Chapter 129

[English text for this chapter is available]

sūta uvāca |
tathānyo'pi ca tatrāsti yājñavalkyasamudravaḥ |
āśramo loka vikhyāto mūrkhāṇāmapi siddhidaḥ || 1 ||
[Analyze grammar]

yatra taptvā tapastīvraṃ yājñavalkyena dhīmatā |
saṃprāptā nikhilā vedā guruṇā'pahṛtāśca ye || 2 ||
[Analyze grammar]

ṛṣaya ūcuḥ |
ko'sau gururabhūttasya yājñavalkyasya dhīmataḥ |
pāṭhayitvā punaryena hṛtā vedā mahātmanā || 3 ||
[Analyze grammar]

kimarthaṃ ca samācakṣva sūtaputrātra vistarāt |
kautukaṃ paramaṃ jātaṃ sarveṣāṃ no dvijanmanām || 4 ||
[Analyze grammar]

sūta uvāca |
āsīdbrāhmaṇaśārdūlaḥ śākalya iti viśrutaḥ |
bhārgavānvayasaṃbhūto veda vedāṃgapāragaḥ || 5 ||
[Analyze grammar]

bṛhatkalpe purā viprā vardhamāne purottame |
bahuśiṣyasamāyukto vedādhyayanatatparaḥ || 6 ||
[Analyze grammar]

sa sadā prātarutthāya vidyādānaṃ prayacchati |
śiṣyebhyaścānurūpebhyaḥ prasādādvijasattamāḥ || 7 ||
[Analyze grammar]

cakāra sa tadā viprāḥ paurohityaṃ mahīpateḥ |
sūryavaṃśaprasūtasya supriyasya mahātmanaḥ || 8 ||
[Analyze grammar]

sa tasya dharmakṛtyāni sarvāṇyeva dinedine |
kṛtvā svagṛhamabhyeti pūjitastena bhūbhujā || 9 ||
[Analyze grammar]

ekaṃ śiṣyaṃ samāropya śāṃtyarthaṃ tasya bhūpateḥ |
kathayitvā pramāṇaṃ ca vidhānaṃ homasaṃbhavam || 10 ||
[Analyze grammar]

śiṣyo'pi sakalaṃ kṛtvā tatkarma susamāhitaḥ |
āśīrvādaṃ pradattvā ca bhūpatergṛhameti ca || 11 ||
[Analyze grammar]

evaṃ prakurvatastasya śākalyasya mahātmanaḥ |
paurohityaṃ gataḥ kālaḥ kiyanmātro dvijottamāḥ || 12 ||
[Analyze grammar]

tadā vaivāhike kāle śapto yaḥ śaṃbhunā svayam |
suniṃdyāṃ vikṛtiṃ dṛṣṭvā tasya vedyāṃ gatasya ca || 13 ||
[Analyze grammar]

atha taṃ yojayāmāsa śāṃtyarthaṃ nṛpamaṃdire |
yājñavalkyaṃ sa śākalyaḥ pratipadyāgataṃ tadā || 14 ||
[Analyze grammar]

so'pi tāruṇyagarveṇa veśyākarajavikṣataḥ |
sarvāṃgeṣu sunirlajjaḥ prakaṭāṃgo jagāma vai || 15 ||
[Analyze grammar]

tataśca śāṃtikaṃ kṛtvā japāṃte bhūpatiṃ ca tam |
śāṃtodakapradānāya hasyamāno janairyayau || 16 ||
[Analyze grammar]

pārthivo'pi ca taṃ dṛṣṭvā tādṛgrūpaṃ viṭaṃ dvijam |
nāśīrjagrāha tenoktāṃ vākyametaduvāca ha || 17 ||
[Analyze grammar]

ucchiṣṭo'haṃ dvijaśreṣṭha śayyārūḍho vyavasthitaḥ |
atra śālodbhave staṃbhe tasmādetajjalaṃ kṣipa || 18 ||
[Analyze grammar]

so'pi sāvajñamājñāya taṃ bhūpaṃ kupitānanaḥ |
taṃ ca staṃbhaṃ samuddiśya dhyātvā tadbrahma śāśvatam || 19 ||
[Analyze grammar]

dyāṃ tvamālikhya ityeva proktvā maṃtraṃ ca yājuṣam ||
prākṣipacchāṃtikaṃ toyaṃ tasya mūrdhani satvaram || 20 ||
[Analyze grammar]

tataḥ sa patite toye staṃbhaḥ pallavaśobhitaḥ |
tatkṣaṇādeva saṃjajñe phala puṣpairvirājitaḥ || 21 ||
[Analyze grammar]

taṃ dṛṣṭvā pārthivaḥ so'tha vismayotphullalocanaḥ |
paścāttāpaṃ vidhāyātha vākyametaduvāca ha || 22 ||
[Analyze grammar]

abhiṣekaṃ dvijaśreṣṭha mamāpi tvaṃ prayaccha bhoḥ |
anenaiva tu mantreṇa śucitvaṃ me vyavasthitam || 23 ||
[Analyze grammar]

yājñavalkya uvāca |
mamābhiṣekadānasya tvamanarho'si pārthiva |
tasmādyāsyāmyahaṃ sadyo yatrasthaḥ sa gururmama || 24 ||
[Analyze grammar]

rājovāca |
tava dāsyāmi vastrāṇi vāhanāni vasūni ca |
tasmādyacchābhiṣekaṃ me mantreṇā'nena sāṃpratam || 25 ||
[Analyze grammar]

yājñavalkya uvāca |
na homāṃtaṃ vinā mantraḥ sphurate pārthivottama |
abhiṣekavidhau prokto yaḥ pūrvaṃ padmayoninā |
tasmānnāhaṃ kariṣyāmi tava yadvai hṛdi sthitam || 26 ||
[Analyze grammar]

ityuktvā vacanaṃ bhūpaṃ yājñavalkyaḥ sa vai dvijaḥ |
jagāma svagṛhaṃ tūrṇaṃ nispṛhatvaṃ samāśritaḥ || 27 ||
[Analyze grammar]

apare'hni samāyātaṃ śākalyamatha bhūpatiḥ |
provāca prāṃjalirbhūtvā vinayāvanataḥ sthitaḥ || 28 ||
[Analyze grammar]

yastvayā preṣitaḥ kalya śiṣyo brāhmaṇasattamaḥ |
śāṃtyarthaṃ preṣaṇīyaśca bhūyo'pyevaṃ gṛhe mama || 29 ||
[Analyze grammar]

bāḍhamityeva sa proktvā tato gatvā nijālayam |
yājñavalkyaṃ samāhūya tataḥ provāca sādaram || 30 ||
[Analyze grammar]

adyāpi tvaṃ nareṃdrasya śāṃtyarthaṃ bhavane vraja |
viśeṣātpārthiveṃdreṇa samāhūto'si putraka || 31 ||
[Analyze grammar]

yājñavalkya uvāca |
nāhaṃ tāta gamiṣyāmi śāṃtyarthaṃ tasya maṃdire |
avalepena yuktasya śuddhyā virahitasya ca || 32 ||
[Analyze grammar]

mayā tasyābhiṣekārthaṃ salilaṃ codyataṃ ca yat |
salilaṃ tena tatkāṣṭhe samādiṣṭaṃ kubuddhinā || 33 ||
[Analyze grammar]

tato mayāpi tatraiva tatkṣaṇātsalilaṃ ca yat |
tasminkāṣṭhe parikṣiptaṃ nītaṃ vṛddhiṃ ca tatkṣaṇāt || 34 ||
[Analyze grammar]

śākalya uvāca |
ata eva viśeṣeṇa samāhūto'si putraka |
tasmāttatra drutaṃ gaccha nāvajñeyā mahībhujaḥ || 35 ||
[Analyze grammar]

apamānādbhavenmānaṃ pārthivānāmasaṃśayam |
yaḥ karoti punastatra mānaṃ na sa bhavetpriyaḥ || 36 ||
[Analyze grammar]

kopaprasāda vastūni vicinvaṃtīha ye sadā |
ārohaṃti śanairbhṛtyā dhunvaṃtamapi pārthivam || 37 ||
[Analyze grammar]

samau mānāpamānau ca cittajñaḥ kālavittathā |
sarvaṃsahaḥ kṣamī vijñaḥ sa bhavedrājavallabhaḥ || 38 ||
[Analyze grammar]

apamānamanādṛtya tasmādgaccha nṛpālayam |
mamājñāpi na laṃghyā ta eṣa dharmaḥ sanātanaḥ || 39 ||
[Analyze grammar]

yājñavalkya uvāca |
ājñābhaṃgo dhruvaṃ bhāvī paripāṭīvyatikramāt |
karoṣi yadi śiṣyāṇāṃ ye tvayā tatra yojitāḥ || 40 ||
[Analyze grammar]

tasmādyadi balānmāṃ tvaṃ yojayiṣyasi taṃ prati |
tvāṃ tyaktvā'nyatra yāsyāmi yataḥ proktaṃ maharṣibhiḥ || 41 ||
[Analyze grammar]

gurorapyavaliptasya kāryākāryamajānataḥ |
utpathe vartamānasya parityāgo vidhīyate || 42 ||
[Analyze grammar]

sūta uvāca |
tasya tadvacanaṃ śrutvā śākalyaḥ krodhamūrchitaḥ |
tataḥ provāca taṃ bhūyo bhartsamāno muhurmuhuḥ || 43 ||
[Analyze grammar]

ekamapyakṣaraṃ yatra guruḥ śiṣye nivedayet |
pṛthivyāṃ nāsti taddravyaṃ yaddattvā hyanṛṇī bhavet || 44 ||
[Analyze grammar]

tasmādgaccha drutaṃ dattvā madadhyayanamālayam |
tyaktvā vidyāṃ mayā dattāṃ no cecchapsyāmyahaṃ tava || 45 ||
[Analyze grammar]

evamuktvābhimaṃtryātha nādabiṃdusamudbhavaiḥ |
maṃtrairātharvaṇaistoyaṃ pānārthaṃ cārpayattataḥ || 46 ||
[Analyze grammar]

so'pibattatkṣaṇāttoyaṃ tatpītvā vyākuleṃdriyaḥ |
udgiradvāṃtidharmeṇa tattvavidyāvimiśritam || 47 ||
[Analyze grammar]

tataḥ provāca taṃ bhūyaḥ śākalyaṃ kupitānanaḥ |
ekamapyakṣaraṃ nāsti tāvakīyaṃ mamodare || 48 ||
[Analyze grammar]

tasmācchiṣyo'smi te nāhaṃ na ca me tvaṃ guruḥ sthitaḥ |
sāṃprataṃ svecchayā'nyatra prayāsyāmi karoṣi kim || 49 ||
[Analyze grammar]

evamuktvā'tha nirgatya tasmātsthānācciraṃtanāt |
papraccha mānavānbhūyaḥ siddhikṣetrāṇi cāsakṛt || 50 ||
[Analyze grammar]

tatastasya samādiṣṭaṃ kṣetrametanmanīṣibhiḥ |
siddhidaṃ sarvajaṃtūnāṃ na vṛthā syātkathaṃcana || 51 ||
[Analyze grammar]

āstāṃ tāvattapastaptvā vrataṃ niyamameva vā |
hāṭakeśvaraje kṣetre siddhiḥ saṃvasato'pi ca || 52 ||
[Analyze grammar]

yenayena ca bhāvena tatra kṣetre vasejjanaḥ |
tasyānurūpiṇī siddhiḥ śubhā syādyadi vā'śubhā || 53 ||
[Analyze grammar]

tacchrutvā ca drutaṃ prāpya kṣetrametaddvijottamāḥ |
bhānumārādhayāmāsa sthāpayitvā tataḥ param || 54 ||
[Analyze grammar]

niyato niyatāhāro brahmacaryaparāyaṇaḥ |
gāyatraṃ nyāsamāsādya nirvikalpena cetasā || 55 ||
[Analyze grammar]

tataśca bhagavāṃstuṣṭo varṣāṃte tamuvāca saḥ |
darśane tasya saṃsthitvā tejaḥ saṃyamya dāruṇam || 56 ||
[Analyze grammar]

yājñavalkya varaṃ brūhi yatte manasi rocate |
sarvameva pradāsyāmi nādeyaṃ vidyate tvayi || 57 ||
[Analyze grammar]

yājñavalkya uvāca |
yadi tuṣṭaḥ suraśreṣṭha vedādhyayanasaṃbhave |
gururbhava mamādyaiva mamaitadvāṃchitaṃ hṛdi || 58 ||
[Analyze grammar]

bhāskara uvāca |
ahaṃ tava kṛpāviṣṭastejaḥ saṃhṛtya tatparam |
tataścātra samāyātastena no dahyase dvija || 59 ||
[Analyze grammar]

tasmādatraiva kuṃḍe ca maṃtrānsārasvatāñchubhān |
vedoktānkṣepayiṣyāmi svayameva dvijottama || 60 ||
[Analyze grammar]

tatra snātvā śucirbhūtvā yatkiṃcidvedasaṃbhavam |
paṭhiṣyasi sakṛttatte kaṃṭhasthaṃ saṃbhaviṣyati || 61 ||
[Analyze grammar]

tattvārthaṃ prakaṭaṃ kṛtsnaṃ viditaṃ te bhaviṣyati |
matprasādānna saṃdehaḥ satyametanmayoditam || 62 ||
[Analyze grammar]

adyādi mānavaḥ prātaḥ snātvā tvatra hrade ca yaḥ |
sāvitreṇa ca sūktena māṃ dṛṣṭvā prapaṭhiṣyati |
tasmai tatsyādasaṃdigdhaṃ yattavoktaṃ mayā dvija || 63 ||
[Analyze grammar]

yājñavalkya uvāca |
evaṃ bhavatu deveśa yattvayoktaṃ vaco'khilam |
paraṃ mama vaco'nyacca tacchṛṇuṣva bravīmi te || 64 ||
[Analyze grammar]

nāhaṃ manuṣyadharmāṇamupādhyāyaṃ kathaṃcana |
kariṣyāmi jagannātha kṛpāṃ kuru mamopari || 65 ||
[Analyze grammar]

tatastasyā dadau sūryo laghimā nāma śobhanām |
vidyāṃ hi tatprabhāvāya sutuṣṭenāṃtarātmanā || 66 ||
[Analyze grammar]

tatastaṃ prāha karṇāṃte mamāśvānāṃ praviśya vai |
abhyāsaṃ kuru vidyānāṃ vedādhyayanamācara || 67 ||
[Analyze grammar]

manmukhādbrāhmaṇaśreṣṭha yadyetattava vāṃchitam |
na te syādyena doṣo'yaṃ mama raśmisamudbhavaḥ || 68 ||
[Analyze grammar]

evamuktaḥ sa tenātha vājikarṇaṃ samāśritaḥ |
laghurbhūtvā'paṭhadvedānbhāskarasya mukhāttataḥ || 69 ||
[Analyze grammar]

evaṃ siddhiṃ samāpanno yājñavalkyo dvijottamāḥ |
kṛtvopaniṣadaṃ cāru vedārthaiḥ sakalairyutam || 70 ||
[Analyze grammar]

janakāya nareṃdrāya vyākhyāya ca tataḥ param |
kātyāyanaṃ sutaṃ prāpya vedasūtrasya kārakam || 71 ||
[Analyze grammar]

tyaktvā kalevaraṃ tatra brahmadvāri vinirmite |
tattejo brahmaṇo gātre yojayāmāsa śaktitaḥ || 72 ||
[Analyze grammar]

tasya tīrthe naraḥ snātvā dṛṣṭvā taṃ ca divākaram |
nādabiṃduṃ paṭhitvā ca tadagre muktimāpnuyāt || 73 ||
[Analyze grammar]