Chapter 304

[English text for this chapter is available]

īśvara uvāca |
tato gacchenmahādevi gaṃgāṃ tripathagāminīm |
saṃgāleśādathaiśānyāṃ dhanuṣāṃ saptake sthitām || 1 ||
[Analyze grammar]

tasyāṃ trinetrā matsyāḥ syurnityamāṃbhasikāḥ priye |
kalauyuge'pi dṛśyaṃte satyaṃsatyaṃ mayoditam || 2 ||
[Analyze grammar]

tasyāṃ snātvā mahādevi mucyate pañcapātakaiḥ || 3 ||
[Analyze grammar]

sūta uvāca |
tasya tadvacanaṃ śrutvā vismitā girijā satī |
uvāca taṃ dvijaśreṣṭhāḥ pracalaccaṃdraśekharam || 4 ||
[Analyze grammar]

pārvatyuvāca |
kathaṃ tatra samāyātā gaṃgā tripathagāminī |
kathaṃ trinetrāḥ saṃjātā matsyā āṃbhasikāḥ śiva || 5 ||
[Analyze grammar]

etadvistarato brūhi yadyahaṃ te priyā vibho || 6 ||
[Analyze grammar]

īśvara uvāca |
śṛṇu devi pravakṣyāmi yadi pṛcchasi māṃ śubhe |
āstikāḥ śraddadhānāśca bhavaṃtīti matirmama || 7 ||
[Analyze grammar]

yadā śapto mahādevo hyajñānatimirāvṛtaiḥ |
ṛṣibhiḥ kopayuktaiśca kasmiṃścitkāraṇāṃtare || 8 ||
[Analyze grammar]

tadā te munayaḥ sarve śaptaṃ jñātvā maheśvaram |
nirānaṃdaṃ jagatsarvaṃ dṛṣṭvā cātmānameva ca || 9 ||
[Analyze grammar]

ārādhya parameśānaṃ dadhataṃ gajarūpakam |
unnataṃ sthānamānīya sānaṃdaṃ cakrire dvijāḥ || 10 ||
[Analyze grammar]

tataḥ prabhṛti sarve te śivadrohakaraṃ param |
ātmānaṃ menire nityaṃ prasanne'pi maheśvare || 11 ||
[Analyze grammar]

mahodayānmahātīrthaṃ sarva āgatya satvaram |
tapastepurmahāghoraṃ saṃgāleśvarasannidhau || 12 ||
[Analyze grammar]

saṃgāleśvaranāmānaṃ sarve pūjya yathāvidhi |
bhṛguratristathā maṃkiḥ kaśyapaḥ kaṇva eva ca || 13 ||
[Analyze grammar]

gautamaḥ kauśikaścaiva kuśikaśca mahātapāḥ |
śūkaro'tha bharadvājo bhārgaviśca mahātapāḥ || 14 ||
[Analyze grammar]

jātūkarṇyo vasiṣṭhaśca sāvarṇiśca parāśaraḥ |
śāṃḍilyaśca pulastyaśca vatsaścaiva mahātapāḥ || 15 ||
[Analyze grammar]

ete cānye ca bahavo hyasaṃkhyātā maharṣayaḥ || 16 ||
[Analyze grammar]

saṃgāleśvaramāsādya prabhāse pāpanāśane |
tapaḥ kurvaṃti satataṃ pratiṣṭhāpya maheśvaram || 17 ||
[Analyze grammar]

tataḥ kālena mahatā te sarve munipuṃgavāḥ |
dhyānāttrilocanasyaiva adṛṣṭe tu maheśvare || 18 ||
[Analyze grammar]

trinetratvamanuprāptāstaponiṣṭhāstapodhanāḥ |
parasparaṃ vīkṣamāṇāstrinetrasyābhiśaṃkayā || 19 ||
[Analyze grammar]

stuvaṃti vividhaiḥ stotrairmanyamānā maheśvaram |
jñātvā dhyānena devasya trinetratvamupāgatāḥ || 20 ||
[Analyze grammar]

cakurugraṃ tapaste tu pūjāṃ devasya śūlinaḥ |
teṣu vai tapyamāneṣu kṛpāviṣṭo maheśvaraḥ || 21 ||
[Analyze grammar]

uvāca tānmunīnsarvāñchṛṇudhvaṃ varamuttamam |
prasanno'haṃ muniśreṣṭhāstapasā pūjayāpi ca || 22 ||
[Analyze grammar]

ṛṣaya ūcuḥ |
yadi prasanno deveśa varaṃ no dātumarhasi |
gaṃgāmānaya vegena hyabhiṣekāya no hara || 23 ||
[Analyze grammar]

tasyāṃ kṛtābhiṣekāstu tava drohakarā vayam |
ajñānabhāvātpūtatvaṃ yāsyāmaḥ pṛthivītale || 24 ||
[Analyze grammar]

īśvara uvāca |
yūyaṃ pavitrakaraṇāḥ pāvanānāṃ ca pāvanāḥ |
gaṃgāṃ caivānayiṣyāmi yuṣmākaṃ cittatuṣṭaye || 25 ||
[Analyze grammar]

pāvitryādbhavatāṃ jātaṃ trainetryaṃ munisattamāḥ |
evamuktvā tataḥ śaṃbhurdhyānastimitalocanaḥ |
sasmāra kṣaṇamātreṇa gaṃgāṃ mīnakulāvṛtām || 26 ||
[Analyze grammar]

smṛtamātrā tadā devī gaṃgā tripathagāminī |
bhitvā bhūmitalaṃ prāptā tatra mīnakulāvṛtā || 27 ||
[Analyze grammar]

ṛṣibhiśca yadā dṛṣṭā gaṃgā mīnayutā śubhā |
dṛṣṭamātrāstu te matsyāstrinetratvamupāgatāḥ || 28 ||
[Analyze grammar]

īśvara uvāca |
yuṣmākaṃ darśanādviprāstrinetratvamupāgatāḥ |
etannidarśanaṃ sarvaṃ lokānāṃ ca pradarśanam || 29 ||
[Analyze grammar]

ṛṣaya ūcuḥ |
asminkuṃḍe mahādeva matsyānāṃ saṃtatiḥ sadā |
trinetrā tvatprasādena bhūyātsarvā yugeyuge || 30 ||
[Analyze grammar]

asminkuṃḍe samāgatya naraḥ snānaṃ karoti yaḥ |
dadāti hema viprāya gāśca vastraṃ tathā tilān || 31 ||
[Analyze grammar]

amāvāsyāṃ viśeṣeṇa trinetraḥ sa prajāyatām |
evaṃ bhaviṣyatītyuktvā hyantardhānaṃ gato haraḥ || 32 ||
[Analyze grammar]

brāhmaṇāstuṣṭisaṃyuktā gatāḥ sarve mahodayam || 33 ||
[Analyze grammar]

etatte kathitaṃ devi gaṃgāmāhātmyamuttamam |
śrutaṃ pāpapraśamanaṃ sarvakāmaphalapradam || 34 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye saṃgāleśvarasamīpavarti gaṃgāmāhātmyavarṇanaṃnāma caturuttaratriśatatamo'dhyāyaḥ || 304 ||
[Analyze grammar]