Chapter 89

[English text for this chapter is available]

sūta uvāca |
evaṃ tatra sthite nityaṃ tasminmātṛgaṇe dvijāḥ |
bālakānāṃ kṣayo jajñe brāhmaṇānāṃ gṛhegṛhe || 1 ||
[Analyze grammar]

taruṇānāṃ viśeṣeṇa camatkārapurottare |
chidramanveṣamāṇāstā bhramaṃtyakhiladevatāḥ || 2 ||
[Analyze grammar]

tataste brāhmaṇāḥ sarve jñātvā chidrasamudbhavam |
vighātaṃ bālakānāṃ ca devatābhirvinirmitam || 3 ||
[Analyze grammar]

ambāvṛddhe samāsādya pūjayitvā prayatnataḥ |
procuśca duḥkhasantaptā vinayāvanatāḥ sthitāḥ || 4 ||
[Analyze grammar]

rakṣārthaṃ sarvaviprāṇāṃ camatkāreṇa bhūbhujā |
bhavadbhyāṃ nirmitaḥ śreṣṭhaḥ prāsādo'yaṃ manoharaḥ || 9 ||
[Analyze grammar]

hriyaṃte bālakā rātrau chidraṃ prāpya sahasraśaḥ |
yuṣmadīyābhiretābhirdevatābhiḥ samantataḥ || 6 ||
[Analyze grammar]

prasādaḥ kriyatāṃ tasmādbrāhmaṇānāṃ mahātmanām |
no cetpuraṃ parityajya yāsyāmo'nyatra bhūtale || 7 ||
[Analyze grammar]

teṣāṃ tadvacanaṃ śrutvā tatoṃ'bā kṛpayānvitā |
hatvā pādaprahāreṇa bhūmiṃ cakre guhāṃ tataḥ || 8 ||
[Analyze grammar]

tasyāṃ sve pāduke nyasya tataḥ provāca devatāḥ |
sarvāstā natasarvāṃgīrvinayena samanvitāḥ || 9 ||
[Analyze grammar]

ime matpāduke divye guhāmadhyagate sadā |
sarvābhiḥ sevanīye ca na gantavyaṃ bahiḥ kvacit || 10 ||
[Analyze grammar]

yā kācillaulyamāsthāya niṣkramiṣyati mohataḥ |
sā divyabhāvanirmuktā śṛgālī saṃbhaviṣyati || 11 ||
[Analyze grammar]

devatā ūcuḥ |
atra sthāne mahādevi ko'smākaṃ prakariṣyati |
pūjāṃ ko vātra cāhārastasmādbrūhi sureśvari || 12 ||
[Analyze grammar]

ambovāca |
atrāgatya vinirmuktā yogino dhyānacintakāḥ |
pūjāṃ samyakkariṣyaṃti sarvāsāṃ bhaktisaṃyutāḥ || 13 ||
[Analyze grammar]

pāduke me prapūjyādau māṃsa madyādibhiḥ kramāt |
avāpsyaṃti ca saṃsiddhiṃ durlabhāmamarairapi || 14 ||
[Analyze grammar]

tatastatheti tāḥ procya guhāmadhye vyavasthitāḥ |
parivārya śubhe tasyāḥ pāduke mokṣadāyike || 15 ||
[Analyze grammar]

tatastatra samāgatya puruṣā api dūrataḥ |
prapūjya pāduke samyaṅmātṝstāśca tataḥ param |
prayāṃti ca parāṃ siddhiṃ janma mṛtyuvivarjitām || 16 ||
[Analyze grammar]

etasminnaṃtare naṣṭā agniṣṭomādikāḥ kriyāḥ |
tīrthayātrāvratānyeva saṃyamā niyamāśca ye || 17 ||
[Analyze grammar]

ye cāpi brāhmaṇāḥ śāṃtāḥ sadā madyasya dūṣaṇam |
prakurvaṃti svahastena te'pi madyaiḥ pṛthagvidhaiḥ || 18 ||
[Analyze grammar]

tarpayaṃti tathā māṃsaistyaktāśeṣamakhakriyāḥ |
pāduke mātṛbhirjuṣṭe tathā dhūpānulepanaiḥ || 19 ||
[Analyze grammar]

etasminnaṃtare bhītāḥ sarve devāḥ savāsavāḥ |
dṛṣṭvā yajñakriyocchedaṃ kṣutpipāsā samākulāḥ || 20 ||
[Analyze grammar]

procurmaheśvaraṃ gatvā vinayāvanatāḥ sthitāḥ |
stutvā pṛthagvidhaiḥ sūktairvedoktaiḥ śatarudriyaiḥ || 21 ||
[Analyze grammar]

devā ūcuḥ |
hāṭakeśvaraje kṣetre pāduke tatra saṃsthite |
aṃbāyā mātṛbhiḥ sārdhaṃ guhāmadhye suguptake || 22 ||
[Analyze grammar]

brāhmaṇā apideveśa madyamāṃsena bhaktitaḥ |
tābhyāṃ pūjāṃ prakurvaṃti prayāṃti paramāṃ gatim || 23 ||
[Analyze grammar]

naṣṭā dharmakriyā sarvā martyaloketra sāṃpratam |
asmākaṃ saṃkṣayo jāto yajñabhāgaṃ vinā prabho || 24 ||
[Analyze grammar]

tasmāttvaṃ kuru deveśa yathā syātpādukākṣayaḥ |
prabhavaṃti makhā bhūmāvasmākaṃ syuḥ parā mudaḥ || 25 ||
[Analyze grammar]

śrībhagavānuvāca |
yā sā aṃbeti vikhyātā śaktiḥ sā parameśvarī |
jaganmātā'kṣayā sākṣānmamā pi jananī ca sā || 26 ||
[Analyze grammar]

tatkathaṃ saṃkṣayastasyāḥ kartuṃ kenāpi śakyate |
manasāpi mahābhāgāḥ pādukānāṃ viśeṣataḥ || 27 ||
[Analyze grammar]

paraṃ tatra kariṣyāmi sukhopāyaṃ sureśvarāḥ |
yuṣmabhyaṃ pādukāyāṃ ca mahattvaṃ yena jāyate || 28 ||
[Analyze grammar]

evamuktvā tato dhyānaṃ cakre devo maheśvaraḥ |
vyāvṛtyakamalaṃ hṛtsthamaṣṭapatraṃ sakarṇikam || 29 ||
[Analyze grammar]

tasyāṃtargatamāsīnamaṃguṣṭhāgramitaṃ śubham |
dvādaśārkaprabhaṃ sūkṣmaṃ svamātmānaṃ vyalokayat || 30 ||
[Analyze grammar]

tasyaivaṃ dhyāyamānasya tṛtīyanayanāttataḥ |
śvetāṃbaradharā śubhrā nirgatā kanyakā śubhā || 31 ||
[Analyze grammar]

atha sā prāha taṃ devaṃ praṇipatya maheśvaram |
kimarthaṃ deva sṛṣṭāsmi mamādeśaḥ pradīyatām || 32 ||
[Analyze grammar]

śrībhagavānuvāca |
hāṭakeśvaraje kṣetre pāduke saṃsthite śubhe |
śrīmāturjagatāṃ mukhye tābhyāṃ pūjāṃ tvamācara || 33 ||
[Analyze grammar]

kanyakāṃ saṃparityajya tavānvayavivarddhitām |
yaḥ kariṣyati tatpūjāmāhāraḥ syātsa mātṛṣu || 34 ||
[Analyze grammar]

kaumārabrahmacaryyeṇa tvayāpi ca subhaktitaḥ |
tābhyāṃ pūjā prakartavyā no cennāśamavāpsyasi || 35 ||
[Analyze grammar]

tava pūjā kariṣyanti ye narā bhaktitatparāḥ |
mātṝṇāṃ saṃmatāste syuḥ sarvadaiva sukhānvitāḥ || 36 ||
[Analyze grammar]

evamuktvā tatastasyā maṃtramārgaṃ yathocitam |
pūjāmārgaṃ viśeṣeṇa kathayāmāsa vistarāt || 37 ||
[Analyze grammar]

tato visarjayāmāsa dattvā chatrādibhūṣaṇam |
pratipattiṃ mahādevastāṃśca sarvānsureśvarān || 38 ||
[Analyze grammar]

kumāryuvāca |
tvayetatkathitaṃ deva tvadanvayasamudbhavāḥ |
kanyakāḥ pūjayiṣyaṃti pāduke te suśobhane || 39 ||
[Analyze grammar]

kaumārabrahmacaryyeṇa bhaviṣyatyanvayaḥ katham |
etanme vistarātsarvaṃ yathāvadvaktumarhasi || 40 ||
[Analyze grammar]

śrībhagavānuvāca |
yasyāyasyāḥ prasannā tvaṃ kanyakāyā vadiṣyasi |
maṃtragrāmamimaṃ samyaktvadbhāvā sā bhaviṣyati || 41 ||
[Analyze grammar]

evaṃ cānyā mahābhāge pāraṃparyeṇa kanyakāḥ |
tava vaṃśodbhavāḥ sarvāḥ prabhaviṣyaṃti maṃtrataḥ || 42 ||
[Analyze grammar]

tataḥ sā tāṃ samāsādya pādukāsaṃbhavāṃ guhām |
pūjāṃ cakre yathānyāyaṃ yathoktaṃ tripurāriṇā || 43 ||
[Analyze grammar]

sūta uvāca |
tadanvayasamutthāyāḥ kanyakāyāḥ kareṇa yaḥ |
pādukābhyāṃ naraḥ pūjāṃ prakaroti samāhitaḥ |
iha loke sukhaṃ prāpya sa syātpretya sukhānvitaḥ || 44 ||
[Analyze grammar]

tasmātsarvaprayatnena kanyāhastena pāduke |
pūjanīye viśeṣeṇa pūjyā sā cāpi kanyakā || 45 ||
[Analyze grammar]

vāṃchadbhiḥ śāśvataṃ saukhyamiha loke paratra ca |
mānavairbhaktisaṃyuktairityuvāca maheśvaraḥ || 46 ||
[Analyze grammar]

etadvaḥ sarvamākhyātaṃ māhātmyaṃ pādukodbhavam |
śrīmāturanuṣaṃgeṇa aṃbādevyā dvijottamāḥ || 47 ||
[Analyze grammar]

yaścaitacchṛṇuyādbhaktyā caturdaśyāṃ samāhitaḥ |
tathāṣṭamyāṃ viśeṣeṇa sa prāpnoti paraṃ padam || 48 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye śrīmātuḥ pādukāmāhātmavarṇanaṃnāmaikonanavatitamo'dhyāyaḥ || 89 ||
[Analyze grammar]