Chapter 265

[English text for this chapter is available]

ṛṣaya ūcuḥ |
prabhūtāni tvayoktāni vratāni niyamāstathā |
prasupte puṃḍarīkākṣe yeṣāṃ saṃkhyā na vidyate || 1 ||
[Analyze grammar]

aśaktyā hi śarīrasya niyamānāṃ kathaṃ caret |
vrataṃ hi sukumārāṃgo dānairvāpi vadasva naḥ || 2 ||
[Analyze grammar]

sūta uvāca |
aśakto niyamaṃ kartuṃ sukumāro bhavettu yaḥ |
tena tatra prakartavyaṃ vikhyātaṃ bhīṣmapaṃcakam || 3 ||
[Analyze grammar]

kārttikasya site pakṣa ekādaśyāṃ samāhitaḥ |
prātarutthāya vipreṃdra kartavyaṃ daṃtadhāvanam || 4 ||
[Analyze grammar]

tatastu niyamaṃ kuryādvāsudevaparāyaṇaḥ |
pūrvoktānāṃ ca sarveṣāṃ niyamānāṃ dvijottamāḥ || 5 ||
[Analyze grammar]

upavāsaḥ prakartavyastasminnahani bhaktitaḥ |
aśaktyā vā śarīrasya hemaṃ dadyātsvaśaktitaḥ || 6 ||
[Analyze grammar]

brāhmaṇāya haviṣyānnaṃ dātavyaṃ vaiṣṇavairnaraiḥ |
evaṃ pañcadinaṃ yāvatkartavyaṃ vratamuttamam || 7 ||
[Analyze grammar]

pūjanīyo hṛṣīkeśo jalaśāyisvarūpadhṛk |
gaṃdhairdhūpaiśca naivedyai rātrijāgaraṇairapi || 8 ||
[Analyze grammar]

ṣaṣṭhe'hani tato jāte pūjayedbrāhmaṇottamān |
tāṃśca vastrairhiraṇyena miṣṭānnena prabhaktitaḥ || 9 ||
[Analyze grammar]

tataḥ kṛtāṃjalirbhūtvā yācayedbrāhmaṇottamān |
sarve me niyamāḥ prāptā yuṣmākaṃ ca prasādataḥ || 10 ||
[Analyze grammar]

tatastairapi vaktavyaṃ caturmāsīsamudbhavam |
vratānāṃ niyamānāṃ ca vrataṃ bhūyāttavākhilam || 11 ||
[Analyze grammar]

tato visarjya tānviprānbhojanaṃ svayamācaret |
sarvāhāreṇa rājeṃdra paṃcagavyaprapūrvakam || 12 ||
[Analyze grammar]

yaḥ karoti vrataṃ tasya phalaṃ syādbahupuṇyadam |
yaḥ punarvratametaddhi kurute dinapaṃcakam |
upavāsaparastasya phalaṃ śataguṇaṃ bhavet || 13 ||
[Analyze grammar]

ekādaśyāṃ hareḥ pūjāṃ jātipuṣpaiḥ samācaret |
dvādaśyāṃ bilvapatreṇa śatapatryā tataḥ param |
trayodaśyāṃ caturdaśyāṃ surabhyā bhaktipūrvakam || 14 ||
[Analyze grammar]

bhṛṃgarājena puṇyena paurṇamāsyāṃ prapūjayet |
pratipaddivase sarvaiḥ pūjanīyo janārdanaḥ |
gomūtraṃ gomayaṃ kṣīraṃ dadhi sarpiḥ kuśodakam || 15 ||
[Analyze grammar]

pratipaddivase sarvānprāśayetkāyaśuddhaye |
agaraṃ guggulaṃ caiva karpūraṃ tagaraṃ tvacā || 16 ||
[Analyze grammar]

ekaikaṃ nirvapeddhūpaṃ pratipaddivase'khilam |
jalaśāyī jagadyoniḥ śeṣaparyaṃkamāśritaḥ || 17 ||
[Analyze grammar]

arghaṃ gṛhṇātu me devo bhīṣmapaṃcakasiddhaye |
maṃtreṇānena dātavyo hyargho devasya bhaktitaḥ || 18 ||
[Analyze grammar]

śaṃkhatoyaṃ samādāya sapuṣpaphalacaṃdanaiḥ |
naivedyaṃ paramānnaṃ ca svaśaktyā nirvapeddvijāḥ || 19 ||
[Analyze grammar]

etadvaḥ sarvamākhyātaṃ vrataṃ vai bhīṣmapaṃcakam |
saṃprāpyate phalaṃ caiva vratānāṃ niyamaiḥ saha || 20 ||
[Analyze grammar]

ṛṣaya ūcuḥ || yadetadbhavatā proktamaśūnyaśāyinīvratam |
indreṇa yatkṛtaṃ pūrvaṃ tuṣṭyarthaṃ cakrapāṇinaḥ |
prasuptasya mahābhāga phalaṃ caiva prakīrtitam || 21 ||
[Analyze grammar]

kasminkāle prakartavyaṃ kenaiva vidhinā tathā |
tasmātsūta mahābhāga vidhānaṃ vistarādvada || 22 ||
[Analyze grammar]

sūta uvāca |
śrāvaṇyāṃ samatītāyāṃ dvitīyādivase sthite |
prātarutthāya viprendrā nakṣatre viṣṇudaivate |
pāpiṣṭhaiḥ patitairmlecchaiḥ saṃbhāṣaṃ naiva kārayet || 23 ||
[Analyze grammar]

tato madhyāhnasamaye snātvā dhautāṃbaraḥ śuciḥ |
jalaśāyinamāsādya maṃtreṇānena pūjayet || 24 ||
[Analyze grammar]

śrīvatsadhāriñchrīkāṃta śrīdhāmañchrīpate'vyaya |
gārhasthyaṃ mā praṇāśaṃ me yātu dharmārthakāmadam || 25 ||
[Analyze grammar]

pitaro mā praṇaśyaṃtu mā praṇaśyaṃtu cāgnayaḥ |
devatā mā praṇaśyaṃtu matto dāṃpatyabhedataḥ || 26 ||
[Analyze grammar]

lakṣmyā viyujyase kṛṣṇa na kadācidyathā bhavān |
tathā kalatrasambandho deva mā me praṇaśyatu || 27 ||
[Analyze grammar]

lakṣmyā hyaśūnyaṃ śayanaṃ yathā te deva sarvadā |
śayyā mamāpyaśūnyāstu tathā janmani janmani || 28 ||
[Analyze grammar]

evamarthaṃ nivedyātha tato vipraṃ prapūjayet |
yathāśaktyā dvijaśreṣṭhā vittaśāṭhyaṃ vivarjayet || 29 ||
[Analyze grammar]

evaṃ bhādrapade māsi āśvine kārtike tathā |
pūjayecca jagannāthaṃ jalaśāyinamacyutam || 30 ||
[Analyze grammar]

akṣārabhojanaṃ kāryaṃ viśeṣāttailavarjitam |
samāptau ca tato dadyādbrāhmaṇeṃdrāya bhaktitaḥ || 31 ||
[Analyze grammar]

phalavrīhisamopetāṃ śayyāṃ vastrasamanvitām |
suvarṇaṃ dakṣiṇāyāṃ ca tathaiva ca phalaṃ labhet || 32 ||
[Analyze grammar]

evaṃ yaḥ kurute samyagvratametatsamāhitaḥ |
tasya tuṣṭipathaṃ yāti jalaśāyī jagadguruḥ || 33 ||
[Analyze grammar]

yathā śakrasya saṃtuṣṭaḥ pūrvameva dvijottamāḥ |
aśūnyaṃ śayanaṃ tasya bhavejjanmani janmani || 34 ||
[Analyze grammar]

aṣṭamāsakṛtaṃ pāpamajñānājjñānato'pi vā |
aśūnyaśayanātsarvaṃ vratānnāśaṃ nayetpumān || 35 ||
[Analyze grammar]

putrahīnā ca yā nārī kākavandhyā ca yā bhavet |
vidhavā yā karotyetadvratamevaṃ samāhitā |
tasyāstuṣṭo jagannāthaḥ kāyaśuddhiṃ prayacchati || 36 ||
[Analyze grammar]

na tasyā jāyate buddhiḥ kadācitpāpasaṃbhavā |
na kāmopahatā buddhiḥ kathaṃcidapi jāyate || 37 ||
[Analyze grammar]

kumārikāpi yā samyagvratametatsamācaret |
sā patiṃ labhate viprāḥ kulīnaṃ rūpasaṃyutam || 38 ||
[Analyze grammar]

niṣkāmaḥ kurute yastu vratametatsamāhitaḥ |
cāturmāsyudbhavānāṃ ca niyamānāṃ phalaṃ labhet || 39 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye jalaśāyyupākhyāne aśūnyaśayanavratamāhātmyavarṇanaṃ nāma pañcaṣaṣṭyuttaradviśatatamo'dhyāyaḥ || 265 ||
[Analyze grammar]