Chapter 133

[English text for this chapter is available]

sūta uvāca |
tathā'nyāpi ca tatrāsti devatā dvijasattamāḥ |
ajāgṛheti vikhyātā sarvarogakṣayāvahā || 1 ||
[Analyze grammar]

ajāpālo yadā rājā sarvalokahite rataḥ |
ajārūpāḥ prayāṃti sma vyādhayaḥ sakalā dvijāḥ |
tadā rātrau samānīya tasminsthāne dadhāti saḥ || 2 ||
[Analyze grammar]

tatastadāśrayātsthānamajāgṛhamiti smṛtam |
sarvairjanairdharā pṛṣṭhedarśanādvyādhināśanam || 3 ||
[Analyze grammar]

tatraiśvaryamabhūtpūrvaṃ yattadbrāhmaṇasattamāḥ |
ahaṃ vaḥ kīrtayiṣyāmi śrotavyaṃ susamāhitaiḥ || 4 ||
[Analyze grammar]

tatrāgato dvijaḥ kaścitkṣetre tāpasarūpadhṛk |
tīrthayātrāprasaṃgena rātrau prāptaḥ śramānvitaḥ || 5 ||
[Analyze grammar]

ajāvṛṃdamathālokya niviṣṭaṃ susukhānvitam |
romaṃtha karmasaṃyuktaṃ viśvastamakutobhayam || 6 ||
[Analyze grammar]

sa jñātvā mānuṣeṇātra bhavitavyamasaṃśayam |
na śūnyāḥ paśavo rātrau sthāsyaṃti vijane vane || 7 ||
[Analyze grammar]

tataḥ phūtkṛtya phūkṛtya divaṃ yāvanna saṃdadhe |
kaścidvācaṃ prasuptaśca tāvattatraiva ciṃtayan || 8 ||
[Analyze grammar]

avaśyaṃ mānuṣeṇātra paśūnāṃ rakṣaṇāya ca |
āgaṃtavyaṃ kuto'pyāśu tasmāttiṣṭhāmi nirbhayaḥ || 9 ||
[Analyze grammar]

evaṃ tasya prasuptasya gatā sā rajanī tataḥ |
tatastvaritavattasya suśrāṃtasya dvijottamāḥ || 10 ||
[Analyze grammar]

atha yāvatprabhāte sa prapaśyati nijāṃ tanum |
tāvatkuṣṭhādibhī rogaiḥ samaṃtātparivāritām || 11 ||
[Analyze grammar]

aśaktaścalituṃ sthānādapi caikaṃ padaṃ kvacit |
tejo hīno'pi raudreṇa cintayāmāsa vai tataḥ || 12 ||
[Analyze grammar]

kimidaṃ kāraṇaṃ yena mamaiṣā saṃsthitā tanuḥ |
akasmādeva rogo'yaṃ calituṃ naiva ca kṣamaḥ || 13 ||
[Analyze grammar]

evaṃ cintayamānasya tasya viprasya tatkṣaṇāt |
dvādaśārkapratīkāśaḥ puruṣaḥ samupāgataḥ || 14 ||
[Analyze grammar]

taṃ yūthaṃ kālayāmāsa tataḥ saṃjñābhirāhvayan |
pṛthaktvena samādāya yaṣṭiṃ savyena pāṇinā || 15 ||
[Analyze grammar]

athāpaśyatsa taṃ vipraṃ vyādhibhiḥ sarvato vṛtam |
aśaktaṃ calituṃ kvāpi tataḥ provāca sādaram || 16 ||
[Analyze grammar]

kastvamevaṃvidhaḥ prāptaḥ sthāne cātra dvijottama |
nāsti rājye mama vyādhiḥ kasyacitkutracitsphuṭam || 17 ||
[Analyze grammar]

ajonāma narendro'haṃ yadi te śrotramāgataḥ |
vyādhīṃśca cchāgarūpeṇa rakṣāmi janakāraṇāt || 18 ||
[Analyze grammar]

tasmādbrūhi śarīrastho yaste vyādhirvyavasthitaḥ |
yenā'haṃ nigrahaṃ tasya karomi dvijasattama || 19 ||
[Analyze grammar]

brāhmaṇa uvāca |
tīrthayātrāparo'haṃ ca bhramāmi kṣitimaṃḍale |
krameṇā'tra samāyātaḥ kṣetre'sminhāṭakeśvare || 20 ||
[Analyze grammar]

niśāvaktre nṛpaśreṣṭha vāsaḥ saṃciṃtito mayā |
dṛṣṭvā'mūṃśca paśūnbhūpa mānuṣaṃ bhāvyameva hi || 21 ||
[Analyze grammar]

tataścātra prasupto'haṃ paśūnāmaṃtike nṛpa || 22 ||
[Analyze grammar]

atha yāvatprabhāte'haṃ prapaśyāmi nijāṃ tanum |
tāvatkuṣṭhādirogaiśca samaṃtātparivāritām || 23 ||
[Analyze grammar]

nānyatkiṃcinnṛpaśreṣṭha kāraṇaṃ vedmi tattvataḥ |
kimetena nṛpaśreṣṭha bhūyobhūyaḥ prajalpatā |
bahutvātkuru tasmānme yathā syānnīrujā tanuḥ || 24 ||
[Analyze grammar]

tataste vyādhayaḥ proktā ajāpālena bhūbhujā |
kenājñā khaṃḍitā me'dya ko vadhyaḥ sāṃprataṃ mama || 25 ||
[Analyze grammar]

vyādhaya ūcuḥ |
mā kopaṃ kuru bhūpāla kṛtye'smiṃstvaṃ kathaṃcana |
yasmādeṣa dvijo viṣṭaḥ sāṃprataṃ vyādhibhistribhiḥ || 26 ||
[Analyze grammar]

rājayakṣmā ca kuṣṭhaṃ ca pāmā ca dvijasattama |
ete saṃsargajā doṣāstrayo'dyāpi prakīrtitāḥ || 27 ||
[Analyze grammar]

eteṣāṃ prathamau yau dvau nivṛttirahitau smṛtau |
auṣadhaiścaiva maṃtraiśca śeṣā nāśaṃ vrajaṃti ca || 28 ||
[Analyze grammar]

ābhyāṃ ca brahmaśāposti yena nāsti nivartanam |
tasmādatra nṛpaśreṣṭha kuru yatte kṣamaṃ bhavet || 29 ||
[Analyze grammar]

etena brāhmaṇenaite spṛṣṭā rājaṃstrayopi ca |
tasmāttāvattanuṃ cāsyāviśatāṃ tāvasaṃśayam || 30 ||
[Analyze grammar]

aparaṃ śṛṇu bhūpāla vacanaṃ no mukhāccyutam |
hitāya sarvajaṃtūnāṃ tava śreyovivṛddhaye || 3 ||
[Analyze grammar]

yatra sthānaṃ ciraṃ tatra medinyāṃ vihitaṃ nṛpa |
purīṣaṃ ca samāviddhā tenaiṣā medinī drutam || 32 ||
[Analyze grammar]

kālāṃtarepi ye martyā bhūmyāmasyāṃ samāgatāḥ |
bhūmeḥ sparśaṃ kariṣyaṃti te bhaviṣyaṃti cedṛśāḥ || 33 ||
[Analyze grammar]

vayaṃ śeṣā mahārāja vyādhayo ye vyavasthitāḥ |
tvayā muktvā bhaviṣyāmo mantrauṣadhavaśānugāḥ || 34 ||
[Analyze grammar]

naitau punastu durgrāhyau brahmaśāpa samudbhavau || 35 ||
[Analyze grammar]

tacchrutvā pārthivaḥ so'pi tasminsthāne vyavasthitaḥ |
taṃ brāhmaṇaṃ punaḥ prāha na bhetavyaṃ tvayā dvija || 36 ||
[Analyze grammar]

ahaṃ tvāṃ rakṣayiṣyāmi vyādherasmātsudāruṇāt |
atra tasmātpratīkṣasva kañcitkālaṃ mamājñayā || 37 ||
[Analyze grammar]

evamuktvā tataścakre tadarthaṃ sumahattapaḥ |
ārādhayanprabhaktyā ca samyaktāṃ kṣetradevatām || 38 ||
[Analyze grammar]

muṃḍenātharvaśīrṣeṇa divārātramataṃdritaḥ |
kṣetrapālotthasūktena vāstusūktena ca dvijāḥ || 39 ||
[Analyze grammar]

siddhārthai raktapuṣpaiśca guggulena sudhūpitaiḥ |
homaṃ kurvannṛpaḥ paścānnīlarudrānviśeṣataḥ || 4 ||
[Analyze grammar]

atha naktāvasānena tasya homasya cotthitā |
bhittvā dharātalaṃ devī mantrākṛṣṭā vinirgatā || 41 ||
[Analyze grammar]

devatā tasya kṣetrasya tataḥ provāca taṃ nṛpam || 42 ||
[Analyze grammar]

ekāhaṃ tava bhūpāla homasyāsya prabhāvataḥ |
vinirgatā dharāpṛṣṭhātkṣetrasyāsyādhipā smṛtā || 43 ||
[Analyze grammar]

tasmādvada mahābhāga yatte kṛtyaṃ karomyaham |
parāṃ tuṣṭimanuprāptā tasmādbrūhi yadīpsitam || 44 ||
[Analyze grammar]

rājovāca |
atra sthāne sadā stheyaṃ tvayā devi viśeṣataḥ |
vyādhisaṃsargajo doṣo bhūmerasyā yathā vrajet || 45 ||
[Analyze grammar]

adyaprabhṛti deveśi tathā nītirvidhīyatām |
no cedasyāḥ prasaṃgena prabhaviṣyaṃti mānavāḥ || 46 ||
[Analyze grammar]

vyādhigrastā yathā vipro yo'yaṃ saṃdṛśyate puraḥ |
mayātra vyādhayaḥ kālaṃ ciraṃ saṃsthāpitā yataḥ |
bhaviṣyati ca me doṣo no ceddevi na saṃśayaḥ || 47 ||
[Analyze grammar]

tathāyaṃ brāhmaṇo rogāttvatprasādātsureśvari |
mukto bhavatu medinyāmatra stheyaṃ sadā tvayā || 48 ||
[Analyze grammar]

kṣetradevatovāca |
etatsthānaṃ mayā sarvaṃ vyādhidoṣavivarjitam |
vihitaṃ sarvadaivātra sthāsye'hamiha sarvadā || 49 ||
[Analyze grammar]

sāṃprataṃ yo'tra me sthāne vyādhigrastaḥ sameṣyati |
pūjayiṣyati māṃ bhaktyā nīrogaḥ sa bhaviṣyati || 50 ||
[Analyze grammar]

tasmādadya dvijeṃdro'yaṃ māṃ pūjayatu sādaram |
bhaktyā paramayā yuktaḥ śucirbhūtvā samāhitaḥ || 51 ||
[Analyze grammar]

atra kṣetre parā'nyāsti vikhyātā caṃdrakūpikā ||
tasyāṃ snātu yathānyāyaṃ nityameva mahīpate || 52 ||
[Analyze grammar]

dakṣaśāpapraśaptena yā caṃdreṇa purā kṛtā |
svasnānārthaṃ kṣayavyādhipragrastena mahātmanā || 53 ||
[Analyze grammar]

tathā khaṇḍaśilānāma devatā cātra tiṣṭhati |
saubhāgyakūpikāsnānaṃ kṛtvā tāṃ ca prapaśyatu || 54 ||
[Analyze grammar]

yā kṛtā kāmadevena kuṣṭhagrastena vai purā |
snapanārthaṃ ca kuṣṭhasya vināśāya ca sādaram || 55 ||
[Analyze grammar]

tathā cāpsarasāṃ kuṇḍamatrāsti nṛpasattama |
tatra snātvā raverahni tataḥ pāmā praśāmyati || 96 ||
[Analyze grammar]

sūta uvāca |
tataḥ sa brāhmaṇaḥ prāpya supuṇyāṃ candrakūpikām |
snānaṃ kṛtvā ca tāṃ devīṃ pūjayāmāsa bhaktitaḥ |
yāvanmāsaṃ tato muktaḥ satvaraṃ rājayakṣmaṇā || 57 ||
[Analyze grammar]

tataḥ saubhāgyakūpīṃ tāṃ dṛṣṭvā kāmavinirmitām |
tathā snānaṃ vidhāyātha paśyankhaṃḍaśilāṃ ca tām || 58 ||
[Analyze grammar]

tadvanmāsena nirmuktaḥ kuṣṭhena dvijasattamāḥ |
tasyā devyāḥ prabhāvena kūpikāyāṃ viśeṣataḥ || 59 ||
[Analyze grammar]

tataścāpsarasāṃ kuṃḍe snātvaikaṃ ravivāsaram |
pāmayā saṃparityakto buddhyeva viṣayātmakaḥ || 60 ||
[Analyze grammar]

tataḥ sa brāhmaṇo jāto dvādaśārkasamaprabhaḥ |
toṣeṇa mahatā yukto dattāśīstasya bhūpateḥ || 61 ||
[Analyze grammar]

prayayau vāṃchitaṃ deśamanujñātaśca bhūbhujā |
devatāyāṃ praṇāmaṃ ca tābhyāṃ kṛtvā punaḥpunaḥ || 62 ||
[Analyze grammar]

sopi rājā sadoṣāṃstānajārūpānvilokya ca |
svasyaiva brāhmaṇaṃ dṛṣṭvā taṃ tathā saṃpraharṣitaḥ || 63 ||
[Analyze grammar]

svayaṃ ca prayayau tatra yatrastho hāṭakeśvaraḥ |
tenaiva ca śarīreṇa nijakāṃtāsamanvitaḥ || 64 ||
[Analyze grammar]

ajāgṛhe sthitā yasmātsā devī kṣetradevatā |
ajāgṛhā tataḥ khyātā sarvatraiva dvijottamāḥ || 65 ||
[Analyze grammar]

adyāpi yakṣmaṇā grasto yastāṃ pūjayate naraḥ |
tainaiva vidhinā samyaksa nīrogo drutaṃ bhavet || 66 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye'jāgṛhotpattimāhātmyavarṇanaṃnāma trayastriṃśaduttaraśatatamo'dhyāyaḥ || 133 ||
[Analyze grammar]