Chapter 88

[English text for this chapter is available]

ṛṣaya ūcuḥ |
yāstvayā devatāḥ proktāścatasraḥ sūtanaṃdana |
camatkārī mahitthā ca mahālakṣmīstathā'parā || 1 ||
[Analyze grammar]

aṃbāvṛddhā caturthī ca tāsāṃ tisraḥ prakīrtitāḥ |
vistareṇa caturthī ca aṃbāvṛddhā na kīrtitā || 2 ||
[Analyze grammar]

etasyāḥ sarvamācakṣva prabhāvaṃ sūtasaṃbhava |
kenaiṣā nirmitā yātrā sarvaṃ vistarato vada || 3 ||
[Analyze grammar]

sūta uvāca |
eṣā tapomayī śaktirambāvṛddhā sureśvarī |
yathātra saṃsthitā pūrvaṃ tatsarvaṃ śrūyatāṃ mama || 4 ||
[Analyze grammar]

camatkāramahīpena purametadyadā kṛtam |
tadā tadrakṣaṇārthāya nirmitā bhāvitātmanā |
catasro devatā hyetāḥ saṃmatena dvijanmanām || 5 ||
[Analyze grammar]

atha tasya mahīpasya aṃbānāmābhavatsutā |
tathānyā vṛddhasaṃjñā ca rūpaudāryaguṇānvite || 6 ||
[Analyze grammar]

ubhe te kāśirājena pariṇīte dvijottamāḥ |
gṛhyoktena vidhānena devaviprāgnisaṃnidhau || 7 ||
[Analyze grammar]

kasyacittvatha kālasya kāśirājasya bhūpateḥ |
taiḥ kālayavanaiḥ sārdhamabhavatsaṃgaro mahān || 8 ||
[Analyze grammar]

atha tairnihataḥ saṃkhye sabhṛtyabalavāhanaḥ |
haralabdhavarai raudraiḥ kāśirājaḥ pratāpavān || 9 ||
[Analyze grammar]

athāṃbā caiva vṛddhā ca vaidhavyaṃ prāpya duḥkhadam |
hāṭakeśvarajaṃ kṣetraṃ gatvā te vāṃchitapradam || 10 ||
[Analyze grammar]

devyā ārādhane yatnaṃ kṛtavatyau tataḥ param |
nāśārthaṃ patiśatrūṇāṃ dhṛtavatyau śubhavratam || 11 ||
[Analyze grammar]

yāvadvarṣaśataṃ sāgraṃ na ca tuṣṭā sureśvarī |
tato vairāgyamāsādya vāṃchaṃtyau svatanukṣayam || 12 ||
[Analyze grammar]

maṃtrairātharvaṇairviprāḥ kṣurikāsūktasaṃbhavaiḥ |
chittvācchittvā svamāṃsāni maṃtrapūtāni bhaktitaḥ || 13 ||
[Analyze grammar]

kṛtavatyau tato homaṃ susamiddhe hutāśane |
agnikuṇḍāttatastasmāścaturhastā śubhānanā || 14 ||
[Analyze grammar]

śvetavastrā viniṣkrāṃtā nārī bālārkasavribhā |
tathānyā ca sunetrāsyā taptahāṭakasannibhā || 15 ||
[Analyze grammar]

tasmātkuṇḍādviniṣkrāṃtā dhṛtakhaḍgā bhayāvahā |
sā'parāpi tathārūpā śaktiḥ paramadāruṇā || 16 ||
[Analyze grammar]

procatuste varaṃ hṛtsthaṃ prārthyatāmiti durlabham || 17 ||
[Analyze grammar]

te ūcatuḥ |
asmākaṃ dayito bharttā kāśirājaḥ pratāpavān |
nihataḥ saṃgare kruddhairyavanaiḥ kālapūrvakaiḥ || 18 ||
[Analyze grammar]

yuṣmadīya prasādena yathā teṣāṃ parikṣayaḥ |
sañjāyate mahādevyau tathā kāryamasaṃśayam || 19 ||
[Analyze grammar]

sthātavyaṃ ca tathātraiva ubhābhyāmapi sādaram |
svapurasya prarakṣārthametatkṛtyaṃ mataṃ hi nau || 20 ||
[Analyze grammar]

tayostadvacanaṃ śrutvā ubhe te devate tataḥ |
saṃprocya bāḍhamityevaṃ tasminkuṇḍe vyavasthite || 21 ||
[Analyze grammar]

etasminnaṃtare tasmātkuṇḍācchatasahasraśaḥ |
niṣkrāṃtāḥ saṃkhyayā hīnā mātaro naikarūpikāḥ || 22 ||
[Analyze grammar]

ekā gajamukhī tatra tathānyā turagānanā |
sārameya mukhāścānyāḥ pakṣicchāgamukhāḥ parāḥ || 23 ||
[Analyze grammar]

tiryañca vapuṣaścānyā vaktrairmānuṣasaṃbhavaiḥ |
triśīrṣāḥ pañcaśīrṣāśca daśaśīrṣāstathā parāḥ || 24 ||
[Analyze grammar]

guhya sthānasthitairvaktrairekāścānyā hṛdisthitaiḥ |
pārśvasaṃsthaiḥ sthitāścānyā anyāḥ pṛṣṭhigatairmukhaiḥ || 25 ||
[Analyze grammar]

ekahastā dvihastāśca pañcahastāstathāparāḥ |
anyā viṃśatihastāśca vihastāśca tathāparāḥ || 26 ||
[Analyze grammar]

bahupādā vipādāśca ekapādāstathāparāḥ |
tathānyāścārdhapādāśca adhovaktrā vibhīṣaṇāḥ || 27 ||
[Analyze grammar]

ekanetrā dvinetrāśca trinetrāśca tathāparāḥ |
kāścidgajasamārūḍhā hayārūḍhāstathāparāḥ || 28 ||
[Analyze grammar]

vṛṣavānarasiṃhājavyāghrasarpāsthitāḥ parāḥ |
godhāśvarāsabhārūḍhāstathā ca vihagāśritāḥ || 29 ||
[Analyze grammar]

kūrmakukkuṭasarpādisamārūḍhāḥ sahasraśaḥ |
prakurvaṃtyo rudantyaśca gāyantyaśca tathā parāḥ |
nṛtyaṃtyaśca hasaṃtyaśca krīḍāsaktāḥ parasparam || 30 ||
[Analyze grammar]

ūrdhvakeśā vikeśāśca gātrakeśāśca bhūriśaḥ |
laṃbakeśā vikeśāśca vājikeśāstathaiva ca || 3 ||
[Analyze grammar]

hrasvadantyo vidaṃtyaśca dīrghadantyo vibhīṣaṇāḥ |
gajadaṃtyastathaivānyā lohadaṃtyobhayāvahāḥ || 32 ||
[Analyze grammar]

laṃbakarṇyo vikarṇyaśca śūrpakarṇyastathā parāḥ |
śaṃkukarṇyaḥ kukarṇyaśca bahukarṇyaḥ sukarṇikāḥ || 33 ||
[Analyze grammar]

ekavastrā vivastrāśca bahuvastrāstathā parāḥ |
carmaprāvaraṇāścaiva kathāprāvaraṇānvitāḥ || 34 ||
[Analyze grammar]

khaṅgahastāḥ śarāhastāḥ kuṃtahastāśca bhīṣaṇāḥ |
pāśahastāstathaivānyāḥ prāsacāpakarāḥ parāḥ |
śūlamudgarahastāśca bhuśuṃḍikarabhūṣitāḥ || 35 ||
[Analyze grammar]

atha tābhyāṃ tathā'karṇya tāḥ sarvā harṣasaṃyutāḥ |
prasthitāstatra tā yatra te kālayavanāḥ sthitāḥ || 36 ||
[Analyze grammar]

tataste tatsamālokya balaṃ devīsamudravam |
raudra rūpadharaṃ tīvraṃ vikṛtaṃ vikṛtairmukhaiḥ || 37 ||
[Analyze grammar]

viṣaṇṇavadanāḥ sarve bhayabhītā samaṃtataḥ |
dhāvato bhakṣitāstābhirdevatābhiḥ sunirdayam || 38 ||
[Analyze grammar]

bālavṛddhasamopetaṃ teṣāṃ rāṣṭraṃ durātmanām |
strībhiśca sahitaṃ tābhirdevatābhiḥ prabhakṣitam || 39 ||
[Analyze grammar]

evaṃ nirvāsya tadrāṣṭraṃ sarvāstā harṣasaṃyutāḥ |
bhūya eva nijaṃ sthānaṃ saṃprāptā dvijasattamāḥ || 40 ||
[Analyze grammar]

tataḥ procuḥ praṇamyoccaistābhyāṃ vinayapūrvakam |
hatāste yavanāḥ kṛṣṇāḥ saputrapaśubāṃdhavāḥ || 4 ||
[Analyze grammar]

udvāsitastathā sarvo deśasteṣāṃ sa vai mahān |
sāṃprataṃ dīyatāṃ kaścidāhārastṛptihetave |
nivāsāya tataḥ sthānaṃ kiṃciccāvedyatāṃ hi naḥ || 42 ||
[Analyze grammar]

devyāvūcatuḥ |
martyaloke'tra yā nāryo garbhavatyaḥ svapaṃti ca |
saṃdhyākālaprakāśe ca tāsāṃ garbho'stu vo drutam || 43 ||
[Analyze grammar]

rudaṃtyo yā viniryāṃti catvareṣu trikeṣu ca |
tāsāṃ garbhastu yuṣmākaṃ saṃpradattaḥ prabhujyatām || 44 ||
[Analyze grammar]

ucchiṣṭā yāḥ prasarpaṃti ramante ca svapaṃti ca |
tāsāṃ garbhaḥ samastānāṃ yuṣmākaṃ bhoja nāya vai || 45 ||
[Analyze grammar]

sūtikābhavane yasminnucchiṣṭaṃ copajāyate |
sa bālakastu yuṣmākaṃ bhojanāya prakalpitaḥ || 46 ||
[Analyze grammar]

na ṣaṣṭhījāgaro yasya bālakasya bhaviṣyati |
sa bhaviṣyati bhojyāya yuṣmākaṃ nātra saṃśayaḥ || 47 ||
[Analyze grammar]

nāśaṃ yāsyati vā yatra pāvakaḥ sūtikāgṛhe |
sa bhaviṣyati bhojyāya yuṣmākaṃ bālarūpadhṛk || 48 ||
[Analyze grammar]

māṃgalyaiḥ saṃparityaktaṃ yadbhavetsūtikāgṛham |
tasminyastiṣṭhate bālaḥ sa yuṣmākaṃ prakalpitaḥ || 49 ||
[Analyze grammar]

saṃdhyāyāṃ bālakā ye vā svapaṃtyākāśadeśagāḥ |
te sarve bhojanārthāya yuṣmākaṃ saṃniveditāḥ || 50 ||
[Analyze grammar]

yasya janmadine prāpte varṣāṃte kriyate na ca |
māṃgalyaṃ tasya yadgātraṃ tadyuṣmākaṃ prakalpitam || 51 ||
[Analyze grammar]

tailābhyaṃgaṃ naraḥ kṛtvā yaśca snānaṃ karoti na |
sa datto bhojanārthāya yuṣmākaṃ nātra saṃśayaḥ || 52 ||
[Analyze grammar]

ucchiṣṭo yaḥ pumāṃstiṣṭhedyo vā catvaramadhyagaḥ |
bhakṣaṇīyaḥ sa sarvābhirnirvikalpena cetasā || 53 ||
[Analyze grammar]

rajasvalāṃ vrajedyo vā puruṣaḥ kāmamohitaḥ |
nagnaḥ śete tathā snāti bhakṣaṇīyaḥ sa satvaram || 54 ||
[Analyze grammar]

dakṣiṇābhimukho rātrau yaśca snāti vimūḍhadhīḥ |
śete ca śayane so'pi bhakṣaṇīyaśca satvaram || 55 ||
[Analyze grammar]

udaṅmukhaśca yo rātrau divā vā dakṣiṇāmukhaḥ |
mūtrotsargaṃ purīṣa vā prakuryādbhakṣya eva saḥ || 56 ||
[Analyze grammar]

yaḥ kuryādrajanīvaktre dadhisaktuprabhakṣaṇam |
aṃtyajābhigamaṃ cātha bhakṣaṇīyo drutaṃ hi saḥ || 57 ||
[Analyze grammar]

sūta uvāca |
evaṃ tābhyāṃ tadā proktā devatāstāḥ samaṃtataḥ |
parivārya tadā tasthuḥ saṃprahṛṣṭena cetasā || 58 ||
[Analyze grammar]

etasminnaṃtare rājā camatkāraḥ pratāpavān |
prāsādaṃ nirmame tābhyāṃ kailāsaśikharopamam || 59 ||
[Analyze grammar]

tataḥ prabhṛti te khyāte kṣetre tatra mahodaye |
aṃbāvṛddhābhidhāne ca purarakṣāpare sadā || 60 ||
[Analyze grammar]

yaḥ pumānprātarutthāya tābhyāṃ paśyati cānanam |
tasya saṃvatsaraṃyāvanna ca cchidraṃ prajāyate || 61 ||
[Analyze grammar]

vṛddhyādau vātha cāṃte vā tābhyāṃ pūjāṃ karoti yaḥ |
na tasya jāyate cchidraṃ kathaṃcidapi bhūtale || 62 ||
[Analyze grammar]

yātrākāle pumānyaśca tābhyāṃ pūjāṃ samācaret |
sa vāṃchitaphalaṃ prāpya śīghraṃ svagṛhamāpnuyāt || 63 ||
[Analyze grammar]

sadāṣṭamyāṃ caturdaśyāṃ yastābhyāṃ balimāharet |
sa kāmānāpnuyādiṣṭāniha pretya ca sadgatim || 64 ||
[Analyze grammar]

yo mahānavamīsaṃjñe divase śraddhayānvitaḥ |
tābhyāṃ samācaretpūjāṃ sa sadā syādakaṇṭakī || 65 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmyeṃ'bāvṛddhāmāhātmyavarṇanaṃnāmāṣṭāśītitamo'dhyāyaḥ || 88 ||
[Analyze grammar]