Chapter 305

[English text for this chapter is available]

īśvara uvāca |
tato gacchenmahādevi tasyāḥ pūrveṇa saṃsthitam |
nāradādityanāmānaṃ jarādāridryanāśanam || 1 ||
[Analyze grammar]

paścime mūlacaṃḍīśāddhanuṣāṃ ca śatatraye |
ārādhya nārado devi bhāskaraṃ vāritaskaram |
jarā nirmuktadehastu tatkṣaṇātsamapadyata || 2 ||
[Analyze grammar]

devyuvāca |
kathaṃ jarāmanuprāpto nārado munipuṃgavaḥ |
kathamārādhitaḥ sūrya etanme vada śaṃkara || 3 ||
[Analyze grammar]

īśvara uvāca |
yadā dvāravatīṃ prāpto nārado munipuṃgavaḥ |
sarve dṛṣṭāstadā tena viṣṇoḥ putrā mahābalāḥ || 4 ||
[Analyze grammar]

tadrājakulamadhye tu krīḍamānā parasparam || āyāṃtaṃ nāradaṃ dṛṣṭvā sarve vinayasaṃyutāḥ || 5 ||
[Analyze grammar]

namaścakruryathānyāyaṃ vinā sāṃbaṃ tvarānvitāḥ |
avinītaṃ tu taṃ dṛṣṭvā kathayāmāsa nāradaḥ || 6 ||
[Analyze grammar]

śarīramadamatto'si yasmātsāṃba hareḥ suta |
acireṇaiva kālena śāpaṃ prāpsyasi dāruṇam || 7 ||
[Analyze grammar]

sāṃba uvāca |
namaskāreṇa kiṃ kāryamṛṣīṇāṃ ca jitātmanām |
āśīrvādena teṣāṃ ca tapohāniḥ prajāyate || 8 ||
[Analyze grammar]

munīnāṃ yaḥ svabhāvo hi tvayi leśo na nārada |
vidyate brahmaṇaḥ putra ucyate kimataḥ param || 9 ||
[Analyze grammar]

na kalatraṃ na te putrā na ca pautraprapautrakāḥ |
na gṛhaṃ naiva ca dvāraṃ na hi gāvo na vatsakāḥ || 10 ||
[Analyze grammar]

brahmaṇo mānasaḥ putro brahmacarye vyavasthitaḥ |
ayuktaṃ kurute nityaṃ kasmātprakṛtirīdṛśī || 11 ||
[Analyze grammar]

yuddhaṃ vinā na te saukhyaṃ saukhyaṃ na kalahaṃ vinā |
yādṛśastādṛśo vāpi vāgvādo'pi sadā priyaḥ || 12 ||
[Analyze grammar]

snānaṃ saṃdhyā japo homastarpaṇaṃ pitṛdevayoḥ |
nāradaḥ kurute cānyadanyatkurvaṃti brāhmaṇāḥ || 13 ||
[Analyze grammar]

kaumāreṇa tu garviṣṭho yasmānmāṃ śāpayiṣyasi |
tasmāttvamapi viprarṣe jarāyukto bhaviṣyasi || 14 ||
[Analyze grammar]

evaṃ śaptastadā devi nārado munipuṃgavaḥ |
ekānte nirmale sthāne kaṃṭakāsthivivarjite || 15 ||
[Analyze grammar]

kṛṣṇājinaparicchinne hyupaviṣṭo varāsane |
ṛṣitoyā taṭe ramye pratiṣṭhāpya mahāmuniḥ || 16 ||
[Analyze grammar]

sūryasya pratimāṃ ramyāṃ sarvadāridryanāśinīm |
tuṣṭāva vividhaiḥ stotrairādityaṃ timirāpaham || 17 ||
[Analyze grammar]

namasta ṛksvarūpāya sāmnāṃ dhāmaga te namaḥ |
jñānaikarūpadehāya nirdhūtatamase namaḥ || 18 ||
[Analyze grammar]

śuddhajyotiḥsvarūpāya nirmūrtāyāmalātmane |
variṣṭhāya vareṇyāya sarvasmai paramātmane || 19 ||
[Analyze grammar]

namo'khilajagadvyāpisvarūpānaṃdamūrtaye |
sarvakāraṇapūtāya niṣṭhāyai jñānacetasām || 20 ||
[Analyze grammar]

namaḥ sarvasvarūpāya prakāśālakṣyarūpiṇe |
bhāskarāya namastubhyaṃ tathā dinakṛte namaḥ || 21 ||
[Analyze grammar]

īśvara uvāca |
evaṃ saṃstuvatastasya puratastasya cetasā |
prādurbabhūva deveśi jagaccakṣuḥ sanātanaḥ |
uvāca paramaṃ prīto nāradaṃ munipuṃgavam || 22 ||
[Analyze grammar]

sūrya uvāca |
varaṃ varaya viprarṣe yaste manasi vartate |
tuṣṭo'haṃ tava dāsyāmi yadyapi syātsudurlabham || 23 ||
[Analyze grammar]

nārada uvāca |
kumāra vayasā yukto jarāyuktakalevaraḥ |
prasādātsyāṃ hi te deva yadi tuṣṭo divākara || 24 ||
[Analyze grammar]

saptamyāṃ ravivāreṇa yastvāṃ paśyati mānavaḥ |
tasya roga bhayaṃ mā'stu prasādāttimirāpaha || 25 ||
[Analyze grammar]

īśvara uvāca |
evaṃ bhaviṣyatītyuktvā hyantardhānaṃ gato raviḥ |
ityetatkathitaṃ devi māhātmyaṃ sakalaṃ tava |
nāradādityadevasya sarvapātakanāśanam || 26 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsa khaṇḍe prathame prabhāsakṣetramāhātmye nāradādityamāhātmyavarṇanaṃnāma pañcottaratriśatatamo'dhyāyaḥ || 305 ||
[Analyze grammar]