Chapter 279

[English text for this chapter is available]

īśvara uvāca |
tato gacchenmahādevi cyavanārkamanuttamam |
hiraṇyāpūrvabhāgasthaṃ cyavanena pratiṣṭhitam || 1 ||
[Analyze grammar]

sarvakāmapradaṃ nṛṇāṃ pūjitaṃ vidhivannaraiḥ |
saptamyāṃ ca vidhānena yaḥ stoṣyati raviṃ naraḥ || 2 ||
[Analyze grammar]

aṣṭottaraśatairnāmnāṃ samyakchraddhāsamanvitaḥ |
śṛṇu tāni mahādevi śucirbhūtvā samāhitaḥ || 3 ||
[Analyze grammar]

kṣaṇaṃ tvaṃ kuru deveśi sarvaṃ vakṣyāmyaśeṣataḥ |
dhaumyena tu yathāpūrvaṃ pārthāya sumahātmane || 4 ||
[Analyze grammar]

nāmāṣṭaśatamākhyātaṃ tacchṛṇuṣva mahāmate |
sūryo'ryamā bhagastvaṣṭā pūṣā'rkaḥ savitā raviḥ || 5 ||
[Analyze grammar]

gabhastimānajaḥ kālo mṛtyurddhātā prabhākaraḥ |
pṛthivyāpaśca tejaśca khaṃ vāyuśca parāyaṇaḥ || 6 ||
[Analyze grammar]

somo bṛhaspatiḥ śukro budhoṃ'gāraka eva ca |
indro vivasvāndīptāṃśuḥ śuciḥ sauriḥ śanaiścaraḥ || 7 ||
[Analyze grammar]

brahmā rudraśca viṣṇuśca skando vaiśravaṇo yamaḥ |
vaidyuto jāṭharaścāgniriṃdhanastejasāṃ patiḥ || 8 ||
[Analyze grammar]

dharmadhvajo vedakarttā vedāṃgo vedavāhanaḥ |
kṛtaṃ tretā dvāparaśca kaliḥ sarvāmarāśrayaḥ || 9 ||
[Analyze grammar]

kalākāṣṭhāmuhūrttāśca pakṣā māsā aharniśāḥ |
saṃvatsarakaro'śvasthaḥ kālacakro vibhāvasuḥ || 10 ||
[Analyze grammar]

puruṣaḥ śāśvato yogī vyaktāvyaktaḥ sanātanaḥ |
lokādhyakṣaḥ prajādhyakṣo viśvakarmā tamonudaḥ || 11 ||
[Analyze grammar]

varuṇaḥ sāgaroṃśuśca jīvanto jīvano'rihā |
bhūtāśrayo bhūtapatiḥ sarvabhūtaniṣevitaḥ || 12 ||
[Analyze grammar]

sraṣṭā saṃvarttako vahniḥ sarvasyādikaro'malaḥ |
anaṃtaḥ kapilo bhānuḥ kāmadaḥ sarvatomukhaḥ || 13 ||
[Analyze grammar]

jayo viṣādo varadaḥ sarvadhātuniṣevitaḥ |
samaḥ suvarṇo bhūtādiḥ śīghragaḥ prāṇadhārakaḥ || 14 ||
[Analyze grammar]

dhanvaṃtarirdhūmaketurādidevo'diteḥ sutaḥ |
dvādaśātmā'raviṃdākṣaḥ pitā mātā pitāmahaḥ || 15 ||
[Analyze grammar]

svargadvāraṃ prajādvāraṃ mokṣadvāraṃ triviṣṭapam |
dehakarttā praśāṃtātmā viśvātmā viśvatomukhaḥ |
carācarātmā sūkṣmātmā maitreṇa vapuṣā'nvitaḥ || 15 ||
[Analyze grammar]

etadvai kīrtanīyasya sūryasyāmitatejasaḥ |
nāmnāmaṣṭottaraśataṃ proktaṃ śakreṇa dhīmatā || 17 ||
[Analyze grammar]

śakrācca nāradaḥ prāpto dhaumyastu tadanantaram |
dhaumyādyudhiṣṭhiraḥ prāpya sarvānkāmānavāptavān || 18 ||
[Analyze grammar]

etāni kīrtanīyasya sūryasyāmitatejasaḥ |
nāmāni yaḥ paṭhennityaṃ sarvānkāmānavāpnuyāt || 19 ||
[Analyze grammar]

surapitṛmanujayakṣasevitamasuraniśācarasiddhavaṃditam |
varakanakahutāśanaprabhaṃ tvamapi nama hitāya bhāskaram || 20 ||
[Analyze grammar]

sūryodaye yastu samāhitaḥ paṭhetsa putralābhaṃ dhanaratnasaṃcayān |
labheta jātismaratāṃ sadā naraḥ smṛtiṃ ca medhāṃ ca sa viṃdate pumān || 21 ||
[Analyze grammar]

imaṃ stavaṃ devavarasya yo naraḥ prakīrttayecchuddhamanāḥ samāhitaḥ |
sa mucyate śokadavāgnisārāllabheta kāmānmanasā yathepsitān || 22 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye cyavanādityamāhātmyasūryāṣṭottaraśatanāma māhātmyavarṇanaṃnāmaikonāśītyuttaradviśatatamo'dhyāyaḥ || 279 ||
[Analyze grammar]