Chapter 7

[English text for this chapter is available]

rājovāca |
kathaṃ tvaṃ hariṇīrūpe jātā mānuṣarūpiṇī |
kena saṃvardhitā bālye kathaṃ te rūpamīdṛśam || 1 ||
[Analyze grammar]

mṛgyuvāca |
śṛṇu deva pravakṣyāmi yadvṛttaṃ kanyake vane |
ṛṣiruddālakonāma gaṃgākūle mahātapāḥ || 2 ||
[Analyze grammar]

prabhāte mūtramutsṛṣṭuṃ gato deva vanāṃtare |
mūtrāṃte patito bhūmau vīryabiṃdurdvijanmanaḥ || 3 ||
[Analyze grammar]

yāvatsa calito vipraḥ śaucaṃ kṛtvā prayatnataḥ |
tāvanmṛgī samāyātā dṛṣṭvā puṣpavanāṃtarāt || 4 ||
[Analyze grammar]

cāpalyādbhakṣitaṃ vīryaṃ dṛṣṭaṃ brahmarṣiṇā svayam |
yasmādaśnāti me vīryaṃ tasmādgarbho bhaviṣyati || 5 ||
[Analyze grammar]

mamarūpā tavavaktrā nārī garbhe bhaviṣyati |
varddhayiṣyati devyastāṃ rasairdivyaiḥ sutāṃ tava || 6 ||
[Analyze grammar]

kenāpi daivayogena jñānaṃ tasyā bhaviṣyati |
evamuddālakādeva saṃjātāhaṃ mṛgānanā |
praviśyāgnau mṛtā pūrvaṃ tvayā sārddhaṃ narādhipa || 7 ||
[Analyze grammar]

tasmājjātaṃ satītvaṃ me saptajanmani vai prabho |
yattvayā kurvatā rājyaṃ pāpaṃ vai samupārjitam || 8 ||
[Analyze grammar]

kṣattradharmaṃ parityajya palāyanaparo mṛtaḥ |
tadeno hi mayā dagdhaṃ citāgnau nṛpasattama || 9 ||
[Analyze grammar]

patiṃ gṛhītvā yā nārī mṛtamagnau viśedyadi |
sā tārayati bhartāramātmānaṃ ca kuladvayam || 10 ||
[Analyze grammar]

gograhe deśabhaṃge ca saṃgrāme sammukhe mṛtaḥ |
sa sūryamaṇḍalaṃ bhittvā brahmaloke mahīyate || 11 ||
[Analyze grammar]

anāśakaṃ yo vidadhāti marttyo dinedine yajñasahasrapuṇyam |
sa yāti yānena gaṇānvitena vidhūya pāpāni suraiḥ sa pūjyate || 12 ||
[Analyze grammar]

gaṃgājale prayāge vā kedāre puṣkare ca ye |
vastrāpathe prabhāse ca mṛtāste svargagāminaḥ || 13 ||
[Analyze grammar]

dvārāvatyāṃ kurukṣetre yogābhyāsena ye mṛtāḥ |
harirityakṣaraṃ mṛtyau yeṣāṃ te svargagāminaḥ || 14 ||
[Analyze grammar]

pūjayitvā hariṃ ye tu bhūmau darbhatilaiḥ saha |
tilāṃśca pañcalohaṃ ca dattvā ye tu payasvinīm || 15 ||
[Analyze grammar]

ye mṛtā rājaśārdūla te narāḥ svarga gāminaḥ |
utpādya putrānsaṃsthāpya pitṛpaitāmahe pade || 16 ||
[Analyze grammar]

nirmalā niṣkalaṃkā ye te mṛtāḥ svargagāminaḥ |
vratopavāsaniratāḥ satyācāraparāyaṇāḥ |
ahiṃsāniratāḥ śāṃtāste narāḥ svargagāminaḥ || 17 ||
[Analyze grammar]

sāpavādo raṇaṃ tyaktvā mṛto yasmānnarādhipa |
saptayoniṣu te janma tasmājjātaṃ mayā saha || 18 ||
[Analyze grammar]

tvāṃ vinā me patirmā bhūnmaraṇe yācitaṃ mayā |
tadāṃtarikṣe rājendra vāguvācāśarīriṇī |
ādau pāpaphalaṃ bhuktvā paścā tsvargaṃ gamiṣyasi || 19 ||
[Analyze grammar]

yadi vastrāpathe gatvā śiraḥ kaścidvimuṃcati |
svarṇarekhājale rājanmānuṣaṃ syānmukhaṃ mama || 20 ||
[Analyze grammar]

ahaṃ mānuṣavaktrā'smi pāpacchāyā'vṛtaṃ mukham |
dṛśyate mṛgavaktrābhaṃ tasmācchīghraṃ vimuṃcaya || 21 ||
[Analyze grammar]

iti śrutvā vaco rājā sārasvatamudaikṣata |
jano vihasya sānandaṃ sarvaṃ satyaṃ mṛgīvacaḥ || 22 ||
[Analyze grammar]

ityuktvā'ha dvijendraḥ sa evaṃ kuru nṛpottama |
evaṃ rājñā samādiṣṭaḥ pratīhāro yayau vanam || 23 ||
[Analyze grammar]

vastrāpathe mahātīrthe bhavaṃ draṣṭuṃ tvarānvitaḥ |
tvaksārajālirmahatī svarṇarekhājalopari || 24 ||
[Analyze grammar]

varttate tacchiro yatra vaṃśaprotaṃ mahāvane |
sārasvatasya śiṣyeṇa kuśalena niveditam || 25 ||
[Analyze grammar]

tīrthaṃ vastrāpathaṃ gatvā bhavasyāgre mahānadī |
jāle tatra śiro dṛṣṭaṃ tacca toye vimocitam || 26 ||
[Analyze grammar]

snātvā saṃpūjya tīrtheśaṃ pratīhāraḥ samabhyagāt |
śiṣyeṇa sahito vegādrathenādityavarcasā || 27 ||
[Analyze grammar]

yadāgataḥ pratīhārastadā sārasvatena sā |
vṛtā cāndrāyaṇenaiva māsamekaṃ nirantaram || 28 ||
[Analyze grammar]

saṃpūrṇe tu vrate tasyā divyaṃ vaktraṃ sulocanam |
suśobhanaṃ dīrghakeśaṃ dīrghakarṇaṃ śubhadvijam || 29 ||
[Analyze grammar]

kambugrīvaṃ padmagaṃdhaṃ sarvalakṣaṇasaṃyutam |
vratāṃte mūrcchitā bālā gatajñānā vabhūva sā || 30 ||
[Analyze grammar]

na devī na ca gaṃdharvī nāsurī na ca kiṃnarī |
yādṛśī sā tadā jātā tīrthabhāvena sundarī || 31 ||
[Analyze grammar]

pariṇītā tu sā tena bhojarājena sundarī |
mṛgīmukhīti vikhyātā devī sā bhuvaneśvarī || 32 ||
[Analyze grammar]

na jānāti punaḥ kiṃcidyadvṛttaṃ rājamandire |
kṛtā sā paṭṭamahiṣī bhojarājena dhīmatā || 33 ||
[Analyze grammar]

īśvara uvāca |
deśānāṃ pravaro deśo girīṇāṃ pravaro giriḥ |
kṣetrāṇāmuttamaṃ kṣetraṃ vanānāmuttamaṃ vanam || 34 ||
[Analyze grammar]

gaṃgā sarasvatī tāpī svarṇarekhājale sthitā |
brahmā viṣṇuśca sūryaśca sarva indrādayaḥ surāḥ || 35 ||
[Analyze grammar]

nāgā yakṣāśca gandharvā asminkṣetre vyavasthitāḥ |
brahmāṃḍaṃ nirmitaṃ yena trailokyaṃ sacarācaram || 36 ||
[Analyze grammar]

devā brahmādayo jātāḥ sa bhavo'tra vyavasthitaḥ |
śivo bhaveti vikhyātaḥ svayaṃ devastrilocanaḥ || 37 ||
[Analyze grammar]

veveti skandaracanādbhavānī cātra saṃsthitā |
ato yannādhikaṃ proktaṃ tīrthaṃ devi mayā tava || 38 ||
[Analyze grammar]

tasmiñjale snānaparo naro yadi saṃdhyāṃ vidhāyānu karoti tarpaṇam |
śrāddhaṃ pitṝṇāṃ ca dadāti dakṣiṇāṃ bhavodbhavaṃ paśyati mucyate bhavāt || 39 ||
[Analyze grammar]

atha yadi bhavapūjāṃ divyapuṣpaiḥ karoti tadanu śivaśiveti stotrapāṭhaṃ ca gītam |
suravara gaṇavṛndaiḥ stūyamāno vimānaiḥ suravaraśivarūpo mānavo yāti nākam || 40 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe dvitīye vastrāpathakṣetramāhātmye svarṇarekhāyāṃ mṛgānanāyāḥ pūrvajanmamṛgamukhaprakṣepaṇena divyamukhatvaprāptyuttaraṃ bhojanṛpatipariṇaya vṛttāntapūrvakaṃ svarṇarekhāmāhātmyavarṇanaṃnāma saptamo'dhyāyaḥ || 7 ||
[Analyze grammar]