Chapter 222

[English text for this chapter is available]

bhartṛyajña uvāca |
yeṣāṃ ca śastramṛtyuḥ syādapamṛtyurathāpi vā |
upasargānmṛtānāṃ ca viṣamṛtyumupeyuṣām || 1 ||
[Analyze grammar]

vahninā ca pradagdhānāṃ jalamṛtyumupeyuṣām |
sarpavyāghrahatānāṃ ca śṛṃgairudbandhanairapi || 2 ||
[Analyze grammar]

śrāddhaṃ teṣāṃ prakartavyaṃ caturdaśyāṃ narādhipa |
teṣāṃ tasminkṛte tṛptistatastatpakṣajā bhavet || 3 ||
[Analyze grammar]

ānarta uvāca |
kasmācchastrahatānāṃ ca proktā śrāddhe caturdaśī |
nānyeṣāṃ divase tatra saṃśayo'yaṃ vadasva me || 4 ||
[Analyze grammar]

ekoddiṣṭaṃ na śaṃsaṃti sapiṇḍīkaraṇaṃ param |
kasmāttatra prakartavyaṃ vadaitanmama vista rāt || 5 ||
[Analyze grammar]

kasmānna pārvaṇaṃ tatra kriyate divase sthite |
pretapakṣe viśeṣeṇa kṛte śrāddhe'khile'pi ca || 6 ||
[Analyze grammar]

bhartṛyajñauvāca |
bṛhatkalpe purā rājanhiraṇyākṣo mahāsuraḥ |
babhūva balavāñchūraḥ sarvadevabhayaṃkaraḥ || 7 ||
[Analyze grammar]

brahmā pratoṣitastena vidhāya vividhaṃ tapaḥ |
kṛṣṇapakṣe viśeṣeṇa nabhasye māsi saṃsthite || 8 ||
[Analyze grammar]

brahmovāca |
parituṣṭosmi te vatsa prārthayasva yathepsitam |
adeyamapi dāsyāmi tasmātprārthaya mā ciram || 9 ||
[Analyze grammar]

hiraṇyākṣa uvāca |
bhūtāḥ pretāḥ piśācāśca rākṣasā daityadānavāḥ |
bubhukṣitāḥ prayācaṃte māṃ nityaṃ padmasaṃbhava || 10 ||
[Analyze grammar]

pretapakṣe kṛte śrāddhe kanyāsaṃsthe divākare |
ekasminnahani prāyastṛptiḥ syādvarṣasaṃbhavā || 11 ||
[Analyze grammar]

tattvamadya dinaṃ dehi tebhyaḥ kamalasambhava |
tena tṛptiṃ gatāḥ sarve sthāsyaṃtyabdaṃ pitāmaha || 12 ||
[Analyze grammar]

śrībrahmovāca |
yaḥ kaścinmānavaḥ śrāddhaṃ svapitṛbhyaḥ pradāsyati |
pretapakṣe caturdaśyāṃ nabhasye mā si saṃsthite || 13 ||
[Analyze grammar]

pretānāṃ rākṣasānāṃ ca bhūtādīnāṃ bhaviṣyati |
mama vākyādasaṃdigdhaṃ ye cānye kīrtitāstvayā || 14 ||
[Analyze grammar]

durmṛtyunā mṛtā ye ca saṃgrāmeṣu hatāśca ye |
ekoddiṣṭe sutairdatte teṣāṃ tṛptirbhaviṣyati || 15 ||
[Analyze grammar]

evamuktvā tato brahmā tataścādarśanaṃ gataḥ |
hiraṇyākṣo'pi saṃhṛṣṭaḥ svameva bhavanaṃ yayau || 16 ||
[Analyze grammar]

yacca śastrahatānāṃ ca tasminnahani dīyate |
ekoddiṣṭaṃ naraiḥ śrāddhaṃ tatte vakṣyāmi kāraṇam || 17 ||
[Analyze grammar]

saṃkhye śastrahatā ye ca nirvikalpena cetasā |
yudhyamānā na te martye jāyate manujāḥ punaḥ || 18 ||
[Analyze grammar]

parāṅmukhāśca hanyaṃte palāyanaparāyaṇāḥ |
te bhavaṃti narāḥ pretā etadāha pitāmahaḥ || 19 ||
[Analyze grammar]

sammukhā api ye dainyaṃ hanyamānā vadaṃti ca |
paścāttāpaṃ ca vā kuryuḥ prahārairjarjarīkṛtāḥ || 20 ||
[Analyze grammar]

te'pi pretā bhavantīha manuḥ svāyaṃbhuvo'bravīt |
kadāciccittacalanaṃ śūrāṇāmapi jāyate || 21 ||
[Analyze grammar]

teṣāṃ bhrāṃtyā dine tatra śrāddhaṃ deyaṃ nijaiḥ sutaiḥ |
apamṛtyumṛtānāṃ ca sarveṣāmapi dehinām || 22 ||
[Analyze grammar]

pretatvaṃ jāyate yasmāttasmācchrāddhasya taddinam |
śrāddhārhaṃ pārthivaśreṣṭha viśeṣeṇa prakīrtitam || 23 ||
[Analyze grammar]

ekoddiṣṭaṃ prakartavyaṃ yasmāttatra dine naraiḥ |
sapiṃḍīkaraṇādūrdhvaṃ tatte vakṣyābhi kāraṇam || 24 ||
[Analyze grammar]

yadi pretatvamāpannaḥ kadācitsvapitā bhavet |
tṛptyarthaṃ tasya kartavyaṃ śrāddhaṃ tatra dine nṛpa || 25 ||
[Analyze grammar]

pitāmahādyāstatrāhni śrāddhaṃ nārhaṃti kutracit |
atha cedbhrāṃtito dadyāddhiyate rākṣasaistu tat || 26 ||
[Analyze grammar]

brahmaṇo vacanādrājanbhūtapretaiśca dānavaiḥ |
tenaikoddiṣṭamevātra kartavyaṃ na tu pārvaṇam || 27 ||
[Analyze grammar]

pitṛpakṣe caturdaśyāṃ kanyāsaṃsthe divākare |
pitāmaho na gṛhṇāti pitrā tena samaṃ tadā || 28 ||
[Analyze grammar]

na ca tasya pitā rājaṃstathaiva prapitāmahaḥ || 29 ||
[Analyze grammar]

etasmātkāraṇādrājanpārvaṇaṃ na vidhīyate |
tasminnahani saṃprāpte vyarthaṃ śrāddhaṃ bhavedyataḥ || 30 ||
[Analyze grammar]

nānyasthānodbhavairvipraiḥ śrāddhakarmavratāni ca |
nāgaro nāgaraiḥ kuryādanyathā tadvṛthā bhavet || 31 ||
[Analyze grammar]

anyasthānodbhavairviprairyacchrāddhaṃ kriyate dhruvam |
saṃpūrṇaṃ vyarthatāṃ yāti nāgarāṇāṃ kriyāparaiḥ || 32 ||
[Analyze grammar]

athācāraparibhraṣṭāḥ śrāddhārhā eva nāgarāḥ |
valīvardasamāno'pi jñātīyo yadi labhyate |
kimanyairbahubhirviprairvedavedāṃgapāragaiḥ || 33 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye śrāddha kalpe caturdaśīśastrahataśrāddhanirṇayavarṇanaṃnāma dvāviṃśatyuttaradviśatatamo'dhyāyaḥ || 222 ||
[Analyze grammar]