Chapter 134

[English text for this chapter is available]

ṛṣaya ūcuḥ |
yadā dakṣeṇa kruddhena purā śapto himadyutiḥ |
tatsarvaṃ bhavatā proktaṃ somanāthakathānakam || 1 ||
[Analyze grammar]

sāṃprataṃ vada kāmasya yathā kuṣṭho'bhavatpurā |
yena doṣeṇa śāpaśca kena tasya niyojitaḥ || 2 ||
[Analyze grammar]

śilākhaṃḍā ca yā devī tathā saubhāgyakūpikā |
yathā tatra samutpannā tathā'smākaṃ prakīrtaya || 3 ||
[Analyze grammar]

sūta uvāca |
purāsīdbrāhmaṇo nāma hārīta iti viśrutaḥ |
sa tapastatra saṃtepe vānaprasthāśrame vasan || 4 ||
[Analyze grammar]

tasya bhāryā'bhavatsādhvī rūpaudāryasamanvitā |
trailokyasundarī sākṣāllakṣmīriva madhudviṣaḥ || 5 ||
[Analyze grammar]

khyātā pūṇakalānāma sarvaiḥ samuditāguṇaiḥ |
tāṃ dṛṣṭvā padmajo'pyāśu kāmasya vaśago'bhavat || 6 ||
[Analyze grammar]

kadācidapi sa prāptastasminkṣetre manobhavaḥ |
saha ratyā tathā prītyā kāmeśvaradidṛkṣayā || 7 ||
[Analyze grammar]

etasminnaṃtare sāpi snānārthaṃ tatra cāgatā |
kṛtvā vastraparityāgaṃ viveśa jalāśayam || 8 ||
[Analyze grammar]

atha tāṃ kāmadevopi samālokya śubhānanām |
ātmīyairapi nirviddho hṛdaye puṣpasāyakaiḥ || 9 ||
[Analyze grammar]

tato ratiṃ parityaktvā prītiṃ ca śarapīḍitaḥ |
vijanaṃ kaṃcidāsādya prasuptaḥ sa taroradhaḥ || 10 ||
[Analyze grammar]

gātraiḥ pulakitaiḥ sarvairniḥśvāsānniḥśvasanmuhuḥ |
agnivarṇānsudīrghāṃśca bāṣpa pūrṇavilocanaḥ || 11 ||
[Analyze grammar]

tiṣṭhansa darśane tasyā ekadṛṣṭyā vyalokayat |
yogīva susamādhistho dhyāyaṃstadbrahma saṃsthitam || 12 ||
[Analyze grammar]

sāpi kāmaṃ samālokya sānurāgaṃ puraḥ sthitam |
jṛṃbhābhaṃgakṛtāsyaṃ ca vepamānaśarīrakam || 13 ||
[Analyze grammar]

sāpi tadbāṇanirbhinnā sābhilāṣā babhūva ha |
kāmaṃ prati viśeṣeṇa tasya rūpeṇa mohitā || 14 ||
[Analyze grammar]

atha tasmājjalātkṛcchrādviniṣkramya śucismitā |
tīropāṃtaṃ samāsādya sthitā taddṛṣṭigocare || 15 ||
[Analyze grammar]

tataḥ kāmaḥ samutthāya śanaistadaṃtikaṃ yayau |
kṛtāṃjalipuṭo bhūtvā tataḥ provāca sādaram || 16 ||
[Analyze grammar]

kā tvamatra viśālākṣi prāptā snātuṃ jalāśaye |
mama nāśāya cārvaṃgi tasmācchṛṇu vaco mama || 17 ||
[Analyze grammar]

ahaṃ puṣpaśaro loke prasiddhaścāruhāsini |
viḍaṃbanāṃ mayā nītā devā api nijaiḥ śaraiḥ || 18 ||
[Analyze grammar]

madbāṇenāhato rudraḥ svaśarīre nitaṃbinīm |
arddhena dhārayāmāsa tyaktvā lajjāṃ sudūrataḥ || 19 ||
[Analyze grammar]

brahmā maccharanirbhinnaḥ svasutāṃ cakame tataḥ |
janayāmāsa tānviprānvālakhilyāṃstathāvidhān || 20 ||
[Analyze grammar]

ahilyāṃ cakame śakro gautamasya priyāṃ satīm |
madbāṇaiḥ pīḍito'tīva svargādetya dharātalam || 21 ||
[Analyze grammar]

evaṃ devā api kṣuṇṇā maccharairye mahattarāḥ |
kiṃ punarmānavāḥ subhrūḥ kṛmiprāyāḥ sucaṃcalāḥ || 22 ||
[Analyze grammar]

ākīṭāṃtaṃ jagatsarvamābrahmāṃtaṃ tathaiva ca |
viḍaṃbanāṃ parāṃ prāptaṃ maccharaiścāruhāsini || 23 ||
[Analyze grammar]

ahaṃ punastvayā bhīru nīto'vasthāmimāṃ śubhe || 24 ||
[Analyze grammar]

tasmāddehi mahābhāge mamādya ratadakṣiṇām |
yāvanna yāṃti saṃtyajya mama prāṇāḥ kalevarāt || 25 ||
[Analyze grammar]

sūta uvāca |
sāpi tadvacanaṃ śrutvā pativrataparāyaṇā |
hanyamānā viśeṣeṇa tadbāṇairhṛdaye bhṛśam || 26 ||
[Analyze grammar]

anabhijñā ca sā sādhvī kāmadharmasya kevalam |
tāpasaiḥ saha saṃvṛddhā nānyaṃ jānāti kiṃcana || 27 ||
[Analyze grammar]

vaktuṃ tadviṣaye yacca procyate kāmapīḍitaiḥ |
adhomukhā'likhadbhūmimaṃguṣṭhena sthitā ciram || 28 ||
[Analyze grammar]

etasminnantare bhānuḥ prāptaścāstaṃ giriṃ prati |
vihārasamaye prāpta āhitāgnirniveśane || 29 ||
[Analyze grammar]

hārīto'pi ciraṃ vīkṣya tanmārgaṃ cākṛtāśanaḥ |
tataḥ sa ciṃtayāmāsa kasmātsā cātra nāgatā || 30 ||
[Analyze grammar]

snātvā tīrthavare tasmindṛṣṭvā tāṃ candrakūpikām |
kāmeśvaraṃ ca deveśaṃ kāmadaṃ sukhadaṃ nṛṇām || 31 ||
[Analyze grammar]

tataḥ śiṣyasamāyukto vīkṣamāṇa itastataḥ |
taṃ deśaṃ samanuprāpto yatra tau dvāvapi sthitau || 32 ||
[Analyze grammar]

ālapanbahudhā kāmo hanyamāno nijaiḥ śaraiḥ |
sāpi caiva viśeṣeṇa vrīḍayā'dhomukhī sthitā || 33 ||
[Analyze grammar]

sa gulmāṃtaritaḥ sarvaṃ tacchrutvā kāmajalpitam |
tasyāśca tadgataṃ bhāvaṃ tataḥ kopāduvāca saḥ || 34 ||
[Analyze grammar]

yasmātpāpa tvayā patnī mamaivaṃ śarapīḍitā |
anabhijñā tathā sādhvī patidharmaparāyaṇā |
kuṣṭhavyādhisamāyuktastasmādvipriyadarśanaḥ || 35 ||
[Analyze grammar]

tvaṃ bhaviṣyasi pāpātmanmukto dāraiḥ svakairapi |
sā'pi caiva viśeṣeṇa vrīḍayā'dhomukhī sthitā || 36 ||
[Analyze grammar]

eṣāpi ca śilāprāyā bhaviṣyati vicetanā |
tvāṃ dṛṣṭvā yā sarāgā'bhūnnijadharmabahiṣkṛtā || 37 ||
[Analyze grammar]

tataḥ prasādayāmāsa taṃ kāmaḥ praṇipatya ca |
na jñāteyaṃ mayā vipra tava bhāryeti sundarī || 38 ||
[Analyze grammar]

tena proktā viruddhāni vākyāni vividhāni ca |
etasyā nāsti doṣo'tra madbāṇaiḥ pīḍitā bhṛśam || 39 ||
[Analyze grammar]

sānurāgā paraṃ jātā noktaṃ kiṃcidvaco mune |
tasmānnārhasi śāpaṃ tvaṃ dātumasyāḥ kathaṃcana || 40 ||
[Analyze grammar]

mamāstyeṣo 'parādho'tra tasmānme nigrahaṃ kuru |
bhūyo'pi brāhmaṇaśreṣṭha asyāḥ śāpasamudbhavam || 41 ||
[Analyze grammar]

api rudrādayo devā madbāṇebhyo dvijottama |
soḍhuṃ śaktā na te yasmāttatkathaṃ syādiyaṃ śilā || 42 ||
[Analyze grammar]

tathātra trividhaṃ pāpaṃ pravadaṃti manīṣiṇaḥ |
mānasaṃ vācikaṃ caiva karmajaṃ ca tṛtīyakam |
tadasmākaṃ dvidhā jātamekaṃ cāsyā munīśvara || 43 ||
[Analyze grammar]

bhāryāyāste surūpāyāstasmātsaṃpūrṇanigraham |
kariṣyasi na te bhītiḥ kācidasti paratrajā || 44 ||
[Analyze grammar]

manastāpādvrajetpāpaṃ mānasaṃ vācikaṃ ca yat |
tasya prasādanenaiva yasyopari vijalpitam || 45 ||
[Analyze grammar]

prāyaścittairyathoktaiśca karmajaṃ pātakaṃ vrajet |
dharmaśāstraiḥ pariproktaṃ yataḥ sarvairmahāmune || 46 ||
[Analyze grammar]

hārīta uvāca |
anyatra viṣaye tasyāḥ pātakaṃ kāmadevate |
etasya tava dharmasya prādhānyaṃ manasaḥ smṛtam || 47 ||
[Analyze grammar]

tasmādevaṃvidhā ceyaṃ sadā sthāsyati cādhama |
kiṃ punaḥ kuru yatkṛtyaṃ nāhaṃ vakṣyāmi kiṃcana || 48 ||
[Analyze grammar]

prathamaṃ manasā sarvaṃ ciṃtyate tadanaṃtaram |
tataḥ prajalpate vācā kriyate karmaṇā tataḥ || 49 ||
[Analyze grammar]

pramāṇaṃ hi manastasmātsarvakṛtyeṣu sarvadā |
etasmātkāraṇātpūrṇo mayā'syā nigrahaḥ kṛtaḥ || 50 ||
[Analyze grammar]

sūta uvāca |
evamuktvā muniśreṣṭho hārītaḥ svāśramaṃ yayau |
sāpi pūrṇakalā jātā śilārūpā ca tatkṣaṇāt || 51 ||
[Analyze grammar]

kāmadevo'pi kuṣṭhena grasto raudreṇa ca dvijāḥ |
śīrṇanāsāṃghripāṇiśca netrāṇāmapriyo'bhavat || 52 ||
[Analyze grammar]

atha kāme nirutsāhe saṃjāte dvijasattamāḥ |
vyādhigraste jagatyasminsṛṣṭirodho vyajāyata || 53 ||
[Analyze grammar]

kevalaṃ kṣīyate loko naiva vṛddhiṃ pragacchati |
svedajā ye'pi jīvāḥ syustepi yātāḥ parikṣayam || 54 ||
[Analyze grammar]

etasminnaṃtare devāḥ sarve ciṃtāsamākulāḥ |
kimidaṃ kṣīyate loko jalasthaiḥ sthalajaiḥ saha || 55 ||
[Analyze grammar]

na dṛśyate kvacidbālaḥ ko'pi kaścitkathaṃcana |
na ca garbhavatī nārī kaccitkṣemaṃ smarasya ca || 56 ||
[Analyze grammar]

tatastaṃ vyādhinā grastaṃ jñātvātra kṣetrasaṃśrayam |
ājagmustvaritāḥ sarve vyākulenāṃtarātmanā || 57 ||
[Analyze grammar]

kāmeśvarapurasthaṃ ca taṃ dṛṣṭvā kusumāyudham |
atyaṃtavikṛtākāraṃ ciṃtayānaṃ maheśvaram || 58 ||
[Analyze grammar]

tataḥ procuḥ suduḥkhārtāḥ kimidaṃ kusumāyudha |
nirutsāhaḥ samutpannaḥ kuṣṭhavyādhisamākulaḥ || 59 ||
[Analyze grammar]

tataścādhomukho jāto lajjayā parayā vṛtaḥ |
provāca śāpajaṃ sarvaṃ hārītasya viceṣṭitam || 60 ||
[Analyze grammar]

tataste vibudhāḥ procuḥ pātakaṃ yadgirā kṛtam || 3 ||
[Analyze grammar]

tattasyārādhanātsarvaṃ saṃkṣayaṃ yātyasaṃśayam || 61 ||
[Analyze grammar]

tasmādetāṃ śilārūpāṃ tvamārādhaya cittaja |
yena kuṣṭhaḥ kṣayaṃ yāti tatastejo'bhivardhate || 62 ||
[Analyze grammar]

jagati syānmahāsṛṣṭirdevakṛtyaṃ kṛtaṃ bhavet |
na te'sti kāyajaṃ pāpaṃ yato muktvā pravācikam || 63 ||
[Analyze grammar]

atra kuṇḍe tvadīye'nyo yaḥ snātvā śraddhayānvitaḥ |
enāṃ pāpavinirmuktāṃ śilāṃ vai mānavaḥ spṛśet || 64 ||
[Analyze grammar]

kuṣṭhavyādhisamopetaḥ kāyotthenāpi karmaṇā |
so'pi vyādhivinirmukto bhaviṣyati gatajvaraḥ || 65 ||
[Analyze grammar]

etatsaubhāgyakūpaṃ ca loke khyātaṃ jalāśayam |
bhaviṣyati na saṃdehaḥ sarvarogakṣayāvaham || 66 ||
[Analyze grammar]

dadrūṇi durvibhūtāni tathānyāśca vicarcikāḥ |
atra snātasya yāsyaṃti dṛṣṭvaitāṃ sadya eva hi || 67 ||
[Analyze grammar]

evamuktvātha te devāḥ prajagmustridaśālayam |
kāmadevo'pi tatrasthastasyāḥ pūjāmatha vyadhāt || 68 ||
[Analyze grammar]

tataśca samatikrāṃte māsamātre dvijottamāḥ |
tādṛgrūpaḥ sa saṃjāto yādṛgāsītpurā smaraḥ || 69 ||
[Analyze grammar]

tataścāyatanaṃ tasyāḥ kṛtvā śraddhāsamanvitaḥ |
jagāma vāṃchitaṃ deśaṃ sṛṣṭyarthaṃ yatnamāsthitaḥ || 70 ||
[Analyze grammar]

sāpi namramukhī tādṛktena śaptā tathaiva ca |
saṃjātā khaṇḍakākārā tena khaṇḍaśilā smṛtā || 71 ||
[Analyze grammar]

yastāṃ pūjayate bhaktyā trayodaśyāṃ tathaiva ca |
nāpavādo bhavettasya paradārasamudbhavaḥ || 72 ||
[Analyze grammar]

kāminyāśca viśeṣeṇa prāhaitacchaṃkarātmajaḥ |
kārtikeyo dvijaśreṣṭhāḥ satyametanmayoditam || 73 ||
[Analyze grammar]

tathā kāmeśvaraṃ devaṃ kāmadevapratiṣṭhitam |
trayodaśyāṃ samārādhya sarvānkāmānavāpnuyāt || 74 ||
[Analyze grammar]

ratiprītisamāyuktaḥ sthitastatra smarastathā |
mūrto brāhmaṇaśārdūlāḥ śreṣṭhaṃ prāsādamāśritaḥ || 75 ||
[Analyze grammar]

virūpo durbhago yo vā trayodaśyāṃ samāhitaḥ |
yastaṃ kuṃkumajaiḥ puṣpaiḥ saṃpūjayati mānavaḥ || 76 ||
[Analyze grammar]

sa saubhāgyasamāyukto rūpavāṃśca prajāyate |
yā nārī patinā tyaktā sapatnījanasaṃvṛtā || 77 ||
[Analyze grammar]

taṃ devaṃ sukalatrāḍhyaṃ tathaiva paripūjayet |
trayodaśyāṃ dvijaśreṣṭhāḥ kesaraiḥ kuṃkumodbhavaiḥ || 78 ||
[Analyze grammar]

sā saubhāgyavatī viprā jāyate ca prajāvatī |
dhanadhānyasamṛddhā ca duḥkhaśokavivarjitā |
doṣaiḥ sarvairvinirmuktā śaṃsitā dharaṇītale || 79 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe śrīhāṭakeśvarakṣetramāhātmye khaṃḍaśilāsaubhāgyakūpikotpattimāhātmyavarṇanaṃ nāma catustriṃśaduttaraśatatamodhyāyaḥ || 134 ||
[Analyze grammar]