibho deśaḥ phalamūlairvivarjitaḥ |
pālāśaiḥ khādirairāḍhyo dhavaiḥ śālmalibhistathā || 13 ||
[Analyze grammar]

suniṣṭhurairnṛpaśubhirbhillaiśca vividhairapi |
nadyo vahaṃti no tatra duṣṭā lokāśca vāsinaḥ |
nārho'haṃ parvataśreṣṭha tatra gaṃtuṃ kathaṃcana || 14 ||
[Analyze grammar]

athovāca vasiṣṭhastaṃ saṃtrastaṃ naṃdivarddhanam |
mā bhīḥ kāryā tvayā tatra deśe dauṣṭyātkathaṃcana || 15 ||
[Analyze grammar]

tava mūrdhni sadā vāso mama tatra bhaviṣyati |
tīrthāni sarito devāḥ puṇyānyāyatanāni ca || 16 ||
[Analyze grammar]

vṛkṣāśca vividhākārāḥ patrapuṣpaphalānvitāḥ |
sadā tatra bhaviṣyaṃti mṛgāśca vihagāḥ śubhāḥ || 17 ||
[Analyze grammar]

ahamevānayiṣyāmi tavārthe ca maheśvaram |
tadā sthāsyaṃti vai tatra sarve devāḥ savāsavāḥ || 18 ||
[Analyze grammar]

sūta uvāca |
vasiṣṭhasya vacaḥ śrutva saṃhṛṣṭo naṃdivarddhanaḥ |
arbudaṃ nāgamāsādya vākyametaduvāca ha || 19 ||
[Analyze grammar]

tatra yāvo'dya bhadraṃ te vayasya vinayānvita |
etatkāryamahaṃ manye sāṃprataṃ dvijasaṃbhavam || 20 ||
[Analyze grammar]

arbuda uvāca |
ahaṃ tatrāgamiṣyāmi snehātte parvatātmaja |
tatraiva ca vasiṣyāmi tvayā sārddhamasaṃśayam || 21 ||
[Analyze grammar]

kiṃ tvahaṃ praṇayādbhrātarvakṣyāmi yadvacaḥ śṛṣu |
praṇayānnānyathā kāryaṃ yadyahaṃ tava saṃmataḥ || 22 ||
[Analyze grammar]

mannāmnā khyātimāyātu nānyatkiṃcidvṛṇomyaham |
tataḥ so'pi pratijñāya ārūḍhastasya copari |
praṇamya pitarau caiva pratasthe muninā saha || 23 ||
[Analyze grammar]

divyairvṛkṣaiḥ śubhaiḥ pūrṇairnadīnirjharasaṃkulaiḥ |
madhurairvihagairyukto mṛgaiḥ saumyaiḥ samanvitaḥ || 24 ||
[Analyze grammar]

mukto'rbudena tatraiva vivare munivākyataḥ |
samastastatrānāsāgraṃ gataḥ parvatasattamaḥ || 25 ||
[Analyze grammar]

vimukto vivare tasminnarbudena mahātmanā |
paripūrṇe mahāraudre saṃtuṣṭo munipuṃgavaḥ || 26 ||
[Analyze grammar]

bravīccārbudaṃ nāgaṃ varaṃ varaya suvrata |
parituṣṭo'smi te bhadra karmaṇānena pannaga || 27 ||
[Analyze grammar]

arbuda uvāca |
eṣa eva varo'smākaṃ yattvaṃ tuṣṭo mahāmune |
avaśyaṃ yadi dātavyaṃ tacchṛṇuṣva dvijottama || 28 ||
[Analyze grammar]

yaccaitacchikhare hyasminnirjharaṃ nirmalodakam |
nāgatīrthamiti khyātiṃ bhūtale yātu sarvataḥ || 29 ||
[Analyze grammar]

atraivāhaṃ vasiṣyāmi mitrasnehātsadā mune |
tatra snātvā divaṃ yātu mānavastvatprasādataḥ || 30 ||
[Analyze grammar]

api vaṃdhyā ca yā nārī snānamātraṃ samācaret |
sā syātputravatī vipra sukhasaubhāgyasaṃyutā || 31 ||
[Analyze grammar]

vasiṣṭha uvāca |
yā vaṃdhyāsmiñjale pūrṇe snānamātraṃ kariṣyati |
sāpi putramavāpnoti sarvalakṣaṇalakṣitam || 32 ||
[Analyze grammar]

nabhasaḥ śuklapaṃcamyāṃ phalaiḥ pūjāṃ karoti ca |
api varṣaśatā nārī sā bhaviṣyati putriṇī || 33 ||
[Analyze grammar]

ye'tra snānaṃ kariṣyaṃti hyasmiṃstīrthe ca bhaktitaḥ |
yāsyaṃti te paraṃ sthānaṃ jarāmaraṇavarjitam || 34 ||
[Analyze grammar]

śrāddhaṃ cātra kariṣyaṃti paṃcamyāṃ ye samāhitāḥ |
māse nabhasi tīrthasya phalaṃ teṣāṃ bhaviṣyati || 35 ||
[Analyze grammar]

sūta uvāca |
evaṃ dattvā varaṃ tasya vasiṣṭho bhagavānmuniḥ |
naṃdivarddhanamabhyetya vākyametaduvāca ha || 36 ||
[Analyze grammar]

varaṃ ca vriyatāṃ vatsa parituṣṭo'smi te'nagha |
vinayātsauhṛdātsarvaṃ dāsyāmi yatsudurllabham || 37 ||
[Analyze grammar]

naṃdivarddhana uvāca |
tavāstu vacanaṃ satyaṃ pūrvoktaṃ munisattama |
sāṃnidhyaṃ jāyatāmatra avaśyaṃ tava sarvadā || 38 ||
[Analyze grammar]

yathāhamarbudetyevaṃ khyātiṃ gacchāmi bhūtale |
prasādāccaiva te bhūyādetanme manasi sthitam || 39 ||
[Analyze grammar]

sūta uvāca |
evamastviti taṃ procya vasiṣṭho bhagavānmuniḥ |
cakre svamāśramaṃ tatra tasya vākyena noditaḥ || 40 ||
[Analyze grammar]

panasaiścaṃpakairāmraiḥ priyaṃgubilvadāḍimaiḥ |
nānāpakṣisamāyukto devagandharvasevitaḥ || 41 ||
[Analyze grammar]

tasthau tatra muniśreṣṭho hyaruṃdhatyā samanvitaḥ |
gomatīmānayāmāsa tapasā munisattamaḥ || 42 ||
[Analyze grammar]

yasyāṃ snātvā divaṃ yāṃti atipāpakṛto narāḥ |
māghamāse viśeṣeṇa makarasthe divākare || 43 ||
[Analyze grammar]

yetra snānaṃ kariṣyaṃti te yāsyaṃti parāṃ gatim || 44 ||
[Analyze grammar]

māghamāse viśeṣeṇa tiladānaṃ karoti yaḥ |
tilasaṃkhyāni varṣāṇi svarge tiṣṭhati mānavaḥ || 45 ||
[Analyze grammar]

bahunā kimihoktena stānamātraṃ samācaret || 46 ||
[Analyze grammar]

vasiṣṭhasya mukhaṃ dṛṣṭvā punarjanma na vidyate |
aruṃdhatī pūjanīyā pūjanīyā viśeṣataḥ || 47 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe tṛtīye'rbudakhaṇḍe vasiṣṭhājñayā nandivardhanaparvatena vivarapūraṇavarṇanaṃnāma tṛtīyo'dhyāyaḥ || 3 ||
[Analyze grammar]