Chapter 247

[English text for this chapter is available]

paijavana uvāca |
śrīḥ kathaṃ tulasīrūpā bilvavṛkṣe ca pārvatī |
etacca vistareṇa tvaṃ mune tattvaṃ vada prabho || 1 ||
[Analyze grammar]

gālava uvāca |
purā daivāsure yuddhe dānavā baladarpitāḥ |
devānnijaghnuḥ saṃgrāme ghorarūpāḥ sudāruṇāḥ || 2 ||
[Analyze grammar]

devāśca bhaya saṃvignā brahmāṇaṃ śaraṇaṃ yayuḥ |
te stutvā pitaraṃ natvā vṛhaspatipuraḥsarāḥ || 3 ||
[Analyze grammar]

tasthuḥ prāṃjalayaḥ sarve tānuvāca pitāmahaḥ |
kimarthaṃ mlānavadanā asmadgehamupāgatāḥ || 4 ||
[Analyze grammar]

kāraṇaṃ kathyatāmāśu vahnīndravasubhiryutāḥ |
devā ūcuḥ |
daityaiḥ parājitāstāta saṃgare'dbhutakāribhiḥ || 9 ||
[Analyze grammar]

vayaṃ sarve parākrāṃtā atastvāṃ śaraṇaṃ gatāḥ |
trāhyasmāndevadeveśa śaraṇaṃ samupāgatān || 6 ||
[Analyze grammar]

tacchrutvā bhagavānprāha brahmā lokapitāmahaḥ |
mayā na śakyate karttuṃ pakṣaḥ kasya janasya ca || 7 ||
[Analyze grammar]

vakṣyāmyupāyaṃ saddharmāśritānāṃ bhavatāṃ puraḥ |
ekadā śivabhaktānāṃ vivādaḥ sumahānabhūt |
samaṃ keśavabhaktaiśca parasparajigīṣayā |
tatastu bhagavānrudraḥ svabhaktānāṃ ca paśyatām || 9 ||
[Analyze grammar]

aikyaṃ viṣṇugaṇaiḥ kurvandadhre rūpaṃ mahādbhutam |
tadā hariharākhyaṃ ca dehārddhābhyāṃ dadhāra saḥ || 10 ||
[Analyze grammar]

haraścaivārddhadehena viṣṇurarddhena cābhavat |
ekato viṣṇucihnāni haracihnāni caikataḥ || 11 ||
[Analyze grammar]

ekato vainateyaśca vṛṣabhaścānyato'bhavat |
vāmato meghavarṇābho deho'śmanicayopamaḥ || 12 ||
[Analyze grammar]

karpūragauraḥ savye tu samajāyata vai tadā |
dvayoraikyasamaṃ viśvaṃ viśvamaikyamavarttata || 13 ||
[Analyze grammar]

vibhedamatayo naṣṭāḥ śrutismṛtyarthabādhakāḥ |
pākhaṃḍino haitukāśca sarve vismayamāgaman || 14 ||
[Analyze grammar]

svaṃsvaṃ mārgaṃ parityajya yayurnirvāṇapaddhatim |
maṃdare pavataśreṣṭhe sā mūrtirnityasaṃstutā || 15 ||
[Analyze grammar]

pramathādyairgaṇaiścaiva varttate'dyāpi niścalā |
sṛṣṭisthityaṃtakartrī sā viśvabījamanaṃtakā || 16 ||
[Analyze grammar]

maheśaviṣṇasaṃyuktā sā smṛtā pāpanāśinī |
yogidhyeyā sadāpūjya sattvādhāraguṇātigā || 17 ||
[Analyze grammar]

mumukṣavo'pi tāṃ dhyātvā prayāṃti paramaṃ padam |
cāturmāsye viśeṣeṇa dhyātvā martyo hyamānuṣaḥ || 18 ||
[Analyze grammar]

tatra gacchaṃti ye teṣāṃ sa devaḥ saṃvidhāsyati |
ityuktvā bhagavāṃsteṣāṃ tatraivāṃtaradhīyata || 19 ||
[Analyze grammar]

te'pi vahnimukhā devāḥ prajagmurmaṃdarācalam |
babhramustatra tatraiva vicinvānā maheśvaram || 20 ||
[Analyze grammar]

pārvatīṃ bilvavṛkṣasthāṃ lakṣmīṃ ca tulasīgatām |
ādau sarvaṃ vṛkṣamayaṃ pūrvaṃ viśvamajāyata || 21 ||
[Analyze grammar]

ete vṛkṣā mahāśreṣṭhāḥ sarve devāṃśasaṃbhavāḥ |
eteṣāṃ sparśanādeva sarvapāpaiḥ pramucyate || 22 ||
[Analyze grammar]

cāturmāsye viśeṣeṇa mahāpāpaughahāriṇaḥ |
yadā tenaiva dadṛśurdevāstribhuvaneśvaram || 23 ||
[Analyze grammar]

tadākāśabhavā vāṇīṃ prāha devānyathārthataḥ |
īśvaraḥ sarvabhūtānāṃ kṛpayā vṛkṣamāśritaḥ || 24 ||
[Analyze grammar]

cāturmāsye'tha saṃprāpte sarvabhūtadayākaraḥ |
aśvattho'taḥ sadā sevyo maṃdavāre viśeṣataḥ || 25 ||
[Analyze grammar]

nityamaśvatthasaṃsparśātpāpaṃ yāti sahasradhā |
dugdhena tarpaṇaṃ ye vai tilamiśreṇa bhaktitaḥ || 26 ||
[Analyze grammar]

secanaṃ vā kariṣyaṃti tṛptistatpūrvajeṣu ca |
darśanādeva vṛkṣasya pātakaṃ tu vinaśyati || 27 ||
[Analyze grammar]

pippalaḥ pūjito dhyāto dṛṣṭaḥ sevita eva vā |
pāparogavināśāya cāturmāsye viśeṣataḥ |
aśvatthaṃ pūjitaṃ siktaṃ sarvabhūtasukhāvaham || 28 ||
[Analyze grammar]

sarvāmayaharaṃ caiva sarvapāpaughahāriṇam |
ye narāḥ kīrtayiṣyaṃti nāmāpyaśvatthavṛkṣajam || 29 ||
[Analyze grammar]

na teṣāṃ yamalokasya bhayaṃ mārge prajāyate |
kuṃkumaiścaṃdanaiścaiva suliptaṃ yaśca kārayeta || 30 ||
[Analyze grammar]

tasya tāpatrayābhāvo vaikuṃṭhe gaṇatā bhavet |
duḥsvapnaṃ duṣṭaciṃtāñca duṣṭajvaraparābhavān || 31 ||
[Analyze grammar]

vilayaṃ naya pāpāni pippala tvaṃ haripriya |
maṃtreṇānena ye devāḥ pūjayiṣyaṃti pippalam || 32 ||
[Analyze grammar]

tatasteṣāṃ dharmarājo jāyate vākyakārakaḥ |
aśvattho vacanenāpi prokto jñānaprado nṛṇām || 133 ||
[Analyze grammar]

śruto harati pāpaṃ ca janmādi maraṇāvadhi |
aśvatthasevanaṃ puṇyaṃ cāturmāsye viśeṣataḥ || 34 ||
[Analyze grammar]

supte deve vṛkṣamadhyamāsthāya bhagavānprabhuḥ |
jalaṃ pṛthvīgataṃ sarvaṃ prapibanniva sevate || 35 ||
[Analyze grammar]

jalaṃ viṣṇurjalatvena viṣṇureva raso mahān |
tasmādvṛkṣagato viṣṇuścāturmāsye'ghanāśanaḥ || 36 ||
[Analyze grammar]

sarvabhūtagato viṣṇurāpyāyayati vai jagat |
tathāśvatthagataṃ viṣṇuṃ yo namasyenna nārakī || 37 ||
[Analyze grammar]

aśvatthaṃ ropayedyastu pṛthivyāṃ prayato naraḥ |
tasya pāpasahasrāṇi vilayaṃ yāṃti tatkṣaṇāt || 38 ||
[Analyze grammar]

aśvatthaḥ sarvavṛkṣāṇāṃ pavitro maṃgalānvitaḥ |
muktido ropito dhyātaścāturmāsye'ghanāśanaḥ || 39 ||
[Analyze grammar]

aśvatthe caraṇaṃ dattvā brahmahatyā prajāyate |
niṣkāraṇaṃ saṃkuthitvā narake pacyate dhruvam || 40 ||
[Analyze grammar]

mūle viṣṇuḥ sthito nityaṃ skaṃdhe keśava eva ca |
nārāyaṇastu śākhāsu patreṣu bhagavānhariḥ || 41 ||
[Analyze grammar]

phale'cyuto na saṃdehaḥ sarvadevaiḥ samanvitaḥ |
cāturmāsye viśeṣeṇa drumapūjī sa muktibhāk || 42 ||
[Analyze grammar]

tasmātsarvaprayatnena sadaivāśvatthasevanam |
yaḥ karoti naro bhaktyā pāpaṃ yāti dinodbhavam || 43 ||
[Analyze grammar]

sa eva viṣṇurdruma eva mūrto mahātmabhiḥ sevitapuṇyamūlaḥ |
yasyāśrayaḥ pāpasahasrahaṃtā bhavennṛṇāṃ kāmadugho guṇāḍhyaḥ || 44 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye śeṣaśāyyupākhyāne brahmanāradasaṃvāde cāturmāsyamāhātmye paijavanopākhyāna aśvatthamahimavarṇanaṃnāma saptacatvāriṃśaduttaradviśatatamo'dhyāyaḥ || 247 ||
[Analyze grammar]