Chapter 266

[English text for this chapter is available]

ṛṣaya ūcuḥ |
śrutāni mukhyatīrthāni tatkṣetraprodbhavāni ca |
yeṣu snāto naraḥ smyaksarva tīrthaphalaṃ labhet || 1 ||
[Analyze grammar]

liṃgāni ca mahābhāga tatra mukhyāni yāni ca |
yairdṛṣṭairlabhyate śreyaḥ sarveṣāṃ tāni no vada || 2 ||
[Analyze grammar]

sūta uvāca |
tatra ca maṃkaṇākhyaṃ tu liṃgamasti suśobhanam |
tathā siddheśvaraṃ nāma gautameśvarasaṃyutam || 3 ||
[Analyze grammar]

kapāleśvamanyacca caturthaṃ parikīrtitam |
ekaikaṃ sarvaliṃgānāṃ phalaṃ yacchatyasaṃśayam |
yathoktavidhinā samyagyathoktaṃ dvijasattamāḥ || 4 ||
[Analyze grammar]

tatra tāvatpravakṣyāmi maṃkaṇeśvarajaṃ phalam |
makārākṣarayuktasya liṃgasyātra dvijottamāḥ || 5 ||
[Analyze grammar]

śivarātriṃ samāsādya yastasya puruṣo dvijāḥ |
kuryājjāgaraṇaṃ rātrau nirāhāraḥ sthitaḥ śuciḥ || 6 ||
[Analyze grammar]

sarvaliṃgodbhavaṃ caiva phalaṃ darśanasaṃbhavam |
jāyate nātra saṃdeha ityuvāca haraḥ svayam || 7 ||
[Analyze grammar]

ṛṣaya ūcuḥ |
śivarātrirmahābhāga kasminkāle tu sā bhavet |
vidhyānaṃ caiva māhātmyaṃ sarvaṃ no vistarādvada || 8 ||
[Analyze grammar]

sūta uvāca || māghasya kṛṣṇapakṣe yā tithiścaiva caturdaśī |
tasyā rātriḥ samākhyātā śivarātrisamudbhavā || 9 ||
[Analyze grammar]

tasyāṃ sarveṣu liṃgeṣu sadā saṃkramate haraḥ |
viśeṣātsarvapuṇyeṣu khyāteyaṃ maṃkaṇeśvare || 10 ||
[Analyze grammar]

ṛṣaya ūcuḥ |
śivarātriḥ kathaṃ jātā kenaiṣā ca vinirmitā |
kasmādbahuphalā jātā sarvaṃ no vistarādvada || 11 ||
[Analyze grammar]

sūta uvāca |
atra vaḥ kīrtayiṣyāmi pūrvavṛttaṃ kathānakam |
bhartṛyajñasya saṃvādamaśvasenasya bhūpateḥ || 12 ||
[Analyze grammar]

ānartādhipatiḥ pūrvamaśvasena iti smṛtaḥ |
āsīddharmaparo nityaṃ vedavedāgaṃpāragaḥ || 13 ||
[Analyze grammar]

bhartṛyajñaḥ purā tena idaṃ pṛṣṭaḥ kutūhalāt |
kalikālaṃ samudvīkṣya vardhamānaṃ dinedine || 14 ||
[Analyze grammar]

aśvasena uvāca |
kalikālakṛte kiṃcidvrataṃ me vada sanmune |
svalpāyāsaṃ mahatpuṇyaṃ sarvapāpapraṇāśanam || 15 ||
[Analyze grammar]

svalpāyuṣaḥ sadā martyā brahmankṛtayuge purā |
tretāyāṃ dvāpare caiva kimu prāpte kalau yuge || 16 ||
[Analyze grammar]

tasmādvarṣavrataṃ tyaktvā kiṃcidekāhnikaṃ vada || 17 ||
[Analyze grammar]

śvaḥ kāryamadya kurvīta pūrvāhṇe cāparāhṇikam |
na hi pratīkṣate mṛtyuḥ kṛtaṃ vāsya na vā kṛtam || 18 ||
[Analyze grammar]

tasya tadvacaṃ śrutvā bhartṛyajña udāradhīḥ |
abravītsuciraṃ dhyātvā jñātvā divyena cakṣuṣā || 19 ||
[Analyze grammar]

asti rājanvrataṃ puṇyaṃ śivarātrītisaṃjñitam |
ekāhnikaṃ mahārāja sarvapātakanāśanam || 20 ||
[Analyze grammar]

tatra yaddīyate dānaṃ hutaṃ japtaṃ tathaiva ca |
sarvamakṣayatāṃ yāti rātri jāgaraṇe kṛte || 21 ||
[Analyze grammar]

aputro labhate putrānadhano dhanamāpnuyāt |
svalpāyurdīrghamāyu्ṣyaṃ śatrūṇāṃ caiva saṃkṣayam || 22 ||
[Analyze grammar]

yaṃyaṃ kāmamabhidhyāyanvratametatsamācaret |
taṃtaṃ samāpnuyānmartyo niṣkāmo mokṣamāpnuyāt || 23 ||
[Analyze grammar]

kārpaṇyenātha vittena yadi kuryātprajāgaram |
tathā varṣakṛtātpāpānmucyate nātra saṃśayaḥ || 24 ||
[Analyze grammar]

yāni kānyatra liṃgāni sthāvarāṇi carāṇi ca |
teṣu saṃkramate devastasyāṃ rātrau yato haraḥ || 25 ||
[Analyze grammar]

śivarātristataḥ proktā tena sā haravallabhā |
prārthitaḥ sa suraiḥ sarvairlokānugrahakāmyayā || 26 ||
[Analyze grammar]

bhagavankalikāle'sminsarvapāpasamanvite |
varṣapāpaviśuddhyarthaṃ dinamekaṃ kṣitau vraja |
yena tvatpūjayā pūtā martyāḥ śuddhimavāpnuyuḥ || 27 ||
[Analyze grammar]

tato dattaṃ hutaṃ teṣāmasmākamupatiṣṭhati |
yaducchiṣṭaṃ narairdattaṃ tadvṛthā jāyate'khilam || 28 ||
[Analyze grammar]

kalikāle na cāsmākaṃ kiṃcidevopatiṣṭhati |
aśuddhairmānavairdattaṃ prabhūtamapi śaṃkara || 29 ||
[Analyze grammar]

śrībhagavānuvāca |
māghamāsasya kṛṣṇāyāṃ caturdaśyāṃ sureśvara |
ahaṃ yāsyāmi bhūpṛṣṭhe rātrau naiva divā kalau || 30 ||
[Analyze grammar]

liṃgeṣu ca samasteṣu caleṣu sthāvareṣu ca |
saṃkramiṣyāmyasaṃdigdhaṃ varṣapāpaviśuddhaye || 31 ||
[Analyze grammar]

tasyāṃ rātrau hi me pūjāṃ yaḥ kariṣyati mānavaḥ |
maṃtrairetaiḥ suraśreṣṭha vipāpmā sa bhaviṣyati || 32 ||
[Analyze grammar]

oṃ sadyojātāya namaḥ |
oṃ vāmadevāya namaḥ |
oṃ ghorāya namaḥ |
oṃ tatpuruṣāya namaḥ |
oṃ īśānāya namaḥ |
evaṃ vaktrāṇi saṃpūjya gandhapuṣpānulepanaiḥ |
vastrairdīpaiśca naivedyaistato'rghaṃ saṃpradāpayet |
maṃtreṇānena saṃpūjya māṃ dhyātvā manasi sthitam || 33 ||
[Analyze grammar]

gaurīvallabha deveśa sarvādya śaśiśekhara |
varṣapāpaviśuddhyarthamargho me pratigṛhyatām || 34 ||
[Analyze grammar]

tataḥ saṃpūjayedvipraṃ bhojanācchādanādibhiḥ |
dattvātha dakṣiṇāṃ tasmai vittaśāṭhyaṃ vivarjayet || 35 ||
[Analyze grammar]

dharmākhyānakathābhiśca salāsyaistāṃḍavaistathā || 36 ||
[Analyze grammar]

evaṃ kariṣyate yo'tra vratametatsureśvara |
varṣapāpaviśuddhyarthaṃ prāyaścittaṃ bhaviṣyati || 37 ||
[Analyze grammar]

tacchrutvā tridaśāḥ sarve praṇamya śaśiśekharam |
saṃprahṛṣṭā naraśreṣṭha svāni sthānāni bhejire || 38 ||
[Analyze grammar]

preṣayāmāsururvyāṃ ca nāradaṃ munisattamam |
prabodhanāya lokānāṃ śivarātrikṛte sadā || 39 ||
[Analyze grammar]

so'pi gatvā dharāpṛṣṭhaṃ śrāvayāmāsa sarvataḥ |
śivarātrestu māhātmyaṃ yaduktaṃ śūlapāṇinā || 40 ||
[Analyze grammar]

tataḥ prabhṛti saṃjātā śivarātrirdharātale |
sarvakāmapradā puṇyā sarvapātakanāśinī || 41 ||
[Analyze grammar]

atra vaḥ kīrtayiṣyāmi purāvṛttaṃ kathānakam |
yadvṛttaṃ naimiṣāraṇye lubdhakasyātra kasyacit || 42 ||
[Analyze grammar]

tatrāsīllubdhakaḥ kaścijjātimātrānna karmataḥ |
vyasenānābhibhūtātmā paravittāpahārakaḥ || 43 ||
[Analyze grammar]

na kadācidvrataṃ tena na dattaṃ na japaḥ kṛtaḥ |
kevalaṃ ca hṛtaṃ vittaṃ lokānāṃ chalasaṃśrayāt || 44 ||
[Analyze grammar]

kasyacittvatha kālasya śivarātriḥ samāgatā |
māghamāse'sitepakṣe sarvapātakanāśinī || 45 ||
[Analyze grammar]

tatrāstyāyatanaṃ puṇyaṃ devadevasya śūlinaḥ |
tatra jāgaraṇaṃ rātrau prārabdhaṃ bahubhirjjanaiḥ || 46 ||
[Analyze grammar]

nārībhirnaraśārdūla bhūṣitābhiḥ subhūṣaṇaiḥ |
athāsau ciṃtayāmāsa coro dṛṣṭvātha jāgaram || 47 ||
[Analyze grammar]

gacchāmi yadi kāṃcitstrīṃ bhūṣaṇaiḥ paribhūṣitām |
niṣkrāṃtāṃ bāhyataścāsya prāsādasyāpnuyāmaham || 48 ||
[Analyze grammar]

tato hatvā samādāya bhūṣaṇāni vrajāmyaham || 49 ||
[Analyze grammar]

evaṃ niścitya manasā gatastasya samīpataḥ |
karṇikāraṃ samāruhya sthito guptastato hi saḥ || 50 ||
[Analyze grammar]

vīkṣamāṇo diśaḥ sarvā nārīniṣkrāmaṇodbhavāḥ |
caurakarmapravṛttasya śītārtasya viśeṣataḥ || 51 ||
[Analyze grammar]

alpāpi nidrā nāyātā na ca nārī vinirgatā |
tasyādhastāttato liṃgamabhavattu dharodbhavam |
gatvā ca patrāṇyādāya pracikṣepāsya copari || 52 ||
[Analyze grammar]

etasminneva kāle tu prodgatastīkṣṇadīdhitiḥ |
asatīnāṃ ca caurāṇāṃ kāmināmasukhāvahaḥ || 53 ||
[Analyze grammar]

tato narāśca nāryaśca jagmuḥ svaṃsvaṃ niketanam |
upacāraparāḥ śāṃtāḥ praṇipatya maheśvaram || 54 ||
[Analyze grammar]

so'pi cauro nirāśaśca kṣutkṣāmaḥ śītavihvalaḥ |
avatīrya drumāttasmādupāyaṃ kaṃcidāśritaḥ || 55 ||
[Analyze grammar]

tataḥ kālena mahatā paṃcatvaṃ samapadyata |
jāto jātismaraḥ so'tha daśārṇādhipatergṛhe || 56 ||
[Analyze grammar]

upavāsaprabhāvena balādapi prajāgarāt |
śivarātrestathā tasya liṅgasyāpi prapūjayā || 57 ||
[Analyze grammar]

tato rājyaṃ samāsādya pitṛpaitāmahaṃ mahat |
kārayāmāsa liṃgasya prāsādaṃ tasya śobhanam || 58 ||
[Analyze grammar]

varṣevarṣe samāśritya śivarātrau prajāgarāt |
upavāsaparobhūtvā gītavāditraniḥsvanaiḥ || 59 ||
[Analyze grammar]

dharmākhyānakathābhiśca gītadhvanibhireva ca |
pūrvoktamaṃtraiḥ saṃpūjya arghaṃ dattvā vidhānataḥ |
saṃtarpya brāhmaṇānkāmairjagāma nilayaṃ nijam || 60 ||
[Analyze grammar]

kasyacittvatha kālasya śivarātrau samāgatāḥ |
prāsāde tatra munayaḥ prāptā śāṇḍilyapūrvakāḥ || 61 ||
[Analyze grammar]

śāṃḍilyo'tha bharadvājo yavakrīto'tha gālavaḥ |
pulastyaḥ pulaho gārgyastathānye bahavo nṛpa || 62 ||
[Analyze grammar]

so'pi rājā bṛhatseno daśārṇādhipateḥ sutaḥ |
saṃprāpto jāgaraṃ kartuṃ tasya liṃgasya cāgrataḥ || 63 ||
[Analyze grammar]

pūjayitvā tato devaṃ praṇipatya munīśvarān |
upaviṣṭastasya cāgre hyanujñāto dvijottamaiḥ || 64 ||
[Analyze grammar]

tatastasyāgrataścakruḥ kathāste bahudhā nṛpa |
rājarṣīṇāmatītānāṃ brahmarṣīṇāṃ viśeṣataḥ || 65 ||
[Analyze grammar]

atha kasminkathāṃte sa taiḥ pṛṣṭo brahmavādibhiḥ |
kautukāviṣṭacittaiśca vismayotphullalocanaiḥ || 66 ||
[Analyze grammar]

rājanpṛcchāmahe sarve vayaṃ kautūhalānvitāḥ |
yadi bravīṣi naḥ satyaṃ devatāyatane sthitaḥ || 67 ||
[Analyze grammar]

rājovāca |
yadi jñāsyāmi vipreṃdrāḥ kathayiṣyāmyasaṃśayam |
devasyāgre ca saṃpṛṣṭaḥ satyenātmānamālabhe || 68 ||
[Analyze grammar]

ṛṣaya ūcuḥ |
puṣkalāni parityajya kasmāddānānyanekaśaḥ |
jāgaraṃ kartukāmo'tra svadeśādupatiṣṭhasi || 69 ||
[Analyze grammar]

varṣevarṣe sadā prāpte nūnaṃ tvaṃ vetsi kāraṇam |
rahasyaṃ yadi te na syāttadbravīhi narādhipa || 70 ||
[Analyze grammar]

sūta uvāca |
savailakṣyaṃ smitaṃ kṛtvā tataḥ prāha sa durmanāḥ |
rahasyaṃ paramaṃ hyetadavācyaṃ hi dvijottamāḥ || 71 ||
[Analyze grammar]

tathāpi ca vadiṣyāmi pṛṣṭo devāgrato yataḥ || 72 ||
[Analyze grammar]

tataḥ sa kathayāmāsa pūrvadehasamudbhavam |
malimlucastato nūnaṃ śivarātrisamudbhavam || 73 ||
[Analyze grammar]

cauryabhāvena devasya pūjanaṃ jāgarastathā |
upavāsaṃ vinā tena śivarātrau purā kṛtam || 74 ||
[Analyze grammar]

jātismaraṇasaṃyuktaṃ janmajātaṃ yathātatham |
tataste munayaḥ sarve sādhuvādānpṛthagvidhān || 75 ||
[Analyze grammar]

nṛpottamasya rājarṣerdattvāśīrbhiḥ samanvitān |
rātrau jāgaraṇaṃ kṛtvā prajagmuste nijāśramān || 76 ||
[Analyze grammar]

so'pi rājāsamabhyarcya taṃ devaṃ tāndvijottamān |
jagāma svapuraṃ paścātkṛtvā rātrau prajāgaram || 77 ||
[Analyze grammar]

bhartṛyajña uvāca |
śivarātriḥ samutpannā evaṃ bhūmitale nṛpa |
evaṃvidhaṃ ca māhātmyaṃ tasyāste parikīrtitam || 78 ||
[Analyze grammar]

tasmātsarvaprayatnena kāryā sa nṛpasattama |
kalikāle viśeṣeṇa ya icchedbhūtimātmanaḥ || 79 ||
[Analyze grammar]

eṣā kṛtā dilīpena nalena nahuṣeṇa ca |
māndhātrā dhuṃdhumāreṇa sagareṇa yuyutsunā || 80 ||
[Analyze grammar]

tathānyaiśca viśeṣeṇa samyakchraddhāsamanvitaiḥ |
prāptāśca hṛdgatāḥ kāmā ye divyā ye ca mānuṣāḥ || 81 ||
[Analyze grammar]

tathā caiva tu sāvitryā śriyā devyā tu sītayā |
aruṃdhatyā sarasvatyā menayā raṃbhayā tathā || 82 ||
[Analyze grammar]

iṃdrāṇyātha dṛṣadvatyā svadhayā svāhayā tathā |
ratyā prītyā prabhāvatyā gāyatryā ca nṛpottama |
sarvāḥ prāptāḥ priyānkāmānatisaubhāgyasaṃyutān || 83 ||
[Analyze grammar]

yaścaitāṃ paṭhate vyuṣṭiṃ bhāvena śivasaṃnidhau |
dinajātpātakātso'pi mucyate nātra saṃśayaḥ || 84 ||
[Analyze grammar]

nāsti gaṃgāsamaṃ tīrthaṃ nāsti devo haropamaḥ |
śivarātreḥ paraṃ nāsti tapaḥ satyaṃ mayoditam || 85 ||
[Analyze grammar]

sarvaratnamayo meruḥ sarvāścaryamayaṃ tapaḥ |
sarvadharmamayī rājañchivarātriḥ prakīrtitāḥ || 86 ||
[Analyze grammar]

garuḍaḥ pakṣiṇāṃ yadvannadīnāṃ sāgaro yathā |
pradhānaḥ sarvadharmāṇāṃ śivarātristathottamā || 87 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye śivārātrimāhātmyavarṇanaṃ nāma ṣaṭṣaṣṭyuttaradviśatatamo'dhyāyaḥ || 266 ||
[Analyze grammar]