Chapter 169

[English text for this chapter is available]

ṛṣaya ūcuḥ |
kasmātsā tuṣṭidā proktā nāgarāṇāṃ viśeṣataḥ |
dhārānāmeti vikhyātā kasmātsā dharaṇītale || 1 ||
[Analyze grammar]

sūta uvāca |
camatkārapure pūrvaṃ dhārānāmeti viśrutā |
āsīttapasvinī sādhvī nāgarī brāhmaṇottamā |
tasyāḥ sakhyamarundhatyā āsītpūrvaṃ sumedhayā || 2 ||
[Analyze grammar]

arundhatī yadā prāptā camatkārapure śubhe |
snānārthaṃ śaṃkhatīrthaṃ tu vasiṣṭhena samāgatā || 3 ||
[Analyze grammar]

tayā dṛṣṭātha sā tatra aṃguṣṭhāgreṇa saṃsthitā |
vāyubhakṣā nirāhārā divyena vapuṣānvitā || 4 ||
[Analyze grammar]

tayā pṛṣṭā ca sā sādhvī kā tvaṃ kasya sutā śubhe |
kimarthaṃ tu sthitā cogre tapasi brūhi me śubhe || 5 ||
[Analyze grammar]

dhārovāca |
devaśarmākhyaviprasya sutāhaṃ nāgarasya ca |
bālatve vartamānāyā vaidhavyaṃ me vyavasthitam || 6 ||
[Analyze grammar]

śaṃkhatīrthasya māhātmyaṃ śrutvā śaṃkheśvarasya ca |
tato'haṃ saṃsthitā hyatra tasyaivārādhane sthitā || 7 ||
[Analyze grammar]

arundhatyuvāca |
tavopari mahānsneho darśanātte vyavasthitaḥ |
tasmādāgaccha gacchāvo mamāśramapadaṃ śubham || 8 ||
[Analyze grammar]

sarasvatyā staṭe śubhre sarvapātakanāśane |
śāstragoṣṭhīratā nityaṃ tatra tiṣṭha mayā saha || 9 ||
[Analyze grammar]

tataḥ saṃprasthitā sā tu tayā sārdhaṃ tapasvinī |
anujñātā svapitrā tu jananyā bāṃdhavaistathā || 10 ||
[Analyze grammar]

tasyāḥ sakhyaṃ ciraṃ kālaṃ tayā saha babhūva ha |
kasyacittvatha kālasya sā śaktistatra cāgatā || 11 ||
[Analyze grammar]

viśvāmitreṇa saṃsṛṣṭā vasiṣṭhasya vadhāya ca |
sā staṃbhitā vasiṣṭhena kṛtā devīsvarūpiṇī |
saṃpūjyā devamartyānāṃ sarvarakṣāpradā śubhā || 12 ||
[Analyze grammar]

tatastu dhārayā tasyāḥ kailāsaśikharopamaḥ |
prāsādo nirmito viprā nānāratnavicitritaḥ || 13 ||
[Analyze grammar]

cakārātha tataḥ stotraṃ tasyāḥ sā ca tapasvinī || 14 ||
[Analyze grammar]

namaste parame brāhmi dhārayoge namonamaḥ |
ardhamātre pare śūnye tasyārdhārdhe namostu te |||| 15 ||
[Analyze grammar]

namaste jagadādhāre namaste bhūtadhāriṇi |
namaste padmapatrākṣi namaste kāṃcanadyute || 16 ||
[Analyze grammar]

namaste siṃhayānāḍhye namaste'stumahābhuje |
namaste devatābhīṣṭe namaste daityasūdini || 17 ||
[Analyze grammar]

namaste mahiṣākrāṃtaśarīracchinnamastake |
namaste viṃdhyanirate surāmāṃsabalipriye || 18 ||
[Analyze grammar]

tvaṃ lakṣmīstvaṃ śacī gaurī tvaṃ siddhistvaṃ vibhāvarī |
tvaṃ svāhā tvaṃ svadhā tuṣṭistvaṃ puṣṭistvaṃ sureśvarī || 19 ||
[Analyze grammar]

śaktirūpāsi devi tvaṃ sṛṣṭisaṃhārakā riṇī |
tvayi dṛṣṭamidaṃ sarvaṃ trailokyaṃ sacarācaram || 20 ||
[Analyze grammar]

yathā tilesthitaṃ tailaṃ dadhisaṃsthaṃ yathā ghṛtam |
havirbhujaśca kāṣṭhasthaḥ suguptaṃ labhyate na hi || 21 ||
[Analyze grammar]

tathā tvamapi deveśi sarvagāpi na lakṣyase || 22 ||
[Analyze grammar]

sūta uvāca |
etena stotramukhyena smṛtā sā parameśvarī |
bahūni varṣa pūgāni pūjayaṃtyā dinedine || 23 ||
[Analyze grammar]

kasyacittvatha kālasya caitraśuklāṣṭamī sitā |
tasminnahani devī sā nadyāṃ saṃsnāpya pūjitā || 24 ||
[Analyze grammar]

bali pūjāṃ tato dattvā stotreṇānena ca stutā |
tataḥ pratyakṣatāṃ gatvā tāmuvāca tapasvinīm || 25 ||
[Analyze grammar]

putri tuṣṭāsmi bhadraṃ te stotreṇānena cānaghe |
varaṃ varaya bhadraṃ te tava dāsyāmi vāṃchitam || 26 ||
[Analyze grammar]

dhārovāca |
yadi tuṣṭāsi me devi yadi deyo varo mama |
tanme nāma tavāpyastu prāsāde'tra hi kevalam || 27 ||
[Analyze grammar]

aparaṃ nāgaro yo'tra tvasminnahani saṃsthite |
pradakṣiṇātrayaṃ kṛtvā tava dattvā phalatrayam || 28 ||
[Analyze grammar]

stotreṇānena bhavatīṃ stutvā ca kurute natim |
tasya saṃvatsaraṃ yāvadrogo rakṣyastvayā'khilaḥ || 29 ||
[Analyze grammar]

yā ca vaṃdhyā bhavennārī sā bhūyātputrasaṃyutā |
durbhagā ca sasaubhāgyā kurūpā rūpasaṃbhavā |
rogiṇī roganirmuktā sarvasaukhyasamanvitā || 30 ||
[Analyze grammar]

devyuvāca |
ahaṃ dhāreti vikhyātā prāsāde'tra tvayā kṛte |
bhaviṣyāmi na sandehastava kīrtikṛte sadā || 31 ||
[Analyze grammar]

atra yo nāgaro bhaktyā samāgatya tapasvini |
pradakṣiṇātrayaṃ kuryāddattvā mama phalatrayam || 32 ||
[Analyze grammar]

so'pi saṃvatsaraṃ yāvadbhavitā rogavarjitaḥ |
evamuktā tu sā devītataścādarśanaṃ gatā || 33 ||
[Analyze grammar]

dhārāpi saṃsthitā tatra arundhatyā samanvitā |
adyāpi dṛśyate vyomni tasyāścāpi samīpagā || 34 ||
[Analyze grammar]

etaddhārodbhavaṃ yo'tra vṛttāṃtaṃ kīrtayiṣyati |
śṛṇuyādvā dvijaśreṣṭhā mucyetpāpāddinodbhavāt || 35 ||
[Analyze grammar]

tasmātsarvaprayatnena paṭhanīyaṃ viśeṣataḥ |
śrotavyaṃ ca prabhaktyedaṃ nāgaraiśca viśeṣataḥ || 36 ||
[Analyze grammar]

iti śrīskāṃde mahāpurāṇa ekāśīti sāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye dhārānāmotpattivṛttāṃta dhārādevīmāhātmyavarṇanaṃ nāmaikonasaptatyuttaraśatatamo'dhyāyaḥ || 169 ||
[Analyze grammar]